৭. গুত্তাথেৰীগাথাৱণ্ণনা

গুত্তে যদত্থং পব্বজ্জাতিআদিকা গুত্তায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী অনুক্কমেন সম্ভতৱিমোক্খসম্ভাৰা হুত্ৱা, পৰিপক্ককুসলমূলা সুগতীসুযেৱ সংসৰন্তী ইমস্মিং বুদ্ধুপ্পাদে সাৱত্থিযং ব্ৰাহ্মণকুলে নিব্বত্তা, গুত্তাতিস্সা নামং অহোসি. সা ৱিঞ্ঞুতং পত্ৱা উপনিস্সযসম্পত্তিযা চোদিযমানা ঘৰাৱাসং জিগুচ্ছন্তী মাতাপিতৰো অনুজানাপেত্ৱা মহাপজাপতিগোতমিযা সন্তিকে পব্বজি. পব্বজিত্ৱা চ ৱিপস্সনং পট্ঠপেত্ৱা ভাৱনং অনুযুঞ্জন্তিযা তস্সা চিত্তং চিৰকালপৰিচযেন বহিদ্ধাৰম্মণে ৱিধাৱতি, একগ্গং নাহোসি. সত্থা দিস্ৱা তং অনুগ্গণ্হন্তো, গন্ধকুটিযং যথানিসিন্নোৱ ওভাসং ফৰিত্ৱা তস্সা আসন্নে আকাসে নিসিন্নং ৱিয অত্তানং দস্সেত্ৱা ওৱদন্তো –

১৬৩. ‘‘গুত্তে যদত্থং পব্বজ্জা, হিত্ৱা পুত্তং ৱসুং পিযং;

তমেৱ অনুব্ৰূহেহি, মা চিত্তস্স ৱসং গমি.

১৬৪. ‘‘চিত্তেন ৱঞ্চিতা সত্তা, মাৰস্স ৱিসযে ৰতা;

অনেকজাতিসংসাৰং, সন্ধাৱন্তি অৱিদ্দসূ.

১৬৫. ‘‘কামাচ্ছন্দঞ্চ ব্যাপাদং, সক্কাযদিট্ঠিমেৱ চ;

সীলব্বতপৰামাসং, ৱিচিকিচ্ছং চ পঞ্চমং.

১৬৬. ‘‘সংযোজনানি এতানি, পজহিত্ৱান ভিক্খুনী;

ওৰম্ভাগমনীযানি, নযিদং পুনৰেহিসি.

১৬৭. ‘‘ৰাগং মানং অৱিজ্জঞ্চ, উদ্ধচ্চঞ্চ ৱিৱজ্জিয;

সংযোজনানি ছেত্ৱান, দুক্খস্সন্তং কৰিস্সসি.

১৬৮. ‘‘খেপেত্ৱা জাতিসংসাৰং, পৰিঞ্ঞায পুনব্ভৱং;

দিট্ঠেৱ ধম্মে নিচ্ছাতা, উপসন্তা চৰিস্সসী’’তি. – ইমা গাথা আভাসি;

তত্থ তমেৱ অনুব্ৰূহেহীতি যদত্থং যস্স কিলেসপৰিনিব্বানস্স খন্ধপৰিনিব্বানস্স চ অত্থায. হিত্ৱা পুত্তং ৱসুং পিযন্তি পিযাযিতব্বং ঞাতিপৰিৱট্টং ভোগক্খন্ধঞ্চ হিত্ৱা মম সাসনে পব্বজ্জা ব্ৰহ্মচৰিযৱাসো ইচ্ছিতো, তমেৱ ৱড্ঢেয্যাসি সম্পাদেয্যাসি. মা চিত্তস্স ৱসং গমীতি দীঘৰত্তং ৰূপাদিআৰম্মণৱসেন ৱড্ঢিতস্স কূটচিত্তস্স ৱসং মা গচ্ছি.

যস্মা চিত্তং নামেতং মাযূপমং, যেন ৱঞ্চিতা অন্ধপুথুজ্জনা মাৰৱসানুগা সংসাৰং নাতিৱত্তন্তি. তেন ৱুত্তং ‘‘চিত্তেন ৱঞ্চিতা’’তিআদি.

সংযোজনানি এতানীতি এতানি ‘‘কামচ্ছন্দঞ্চ ব্যাপাদ’’ন্তিআদিনা যথাৱুত্তানি পঞ্চ বন্ধনট্ঠেন সংযোজনানি. পজহিত্ৱানাতি অনাগামিমগ্গেন সমুচ্ছিন্দিত্ৱা. ভিক্খুনীতি তস্সা আলপনং. ওৰম্ভাগমনীযানীতি ৰূপাৰূপধাতুতো হেট্ঠাভাগে কামধাতুযং মনুস্সজীৱস্স হিতানি উপকাৰানি তত্থ পটিসন্ধিযা পচ্চযভাৱতো. ম-কাৰো পদসন্ধিকৰো. ‘‘ওৰমাগমনীযানী’’তি পাড়ি, সো এৱত্থো. নযিদং পুনৰেহিসীতি ওৰম্ভাগিযানং সংযোজনানং পহানেন ইদং কামট্ঠানং কামভৱং পটিসন্ধিৱসেন পুন নাগমিস্সসি. ৰ-কাৰো পদসন্ধিকৰো. ‘‘ইত্থ’’ন্তি ৱা পাড়ি, ইত্থত্তং কামভৱমিচ্চেৱ অত্থো.

ৰাগন্তি ৰূপৰাগঞ্চ অৰূপৰাগঞ্চ. মানন্তি অগ্গমগ্গৱজ্ঝং মানং. অৱিজ্জঞ্চ উদ্ধচ্চঞ্চাতি এত্থাপি এসেৱ নযো. ৱিৱজ্জিযাতি ৱিপস্সনায ৱিক্খম্ভেত্ৱা. সংযোজনানি ছেত্ৱানাতি এতানি ৰূপৰাগাদীনি পঞ্চুদ্ধম্ভাগিযানি সংযোজনানি অৰহত্তমগ্গেন সমুচ্ছিন্দিত্ৱা. দুক্খস্সন্তং কৰিস্সসীতি সব্বস্সাপি ৱট্টদুক্খস্স পৰিযন্তং পৰিযোসানং পাপুণিস্সসি.

খেপেত্ৱা জাতিসংসাৰন্তি জাতি সমূলিকসংসাৰপৱত্তিং পৰিযোসাপেত্ৱা. নিচ্ছাতাতি নিত্তণ্হা. উপসন্তাতি সব্বসো কিলেসানং ৱূপসমেন উপসন্তা. সেসং ৱুত্তনযমেৱ.

এৱং সত্থাৰা ইমাসু গাথাসু ভাসিতাসু গাথাপৰিযোসানে থেৰী সহ পটিসম্ভিদাহি অৰহত্তং পত্ৱা উদানৱসেন ভগৱতা ভাসিতনিযামেনেৱ ইমা গাথা অভাসি. তেনেৱ তা থেৰিযা গাথা নাম জাতা.

গুত্তাথেৰীগাথাৱণ্ণনা নিট্ঠিতা.