৫. অনোপমাথেৰীগাথাৱণ্ণনা

উচ্চে কুলেতিআদিকা অনোপমায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী অনুক্কমেন ৱিমুত্তিপৰিপাচনীযে ধম্মে পৰিব্ৰূহিত্ৱা ইমস্মিং বুদ্ধুপ্পাদে সাকেতনগৰে মজ্ঝস্স নাম সেট্ঠিনো ধীতা হুত্ৱা নিব্বত্তি. তস্সা ৰূপসম্পত্তিযা অনোপমাতি নামং অহোসি. তস্সা ৱযপ্পত্তকালে বহূ সেট্ঠিপুত্তা ৰাজমহামত্তা ৰাজানো চ পিতু দূতং পাহেসুং – ‘‘অত্তনো ধীতৰং অনোপমং দেহি, ইদঞ্চিদঞ্চ তে দস্সামা’’তি. সা তং সুত্ৱা উপনিস্সযসম্পন্নতায ‘‘ঘৰাৱাসেন ময্হং অত্থো নত্থী’’তি সত্থু সন্তিকং গন্ত্ৱা ধম্মং সুত্ৱা ঞাণস্স পৰিপাকং গতত্তা দেসনানুসাৰেন ৱিপস্সনং আৰভিত্ৱা তং উস্সুক্কাপেন্তী মগ্গপটিপাটিযা ততিযফলে পতিট্ঠাসি. সা সত্থাৰং পব্বজ্জং যাচিত্ৱা সত্থুআণায ভিক্খুনুপস্সযং উপগন্ত্ৱা ভিক্খুনীনং সন্তিকে পব্বজিত্ৱা সত্তমে দিৱসে অৰহত্তং সচ্ছিকত্ৱা অত্তনো পটিপত্তিং পচ্চৱেক্খিত্ৱা উদানৱসেন –

১৫১. ‘‘উচ্চে কুলে অহং জাতা, বহুৱিত্তে মহদ্ধনে;

ৱণ্ণৰূপেন সম্পন্না, ধীতা মজ্ঝস্স অত্ৰজা.

১৫২. ‘‘পত্থিতা ৰাজপুত্তেহি, সেট্ঠিপুত্তেহি গিজ্ঝিতা;

পিতু মে পেসযী দূতং, দেথ ময্হং অনোপমং.

১৫৩. ‘‘যত্তকং তুলিতা এসা, তুয্হং ধীতা অনোপমা;

ততো অট্ঠগুণং দস্সং, হিৰঞ্ঞং ৰতনানি চ.

১৫৪. ‘‘সাহং দিস্ৱান সম্বুদ্ধং, লোকজেট্ঠং অনুত্তৰং;

তস্স পাদানি ৱন্দিত্ৱা, একমন্তং উপাৱিসিং.

১৫৫. ‘‘সো মে ধম্মমদেসেসি, অনুকম্পায গোতমো;

নিসিন্না আসনে তস্মিং, ফুসযিং ততিযং ফলং.

১৫৬. ‘‘ততো কেসানি ছেত্ৱান, পব্বজিং অনগাৰিযং;

অজ্জ মে সত্তমী ৰত্তি, যতো তণ্হা ৱিসেসিতা’’তি. –

ইমা গাথা অভাসি.

তত্থ উচ্চে কুলেতি উড়াৰতমে ৱেস্সকুলে. বহুৱিত্তেতি অলঙ্কাৰাদিপহূতৱিত্তূপকৰণে. মহদ্ধনেতি নিধানগতস্সেৱ চত্তাৰীসকোটিপৰিমাণস্স মহতো ধনস্স অত্থিভাৱেন মহদ্ধনে অহং জাতাতি যোজনা. ৱণ্ণৰূপেন সম্পন্নাতি ৱণ্ণসম্পন্না চেৱ ৰূপসম্পন্না চ, সিনিদ্ধভাসুৰায ছৱিসম্পত্তিযা ৱত্থাভৰণাদিসৰীৰাৱযৱসম্পত্তিযা চ সমন্নাগতাতি অত্থো. ধীতা মজ্ঝস্স অত্ৰজাতি মজ্ঝনামস্স সেট্ঠিনো ওৰসা ধীতা.

পত্থিতা ৰাজপুত্তেহীতি ‘‘কথং নু খো তং লভেয্যামা’’তি ৰাজকুমাৰেহি অভিপত্থিতা. সেট্ঠিপুত্তেহি গিজ্ঝিতাতি তথা সেট্ঠিকুমাৰেহিপি অভিগিজ্ঝিতা পচ্চাসীসিতা. দেথ ময্হং অনোপমন্তি ৰাজপুত্তাদযো ‘‘দেথ ময্হং অনোপমং দেথ ময্হ’’ন্তি পিতু সন্তিকে দূতং পেসযিংসু.

যত্তকং তুলিতা এসাতি ‘‘তুয্হং ধীতা অনোপমা যত্তকং ধনং অগ্ঘতী’’তি তুলিতা লক্খণঞ্ঞূহি পৰিচ্ছিন্না, ‘‘ততো অট্ঠগুণং দস্সামী’’তি পিতু মে পেসযি দূতন্তি যোজনা. সেসং হেট্ঠা ৱুত্তনযমেৱ.

অনোপমাথেৰীগাথাৱণ্ণনা নিট্ঠিতা.