৪. সুজাতাথেৰীগাথাৱণ্ণনা

অলঙ্কতা সুৱসনাতিআদিকা সুজাতায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী অনুক্কমেন সম্ভতৱিমোক্খসম্ভাৰা হুত্ৱা ইমস্মিং বুদ্ধুপ্পাদে সাকেতনগৰে সেট্ঠিকুলে নিব্বত্তিত্ৱা ৱযপ্পত্তা মাতাপিতূহি সমানজাতিকস্স সেট্ঠিপুত্তস্স দিন্না হুত্ৱা পতিকুলং গতা. তত্থ তেন সদ্ধিং সুখসংৱাসং ৱসন্তী একদিৱসং উয্যানং গন্ত্ৱা নক্খত্তকীড়ং কীড়িত্ৱা পৰিজনেন সদ্ধিং নগৰং আগচ্ছন্তী অঞ্জনৱনে সত্থাৰং দিস্ৱা পসন্নমানসা উপসঙ্কমিত্ৱা ৱন্দিত্ৱা একমন্তং নিসীদি. সত্থা তস্সা অনুপুব্বিং কথং কথেত্ৱা কল্লচিত্ততং ঞত্ৱা উপৰি সামুক্কংসিকং ধম্মদেসনং পকাসেসি. সা দেসনাৱসানে অত্তনো কতাধিকাৰতায ঞাণস্স পৰিপাকং গতত্তা চ, সত্থু চ দেসনাৱিলাসেন যথানিসিন্নাৱ সহ পটিসম্ভিদাহি অৰহত্তং পত্ৱা সত্থাৰং ৱন্দিত্ৱা গেহং গন্ত্ৱা সামিকঞ্চ মাতাপিতৰো চ অনুজানাপেত্ৱা সত্থুআণায ভিক্খুনুপস্সযং গন্ত্ৱা ভিক্খুনীনং সন্তিকে পব্বজি. পব্বজিত্ৱা চ অত্তনো পটিপত্তিং পচ্চৱেক্খিত্ৱা উদানৱসেন –

১৪৫. ‘‘অলঙ্কতা সুৱসনা, মালিনী চন্দনোক্খিতা;

সব্বাভৰণসঞ্ছন্না, দাসীগণপুৰক্খতা.

১৪৬. ‘‘অন্নং পানঞ্চ আদায, খজ্জং ভোজ্জং অনপ্পকং;

গেহতো নিক্খমিত্ৱান, উয্যানমভিহাৰযিং.

১৪৭. ‘‘তত্থ ৰমিত্ৱা কীড়িত্ৱা, আগচ্ছন্তী সকং ঘৰং;

ৱিহাৰং দট্ঠুং পাৱিসিং, সাকেতে অঞ্জনং ৱনং.

১৪৮. ‘‘দিস্ৱান লোকপজ্জোতং, ৱন্দিত্ৱান উপাৱিসিং;

সো মে ধম্মমদেসেসি, অনুকম্পায চক্খুমা.

১৪৯. ‘‘সুত্ৱা চ খো মহেসিস্স, সচ্চং সম্পটিৱিজ্ঝহং;

তত্থেৱ ৱিৰজং ধম্মং, ফুসযিং অমতং পদং.

১৫০. ‘‘ততো ৱিঞ্ঞাতসদ্ধম্মা, পব্বজিং অনগাৰিযং;

তিস্সো ৱিজ্জা অনুপ্পত্তা, অমোঘং বুদ্ধসাসন’’ন্তি. –

ইমা গাথা অভাসি.

তত্থ অলঙ্কতাতি ৱিভূসিতা. তং পন অলঙ্কতাকাৰং দস্সেতুং ‘‘সুৱসনা মালিনী চন্দনোক্খিতা’’তি ৱুত্তং. তত্থ মালিনীতি মালাধাৰিনী. চন্দনোক্খিতাতি চন্দনানুলিত্তা. সব্বাভৰণসঞ্ছন্নাতি হত্থূপগাদীহি সব্বেহি আভৰণেহি অলঙ্কাৰৱসেন সঞ্ছাদিতসৰীৰা.

অন্নং পানঞ্চ আদায, খজ্জং ভোজ্জং অনপ্পকন্তি সালিওদনাদিঅন্নং, অম্বপানাদিপানং, পিট্ঠখাদনীযাদিখজ্জং, অৱসিট্ঠং আহাৰসঙ্খাতং ভোজ্জঞ্চ পহূতং গহেত্ৱা. উয্যানমভিহাৰযিন্তি নক্খত্তকীড়াৱসেন উয্যানং উপনেসিং. অন্নপানাদিং তত্থ আনেত্ৱা সহ পৰিজনেন কীড়ন্তী ৰমন্তী পৰিচাৰেসিন্তি অধিপ্পাযো.

সাকেতে অঞ্জনং ৱনন্তি সাকেতসমীপে অঞ্জনৱনে ৱিহাৰং পাৱিসিং.

লোকপজ্জোতন্তি ঞাণপজ্জোতেন লোকস্স পজ্জোতভূতং.

ফুসযিন্তি ফুসিং, অধিগচ্ছিন্তি অত্থো. সেসং ৱুত্তনযমেৱ.

সুজাতাথেৰীগাথাৱণ্ণনা নিট্ঠিতা.