৬. মিত্তাকাড়ীথেৰীগাথাৱণ্ণনা

সদ্ধায পব্বজিত্ৱানাতিআদিকা মিত্তাকাড়িযা থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী ইমস্মিং বুদ্ধুপ্পাদে কুৰুৰট্ঠে কম্মাসধম্মনিগমে ব্ৰাহ্মণকুলে নিব্বত্তিত্ৱা ৱিঞ্ঞুতং পত্তা মহাসতিপট্ঠানদেসনায পটিলদ্ধসদ্ধা ভিক্খুনীসু পব্বজিত্ৱা সত্ত সংৱচ্ছৰানি লাভসক্কাৰগিদ্ধিকা হুত্ৱা সমণধম্মং কৰোন্তী তত্থ তত্থ ৱিচৰিত্ৱা অপৰভাগে যোনিসো উম্মুজ্জন্তী সংৱেগজাতা হুত্ৱা ৱিপস্সনং পট্ঠপেত্ৱা ন চিৰস্সেৱ সহ পটিসম্ভিদাহি অৰহত্তং পত্ৱা অত্তনো পটিপত্তিং পচ্চৱেক্খিত্ৱা উদানৱসেন –

৯২. ‘‘সদ্ধায পব্বজিত্ৱান, অগাৰস্মানগাৰিযং;

ৱিচৰিংহং তেন তেন, লাভসক্কাৰউস্সুকা.

৯৩. ‘‘ৰিঞ্চিত্ৱা পৰমং অত্থং, হীনমত্থং অসেৱিহং;

কিলেসানং ৱসং গন্ত্ৱা, সামঞ্ঞত্থং ন বুজ্ঝিহং.

৯৪. ‘‘তস্সা মে অহু সংৱেগো, নিসিন্নায ৱিহাৰকে;

উম্মগ্গপটিপন্নাম্হি, তণ্হায ৱসমাগতা.

৯৫. ‘‘অপ্পকং জীৱিতং ময্হং, জৰা ব্যাধি চ মদ্দতি;

পুৰাযং ভিজ্জতি কাযো, ন মে কালো পমজ্জিতুং.

৯৬. ‘‘যথাভূতমৱেক্খন্তী, খন্ধানং উদযব্বযং;

ৱিমুত্তচিত্তা উট্ঠাসিং, কতং বুদ্ধস্স সাসন’’ন্তি. – ইমা গাথা অভাসি;

তত্থ ৱিচৰিংহং তেন তেন, লাভসক্কাৰউস্সুকাতি লাভে চ সক্কাৰে চ উস্সুকা যুত্তপ্পযুত্তা হুত্ৱা তেন তেন বাহুসচ্চধম্মকথাদিনা লাভুপ্পাদহেতুনা ৱিচৰিং অহং.

ৰিঞ্চিত্ৱা পৰমং অত্থন্তি ঝানৱিপস্সনামগ্গফলাদিং উত্তমং অত্থং জহিত্ৱা ছড্ডেত্ৱা. হীনমত্থং অসেৱিহন্তি চতুপচ্চযসঙ্খাতআমিসভাৱতো হীনং লামকং অত্থং অযোনিসো পৰিযেসনায পটিসেৱিং অহং. কিলেসানং ৱসং গন্ত্ৱাতি মানমদতণ্হাদীনং কিলেসানং ৱসং উপগন্ত্ৱা সামঞ্ঞত্থং সমণকিচ্চং ন বুজ্ঝিং ন জানিং অহং.

নিসিন্নায ৱিহাৰকেতি মম ৱসনকওৱৰকে নিসিন্নায অহু সংৱেগো. কথন্তি চে, আহ ‘‘উম্মগ্গপটিপন্নাম্হী’’তি. তত্থ উম্মগ্গপটিপন্নাম্হীতি যাৱদেৱ অনুপাদায পৰিনিব্বানত্থমিদং সাসনং, তত্থ সাসনে পব্বজিত্ৱা কম্মট্ঠানং অমনসিকৰোন্তী তস্স উম্মগ্গপটিপন্না অম্হীতি. তণ্হায ৱসমাগতাতি পচ্চযুপ্পাদনতণ্হায ৱসং উপগতা.

অপ্পকং জীৱিতং ময্হন্তি পৰিচ্ছিন্নকালা ৱজ্জিততো বহূপদ্দৱতো চ মম জীৱিতং অপ্পকং পৰিত্তং লহুকং. জৰা ব্যাধি চ মদ্দতীতি তঞ্চ সমন্ততো আপতিত্ৱা নিপ্পোথেন্তা পব্বতা ৱিয জৰা ব্যাধি চ মদ্দতি নিম্মথতি. ‘‘মদ্দৰে’’তিপি পাঠো. পুৰাযং ভিজ্জতি কাযোতি অযং কাযো ভিজ্জতি পুৰা. যস্মা তস্স একংসিকো ভেদো, তস্মা ন মে কালো পমজ্জিতুং অযং কালো অট্ঠক্খণৱজ্জিতো নৱমো খণো, সো পমজ্জিতুং ন যুত্তোতি তস্সাহুং সংৱেগোতি যোজনা.

যথাভূতমৱেক্খন্তীতি এৱং জাতসংৱেগা ৱিপস্সনং পট্ঠপেত্ৱা অনিচ্চাদিমনসিকাৰেন যথাভূতমৱেক্খন্তী. কিং অৱেক্খন্তীতি আহ ‘‘খন্ধানং উদযব্বয’’ন্তি. ‘‘অৱিজ্জাসমুদযা ৰূপসমুদযো’’তিআদিনা (পটি. ম. ১.৫০) সমপঞ্ঞাসপ্পভেদানং পঞ্চন্নং উপাদানক্খন্ধানং উপ্পাদনিৰোধঞ্চ উদযব্বযানুপস্সনায অৱেক্খন্তী ৱিপস্সনং উস্সুক্কাপেত্ৱা মগ্গপটিপাটিযা সব্বসো কিলেসেহি চ ভৱেহি চ ৱিমুত্তচিত্তা উট্ঠাসিং, উভতো উট্ঠানেন মগ্গেন ভৱত্তযতো চাতি ৱুট্ঠিতা অহোসিং. সেসং ৱুত্তনযমেৱ.

মিত্তাকাড়ীথেৰীগাথাৱণ্ণনা নিট্ঠিতা.