৩. সীহাথেৰীগাথাৱণ্ণনা

অযোনিসো মনসিকাৰাতিআদিকা সীহায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনিত্ৱা ইমস্মিং বুদ্ধুপ্পাদে ৱেসালিযং সীহসেনাপতিনো ভগিনিযা ধীতা হুত্ৱা নিব্বত্তি. তস্সা ‘‘মাতুলস্স নামং কৰোমা’’তি সীহাতি নামং অকংসু. সা ৱিঞ্ঞুতং পত্ৱা একদিৱসং সত্থাৰা সীহস্স সেনাপতিনো ধম্মে দেসিযমানে তং ধম্মং সুত্ৱা পটিলদ্ধসদ্ধা মাতাপিতৰো অনুজানাপেত্ৱা পব্বজি. পব্বজিত্ৱা চ ৱিপস্সনং আৰভিত্ৱাপি বহিদ্ধা পুথুত্তাৰম্মণে ৱিধাৱন্তং চিত্তং নিৱত্তেতুং অসক্কোন্তী সত্ত সংৱচ্ছৰানি মিচ্ছাৱিতক্কেহি বাধীযমানা চিত্তস্সাদং অলভন্তী ‘‘কিং মে ইমিনা পাপজীৱিতেন, উব্বন্ধিত্ৱা মৰিস্সামী’’তি পাসং গহেত্ৱা ৰুক্খসাখাযং লগ্গিত্ৱা তং অত্তনো কণ্ঠে পটিমুঞ্চন্তী পুব্বাচিণ্ণৱসেন ৱিপস্সনায চিত্তং অভিনীহৰি, অন্তিমভৱিকতায পাসস্স বন্ধনং গীৱট্ঠানে অহোসি, ঞাণস্স পৰিপাকং গতত্তা সা তাৱদেৱ ৱিপস্সনং ৱড্ঢেত্ৱা সহ পটিসম্ভিদাহি অৰহত্তং পাপুণি. অৰহত্তং পত্তসমকালমেৱ চ পাসবন্ধো গীৱতো মুচ্চিত্ৱা ৱিনিৱত্তি. সা অৰহত্তে পতিট্ঠিতা উদানৱসেন –

৭৭. ‘‘অযোনিসো মনসিকাৰা, কামৰাগেন অট্টিতা;

অহোসিং উদ্ধতা পুব্বে, চিত্তে অৱসৱত্তিনী.

৭৮. ‘‘পৰিযুট্ঠিতা ক্লেসেহি, সুভসঞ্ঞানুৱত্তিনী;

সমং চিত্তস্স ন লভিং, ৰাগচিত্তৱসানুগা.

৭৯. ‘‘কিসা পণ্ডু ৱিৱণ্ণা চ, সত্ত ৱস্সানি চাৰিহং;

নাহং দিৱা ৱা ৰত্তিং ৱা, সুখং ৱিন্দিং সুদুক্খিতা.

৮০. ‘‘ততো ৰজ্জুং গহেত্ৱান, পাৱিসিং ৱনমন্তৰং;

ৱৰং মে ইধ উব্বন্ধং, যঞ্চ হীনং পুনাচৰে.

৮১. ‘‘দড়্হপাসং কৰিত্ৱান, ৰুক্খসাখায বন্ধিয;

পক্খিপিং পাসং গীৱাযং, অথ চিত্তং ৱিমুচ্চি মে’’তি. –

ইমা গাথা অভাসি.

তত্থ অযোনিসো মনসিকাৰাতি অনুপাযমনসিকাৰেন, অসুভে সুভন্তি ৱিপল্লাসগ্গাহেন. কামৰাগেন অট্টিতাতি কামগুণেসু ছন্দৰাগেন পীড়িতা. অহোসিং উদ্ধতা পুব্বে, চিত্তে অৱসৱত্তিনীতি পুব্বে মম চিত্তে ময্হং ৱসে অৱত্তমানে উদ্ধতা নানাৰম্মণে ৱিক্খিত্তচিত্তা অসমাহিতা অহোসিং.

পৰিযুট্ঠিতা ক্লেসেহি, সুভসঞ্ঞানুৱত্তিনীতি পৰিযুট্ঠানপত্তেহি কামৰাগাদিকিলেসেহি অভিভূতা ৰূপাদীসু সুভন্তি পৱত্তায কামসঞ্ঞায অনুৱত্তনসীলা. সমং চিত্তস্স ন লভিং, ৰাগচিত্তৱসানুগাতি কামৰাগসম্পযুত্তচিত্তস্স ৱসং অনুগচ্ছন্তী ঈসকম্পি চিত্তস্স সমং চেতোসমথং চিত্তেকগ্গতং ন লভিং.

কিসা পণ্ডু ৱিৱণ্ণা চাতি এৱং উক্কণ্ঠিতভাৱেন কিসা ধমনিসন্থতগত্তা উপ্পণ্ডুপ্পণ্ডুকজাতা ততো এৱ ৱিৱণ্ণা ৱিগতছৱিৱণ্ণা চ হুত্ৱা. সত্ত ৱস্সানীতি সত্ত সংৱচ্ছৰানি. চাৰিহন্তি চৰিং অহং. নাহং দিৱা ৱা ৰত্তিং ৱা, সুখং ৱিন্দিং সুদুক্খিতাতি এৱমহং সত্তসু সংৱচ্ছৰেসু কিলেসদুক্খেন দুক্খিতা একদাপি দিৱা ৱা ৰত্তিং ৱা সমণসুখং ন পটিলভিং.

ততোতি কিলেসপৰিযুট্ঠানেন সমণসুখালাভভাৱতো. ৰজ্জুং গহেত্ৱান পাৱিসিং, ৱনমন্তৰন্তি পাসৰজ্জুং আদায ৱনন্তৰং পাৱিসিং. কিমত্থং পাৱিসীতি চে আহ – ‘‘ৱৰং মে ইধ উব্বন্ধং, যঞ্চ হীনং পুনাচৰে’’তি যদহং সমণধম্মং কাতুং অসক্কোন্তী হীনং গিহিভাৱং পুন আচৰে আচৰেয্যং অনুতিট্ঠেয্যং, ততো সতগুণেন সহস্সগুণেন ইমস্মিং ৱনন্তৰে উব্বন্ধং বন্ধিত্ৱা মৰণং মে ৱৰং সেট্ঠন্তি অত্থো. অথ চিত্তং ৱিমুচ্চি মেতি যদা ৰুক্খসাখায বন্ধপাসং গীৱাযং পক্খিপি, অথ তদনন্তৰমেৱ ৱুট্ঠানগামিনিৱিপস্সনামগ্গেন ঘটিতত্তা মগ্গপটিপাটিযা সব্বাসৱেহি মম চিত্তং ৱিমুচ্চি ৱিমুত্তং অহোসীতি.

সীহাথেৰীগাথাৱণ্ণনা নিট্ঠিতা.