২. ৱিমলাথেৰীগাথাৱণ্ণনা

মত্তা ৱণ্ণেন ৰূপেনাতিআদিকা ৱিমলায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনিত্ৱা ইমস্মিং বুদ্ধুপ্পাদে ৱেসালিযং অঞ্ঞতৰায ৰূপূপজীৱিনিযা ইত্থিযা ধীতা হুত্ৱা নিব্বত্তি. ৱিমলাতিস্সা নামং অহোসি. সা ৱযপ্পত্তা তথেৱ জীৱিকং কপ্পেন্তী একদিৱসং আযস্মন্তং মহামোগ্গল্লানং ৱেসালিযং পিণ্ডায চৰন্তং দিস্ৱা পটিবদ্ধচিত্তা হুত্ৱা থেৰস্স ৱসনট্ঠানং গন্ত্ৱা থেৰং উদ্দিস্স পলোভনকম্মং কাতুং আৰভি. ‘‘তিত্থিযেহি উয্যোজিতা তথা অকাসী’’তি কেচি ৱদন্তি. থেৰো তস্সা অসুভৱিভাৱনমুখেন সন্তজ্জনং কত্ৱা ওৱাদমদাসি. তং হেট্ঠা থেৰগাথায আগতমেৱ, তথা পন থেৰেন ওৱাদে দিন্নে সা সংৱেগজাতা হিৰোত্তপ্পং পচ্চুপট্ঠপেত্ৱা সাসনে পটিলদ্ধসদ্ধা উপাসিকা হুত্ৱা অপৰভাগে ভিক্খুনীসু পব্বজিত্ৱা ঘটেন্তী ৱাযমন্তী হেতুসম্পন্নতায ন চিৰস্সেৱ অৰহত্তং পত্ৱা অত্তনো পটিপত্তিং পচ্চৱেক্খিত্ৱা উদানৱসেন –

৭২. ‘‘মত্তা ৱণ্ণেন ৰূপেন, সোভগ্গেন যসেন চ;

যোব্বনেন চুপত্থদ্ধা, অঞ্ঞাসমতিমঞ্ঞিহং.

৭৩. ‘‘ৱিভূসেত্ৱা ইমং কাযং, সুচিত্তং বাললাপনং;

অট্ঠাসিং ৱেসিদ্ৱাৰম্হি, লুদ্দো পাসমিৱোড্ডিয.

৭৪. ‘‘পিড়ন্ধনং ৱিদংসেন্তী, গুয্হং পকাসিকং বহুং;

অকাসিং ৱিৱিধং মাযং, উজ্ঝগ্ঘন্তী বহুং জনং.

৭৫. ‘‘সাজ্জ পিণ্ডং চৰিত্ৱান, মুণ্ডা সঙ্ঘাটিপাৰুতা;

নিসিন্না ৰুক্খমূলম্হি, অৱিতক্কস্স লাভিনী.

৭৬. ‘‘সব্বে যোগা সমুচ্ছিন্না, যে দিব্বা যে চ মানুসা;

খেপেত্ৱা আসৱে সব্বে, সীতিভূতাম্হি নিব্বুতা’’তি. –

ইমা গাথা অভাসি.

তত্থ মত্তা ৱণ্ণেন ৰূপেনাতি গুণৱণ্ণেন চেৱ ৰূপসম্পত্তিযা চ. সোভগ্গেনাতি সুভগভাৱেন. যসেনাতি পৰিৱাৰসম্পত্তিযা. মত্তা ৱণ্ণমদৰূপমদসোভগ্গমদপৰিৱাৰমদৱসেন মদং আপন্নাতি অত্থো. যোব্বনেন চুপত্থদ্ধাতি যোব্বনমদেন উপৰূপৰি থদ্ধা যোব্বননিমিত্তেন অহঙ্কাৰেন উপত্থদ্ধচিত্তা অনুপসন্তমানসা. অঞ্ঞাসমতিমঞ্ঞিহন্তি অঞ্ঞা ইত্থিযো অত্তনো ৱণ্ণাদিগুণেহি সব্বথাপি অতিক্কমিত্ৱা মঞ্ঞিং অহং. অঞ্ঞাসং ৱা ইত্থীনং ৱণ্ণাদিগুণে অতিমঞ্ঞিং অতিক্কমিত্ৱা অমঞ্ঞিং অৱমানং অকাসিং.

ৱিভূসিত্ৱা ইমং কাযং, সুচিত্তং বাললাপনন্তি ইমং নানাৱিধঅসুচিভৰিতং জেগুচ্ছং অহং মমাতি বালানং লাপনতো ৱাচনতো বাললাপনং মম কাযং ছৱিৰাগকৰণকেসট্ঠপনাদিনা সুচিত্তং ৱত্থাভৰণেহি ৱিভূসিত্ৱা সুমণ্ডিতপসাদিতং কত্ৱা. অট্ঠাসিং ৱেসিদ্ৱাৰম্হি, লুদ্দো পাসমিৱোড্ডিযাতি মিগলুদ্দো ৱিয মিগানং বন্ধনত্থায দণ্ডৱাকুৰাদিমিগপাসং, মাৰস্স পাসভূতং যথাৱুত্তং মম কাযং ৱেসিদ্ৱাৰম্হি ৱেসিযা ঘৰদ্ৱাৰে ওড্ডিযিত্ৱা অট্ঠাসিং.

পিড়ন্ধনং ৱিদংসেন্তী, গুয্হং পকাসিকং বহুন্তি ঊৰুজঘনথনদস্সনাদিকং গুয্হঞ্চেৱ পাদজাণুসিৰাদিকং পকাসঞ্চাতি গুয্হং পকাসিকঞ্চ বহুং নানপ্পকাৰং পিড়ন্ধনং আভৰণং দস্সেন্তী. অকাসিং ৱিৱিধং মাযং, উজ্ঝগ্ঘন্তী বহুং জনন্তি যোব্বনমদমত্তং বহুং বালজনং ৱিপ্পলম্ভেতুং হসন্তী গন্ধমালাৱত্থাভৰণাদীহি সৰীৰসভাৱপটিচ্ছাদনেন হসৱিলাসভাৱাদীহি তেহি চ ৱিৱিধং নানপ্পকাৰং ৱঞ্চনং অকাসিং.

সাজ্জ পিণ্ডং চৰিত্ৱান…পে… অৱিতক্কস্স লাভিনীতি সা অহং এৱং পমাদৱিহাৰিনী সমানা অজ্জ ইদানি অয্যস্স মহামোগ্গল্লানত্থেৰস্স ওৱাদে ঠত্ৱা সাসনে পব্বজিত্ৱা মুণ্ডা সঙ্ঘাটিপাৰুতা হুত্ৱা পিণ্ডং চৰিত্ৱান ভিক্খাহাৰং ভুঞ্জিত্ৱা নিসিন্না ৰুক্খমূলম্হি ৰুক্খমূলে ৱিৱিত্তাসনে নিসিন্না দুতিযজ্ঝানপাদকস্স অগ্গফলস্স অধিগমেন অৱিতক্কস্স লাভিনী অম্হীতি যোজনা.

সব্বে যোগাতি কামযোগাদযো চত্তাৰোপি যোগা. সমুচ্ছিন্নাতি পঠমমগ্গাদিনা যথাৰহং সম্মদেৱ উচ্ছিন্না পহীনা. সেসং ৱুত্তনযমেৱ.

ৱিমলাথেৰীগাথাৱণ্ণনা নিট্ঠিতা.