১২. চন্দাথেৰীগাথাৱণ্ণনা

দুগ্গতাহং পুৰে আসিন্তিআদিকা চন্দায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী অনুক্কমেন সম্ভতৱিমোক্খসম্ভাৰা পৰিপক্কঞাণা ইমস্মিং বুদ্ধুপ্পাদে অঞ্ঞতৰস্মিং ব্ৰাহ্মণগামে অপঞ্ঞাতস্স ব্ৰাহ্মণস্স গেহে পটিসন্ধিং গণ্হি. তস্সা নিব্বত্তিতো পট্ঠাযং তং কুলং ভোগেহি পৰিক্খযং গতং. সা অনুক্কমেন ৱিঞ্ঞুতং পত্ৱা দুক্খেন জীৱতি. অথ তস্মিং গেহে অহিৱাতৰোগো উপ্পজ্জি. তেনস্সা সব্বেপি ঞাতকা মৰণব্যসনং পাপুণিংসু. সা ঞাতিক্খযে জাতে অঞ্ঞত্থ জীৱিতুং অসক্কোন্তী কপালহত্থা কুলে কুলে ৱিচৰিত্ৱা লদ্ধলদ্ধেন ভিক্খাহাৰেন যাপেন্তী একদিৱসং পটাচাৰায থেৰিযা ভত্তৱিস্সগ্গট্ঠানং অগমাসি. ভিক্খুনিযো তং দুক্খিতং খুদ্দাভিভূতং দিস্ৱান সঞ্জাতকাৰুঞ্ঞা পিযসমুদাচাৰেন সঙ্গহেত্ৱা তত্থ ৱিজ্জমানেন উপচাৰমনোহৰেন আহাৰেন সন্তপ্পেসুং. সা তাসং আচাৰসীলে পসীদিত্ৱা থেৰিযা সন্তিকং উপসঙ্কমিত্ৱা ৱন্দিত্ৱা একমন্তং নিসীদি. তস্সা থেৰী ধম্মং কথেসি. সা তং ধম্মং সুত্ৱা সাসনে অভিপ্পসন্না সংসাৰে চ সঞ্জাতসংৱেগা পব্বজি. পব্বজিত্ৱা চ থেৰিযা ওৱাদে ঠত্ৱা ৱিপস্সনং পট্ঠপেত্ৱা ভাৱনং অনুযুঞ্জন্তী কতাধিকাৰতায ঞাণস্স চ পৰিপাকং গতত্তা ন চিৰস্সেৱ সহ পটিসম্ভিদাহি অৰহত্তং পত্ৱা অত্তনো পটিপত্তিং পচ্চৱেক্খিত্ৱা –

১২২. ‘‘দুগ্গতাহং পুৰে আসিং, ৱিধৱা চ অপুত্তিকা;

ৱিনা মিত্তেহি ঞাতীহি, ভত্তচোড়স্স নাধিগং.

১২৩. ‘‘পত্তং দণ্ডঞ্চ গণ্হিত্ৱা, ভিক্খমানা কুলা কুলং;

সীতুণ্হেন চ ডয্হন্তী, সত্ত ৱস্সানি চাৰিহং.

১২৪. ‘‘ভিক্খুনিং পুন দিস্ৱান, অন্নপানস্স লাভিনিং;

উপসঙ্কম্মং অৱোচং, পব্বজ্জং অনগাৰিযং.

১২৫. ‘‘সা চ মং অনুকম্পায, পব্বাজেসি পটাচাৰা;

ততো মং ওৱদিত্ৱান, পৰমত্থে নিযোজযি.

১২৬. ‘‘তস্সাহং ৱচনং সুত্ৱা, অকাসিং অনুসাসনিং;

অমোঘো অয্যাযোৱাদো, তেৱিজ্জাম্হি অনাসৱা’’তি. –

উদানৱসেন ইমা গাথা অভাসি.

তত্থ দুগ্গতাতি দলিদ্দা. পুৰেতি পব্বজিততো পুব্বে. পব্বজিতকালতো পট্ঠায হি ইধ পুগ্গলো ভোগেহি অড্ঢো ৱা দলিদ্দো ৱাতি ন ৱত্তব্বো. গুণেহি পন অযং থেৰী অড্ঢাযেৱ. তেনাহ ‘‘দুগ্গতাহং পুৰে আসি’’ন্তি. ৱিধৱাতি ধৱো ৱুচ্চতি সামিকো, তদভাৱা ৱিধৱা, মতপতিকাতি অত্থো. অপুত্তিকাতি পুত্তৰহিতা. ৱিনা মিত্তেহীতি মিত্তেহি বন্ধৱেহি চ পৰিহীনা ৰহিতা. ভত্তচোড়স্স নাধিগন্তি ভত্তস্স চোড়স্স চ পাৰিপূৰিং নাধিগচ্ছিং, কেৱলং পন ভিক্খাপিণ্ডস্স পিলোতিকাখণ্ডস্স চ ৱসেন ঘাসচ্ছাদনমত্তমেৱ অলত্থন্তি অধিপ্পাযো. তেনাহ ‘‘পত্তং দণ্ডঞ্চ গণ্হিত্ৱা’’তিআদি.

তত্থ পত্তন্তি মত্তিকাভাজনং. দণ্ডন্তি গোণসুনখাদিপৰিহৰণদণ্ডকং. কুলা কুলন্তি কুলতো কুলং. সীতুণ্হেন চ ডয্হন্তীতি ৱসনগেহাভাৱতো সীতেন চ উণ্হেন চ পীড়িযমানা.

ভিক্খুনিন্তি পটাচাৰাথেৰিং সন্ধায ৱদতি. পুনাতি পচ্ছা, সত্তসংৱচ্ছৰতো অপৰভাগে.

পৰমত্থেতি পৰমে উত্তমে অত্থে, নিব্বানগামিনিযা পটিপদায নিব্বানে চ. নিযোজযীতি কম্মট্ঠানং আচিক্খন্তী নিযোজেসি. সেসং ৱুত্তনযমেৱ.

চন্দাথেৰীগাথাৱণ্ণনা নিট্ঠিতা.

পঞ্চকনিপাতৱণ্ণনা নিট্ঠিতা.