১. অঞ্ঞতৰাথেৰীগাথাৱণ্ণনা

পঞ্চকনিপাতে পণ্ণৱীসতি ৱস্সানীতিআদিকা অঞ্ঞতৰায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী ইমস্মিং বুদ্ধুপ্পাদে দেৱদহনগৰে মহাপজাপতিগোতমিযা ধাতী হুত্ৱা ৱড্ঢেসি. নামগোত্ততো পন অপঞ্ঞাতা অহোসি. সা মহাপজাপতিগোতমিযা পব্বজিতকালে সযম্পি পব্বজিত্ৱা পঞ্চৱীসতি সংৱচ্ছৰানি কামৰাগেন উপদ্দুতা অচ্ছৰাসঙ্ঘাতমত্তম্পি কালং চিত্তেকগ্গতং অলভন্তী বাহা পগ্গয্হ কন্দমানা ধম্মদিন্নাথেৰিযা সন্তিকে ধম্মং সুত্ৱা কামেহি ৱিনিৱত্তিতমানসা কম্মট্ঠানং গহেত্ৱা ভাৱনমনুযঞ্জন্তী ন চিৰস্সেৱ ছড়ভিঞ্ঞা হুত্ৱা অত্তনো পটিপত্তিং পচ্চৱেক্খিত্ৱা উদানৱসেন –

৬৭. ‘‘পণ্ণৱীসতি ৱস্সানি, যতো পব্বজিতা অহং;

নাচ্ছৰাসঙ্ঘাতমত্তম্পি, চিত্তস্সূপসমজ্ঝগং.

৬৮. ‘‘অলদ্ধা চেতসো সন্তিং, কামৰাগেনৱস্সুতা;

বাহা পগ্গয্হ কন্দন্তী, ৱিহাৰং পাৱিসিং অহং.

৬৯. ‘‘সা ভিক্খুনিং উপাগচ্ছিং, যা মে সদ্ধাযিকা অহু;

সা মে ধম্মমদেসেসি, খন্ধাযতনধাতুযো.

৭০. ‘‘তস্সা ধম্মং সুণিত্ৱান, একমন্তে উপাৱিসিং;

পুব্বেনিৱাসং জানামি, দিব্বচক্খু ৱিসোধিতং.

৭১. ‘‘চেতোপৰিচ্চঞাণঞ্চ, সোতধাতু ৱিসোধিতা;

ইদ্ধীপি মে সচ্ছিকতা, পত্তো মে আসৱক্খযো;

ছড়ভিঞ্ঞা সচ্ছিকতা, কতং বুদ্ধস্স সাসন’’ন্তি. –

ইমা গাথা অভাসি.

তত্থ নাচ্ছৰাসঙ্ঘাতমত্তম্পীতি অচ্ছৰাঘটিতমত্তম্পি খণং অঙ্গুলিফোটনমত্তম্পি কালন্তি অত্থো. চিত্তস্সূপসমজ্ঝগন্তি চিত্তস্স উপসমং চিত্তেকগ্গং ন অজ্ঝগন্তি যোজনা, ন পটিলভিন্তি অত্থো.

কামৰাগেনৱস্সুতাতি কামগুণসঙ্খাতেসু ৱত্থুকামেসু দড়্হতৰাভিনিৱেসিতায বহলেন ছন্দৰাগেন তিন্তচিত্তা.

ভিক্খুনিন্তি ধম্মদিন্নত্থেৰিং সন্ধায ৱদতি.

চেতোপৰিচ্চঞাণঞ্চাতি চেতোপৰিযঞাণঞ্চ ৱিসোধিতন্তি সম্বন্ধো, অধিগতন্তি অত্থো. সেসং ৱুত্তনযমেৱ.

অঞ্ঞতৰাথেৰীগাথাৱণ্ণনা নিট্ঠিতা.