৮. সোমাথেৰীগাথাৱণ্ণনা

যং তং ইসীহি পত্তব্বন্তিআদিকা সোমায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী সিখিস্স ভগৱতো কালে খত্তিযমহাসালকুলে নিব্বত্তিত্ৱা ৱিঞ্ঞুতং পত্ৱা অৰুণৰঞ্ঞো অগ্গমহেসী অহোসীতি সব্বং অতীতৱত্থু অভযত্থেৰিযা ৱত্থুসদিসং. পচ্চুপ্পন্নৱত্থু পন অযং থেৰী তত্থ তত্থ দেৱমনুস্সেসু সংসৰন্তী ইমস্মিং বুদ্ধুপ্পাদে ৰাজগহে বিম্বিসাৰস্স ৰঞ্ঞো পুৰোহিতস্স ধীতা হুত্ৱা নিব্বত্তি. তস্সা সোমাতি নামং অহোসি. সা ৱিঞ্ঞুতং পত্তা সত্থু ৰাজগহপৱেসনে পটিলদ্ধসদ্ধা উপাসিকা হুত্ৱা অপৰভাগে সঞ্জাতসংৱেগা ভিক্খুনীসু পব্বজিত্ৱা কতপুব্বকিচ্চা ৱিপস্সনায কম্মং কৰোন্তী ন চিৰস্সেৱ সহ পটিসম্ভিদাহি অৰহত্তং পাপুণি. তেন ৱুত্তং অপদানে (অপ. থেৰী ২.১.৭১, ৮০-৯০) –

‘‘নগৰে অৰুণৱতিযা, অৰুণো নাম খত্তিযো;

তস্স ৰঞ্ঞো অহুং ভৰিযা, ৱাৰিতং ৱাৰযামহং.

‘‘যাৱতা…পে… কতং বুদ্ধস্স সাসন’’ন্তি. –

সব্বং অভযত্থেৰিযা অপদানসদিসং.

অৰহত্তং পন পত্ৱা ৱিমুত্তিসুখেন সাৱত্থিযং ৱিহৰন্তী একদিৱসং দিৱাৱিহাৰত্থায অন্ধৱনং পৱিসিত্ৱা অঞ্ঞতৰস্মিং ৰুক্খমূলে নিসীদি. অথ নং মাৰো ৱিৱেকতো ৱিচ্ছেদেতুকামো অদিস্সমানুৰূপো উপগন্ত্ৱা আকাসে ঠত্ৱা –

৬০. ‘‘যং তং ইসীহি পত্তব্বং, ঠানং দুৰভিসম্ভৱং;

ন তং দ্ৱঙ্গুলপঞ্ঞায, সক্কা পপ্পোতুমিত্থিযা’’তি. – ইমং গাথমাহ;

তস্সত্থো – সীলক্খন্ধাদীনং এসনট্ঠেন ‘‘ইসী’’তি লদ্ধনামেহি বুদ্ধাদীহি মহাপঞ্ঞেহি পত্তব্বং, তং অঞ্ঞেহি পন দুৰভিসম্ভৱং দুন্নিপ্ফাদনীযং. যং তং অৰহত্তসঙ্খাতং পৰমস্সাসট্ঠানং, ন তং দ্ৱঙ্গুলপঞ্ঞায নিহীনপঞ্ঞায ইত্থিযা পাপুণিতুং সক্কা. ইত্থিযো হি সত্তট্ঠৱস্সকালতো পট্ঠায সব্বকালং ওদনং পচন্তিযো পক্কুথিতে উদকে তণ্ডুলে পক্খিপিত্ৱা ‘‘এত্তাৱতা ওদনং পক্ক’’ন্তি ন জানন্তি, পক্কুথিযমানে পন তণ্ডুলে দব্বিযা উদ্ধৰিত্ৱা দ্ৱীহি অঙ্গুলীহি পীড়েত্ৱা জানন্তি, তস্মা দ্ৱঙ্গুলিপঞ্ঞাযাতি ৱুত্তা.

তং সুত্ৱা থেৰী মাৰং অপসাদেন্তী –

৬১. ‘‘ইত্থিভাৱো নো কিং কযিৰা, চিত্তম্হি সুসমাহিতে;

ঞাণম্হি ৱত্তমানম্হি, সম্মা ধম্মং ৱিপস্সতো.

৬২. ‘‘সব্বত্থ ৱিহতা নন্দী, তমোক্খন্ধো পদালিতো;

এৱং জানাহি পাপিম, নিহতো ত্ৱমসি অন্তকা’’তি. –

ইতৰা দ্ৱে গাথা অভাসি.

তত্থ ইত্থিভাৱো নো কিং কযিৰাতি মাতুগামভাৱো অম্হাকং কিং কৰেয্য, অৰহত্তপ্পত্তিযা কীদিসং ৱিবন্ধং উপ্পাদেয্য. চিত্তম্হি সুসমাহিতেতি চিত্তে অগ্গমগ্গসমাধিনা সুট্ঠু সমাহিতে. ঞাণম্হি ৱত্তমানম্হীতি ততো অৰহত্তমগ্গঞাণে পৱত্তমানে. সম্মা ধম্মং ৱিপস্সতোতি চতুসচ্চধম্মং পৰিঞ্ঞাদিৱিধিনা সম্মদেৱ পস্সতো. অযঞ্হেত্থ সঙ্খেপো – পাপিম, ইত্থী ৱা হোতু পুৰিসো ৱা, অগ্গমগ্গে অধিগতে অৰহত্তং হত্থগতমেৱাতি.

ইদানি তস্স অত্তনা অধিগতভাৱং উজুকমেৱ দস্সেন্তী ‘‘সব্বত্থ ৱিহতা নন্দী’’তি গাথমাহ. সা ৱুত্তত্থাযেৱ.

সোমাথেৰীগাথাৱণ্ণনা নিট্ঠিতা.

তিকনিপাতৱণ্ণনা নিট্ঠিতা.