৮. অভযমাতুথেৰীগাথাৱণ্ণনা

উদ্ধং পাদতলাতিআদিকা অভযমাতায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে পুঞ্ঞানি উপচিনন্তী তিস্সস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্ৱা একদিৱসং সত্থাৰং পিণ্ডায চৰন্তং দিস্ৱা পসন্নমানসা পত্তং গহেত্ৱা কটচ্ছুমত্তং ভিক্খং অদাসি. সা তেন পুঞ্ঞকম্মেন দেৱমনুস্সেসু সংসৰন্তী ইমস্মিং বুদ্ধুপ্পাদে তাদিসেন কম্মনিস্সন্দেন উজ্জেনিযং পদুমৱতী নাম নগৰসোভিণী অহোসি. ৰাজা বিম্বিসাৰো তস্সা ৰূপসম্পত্তিআদিকে গুণে সুত্ৱা পুৰোহিতস্স আচিক্খি – ‘‘উজ্জেনিযং কিৰ পদুমৱতী নাম গণিকা অহোসি, তমহং দট্ঠুকামোম্হী’’তি. পুৰোহিতো ‘‘সাধু, দেৱা’’তি মন্তবলেন কুম্ভীৰং নাম যক্খং আৱহেত্ৱা যক্খানুভাৱেন ৰাজানং তাৱদেৱ উজ্জেনীনগৰং নেসি. ৰাজা তায সদ্ধিং একৰত্তিং সংৱাসং কপ্পেসি. সা তেন গব্ভং গণ্হি. ৰঞ্ঞো চ আৰোচেসি – ‘‘মম কুচ্ছিযং গব্ভো পতিট্ঠহী’’তি. তং সুত্ৱা ৰাজা নং ‘‘সচে পুত্তো ভৱেয্য, ৱড্ঢেত্ৱা মমং দস্সেহী’’তি ৱত্ৱা নামমুদ্দিকং দত্ৱা অগমাসি. সা দসমাসচ্চযেন পুত্তং ৱিজাযিত্ৱা নামগ্গহণদিৱসে অভযোতি নামং অকাসি. পুত্তঞ্চ সত্তৱস্সিককালে ‘‘তৱ পিতা বিম্বিসাৰমহাৰাজা’’তি ৰঞ্ঞো সন্তিকং পহিণি. ৰাজা তং পুত্তং পস্সিত্ৱা পুত্তসিনেহং পটিলভিত্ৱা কুমাৰকপৰিহাৰেন ৱড্ঢেসি. তস্স সদ্ধাপটিলাভো পব্বজ্জা ৱিসেসাধিগমো চ হেট্ঠা আগতোযেৱ. তস্স মাতা অপৰভাগে পুত্তস্স অভযত্থেৰস্স সন্তিকে ধম্মং সুত্ৱা পটিলদ্ধসদ্ধা ভিক্খুনীসু পব্বজিত্ৱা ৱিপস্সনায কম্মং কৰোন্তী নচিৰস্সেৱ সহ পটিসম্ভিদাহি অৰহত্তং পাপুণি. তেন ৱুত্তং অপদানে (অপ. থেৰী ২.১.৬০-৭০) –

‘‘পিণ্ডচাৰং চৰন্তস্স, তিস্সনামস্স সত্থুনো;

কটচ্ছুভিক্খং পগ্গয্হ, বুদ্ধসেট্ঠস্সদাসহং.

‘‘পটিগ্গহেত্ৱা সম্বুদ্ধো, তিস্সো লোকগ্গনাযকো;

ৱীথিযা সণ্ঠিতো সত্থা, অকা মে অনুমোদনং.

‘‘কটচ্ছুভিক্খং দত্ৱান, তাৱতিংসং গমিস্সসি;

ছত্তিংসদেৱৰাজূনং, মহেসিত্তং কৰিস্সসি.

‘‘পঞ্ঞাসং চক্কৱত্তীনং, মহেসিত্তং কৰিস্সসি;

মনসা পত্থিতং সব্বং, পটিলচ্ছসি সব্বদা.

‘‘সম্পত্তিং অনুভোত্ৱান, পব্বজিস্সসি কিঞ্চনা;

সব্বাসৱে পৰিঞ্ঞায, নিব্বাযিস্সসিনাসৱা.

‘‘ইদং ৱত্ৱান সম্বুদ্ধো, তিস্সো লোকগ্গনাযকো;

নভং অব্ভুগ্গমী ৱীৰো, হংসৰাজাৱ অম্বৰে.

‘‘সুদিন্নং মে দানৱৰং, সুযিট্ঠা যাগসম্পদা;

কটচ্ছুভিক্খং দত্ৱান, পত্তাহং অচলং পদং.

‘‘দ্ৱেনৱুতে ইতো কপ্পে, যং দানমদদিং তদা;

দুগ্গতিং নাভিজানামি, ভিক্খাদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা অত্তনো পুত্তেন অভযত্থেৰেন ধম্মং কথেন্তেন ওৱাদৱসেন যা গাথা ভাসিতা, উদানৱসেন সযম্পি তা এৱ পচ্চুদাহৰন্তী –

৩৩. ‘‘উদ্ধং পাদতলা অম্ম, অধো ৱে কেসমত্থকা;

পচ্চৱেক্খস্সুমং কাযং, অসুচিং পূতিগন্ধিকং.

৩৪. ‘‘এৱং ৱিহৰমানায, সব্বো ৰাগো সমূহতো;

পৰিড়াহো সমুচ্ছিন্নো, সীতিভূতাম্হি নিব্বুতা’’তি. – আহ;

তত্থ পঠমগাথায তাৱ অযং সঙ্খেপত্থো – অম্ম পদুমৱতি, পাদতলতো উদ্ধং কেসমত্থকতো অধো নানপ্পকাৰঅসুচিপূৰিতায অসুচিং সব্বকালং পূতিগন্ধৱাযনতো পূতিগন্ধিকং, ইমং কুচ্ছিতানং আযতনতায কাযং সৰীৰং ঞাণচক্খুনা পচ্চৱেক্খস্সূতি. অযঞ্হি তস্সা পুত্তেন ওৱাদদানৱসেন ভাসিতা গাথা.

সা তং সুত্ৱা অৰহত্তং পত্ৱা উদানেন্তী আচৰিযপূজাৱসেন তমেৱ গাথং পঠমং ৱত্ৱা অত্তনো পটিপত্তিং কথেন্তী ‘‘এৱং ৱিহৰমানাযা’’তি দুতিযং গাথমাহ.

তত্থ এৱং ৱিহৰমানাযাতি এৱং মম পুত্তেন অভযত্থেৰেন ‘‘উদ্ধং পাদতলা’’তিআদিনা দিন্নে ওৱাদে ঠত্ৱা সব্বকাযং অসুভতো দিস্ৱা একগ্গচিত্তা তত্থ ভূতুপাদাযভেদে ৰূপধম্মে তপ্পটিবদ্ধে ৱেদনাদিকে অৰূপধম্মে পৰিগ্গহেত্ৱা তত্থ তিলক্খণং আৰোপেত্ৱা অনিচ্চানুপস্সনাদিৱসেন ৱিহৰমানায. সব্বো ৰাগো সমূহতোতি ৱুট্ঠানগামিনিৱিপস্সনায মগ্গেন ঘটিতায মগ্গপটিপাটিযা অগ্গমগ্গেন সব্বো ৰাগো মযা সমূহতো সমুগ্ঘাটিতো. পৰিড়াহো সমুচ্ছিন্নোতি ততো এৱ সব্বো কিলেসপৰিড়াহো সম্মদেৱ উচ্ছিন্নো, তস্স চ সমুচ্ছিন্নত্তা এৱ সীতিভূতা সউপাদিসেসায নিব্বানধাতুযা নিব্বুতা অম্হীতি.

অভযমাতুথেৰীগাথাৱণ্ণনা নিট্ঠিতা.