৩. সুমঙ্গলমাতুথেৰীগাথাৱণ্ণনা

সুমুত্তিকাতিআদিকা সুমঙ্গলমাতায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে কুসলং উপচিনিত্ৱা ইমস্মিং বুদ্ধুপ্পাদে সাৱত্থিযং দলিদ্দকুলে নিব্বত্তিত্ৱা ৱযপ্পত্তা অঞ্ঞতৰস্স নড়কাৰস্স দিন্না পঠমগব্ভেযেৱ পচ্ছিমভৱিকং পুত্তং লভি. তস্স সুমঙ্গলোতি নামং অহোসি. ততো পট্ঠায সা সুমঙ্গলমাতাতি পঞ্ঞাযিত্থ. যস্মা পনস্সা নামগোত্তং ন পাকটং, তস্মা ‘‘অঞ্ঞতৰা থেৰী ভিক্খুনী অপঞ্ঞাতা’’তি পাড়িযং ৱুত্তং. সোপিস্সা পুত্তো ৱিঞ্ঞুতং পত্তো পব্বজিত্ৱা সহ পটিসম্ভিদাহি অৰহত্তং পত্ৱা সুমঙ্গলত্থেৰোতি পাকটো অহোসি. তস্স মাতা ভিক্খুনীসু পব্বজিত্ৱা ৱিপস্সনায কম্মং কৰোন্তী একদিৱসং গিহিকালে অত্তনা লদ্ধদুক্খং পচ্চৱেক্খিত্ৱা সংৱেগজাতা ৱিপস্সনং ৱড্ঢেত্ৱা সহ পটিসম্ভিদাহি অৰহত্তং পত্ৱা উদানেন্তী –

২৩. ‘‘সুমুত্তিকা সুমুত্তিকা, সাধুমুত্তিকাম্হি মুসলস্স;

অহিৰিকো মে ছত্তকং ৱাপি, উক্খলিকা মে দেড্ডুভং ৱাতি.

২৪. ‘‘ৰাগঞ্চ অহং দোসঞ্চ, চিচ্চিটি চিচ্চিটীতি ৱিহনামি;

সা ৰুক্খমূলমুপগম্ম, ‘অহো সুখ’ন্তি সুখতো ঝাযামী’’তি. –

ইমা দ্ৱে গাথা অভাসি.

তত্থ সুমুত্তিকাতি সুমুত্তা. ক-কাৰো পদপূৰণমত্তং, সুট্ঠু মুত্তা ৱতাতি অত্থো. সা সাসনে অত্তনা পটিলদ্ধসম্পত্তিং দিস্ৱা পসাদৱসেন, তস্সা ৱা পসংসাৱসেন আমন্তেত্ৱা ৱুত্তং ‘‘সুমুত্তিকা সুমুত্তিকা’’তি. যং পন গিহিকালে ৱিসেসতো জিগুচ্ছতি, ততো ৱিমুত্তিং দস্সেন্তী ‘‘সাধুমুত্তিকাম্হী’’তিআদিমাহ. তত্থ সাধুমুত্তিকাম্হীতি সম্মদেৱ মুত্তা ৱত অম্হি. মুসলস্সাতি মুসলতো. অযং কিৰ দলিদ্দভাৱেন গিহিকালে সযমেৱ মুসলকম্মং কৰোতি, তস্মা এৱমাহ. অহিৰিকো মেতি মম সামিকো অহিৰিকো নিল্লজ্জো, সো মম ন ৰুচ্চতীতি ৱচনসেসো. পকতিযাৱ কামেসু ৱিৰত্তচিত্ততায কামাধিমুত্তানং পৱত্তিং জিগুচ্ছন্তী ৱদতি. ছত্তকং ৱাপীতি জীৱিতহেতুকেন কৰীযমানং ছত্তকম্পি মে ন ৰুচ্চতীতি অত্থো. ৱা-সদ্দো অৱুত্তসমুচ্চযত্থো, তেন পেড়াচঙ্কোটকাদিং সঙ্গণ্হাতি. ৱেড়ুদণ্ডাদীনি গহেত্ৱা দিৱসে দিৱসে ছত্তাদীনং কৰণৱসেন দুক্খজীৱিতং জিগুচ্ছন্তী ৱদতি. ‘‘অহিতকো মে ৱাতো ৱাতী’’তি কেচি ৱত্ৱা অহিতকো জৰাৱহো গিহিকালে মম সৰীৰে ৱাতো ৱাযতীতি অত্থং ৱদন্তি. অপৰে পন ‘‘অহিতকো পৰেসং দুগ্গন্ধতৰো চ মম সৰীৰতো ৱাতো ৱাযতী’’তি অত্থং ৱদন্তি. উক্খলিকা মে দেড্ডুভং ৱাতীতি মে মম ভত্তপচনভাজনং চিৰপাৰিৱাসিকভাৱেন অপৰিসুদ্ধতায উদকসপ্পগন্ধং ৱাযতি, ততো অহং সাধুমুত্তিকাম্হীতি যোজনা.

ৰাগঞ্চ অহং দোসঞ্চ, চিচ্চিটি চিচ্চিটীতি ৱিহনামীতি অহং কিলেসজেট্ঠকং ৰাগঞ্চ দোসঞ্চ চিচ্চিটি চিচ্চিটীতি ইমিনা সদ্দেন সদ্ধিং ৱিহনামি ৱিনাসেমি, পজহামীতি অত্থো. সা কিৰ অত্তনো সামিকং জিগুচ্ছন্তী তেন দিৱসে দিৱসে ফালিযমানানং সুক্খানং ৱেড়ুদণ্ডাদীনং সদ্দং গৰহন্তী তস্স পহানং ৰাগদোসপহানেন সমং কত্ৱা অৱোচ. সা ৰুক্খমূলমুপগম্মাতি সা অহং সুমঙ্গলমাতা ৱিৱিত্তং ৰুক্খমূলং উপসঙ্কমিত্ৱা. সুখতো ঝাযামীতি সুখন্তি ঝাযামি, কালেন কালং সমাপজ্জন্তী ফলসুখং নিব্বানসুখঞ্চ পটিসংৱেদিযমানা ফলজ্ঝানেন ঝাযামীতি অত্থো. অহো সুখন্তি ইদং পনস্সা সমাপত্তিতো পচ্ছা পৱত্তমনসিকাৰৱসেন ৱুত্তং, পুব্বাভোগৱসেনাতিপি যুজ্জতেৱ.

সুমঙ্গলমাতুথেৰীগাথাৱণ্ণনা নিট্ঠিতা.