৫. সুভাকম্মাৰধীতুথেৰীগাথাৱণ্ণনা

দহৰাহন্তিআদিকা সুভায কম্মাৰধীতায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী অনুক্কমেন সম্ভাৱিতকুসলমূলা উপচিতৱিমোক্খসম্ভাৰা সুগতীসুযেৱ সংসৰন্তী পৰিপক্কঞাণা হুত্ৱা ইমস্মিং বুদ্ধুপ্পাদে ৰাজগহে অঞ্ঞতৰস্স সুৱণ্ণকাৰস্স ধীতা হুত্ৱা নিব্বত্তি, ৰূপসম্পত্তিসোভায সুভাতি তস্সা নামং অহোসি. সা অনুক্কমেন ৱিঞ্ঞুতং পত্ৱা, সত্থু ৰাজগহপ্পৱেসনে সত্থৰি সঞ্জাতপ্পসাদা একদিৱসং ভগৱন্তং উপসঙ্কমিত্ৱা ৱন্দিত্ৱা একমন্তং নিসীদি. সত্থা তস্সা ইন্দ্ৰিযপৰিপাকং দিস্ৱা অজ্ঝাসযানুৰূপং চতুসচ্চগব্ভধম্মং দেসেসি. সা তাৱদেৱ সহস্সনযপটিমণ্ডিতে সোতাপত্তিফলে পতিট্ঠাসি. সা অপৰভাগে ঘৰাৱাসে দোসং দিস্ৱা মহাপজাপতিযা গোতমিযা সন্তিকে পব্বজিত্ৱা ভিক্খুনিসীলে পতিট্ঠিতা উপৰিমগ্গত্থায ভাৱনমনুযুঞ্জি. তং ঞাতকা কালেন কালং উপসঙ্কমিত্ৱা কামেহি নিমন্তেন্তা পহূতধনং ৱিভৱজাতঞ্চ দস্সেত্ৱা পলোভেন্তি. সা একদিৱসং অত্তনো সন্তিকং উপগতানং ঘৰাৱাসেসু কামেসু চ আদীনৱং পকাসেন্তী ‘‘দহৰাহ’’ন্তিআদীহি চতুৱীসতিযা গাথাহি ধম্মং কথেত্ৱা তে নিৰাসে কত্ৱা ৱিস্সজ্জেত্ৱা ৱিপস্সনায কম্মং কৰোন্তী ইন্দ্ৰিযানি পৰিযোদপেন্তী ভাৱনং উস্সুক্কাপেত্ৱা ন চিৰস্সেৱ সহ পটিসম্ভিদাহি অৰহত্তং পাপুণি. অৰহত্তং পন পত্ৱা –

৩৩৯. ‘‘দহৰাহং সুদ্ধৱসনা, যং পুৰে ধম্মমস্সুণিং;

তস্সা মে অপ্পমত্তায, সচ্চাভিসমযো অহু.

৩৪০. ‘‘ততোহং সব্বকামেসু, ভুসং অৰতিমজ্ঝগং;

সক্কাযস্মিং ভযং দিস্ৱা, নেক্খম্মমেৱ পীহযে.

৩৪১. ‘‘হিত্ৱানহং ঞাতিগণং, দাসকম্মকৰানি চ;

গামখেত্তানি ফীতানি, ৰমণীযে পমোদিতে.

৩৪২. ‘‘পহাযহং পব্বজিতা, সাপতেয্যমনপ্পকং;

এৱং সদ্ধায নিক্খম্ম, সদ্ধম্মে সুপ্পৱেদিতে.

৩৪৩. ‘‘নেতং অস্স পতিৰূপং, আকিঞ্চঞ্ঞঞ্হি পত্থযে;

যো জাতৰূপং ৰজতং, ছড্ডেত্ৱা পুনৰাগমে.

৩৪৪. ‘‘ৰজতং জাতৰূপং ৱা, ন বোধায ন সন্তিযা;

নেতং সমণসাৰুপ্পং, ন এতং অৰিযদ্ধনং.

৩৪৫. ‘‘লোভনং মদনঞ্চেতং, মোহনং ৰজৱড্ঢনং;

সাসঙ্কং বহুআযাসং, নত্থি চেত্থ ধুৱং ঠিতি.

৩৪৬. ‘‘এত্থ ৰত্তা পমত্তা চ, সংকিলিট্ঠমনা নৰা;

অঞ্ঞমঞ্ঞেন ব্যাৰুদ্ধা, পুথূ কুব্বন্তি মেধগং.

৩৪৭. ‘‘ৱধো বন্ধো পৰিক্লেসো, জানি সোকপৰিদ্দৱো;

কামেসু অধিপন্নানং, দিস্সতে ব্যসনং বহুং.

৩৪৮. ‘‘তং মং ঞাতী অমিত্তাৱ, কিং ৱো কামেসু যুঞ্জথ;

জানাথ মং পব্বজিতং, কামেসু ভযদস্সিনিং.

৩৪৯. ‘‘ন হিৰঞ্ঞসুৱণ্ণেন, পৰিক্খীযন্তি আসৱা;

অমিত্তা ৱধকা কামা, সপত্তা সল্লবন্ধনা.

৩৫০. ‘‘তং মং ঞাতী অমিত্তাৱ, কিং ৱো কামেসু যুঞ্জথ;

জানাথ মং পব্বজিতং, মুণ্ডং সঙ্ঘাটিপাৰুতং.

৩৫১. ‘‘উত্তিট্ঠপিণ্ডো উঞ্ছো চ, পংসুকূলঞ্চ চীৱৰং;

এতং খো মম সাৰুপ্পং, অনগাৰূপনিস্সযো.

৩৫২. ‘‘ৱন্তা মহেসীহি কামা, যে দিব্বা যে চ মানুসা;

খেমট্ঠানে ৱিমুত্তা তে, পত্তা তে অচলং সুখং.

৩৫৩. ‘‘মাহং কামেহি সংগচ্ছিং, যেসু তাণং ন ৱিজ্জতি;

অমিত্তা ৱধকা কামা, অগ্গিক্খন্ধূপমা দুখা.

৩৫৪. ‘‘পৰিপন্থো এস ভযো, সৱিঘাতো সকণ্টকো;

গেধো সুৱিসমো চেসো, মহন্তো মোহনামুখো.

৩৫৫. ‘‘উপসগ্গো ভীমৰূপো, কামা সপ্পসিৰূপমা;

যে বালা অভিনন্দন্তি, অন্ধভূতা পুথুজ্জনা.

৩৫৬. ‘‘কামপঙ্কেন সত্তা হি, বহূ লোকে অৱিদ্দসূ;

পৰিযন্তং ন জানন্তি, জাতিযা মৰণস্স চ.

৩৫৭. ‘‘দুগ্গতিগমনং মগ্গং, মনুস্সা কামহেতুকং;

বহুং ৱে পটিপজ্জন্তি, অত্তনো ৰোগমাৱহং.

৩৫৮. ‘‘এৱং অমিত্তজননা, তাপনা সংকিলেসিকা;

লোকামিসা বন্ধনীযা, কামা মৰণবন্ধনা.

৩৫৯. ‘‘উম্মাদনা উল্লপনা, কামা চিত্তপ্পমাথিনো;

সত্তানং সংকিলেসায, খিপ্পং মাৰেন ওড্ডিতং.

৩৬০. ‘‘অনন্তাদীনৱা কামা, বহুদুক্খা মহাৱিসা;

অপ্পস্সাদা ৰণকৰা, সুক্কপক্খৱিসোসনা.

৩৬১. ‘‘সাহং এতাদিসং কত্ৱা, ব্যসনং কামহেতুকং;

ন তং পচ্চাগমিস্সামি, নিব্বানাভিৰতা সদা.

৩৬২. ‘‘ৰণং তৰিত্ৱা কামানং, সীতিভাৱাভিকঙ্খিনী;

অপ্পমত্তা ৱিহস্সামি, সব্বসংযোজনক্খযে.

৩৬৩. ‘‘অসোকং ৱিৰজং খেমং, অৰিযট্ঠঙ্গিকং উজুং;

তং মগ্গং অনুগচ্ছামি, যেন তিণ্ণা মহেসিনো.

৩৬৪. ‘‘ইমং পস্সথ ধম্মট্ঠং, সুভং কম্মাৰধীতৰং;

অনেজং উপসম্পজ্জ, ৰুক্খমূলম্হি ঝাযতি.

৩৬৫. ‘‘অজ্জট্ঠমী পব্বজিতা, সদ্ধা সদ্ধম্মসোভনা;

ৱিনীতুপ্পলৱণ্ণায, তেৱিজ্জা মচ্চুহাযিনী.

৩৬৬. ‘‘সাযং ভুজিস্সা অণণা, ভিক্খুনী ভাৱিতিন্দ্ৰিযা;

সব্বযোগৱিসংযুত্তা, কতকিচ্চা অনাসৱা.

৩৬৭. ‘‘তং সক্কো দেৱসঙ্ঘেন, উপসঙ্কম্ম ইদ্ধিযা;

নমস্সতি ভূতপতি, সুভং কম্মাৰধীতৰ’’ন্তি. – ইমা গাথা অভাসি;

তত্থ দহৰাহং সুদ্ধৱসনা, যং পুৰে ধম্মমস্সুণিন্তি যস্মা অহং পুব্বে দহৰা তৰুণী এৱ সুদ্ধৱসনা সুদ্ধৱত্থনিৱত্থা অলঙ্কতপ্পটিযত্তা সত্থু সন্তিকে ধম্মং অস্সোসিং. তস্সা মে অপ্পমত্তায, সচ্চাভিসমযো অহূতি যস্মা চ তস্সা মে ময্হং যথাসুতং ধম্মং পচ্চৱেক্খিত্ৱা অপ্পমত্তায উপট্ঠিতস্সতিযা সীলং অধিট্ঠহিত্ৱা ভাৱনং অনুযুঞ্জন্তিযাৱ চতুন্নং অৰিযসচ্চানং অভিসমযো ‘‘ইদং দুক্খ’’ন্তিআদিনা (পটি. ম. ১.৩২) পটিৱেধো অহোসি.

ততোহং সব্বকামেসু, ভুসং অৰতিমজ্ঝগন্তি ততো তেন কাৰণেন সত্থু সন্তিকে ধম্মস্স সুতত্তা সচ্চানঞ্চ অভিসমিতত্তা মনুস্সেসু দিব্বেসু চাতি সব্বেসুপি কামেসু ভুসং অতিৱিয অৰতিং উক্কণ্ঠিং অধিগচ্ছিং. সক্কাযস্মিং উপাদানক্খন্ধপঞ্চকে, ভযং সপ্পটিভযভাৱং ঞাণচক্খুনা দিস্ৱা, নেক্খম্মমেৱ পব্বজ্জং নিব্বানমেৱ, পীহযে পিহযামি পত্থযামি.

দাসকম্মকৰানি চাতি দাসে চ কম্মকাৰে চ, লিঙ্গৱিপল্লাসেন হেতং ৱুত্তং. গামখেত্তানীতি গামে চ পুব্বণ্ণাপৰণ্ণৱিৰুহনক্খেত্তানি চ, গামপৰিযাপন্নানি ৱা খেত্তানি. ফীতানীতি সমিদ্ধানি. ৰমণীযেতি মনুঞ্ঞে. পমোদিতেতি পমুদিতে, ভোগক্খন্ধে হিত্ৱাতি সম্বন্ধো. সাপতেয্যন্তি সন্তকং ধনং, মণিকনকৰজতাদিপৰিগ্গহৱত্থুং. অনপ্পকন্তি মহন্তং, পহাযাতি যোজনা. এৱং সদ্ধায নিক্খম্মাতি ‘‘হিত্ৱানহং ঞাতিগণ’’ন্তিআদিনা ৱুত্তপ্পকাৰেন মহন্তং ঞাতিপৰিৱট্টং মহন্তঞ্চ ভোগক্খন্ধং পহায কম্মকম্মফলানি ৰতনত্তযঞ্চাতি সদ্ধেয্যৱত্থুং সদ্ধায সদ্দহিত্ৱা ঘৰতো নিক্খম্ম, সদ্ধম্মে সুপ্পৱেদিতে সম্মাসম্বুদ্ধেন সুট্ঠু পৱেদিতে অৰিযৱিনযে অহং পব্বজিতা.

এৱং পব্বজিতায পন নেতং অস্স পতিৰূপং, যদিদং ছড্ডিতানং কামানং পচ্চাগমনং. আকিঞ্চঞ্ঞঞ্হি পত্থযেতি অহং অকিঞ্চনভাৱং অপৰিগ্গহভাৱমেৱ পত্থযামি. যো জাতৰূপৰজতং, ছড্ডেত্ৱা পুনৰাগমেতি যো পুগ্গলো সুৱণ্ণং ৰজতং অঞ্ঞম্পি ৱা কিঞ্চি ধনজাতং ছড্ডেত্ৱা পুন তং গণ্হেয্য, সো পণ্ডিতানং অন্তৰে কথং সীসং উক্খিপেয্য?

যস্মা ৰজতং জাতৰূপং ৱা, ন বোধায ন সন্তিযা ন মগ্গঞাণায ন নিব্বানায হোতীতি অত্থো. নেতং সমণসাৰুপ্পন্তি এতং জাতৰূপৰজতাদিপৰিগ্গহৱত্থু, তস্স ৱা পৰিগ্গণ্হনং সমণানং সাৰুপ্পং ন হোতি. তথা হি ৱুত্তং ‘‘ন কপ্পতি সমণানং সক্যপুত্তিযানং জাতৰূপৰজত’’ন্তিআদি (চূড়ৱ. ৪৪৬). ন এতং অৰিযদ্ধনন্তি এতং যথাৱুত্তপৰিগ্গহৱত্থু সদ্ধাদিধনং ৱিয অৰিযধম্মমযম্পি ধনং ন হোতি, ন অৰিযভাৱাৱহতো. তেনাহ ‘‘লোভন’’ন্তিআদি.

তত্থ লোভনন্তি লোভুপ্পাদনং. মদনন্তি মদাৱহং. মোহনন্তি সম্মোহজননং. ৰজৱড্ঢনন্তি ৰাগৰজাদিসংৱড্ঢনং. যেন পৰিগ্গহিতং, তস্স আসঙ্কাৱহত্তা সহ আসঙ্কায ৱত্ততীতি সাসঙ্কং, যেন পৰিগ্গহিতং, তস্স যতো কুতো আসঙ্কাৱহন্তি অত্থো. বহুআযাসন্তি সজ্জনৰক্খণাদিৱসেন বহুপৰিস্সমং. নত্থি চেত্থ ধুৱং ঠিতীতি এতস্মিং ধনে ধুৱভাৱো চ ঠিতিভাৱো চ নত্থি, চঞ্চলমনৱট্ঠিতমেৱাতি অত্থো.

এত্থ ৰত্তা পমত্তা চাতি এতস্মিং ধনে ৰত্তা সঞ্জাতৰাগা দসকুসলধম্মেসু সতিযা ৱিপ্পৱাসেন পমত্তা. সংকিলিট্ঠমনা লোভাদিসংকিলেসেন সংকিলিট্ঠচিত্তাৱ নাম হোন্তি. ততো চ অঞ্ঞমঞ্ঞম্হি ব্যাৰুদ্ধা, পুথূ কুব্বন্তি মেধগং অন্তমসো মাতাপি পুত্তেন, পুত্তোপি মাতৰাতি এৱং অঞ্ঞমঞ্ঞং পটিৰুদ্ধা হুত্ৱা পুথূ সত্তা মেধগং কলহং কৰোন্তি. তেনাহ ভগৱা – ‘‘পুন চপৰং, ভিক্খৱে, কামহেতু কামনিদানং কামাধিকৰণং…পে… মাতাপি পুত্তেন ৱিৱদতি পুত্তোপি মাতৰা ৱিৱদতী’’তিআদি (ম. নি. ১.১৬৮, ১৭৮).

ৱধোতি মৰণং. বন্ধোতি অদ্দুবন্ধনাদিবন্ধনং. পৰিক্লেসোতি হত্থচ্ছেদাদিপৰিকিলেসাপত্তি. জানীতি ধনজানি চেৱ পৰিৱাৰজানি চ. সোকপৰিদ্দৱোতি সোকো চ পৰিদেৱো চ. অধিপন্নানন্তি অজ্ঝোসিতানং. দিস্সতে ব্যসনং বহুন্তি যথাৱুত্তৱধবন্ধনাদিভেদং অৱুত্তঞ্চ দোমনস্সুপাযাসাদিং দিট্ঠধম্মিকং সম্পৰাযিকঞ্চ বহুং বহুৱিধং ব্যসনং অনত্থো কামেসু দিস্সতেৱ.

তং মং ঞাতী অমিত্তাৱ, কিং ৱো কামেসু যুঞ্জথাতি তাদিসং মং যথা কামেসু ৱিৰত্তং তুম্হে ঞাতী ঞাতকা সমানা অনত্থকামা অমিত্তা ৱিয কিং কেন কাৰণেন কামেসু যুঞ্জথ নিযোজেথ. জানাথ মং পব্বজিতং, কামেসু ভযদস্সিনিন্তি কামে ভযতো পস্সন্তিং পব্বজিতং মং আজানাথ, কিং এত্তকং তুম্হেহি অনঞ্ঞাতন্তি অধিপ্পাযো.

ন হিৰঞ্ঞসুৱণ্ণেন, পৰিক্খীযন্তি আসৱাতি কামাসৱাদযো হিৰঞ্ঞসুৱণ্ণেন ন কদাচি পৰিক্খযং গচ্ছন্তি, অথ খো তেহি এৱ পৰিৱড্ঢন্তেৱ. তেনাহ – ‘‘অমিত্তা ৱধকা কামা, সপত্তা সল্লবন্ধনা’’তি. কামা হি অহিতাৱহত্তা মেত্তিযা অভাৱেন অমিত্তা, মৰণহেতুতায উক্খিত্তাসিকৱধকসদিসত্তা ৱধকা, অনুবন্ধিত্ৱাপি অনত্থাৱহনতায ৱেৰানুবন্ধসপত্তসদিসত্তা সপত্তা, ৰাগাদীনং সল্লানং বন্ধনতো সল্লবন্ধনা.

মুণ্ডন্তি মুণ্ডিতকেসং. তত্থ তত্থ নন্তকানি গহেত্ৱা সঙ্ঘাটিচীৱৰপাৰুপনেন সঙ্ঘাটিপাৰুতং.

উত্তিট্ঠপিণ্ডোতি ৱিৱটদ্ৱাৰে ঘৰে ঘৰে পতিট্ঠিত্ৱা লভনকপিণ্ডো. উঞ্ছোতি তদত্থং উঞ্ছাচৰিযা. অনগাৰূপনিস্সযোতি অনগাৰানং পব্বজিতানং উপগন্ত্ৱা নিস্সিতব্বতো উপনিস্সযভূতো জীৱিতপৰিক্খাৰো. তঞ্হি নিস্সায পব্বজিতা জীৱন্তি.

ৱন্তাতি ছড্ডিতা. মহেসীহীতি বুদ্ধাদীহি মহেসীহি. খেমট্ঠানেতি কামযোগাদীহি অনুপদ্দৱট্ঠানভূতে নিব্বানে. তেতি মহেসযো. অচলং সুখন্তি নিব্বানসুখং পত্তা. তস্মা তং পত্থেন্তেন কামা পৰিচ্চজিতব্বাতি অধিপ্পাযো.

মাহং কামেহি সংগচ্ছিন্তি অহং কদাচিপি কামেহি ন সমাগচ্ছেয্যং. কস্মাতি চে আহ – ‘‘যেসু তাণং ন ৱিজ্জতী’’তিআদি, যেসু কামেসু উপপৰিক্খিযমানেসু একস্মিম্পি অনত্থপৰিত্তাণং নাম নত্থি. অগ্গিক্খন্ধূপমা মহাভিতাপট্ঠেন. দুখা দুক্খমট্ঠেন.

পৰিপন্থো এস ভযো যদিদং কামা নাম অৱিদিতৱিপুলানত্থাৱহত্তা. সৱিঘাতো চিত্তৱিঘাতকৰত্তা. সকণ্টকো ৱিনিৱিজ্ঝনত্তা. গেধো সুৱিসমো চেসোতি গিদ্ধিহেতুতায গেধো. সুট্ঠু ৱিসমো মহাপলিবোধো সো. দুৰতিক্কমনট্ঠেন মহন্তো. মোহনামুখো মুচ্ছাপত্তিহেতুতো.

উপসগ্গো ভীমৰূপোতি অতিভিংসনকসভাৱো, মহন্তো দেৱতূপসগ্গো ৱিয অনত্থকাদিদুক্খাৱহনতো. সপ্পসিৰূপমা কামা সপ্পটিভযট্ঠেন.

কামপঙ্কেন সত্তাতি কামসঙ্খাতেন পঙ্কেন সত্তা লগ্গা.

দুগ্গতিগমনং মগ্গন্তি নিৰযাদিঅপাযগামিনং মগ্গং. কামহেতুকন্তি কামোপভোগহেতুকং. বহুন্তি পাণাতিপাতাদিভেদেন বহুৱিধং. ৰোগমাৱহন্তি ৰুজ্জনট্ঠেন ৰোগসঙ্খাতস্স দিট্ঠধম্মিকাদিভেদস্স দুক্খস্স আৱহনকং.

এৱন্তি ‘‘অমিত্তা ৱধকা’’তিআদিনা ৱুত্তপ্পকাৰেন. অমিত্তজননাতি অমিত্তভাৱস্স নিব্বত্তনকা. তাপনাতি সন্তাপনকা, তপনীযাতি অত্থো. সংকিলেসিকাতি সংকিলেসাৱহা. লোকামিসাতি লোকে আমিসভূতা. বন্ধনিযাতি বন্ধভূতেহি সংযোজনেহি ৱড্ঢিতব্বা, সংযোজনিযাতি অত্থো. মৰণবন্ধনাতি ভৱাদীসু নিব্বত্তিনিমিত্ততায পৱত্তকাৰণতো চ মৰণৱিবন্ধনা.

উম্মাদনাতি ৱিপৰিণামধম্মানং ৱিযোগৱসেন সোকুম্মাদকৰা, ৱড্ঢিযা ৱা উপৰূপৰিমদাৱহা. উল্লপনাতি ‘‘অহো সুখং অহো সুখ’’ন্তি উদ্ধং উদ্ধং লপাপনকা. ‘‘উল্লোলনা’’তিপি পাঠো, ভত্তপিণ্ডনিমিত্তং নঙ্গুট্ঠং উল্লোলেন্তো সুনখো ৱিয আমিসহেতু সত্তে উপৰূপৰিলালনা, পৰাভৱাৱঞ্ঞাতপাপনকাতি অত্থো. চিত্তপ্পমাথিনোতি পৰিড়াহুপ্পাদনাদিনা সম্পতি আযতিঞ্চ চিত্তস্স পমথনসীলা. ‘‘চিত্তপ্পমদ্দিনো’’তি ৱা পাঠো, সো এৱত্থো. যে পন ‘‘চিত্তপ্পমাদিনো’’তি ৱদন্তি, তেসং চিত্তস্স পমাদাৱহাতি অত্থো. সংকিলেসাযাতি ৱিবাধনায উপতাপনায ৱা. খিপ্পং মাৰেন ওড্ডিতন্তি কামা নামেতে মাৰেন ওড্ডিতং কুমিনন্তি দট্ঠব্বা সত্তানং অনত্থাৱহনতো.

অনন্তাদীনৱাতি ‘‘লোভনং মদনঞ্চেত’’ন্তিআদিনা, ‘‘ইধ সীতস্স পুৰক্খতো উণ্হস্স পুৰক্খতো’’তিআদিনা (ম. নি. ১.১৬৭) চ দুক্খক্খন্ধসুত্তাদীসু ৱুত্তনযেন অপৰিযন্তাদীনৱা বহুদোসা. বহুদুক্খাতি আপাযিকাদিবহুৱিধদুক্খানুবন্ধা. মহাৱিসাতি কটুকাসয্হফলতায হলাহলাদিমহাৱিসসদিসা. অপ্পস্সাদাতি সত্থধাৰাগতমধুবিন্দু ৱিয পৰিত্তস্সাদা. ৰণকৰাতি সাৰাগাদিসংৱড্ঢকা. সুক্কপক্খৱিসোসনাতি সত্তানং অনৱজ্জকোট্ঠাসস্স ৱিনাসকা.

সাহন্তি সা অহং, হেট্ঠা ৱুত্তনযেনেৱ সত্থু সন্তিকে ধম্মং সুত্ৱা পটিলদ্ধসদ্ধা কামে পহায পব্বজিত্ৱা ঠিতাতি অত্থো. এতাদিসন্তি এৱৰূপং ৱুত্তপ্পকাৰং. কত্ৱাতি ইতি কত্ৱা, যথাৱুত্তকাৰণেনাতি অত্থো. ন তং পচ্চাগমিস্সামীতি তং মযা পুব্বে ৱন্তকামে পুন ন পৰিভুঞ্জিস্সামি. নিব্বানাভিৰতা সদাতি যস্মা পব্বজিতকালতো পট্ঠায সব্বকালং নিব্বানাভিৰতা, তস্মা ন তং পচ্চাগমিস্সামীতি যোজনা.

ৰণং তৰিত্ৱা কামানন্তি কামানং ৰণং তৰিত্ৱা, তঞ্চ মযা কাতব্বং অৰিযমগ্গসংপহাৰং কত্ৱা. সীতিভাৱাভিকঙ্খিনীতি সব্বকিলেসদৰথপৰিড়াহৱূপসমেন সীতিভাৱসঙ্খাতং অৰহত্তং অভিকঙ্খন্তী. সব্বসংযোজনক্খযেতি সব্বেসং সংযোজনানং খযভূতে নিব্বানে অভিৰতা.

যেন তিণ্ণা মহেসিনোতি যেন অৰিযমগ্গেন বুদ্ধাদযো মহেসিনো সংসাৰমহোঘং তিণ্ণা, অহম্পি তেহি গতমগ্গং অনুগচ্ছামি, সীলাদিপটিপত্তিযা অনুপাপুণামীতি অত্থো.

ধম্মট্ঠন্তি অৰিযফলধম্মে ঠিতং. অনেজন্তি পটিপ্পস্সদ্ধ এজতায অনেজন্তি লদ্ধনামং অগ্গফলং. উপসম্পজ্জাতি সম্পাদেত্ৱা অগ্গমগ্গাধিগমেন অধিগন্ত্ৱা. ঝাযতীতি তমেৱ ফলজ্ঝানং উপনিজ্ঝাযতি.

অজ্জট্ঠমী পব্বজিতাতি পব্বজিতা হুত্ৱা পব্বজিততো পট্ঠায অজ্জ অট্ঠমদিৱসো, ইতো অতীতে অট্ঠমিযং পব্বজিতাতি অত্থো. সদ্ধাতি সদ্ধাসম্পন্না. সদ্ধম্মসোভনাতি সদ্ধম্মাধিগমেন সোভনা.

ভুজিস্সাতি দাসভাৱসদিসানং কিলেসানং পহানেন ভুজিস্সা. কামচ্ছন্দাদিইণাপগমেন অণণা.

ইমা কিৰ তিস্সো গাথা পব্বজিত্ৱা অট্ঠমে দিৱসে অৰহত্তং পত্ৱা অঞ্ঞতৰস্মিং ৰুক্খমূলে ফলসমাপত্তিং সমাপজ্জিত্ৱা নিসিন্নং থেৰিং ভিক্খূনং দস্সেত্ৱা পসংসন্তেন ভগৱতা ৱুত্তা.

অথ সক্কো দেৱানমিন্দো তং পৱত্তিং দিব্বেন চক্খুনা দিস্ৱা ‘‘এৱং সত্থাৰা পসংসীযমানা অযং থেৰী যস্মা দেৱেহি চ পযিৰুপাসিতব্বা’’তি তাৱদেৱ তাৱতিংসেহি দেৱেহি সদ্ধিং উপসঙ্কমিত্ৱা অভিৱাদেত্ৱা অঞ্জলিং পগ্গয্হ অট্ঠাসি. তং সন্ধায সঙ্গীতিকাৰেহি ৱুত্তং –

‘‘তং সক্কো দেৱসঙ্ঘেন, উপসঙ্কম্ম ইদ্ধিযা;

নমস্সতি ভূতপতি, সুভং কম্মাৰধীতৰ’’ন্তি.

তত্থ তীসু কামভৱেসু ভূতানং সত্তানং পতি ইস্সৰোতি কত্ৱা ভূতপতীতি লদ্ধনামো সক্কো দেৱৰাজা দেৱসঙ্ঘেন সদ্ধিং তং সুভং কম্মাৰধীতৰং অত্তনো দেৱিদ্ধিযা উপসঙ্কম্ম নমস্সতি, পঞ্চপতিট্ঠিতেন ৱন্দতীতি অত্থো.

সুভাকম্মাৰধীতুথেৰীগাথাৱণ্ণনা নিট্ঠিতা.

ৱীসতিনিপাতৱণ্ণনা নিট্ঠিতা.