১৩. ৱীসতিনিপাতো
১. অম্বপালীথেৰীগাথাৱণ্ণনা
ৱীসতিনিপাতে কাড়কা ভমৰৱণ্ণসাদিসাতিআদিকা অম্বপালিযা থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী সিখিস্স ভগৱতো সাসনে পব্বজিত্ৱা উপসম্পন্না হুত্ৱা ভিক্খুনিসিক্খাপদং সমাদায ৱিহৰন্তী, একদিৱসং সম্বহুলাহি ভিক্খুনীহি সদ্ধিং চেতিযং ৱন্দিত্ৱা পদক্খিণং কৰোন্তী পুৰেতৰং গচ্ছন্তিযা খীণাসৱত্থেৰিযা খিপন্তিযা সহসা খেড়পিণ্ডং চেতিযঙ্গণে পতিতং, খীণাসৱত্থেৰিযা অপস্সিত্ৱা গতায অযং পচ্ছতো গচ্ছন্তী তং খেড়পিণ্ডং দিস্ৱা ‘‘কা নাম গণিকা ইমস্মিং ঠানে খেড়পিণ্ডং পাতেসী’’তি অক্কোসি. সা ভিক্খুনিকালে সীলং ৰক্খন্তী গব্ভৱাসং জিগুচ্ছিত্ৱা ওপপাতিকত্তভাৱে চিত্তং ঠপেসি. তেন চৰিমত্তভাৱে ৱেসালিযং ৰাজুয্যানে অম্বৰুক্খমূলে ওপপাতিকা হুত্ৱা নিব্বত্তি. তং দিস্ৱা উয্যানপালো নগৰং উপনেসি. অম্বৰুক্খমূলে নিব্বত্ততায সা অম্বপালীত্ৱেৱ ৱোহৰীযিত্থ. অথ নং অভিৰূপং দস্সনীযং পাসাদিকং ৱিলাসকন্ততাদিগুণৱিসেসসমুদিতং দিস্ৱা সম্বহুলা ৰাজকুমাৰা অত্তনো অত্তনো পৰিগ্গহং কাতুকামা অঞ্ঞমঞ্ঞং কলহং অকংসু. তেসং কলহৱূপসমত্থং তস্সা কম্মসঞ্চোদিতা ৱোহাৰিকা ‘‘সব্বেসং হোতূ’’তি গণিকাট্ঠানে ঠপেসুং. সা সত্থৰি পটিলদ্ধসদ্ধা অত্তনো উয্যানে ৱিহাৰং কত্ৱা বুদ্ধপ্পমুখস্স ভিক্খুসঙ্ঘস্স নিয্যাদেত্ৱা পচ্ছা অত্তনো পুত্তস্স ৱিমলকোণ্ডঞ্ঞত্থেৰস্স সন্তিকে ধম্মং সুত্ৱা পব্বজিত্ৱা ৱিপস্সনায কম্মং কৰোন্তী অত্তনো সৰীৰস্স জৰাজিণ্ণভাৱং নিস্সায সংৱেগজাতা সঙ্খাৰানং অনিচ্চতং ৱিভাৱেন্তী –
২৫২. ‘‘কাড়কা ভমৰৱণ্ণসাদিসা, ৱেল্লিতগ্গা মম মুদ্ধজা অহুং;
তে জৰায সাণৱাকসাদিসা, সচ্চৱাদিৱচনং অনঞ্ঞথা.
২৫৩. ‘‘ৱাসিতোৱ সুৰভী কৰণ্ডকো, পুপ্ফপূৰ মম উত্তমঙ্গজো;
তং জৰাযথ সলোমগন্ধিকং, সচ্চৱাদিৱচনং অনঞ্ঞথা.
২৫৪. ‘‘কাননংৱ সহিতং সুৰোপিতং, কোচ্ছসূচিৱিচিতগ্গসোভিতং;
তং জৰায ৱিৰলং তহিং তহিং, সচ্চৱাদিৱচনং অনঞ্ঞথা.
২৫৫. ‘‘কণ্হখন্ধকসুৱণ্ণমণ্ডিতং, সোভতে সুৱেণীহিলঙ্কতং;
তং জৰায খলিতং সিৰং কতং, সচ্চৱাদিৱচনং অনঞ্ঞথা.
২৫৬. ‘‘চিত্তকাৰসুকতাৱ লেখিকা, সোভৰে সু ভমুকা পুৰে মম;
তা জৰায ৱলিভিপ্পলম্বিতা, সচ্চৱাদিৱচনং অনঞ্ঞথা.
২৫৭. ‘‘ভস্সৰা সুৰুচিৰা যথা মণী, নেত্তহেসুমভিনীলমাযতা;
তে জৰাযভিহতা ন সোভৰে, সচ্চৱাদিৱচনং অনঞ্ঞথা.
২৫৮. ‘‘সণ্হতুঙ্গসদিসী চ নাসিকা, সোভতে সু অভিযোব্বনং পতি;
সা জৰায উপকূলিতা ৱিয, সচ্চৱাদিৱচনং অনঞ্ঞথা.
২৫৯. ‘‘কঙ্কণংৱ সুকতং সুনিট্ঠিতং, সোভৰে সু মম কণ্ণপাড়িযো;
তা জৰায ৱলিভিপ্পলম্বিতা, সচ্চৱাদিৱচনং অনঞ্ঞথা.
২৬০. ‘‘পত্তলীমকুলৱণ্ণসাদিসা, সোভৰে সু দন্তা পুৰে মম;
তে জৰায খণ্ডিতা চাসিতা, সচ্চৱাদিৱচনং অনঞ্ঞথা.
২৬১. ‘‘কাননম্হি ৱনসণ্ডচাৰিনী, কোকিলাৱ মধুৰং নিকূজিহং;
তং জৰায খলিতং তহিং তহিং, সচ্চৱাদিৱচনং অনঞ্ঞথা.
২৬২. ‘‘সণ্হকম্বুৰিৱ সুপ্পমজ্জিতা, সোভতে সু গীৱা পুৰে মম;
সা জৰায ভগ্গা ৱিনামিতা, সচ্চৱাদিৱচনং অনঞ্ঞথা.
২৬৩. ‘‘ৱট্টপলিঘসদিসোপমা উভো, সোভৰে সু বাহা পুৰে মম;
তা জৰায যথা পাটলিব্বলিতা, সচ্চৱাদিৱচনং অনঞ্ঞথা.
২৬৪. ‘‘সণ্হমুদ্দিকসুৱণ্ণমণ্ডিতা, সোভৰে সু হত্থা পুৰে মম;
তে জৰায যথা মূলমূলিকা, সচ্চৱাদিৱচনং অনঞ্ঞথা.
২৬৫. ‘‘পীনৱট্টসহিভুগ্গতা উভো, সোভৰে সু থনকা পুৰে মম;
থেৱিকীৱ লম্বন্তি নোদকা, সচ্চৱাদিৱচনং অনঞ্ঞথা.
২৬৬. ‘‘কঞ্চনস্স ফলকংৱ সম্মট্ঠং, সোভতে সু কাযো পুৰে মম;
সো ৱলীহি সুখুমাহি ওততো, সচ্চৱাদিৱচনং অনঞ্ঞথা.
২৬৭. ‘‘নাগভোগসদিসোপমা উভো, সোভৰে সু ঊৰূ পুৰে মম;
তে জৰায যথা ৱেড়ুনাড়িযো, সচ্চৱাদিৱচনং অনঞ্ঞথা.
২৬৮. ‘‘সণ্হনূপুৰসুৱণ্ণমণ্ডিতা, সোভৰে সু জঙ্ঘা পুৰে মম;
তা জৰায তিলদণ্ডকাৰিৱ, সচ্চৱাদিৱচনং অনঞ্ঞথা.
২৬৯. ‘‘তূলপুণ্ণসদিসোপমা উভো, সোভৰে সু পাদা পুৰে মম;
তে জৰায ফুটিতা ৱলীমতা, সচ্চৱাদিৱচনং অনঞ্ঞথা.
২৭০. ‘‘এদিসো অহু অযং সমুস্সযো, জজ্জৰো বহুদুখানমালযো;
সোপলেপপতিতো জৰাঘৰো, সচ্চৱাদিৱচনং অনঞ্ঞথা’’তি. –
ইমা গাথাযো অভাসি.
তত্থ কাড়কাতি কাড়কৱণ্ণা. ভমৰৱণ্ণসাদিসাতি কাড়কা হোন্তাপি ভমৰসদিসৱণ্ণা, সিনিদ্ধনীলাতি অত্থো. ৱেল্লিতগ্গাতি কুঞ্চিতগ্গা, মূলতো পট্ঠায যাৱ অগ্গা কুঞ্চিতা ৱেল্লিতাতি অত্থো. মুদ্ধজাতি কেসা. জৰাযাতি জৰাহেতু জৰায উপহতসোভা. সাণৱাকসাদিসাতি সাণসদিসা ৱাকসদিসা চ, সাণৱাকসদিসা চেৱ মকচিৱাকসদিসা চাতিপি অত্থো. সচ্চৱাদিৱচনং অনঞ্ঞথাতি সচ্চৱাদিনো অৱিতথৱাদিনো সম্মাসম্বুদ্ধস্স ‘‘সব্বং ৰূপং অনিচ্চং জৰাভিভূত’’ন্তিআদিৱচনং অনঞ্ঞথা যথাভূতমেৱ, ন তত্থ ৱিতথং অত্থীতি.
ৱাসিতোৱ সুৰভী কৰণ্ডকোতি পুপ্ফগন্ধৱাসচুণ্ণাদীহি ৱাসিতো ৱাসং গাহাপিতো পসাধনসমুগ্গো ৱিয সুগন্ধি. পুপ্ফপূৰ মম উত্তমঙ্গজোতি চম্পকসুমনমল্লিকাদীহি পুপ্ফেহি পূৰিতো পুব্বে মম কেসকলাপো নিম্মলোতি অত্থো. তন্তি উত্তমঙ্গজং. অথ পচ্ছা এতৰহি সলোমগন্ধিকং পাকতিকলোমগন্ধমেৱ জাতং. অথ ৱা সলোমগন্ধিকন্তি মেণ্ডকলোমেহি সমানগন্ধং. ‘‘এড়কলোমগন্ধ’’ন্তিপি ৱদন্তি.
কাননংৱ সহিতং সুৰোপিতন্তি সুট্ঠু ৰোপিতং সহিতং ঘনসন্নিৱেসং উদ্ধমেৱ উট্ঠিতং উজুকদীঘসাখং উপৱনং ৱিয. কোচ্ছসূচিৱিচিতগ্গসোভিতন্তি পুব্বে কোচ্ছেন সুৱণ্ণসূচিযা চ কেসজটাৱিজটনেন ৱিচিতগ্গং হুত্ৱা সোভিতং, ঘনভাৱেন ৱা কোচ্ছসদিসং হুত্ৱা পণদন্তসূচীহি ৱিচিতগ্গতায সোভিতং. তন্তি উত্তমঙ্গজং. ৱিৰলং তহিং তহিন্তি তত্থ তত্থ ৱিৰলং ৱিলূনকেসং.
কণ্হখন্ধকসুৱণ্ণমণ্ডিতন্তি সুৱণ্ণৱজিৰাদীহি ৱিভূসিতং কণ্হকেসপুঞ্জকং. যে পন ‘‘সণ্হকণ্ডকসুৱণ্ণমণ্ডিত’’ন্তি পঠন্তি, তেসং সণ্হাহি সুৱণ্ণসূচীহি জটাৱিজটনেন মণ্ডিতন্তি অত্থো. সোভতে সুৱেণীহিলঙ্কতন্তি সুন্দৰেহি ৰাজৰুক্খমালা সদিসেহি কেসৱেণীহি অলঙ্কতং হুত্ৱা পুব্বে ৱিৰাজতে. তং জৰায খলিতং সিৰং কতন্তি তং তথা সোভিতং সিৰং ইদানি জৰায খলিতং খণ্ডিতাখণ্ডিতং ৱিলূনকেসং কতং.
চিত্তকাৰসুকতাৱ লেখিকাতি চিত্তকাৰেন সিপ্পিনা নীলায ৱণ্ণধাতুযা সুট্ঠু কতা লেখা ৱিয সোভতে. সু ভমুকা পুৰে মমাতি সুন্দৰা ভমুকা পুব্বে মম সোভনং গতা. ৱলিভিপ্পলম্বিতাতি নলাটন্তে উপ্পন্নাহি ৱলীহি পলম্বন্তা ঠিতা.
ভস্সৰাতি ভাসুৰা. সুৰুচিৰাতি সুট্ঠু ৰুচিৰা. যথা মণীতি মণিমুদ্দিকা ৱিয. নেত্তহেসুন্তি সুনেত্তা অহেসুং. অভিনীলমাযতাতি অভিনীলা হুত্ৱা আযতা. তেতি নেত্তা. জৰাযভিহতাতি জৰায অভিহতা.
সণ্হতুঙ্গসদিসী চাতি সণ্হা তুঙ্গা সেসমুখাৱযৱানং অনুৰূপা চ. সোভতেতি ৱট্টেত্ৱা ঠপিতহৰিতালৱট্টি ৱিয মম নাসিকা সোভতে. সু অভিযোব্বনং পতীতি সুন্দৰে অভিনৱযোব্বনকালে সা নাসিকা ইদানি জৰায নিৱাৰিতসোভতায পৰিসেদিতা ৱিয ৱৰত্তা ৱিয চ জাতা.
কঙ্কণংৱ সুকতং সুনিট্ঠিতন্তি সুপৰিকম্মকতং সুৱণ্ণকঙ্কণং ৱিয ৱট্টুলভাৱং সন্ধায ৱদতি. সোভৰেতি সোভন্তে. ‘‘সোভন্তে’’তি ৱা পাঠো. সুইতি নিপাতমত্তং. কণ্ণপাড়িযোতি কণ্ণগন্ধা. ৱলিভিপ্পলম্বিতাতি তহিং তহিং উপ্পন্নৱলীহি ৱলিতা হুত্ৱা ৱট্টনিযা পণামিতৱত্থখন্ধা ৱিয ভস্সন্তা ওলম্বন্তি.
পত্তলীমকুলৱণ্ণসাদিসাতি কদলিমকুলসদিসৱণ্ণসণ্ঠানা. খণ্ডিতাতি ভেদনপতনেহি খণ্ডিতা খণ্ডভাৱং গতা. অসিতাতি ৱণ্ণভেদেন অসিতভাৱং গতা.
কাননম্হি ৱনসণ্ডচাৰিনী, কোকিলাৱ মধুৰং নিকূজিহন্তি ৱনসণ্ডে গোচৰচৰণেন ৱনসণ্ডচাৰিনী কাননে অনুসংগীতনিৱাসিনী কোকিলা ৱিয মধুৰালাপং নিকূজিহং. তন্তি নিকূজিতং আলাপং. খলিতং তহিং তহিন্তি খণ্ডদন্তাদিভাৱেন তত্থ তত্থ পক্খলিতং জাতং.
সণ্হকম্বুৰিৱ সুপ্পমজ্জিতাতি সুট্ঠু পমজ্জিতা সণ্হা সুৱণ্ণসঙ্খা ৱিয. ভগ্গা ৱিনামিতাতি মংসপৰিক্খযেন ৱিভূতসিৰাজালতায ভগ্গা হুত্ৱা ৱিনতা.
ৱট্টপলিঘসদিসোপমাতি ৱট্টেন পলিঘদণ্ডেন সমসমা. তাতি তা উভোপি বাহাযো. যথা পাটলিব্বলিতাতি জজ্জৰভাৱেন পলিতপাটলিসাখাসদিসা.
সণ্হমুদ্দিকসুৱণ্ণমণ্ডিতাতি সুৱণ্ণমযাহি মট্ঠভাসুৰাহি মুদ্দিকাহি ৱিভূসিতা. যথা মূলমূলিকাতি মূলককণ্ডসদিসা.
পীনৱট্টসহিতুগ্গতাতি পীনা ৱট্টা অঞ্ঞমঞ্ঞং সহিতাৱ হুত্ৱা উগ্গতা উদ্ধমুখা. সোভতে সু থনকা পুৰে মমাতি মম উভোপি থনা যথাৱুত্তৰূপা হুত্ৱা সুৱণ্ণকলসিযো ৱিয সোভিংসু. পুথুত্তে হি ইদং একৱচনং, অতীতত্থে চ ৱত্তমানৱচনং. থেৱিকীৱ লম্বন্তি নোদকাতি তে উভোপি মে থনা নোদকা গলিতজলা ৱেণুদণ্ডকে ঠপিতউদকভস্মা ৱিয লম্বন্তি.
কঞ্চনফলকংৱ সম্মট্ঠন্তি জাতিহিঙ্গুলকেন মক্খিত্ৱা চিৰপৰিমজ্জিতসোৱণ্ণফলকং ৱিয সোভতে. সো ৱলীহি সুখুমাহি ওততোতি সো মম কাযো ইদানি সুখুমাহি ৱলীহি তহিং তহিং ৱিততো ৱলিত্তচতং আপন্নো.
নাগভোগসদিসোপমাতি হত্থিনাগস্স হত্থেন সমসমা. হত্থো হি ইধ ভুঞ্জতি এতেনাতি ভোগোতি ৱুত্তো. তেতি ঊৰুযো. যথা ৱেড়ুনাড়িযোতি ইদানি ৱেড়ুপব্বসদিসা অহেসুং.
সণ্হনূপুৰসুৱণ্ণমণ্ডিতাতি সিনিদ্ধমট্ঠেহি সুৱণ্ণনূপুৰেহি ৱিভূসিতা. জঙ্ঘাতি অট্ঠিজঙ্ঘাযো. তাতি তা জঙ্ঘাযো. তিলদণ্ডকাৰিৱাতি অপ্পমংসলোহিতত্তা কিসভাৱেন লূনাৱসিট্ঠৱিসুক্খতিলদণ্ডকা ৱিয অহেসুং. ৰ-কাৰো পদসন্ধিকৰো.
তূলপুণ্ণসদিসোপমাতি মুদুসিনিদ্ধভাৱেন সিম্বলিতূলপুণ্ণপলিগুণ্ঠিতউপাহনসদিসা. তে মম পাদা ইদানি ফুটিতা ফলিতা, ৱলীমতা ৱলিমন্তো জাতা.
এদিসোতি এৱৰূপো. অহু অহোসি যথাৱুত্তপ্পকাৰো. অযং সমুস্সযোতি অযং মম কাযো. জজ্জৰোতি সিথিলাবন্ধো. বহুদুখানমালযোতি জৰাদিহেতুকানং বহূনং দুক্খানং আলযভূতো. সোপলেপপতিতোতি সো অযং সমুস্সযো অপলেপপতিতো অভিসঙ্খাৰালেপপৰিক্খযেন পতিতো পাতাভিমুখোতি অত্থো. সোপি অলেপপতিতোতি ৱা পদৱিভাগো, সো এৱত্থো. জৰাঘৰোতি জিণ্ণঘৰসদিসো. জৰায ৱা ঘৰভূতো অহোসি. তস্মা সচ্চৱাদিনো ধম্মানং যথাভূতং সভাৱং সম্মদেৱ ঞত্ৱা কথনতো অৱিতথৱাদিনো সম্মাসম্বুদ্ধস্স মম সত্থুৱচনং অনঞ্ঞথা.
এৱং অযং থেৰী অত্তনো অত্তভাৱে অনিচ্চতায সল্লক্খণমুখেন সব্বেসুপি তেভূমকধম্মেসু অনিচ্চতং উপধাৰেত্ৱা তদনুসাৰেন তত্থ দুক্খলক্খণং অনত্তলক্খণঞ্চ আৰোপেত্ৱা ৱিপস্সনং উস্সুক্কাপেন্তী মগ্গপটিপাটিযা অৰহত্তং পাপুণি. তেন ৱুত্তং অপদানে (অপ. থেৰী ২.৪.২০৪-২১৯) –
‘‘যো ৰংসিফুসিতাৱেড়ো, ফুস্সো নাম মহামুনি;
তস্সাহং ভগিনী আসিং, অজাযিং খত্তিযে কুলে.
‘‘তস্স ধম্মং সুণিত্ৱাহং, ৱিপ্পসন্নেন চেতসা;
মহাদানং দদিত্ৱান, পত্থযিং ৰূপসম্পদং.
‘‘একতিংসে ইতো কপ্পে, সিখী লোকগ্গনাযকো;
উপ্পন্নো লোকপজ্জোতো, তিলোকসৰণো জিনো.
‘‘তদাৰুণপুৰে ৰম্মে, ব্ৰহ্মঞ্ঞকুলসম্ভৱা;
ৱিমুত্তচিত্তং কুপিতা, ভিক্খুনিং অভিসাপযিং.
‘‘ৱেসিকাৱ অনাচাৰা, জিনসাসনদূসিকা;
এৱং অক্কোসযিত্ৱান, তেন পাপেন কম্মুনা.
‘‘দাৰুণং নিৰযং গন্ত্ৱা, মহাদুক্খসমপ্পিতা;
ততো চুতা মনুস্সেসু, উপপন্না তপস্সিনী.
‘‘দসজাতিসহস্সানি, গণিকত্তমকাৰযিং;
তম্হা পাপা ন মুচ্চিস্সং, ভুত্ৱা দুট্ঠৱিসং যথা.
‘‘ব্ৰহ্মচৰিযমসেৱিস্সং, কস্সপে জিনসাসনে;
তেন কম্মৱিপাকেন, অজাযিং তিদসে পুৰে.
‘‘পচ্ছিমে ভৱে সম্পত্তে, অহোসিং ওপপাতিকা;
অম্বসাখন্তৰে জাতা, অম্বপালীতি তেনহং.
‘‘পৰিৱুতা পাণকোটীহি, পব্বজিং জিনসাসনে;
পত্তাহং অচলং ঠানং, ধীতা বুদ্ধস্স ওৰসা.
‘‘ইদ্ধীসু চ ৱসী হোমি, সোতধাতুৱিসুদ্ধিযা;
চেতোপৰিযঞাণস্স, ৱসী হোমি মহামুনি.
‘‘পুব্বেনিৱাসং জানামি, দিব্বচক্খু ৱিসোধিতং;
সব্বাসৱপৰিক্খীণা, নত্থি দানি পুনব্ভৱো.
‘‘অত্থধম্মনিৰুত্তীসু, পটিভানে তথেৱ চ;
ঞাণং মে ৱিমলং সুদ্ধং, বুদ্ধসেট্ঠস্স ৱাহসা.
‘‘কিলেসা ঝাপিতা ময্হং, ভৱা সব্বে সমূহতা;
নাগীৱ বন্ধনং ছেত্ৱা, ৱিহৰামি অনাসৱা.
‘‘স্ৱাগতং ৱত মে আসি, বুদ্ধসেট্ঠস্স সন্তিকে;
তিস্সো ৱিজ্জা অনুপ্পত্তা, কতং বুদ্ধস্স সাসনং.
‘‘পটিসম্ভিদা চতস্সো, ৱিমোক্খাপি চ অট্ঠিমে;
ছড়ভিঞ্ঞা সচ্ছিকতা, কতং বুদ্ধস্স সাসন’’ন্তি.
অৰহত্তং পন পত্ৱা অত্তনো পটিপত্তিং পচ্চৱেক্খিত্ৱা উদানৱসেন তা এৱ গাথা পচ্চুদাহাসীতি.
অম্বপালীথেৰীগাথাৱণ্ণনা নিট্ঠিতা.
২. ৰোহিনীথেৰীগাথাৱণ্ণনা
সমণাতি ভোতি সুপীতিআদিকা ৰোহিনিযা থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী ইতো একনৱুতিকপ্পে ৱিপস্সিস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্ৱা, একদিৱসং বন্ধুমতীনগৰে ভগৱন্তং পিণ্ডায চৰন্তং দিস্ৱা পত্তং গহেত্ৱা পূৱস্স পূৰেত্ৱা ভগৱতো দত্ৱা পীতিসোমনস্সজাতা পঞ্চপতিট্ঠিতেন ৱন্দি. সা তেন পুঞ্ঞকম্মেন দেৱমনুস্সেসু সংসৰন্তী অনুক্কমেন উপচিতৱিমোক্খসম্ভাৰা হুত্ৱা ইমস্মিং বুদ্ধুপ্পাদে ৱেসালিযং মহাৱিভৱস্স ব্ৰাহ্মণস্স গেহে নিব্বত্তিত্ৱা ৰোহিনীতি লদ্ধনামা ৱিঞ্ঞুতং পত্ৱা, সত্থৰি ৱেসালিযং ৱিহৰন্তে ৱিহাৰং গন্তৱা ধম্মং সুত্ৱা সোতাপন্না হুত্ৱা মাতাপিতূনং ধম্মং দেসেত্ৱা সাসনে পসাদং উপ্পাদেত্ৱা তে অনুজানাপেত্ৱা সযং পব্বজিত্ৱা ৱিপস্সনায কম্মং কৰোন্তী ন চিৰস্সেৱ সহ পটিসম্ভিদাহি অৰহত্তং পাপুণি. তেন ৱুত্তং –
‘‘নগৰে বন্ধুমতিযা, ৱিপস্সিস্স মহেসিনো;
পিণ্ডায ৱিচৰন্তস্স, পূৱেদাসিমহং তদা.
‘‘তেন কম্মেন সুকতেন, চেতনাপণিধীহি চ;
তত্থ চিত্তং পসাদেত্ৱা, তাৱতিংসমগচ্ছহং.
‘‘ছত্তিংসদেৱৰাজূনং, মহেসিত্তমকাৰযিং;
পঞ্ঞাসচক্কৱত্তীনং, মহেসিত্তমকাৰযিং.
‘‘মনসা পত্থিতা নাম, সব্বা ময্হং সমিজ্ঝথ;
সম্পত্তিং অনুভোত্ৱান, দেৱেসু মনুজেসু চ.
‘‘পচ্ছিমে ভৱসম্পত্তে, জাতো ৱিপ্পকুলে অহং;
ৰোহিনী নাম নামেন, ঞাতকেহি পিযাযিতা.
‘‘ভিক্খূনং সন্তিকং গন্ত্ৱা, ধম্মং সুত্ৱা যথাতথং;
সংৱিগ্গমানসা হুত্ৱা, পব্বজিং অনগাৰিযং.
‘‘যোনিসো পদহন্তীনং, অৰহত্তমপাপুণিং;
একনৱুতিতো কপ্পে, যং দানমদদিং তদা;
দুগ্গতিং নাভিজানামি, পূৱদানস্সিদং ফলং.
‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.
অৰহত্তং পন পত্ৱা অত্তনো পটিপত্তিং পচ্চৱেক্খিত্ৱা পুব্বে সোতাপন্নকালে পিতৰা অত্তনা চ ৱচনপটিৱচনৱসেন ৱুত্তগাথা উদানৱসেন ভাসন্তী –
২৭১. ‘‘সমণাতি ভোতি সুপি, সমণাতি পবুজ্ঝসি;
সমণানেৱ কিত্তেসি, সমণী নূন ভৱিস্সসি.
২৭২. ‘‘ৱিপুলং অন্নঞ্চ পানঞ্চ, সমণানং পৱেচ্ছসি;
ৰোহিনী দানি পুচ্ছামি, কেন তে সমণা পিযা.
২৭৩. ‘‘অকম্মকামা অলসা, পৰদত্তূপজীৱিনো;
আসংসুকা সাদুকামা, কেন তে সমণা পিযা.
২৭৪. ‘‘চিৰস্সং ৱত মং তাত, সমণানং পৰিপুচ্ছসি;
তেসং তে কিত্তযিস্সামি, পঞ্ঞাসীলপৰক্কমং.
২৭৫. ‘‘কম্মকামা অনলসা, কম্মসেট্ঠস্স কাৰকা;
ৰাগং দোসং পজহন্তি, তেন মে সমণা পিযা.
২৭৬. ‘‘তীণি পাপস্স মূলানি, ধুনন্তি সুচিকাৰিনো;
সব্বং পাপং পহীনেসং, তেন মে সমণা পিযা.
২৭৭. ‘‘কাযকম্মং সুচি নেসং, ৱচীকম্মঞ্চ তাদিসং;
মনোকম্মং সুচি নেসং, তেন মে সমণা পিযা.
২৭৮. ‘‘ৱিমলা সঙ্খমুত্তাৱ, সুদ্ধা সন্তৰবাহিৰা;
পুণ্ণা সুক্কান ধম্মানং, তেন মে সমণা পিযা.
২৭৯. ‘‘বহুস্সুতা ধম্মধৰা, অৰিযা ধম্মজীৱিনো;
অত্থং ধম্মঞ্চ দেসেন্তি, তেন মে সমণা পিযা.
২৮০. ‘‘বহুস্সুতা ধম্মধৰা, অৰিযা ধম্মজীৱিনো;
একগ্গচিত্তা সতিমন্তো, তেন মে সমণা পিযা.
২৮১. ‘‘দূৰঙ্গমা সতিমন্তো, মন্তভাণী অনুদ্ধতা;
দুক্খস্সন্তং পজানন্তি, তেন মে সমণা পিযা.
২৮২. ‘‘যস্মা গামা পক্কমন্তি, ন ৱিলোকেন্তি কিঞ্চনং;
অনপেক্খাৱ গচ্ছন্তি, তেন মে সমণা পিযা.
২৮৩. ‘‘ন তে সং কোট্ঠে ওপেন্তি, ন কুম্ভিং ন খড়োপিযং;
পৰিনিট্ঠিতমেসানা, তেন মে সমণা পিযা.
২৮৪. ‘‘ন তে হিৰঞ্ঞং গণ্হন্তি, ন সুৱণ্ণং ন ৰূপিযং;
পচ্চুপ্পন্নেন যাপেন্তি, তেন মে সমণা পিযা.
২৮৫. ‘‘নানাকুলা পব্বজিতা, নানাজনপদেহি চ;
অঞ্ঞমঞ্ঞং পিহযন্তি, তেন মে সমণা পিযা.
২৮৬. ‘‘অত্থায ৱত নো ভোতি, কুলে জাতাসি ৰোহিনী;
সদ্ধা বুদ্ধে চ ধম্মে চ, সঙ্ঘে চ তিব্বগাৰৱা.
২৮৭. ‘‘তুৱঞ্হেতং পজানাসি, পুঞ্ঞক্খেত্তং অনুত্তৰং;
অম্হম্পি এতে সমণা, পটিগ্গণ্হন্তি দক্খিণং.
২৮৮. ‘‘পতিট্ঠিতো হেত্থ যঞ্ঞো, ৱিপুলো নো ভৱিস্সতি;