৪. সুন্দৰীথেৰীগাথাৱণ্ণনা

পেতানি ভোতি পুত্তানীতিআদিকা সুন্দৰিযা থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী ইতো একতিংসকপ্পে ৱেস্সভুস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্ৱা একদিৱসং সত্থাৰং পিণ্ডায চৰন্তং দিস্ৱা পসন্নমানসা ভিক্খং দত্ৱা পঞ্চপতিট্ঠিতেন ৱন্দি. সত্থা তস্সা চিত্তপ্পসাদং ঞত্ৱা অনুমোদনং কত্ৱা পক্কামি. সা তেন পুঞ্ঞকম্মেন তাৱতিংসেসু নিব্বত্তিত্ৱা তত্থ যাৱতাযুকং ঠত্ৱা দিব্বসম্পত্তিং অনুভৱিত্ৱা ততো চুতা অপৰাপৰং সুগতীসুযেৱ সংসৰন্তী পৰিপক্কঞাণা হুত্ৱা ইমস্মিং বুদ্ধুপ্পাদে বাৰাণসিযং সুজাতস্স নাম ব্ৰাহ্মণস্স ধীতা হুত্ৱা নিব্বত্তি. তস্সা ৰূপসম্পত্তিযা সুন্দৰীতি নামং অহোসি. ৱযপ্পত্তকালে চস্সা কনিট্ঠভাতা কালমকাসি. অথস্সা পিতা পুত্তসোকেন অভিভূতো তত্থ তত্থ ৱিচৰন্তো ৱাসিট্ঠিত্থেৰিযা সমাগন্ত্ৱা তং সোকৱিনোদনকাৰণং পুচ্ছন্তো ‘‘পেতানি ভোতি পুত্তানী’’তিআদিকা দ্ৱে গাথা অভাসি. থেৰী তং সোকাভিভূতং ঞত্ৱা সোকং ৱিনোদেতুকামা ‘‘বহূনি পুত্তসতানী’’তিআদিকা দ্ৱে গাথা ৱত্ৱা অত্তনো অসোকভাৱং কথেসি. তং সুত্ৱা ব্ৰাহ্মণো ‘‘কথং ত্ৱং, অয্যে, এৱং অসোকা জাতা’’তি আহ. তস্স থেৰী ৰতনত্তযগুণং কথেসি.

অথ ব্ৰাহ্মণো ‘‘কুহিং সত্থা’’তি পুচ্ছিত্ৱা ‘‘ইদানি মিথিলাযং ৱিহৰতী’’তি তং সুত্ৱা তাৱদেৱ ৰথং যোজেত্ৱা ৰথেন মিথিলং গন্ত্ৱা সত্থাৰং উপসঙ্কমিত্ৱা ৱন্দিত্ৱা সম্মোদনীযং কথং কত্ৱা একমন্তং নিসীদি. তস্স সত্থা ধম্মং দেসেসি. সো ধম্মং সুত্ৱা পটিলদ্ধসদ্ধো পব্বজিত্ৱা ৱিপস্সনং পট্ঠপেত্ৱা ঘটেন্তো ৱাযমন্তো ততিযে দিৱসে অৰহত্তং পাপুণি. অথ সাৰথি ৰথং আদায বাৰাণসিং গন্ত্ৱা ব্ৰাহ্মণিযা তং পৱত্তিং আৰোচেসি. সুন্দৰী অত্তনো পিতু পব্বজিতভাৱং সুত্ৱা, ‘‘অম্ম, অহম্পি পব্বজিস্সামী’’তি মাতৰং আপুচ্ছি. মাতা ‘‘যং ইমস্মিং গেহে ভোগজাতং, সব্বং তং তুয্হং সন্তকং, ত্ৱং ইমস্স কুলস্স দাযাদিকা পটিপজ্জ, ইমং সব্বভোগং পৰিভুঞ্জ, মা পব্বজী’’তি আহ. সা ‘‘ন ময্হং ভোগেহি অত্থো, পব্বজিস্সামেৱাহং, অম্মা’’তি মাতৰং অনুজানাপেত্ৱা মহতিং সম্পত্তিং খেড়পিণ্ডং ৱিয ছড্ডেত্ৱা পব্বজি. পব্বজিত্ৱা চ সিক্খমানাযেৱ হুত্ৱা ৱিপস্সনং ৱড্ঢেত্ৱা ঘটেন্তী ৱাযমন্তী হেতুসম্পন্নতায ঞাণস্স পৰিপাকং গতত্তা সহ পটিসম্ভিদাহি অৰহত্তং পাপুণি. তেন ৱুত্তং অপদানে –

‘‘পিণ্ডপাতং চৰন্তস্স, ৱেস্সভুস্স মহেসিনো;

কটচ্ছুভিক্খমুগ্গয্হ, বুদ্ধসেট্ঠস্সদাসহং.

‘‘পটিগ্গহেত্ৱা সম্বুদ্ধো, ৱেস্সভূ লোকনাযকো;

ৱীথিযা সণ্ঠিতো সত্থা, অকা মে অনুমোদনং.

‘‘কটচ্ছুভিক্খং দত্ৱান, তাৱতিংসং গমিস্সসি;

ছত্তিংসদেৱৰাজূনং, মহেসিত্তং কৰিস্সসি.

‘‘পঞ্ঞাসং চক্কৱত্তীনং, মহেসিত্তং কৰিস্সসি;

মনসা পত্থিতং সব্বং, পটিলচ্ছসি সব্বদা.

‘‘সম্পত্তিং অনুভোত্ৱান, পব্বজিস্সসি কিঞ্চনা;

সব্বাসৱে পৰিঞ্ঞায, নিব্বাযিস্সসিনাসৱা.

‘‘ইদং ৱত্ৱান সম্বুদ্ধো, ৱেস্সভূ লোকনাযকো;

নভং অব্ভুগ্গমী ৱীৰো, হংসৰাজাৱ অম্বৰে.

‘‘সুদিন্নং মে দানৱৰং, সুযিট্ঠা যাগসম্পদা;

কটচ্ছুভিক্খং দত্ৱান, পত্তাহং অচলং পদং.

‘‘একতিংসে ইতো কপ্পে, যং দানমদদিং তদা;

দুগ্গতিং নাভিজানামি, ভিক্খাদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা ফলসুখেন নিব্বানসুখেন চ ৱিহৰন্তী অপৰভাগে ‘‘সত্থু পুৰতো সীহনাদং নদিস্সামী’’তি উপজ্ঝাযং আপুচ্ছিত্ৱা বাৰাণসিতো নিক্খমিত্ৱা সম্বহুলাহি ভিক্খুনীহি সদ্ধিং অনুক্কমেন সাৱত্থিং গন্ত্ৱা সত্থু সন্তিকং উপসঙ্কমিত্ৱা সত্থাৰং ৱন্দিত্ৱা একমন্তং ঠিতা সত্থাৰা কতপটিসন্থাৰা সত্থু ওৰসধীতুভাৱাদিৱিভাৱনেন অঞ্ঞং ব্যাকাসি. অথস্সা মাতৰং আদিং কত্ৱা সব্বো ঞাতিগণো পৰিজনো চ পব্বজি. সা অপৰভাগে অত্তনো পটিপত্তিং পচ্চৱেক্খিত্ৱা পিতৰা ৱুত্তগাথং আদিং কত্ৱা উদানৱসেন –

৩১৩. ‘‘পেতানি ভোতি পুত্তানি, খাদমানা তুৱং পুৰে;

তুৱং দিৱা চ ৰত্তো চ, অতীৱ পৰিতপ্পসি.

৩১৪. ‘‘সাজ্জ সব্বানি খাদিত্ৱা, সতপুত্তানি ব্ৰাহ্মণী;

ৱাসেট্ঠি কেন ৱণ্ণেন, ন বাড়্হং পৰিতপ্পসি.

৩১৫. ‘‘বহূনি পুত্তসতানি, ঞাতিসঙ্ঘসতানি চ;

খাদিতানি অতীতংসে, মম তুঞ্হঞ্চ ব্ৰাহ্মণ.

৩১৬. ‘‘সাহং নিস্সৰণং ঞত্ৱা, জাতিযা মৰণস্স চ;

ন সোচামি ন ৰোদামি, ন চাপি পৰিতপ্পযিং.

৩১৭. ‘‘অব্ভুতং ৱত ৱাসেট্ঠি, ৱাচং ভাসসি এদিসিং;

কস্স ত্ৱং ধম্মমঞ্ঞায, গিৰং ভাসসি এদিসিং.

৩১৮. ‘‘এস ব্ৰাহ্মণ সম্বুদ্ধো, নগৰং মিথিলং পতি;

সব্বদুক্খপ্পহানায, ধম্মং দেসেসি পাণিনং.

৩১৯. ‘‘তস্স ব্ৰহ্মে অৰহতো, ধম্মং সুত্ৱা নিৰূপধিং;

তত্থ ৱিঞ্ঞাতসদ্ধম্মা, পুত্তসোকং ব্যপানুদিং.

৩২০. ‘‘সো অহম্পি গমিস্সামি, নগৰং মিথিলং পতি;

অপ্পেৱ মং সো ভগৱা, সব্বদুক্খা পমোচযে.

৩২১. ‘‘অদ্দস ব্ৰাহ্মণো বুদ্ধং, ৱিপ্পমুত্তং নিৰূপধিং;

স্ৱস্স ধম্মমদেসেসি, মুনি দুক্খস্স পাৰগূ.

৩২২. ‘‘দুক্খং দুক্খসমুপ্পাদং, দুক্খস্স চ অতিক্কমং;

অৰিযং চট্ঠঙ্গিকং মগ্গং, দুক্খূপসমগামিনং.

৩২৩. ‘‘তত্থ ৱিঞ্ঞাতসদ্ধম্মো, পব্বজ্জং সমৰোচযি;

সুজাতো তীহি ৰত্তীহি, তিস্সো ৱিজ্জা অফস্সযি.

৩২৪. ‘‘এহি সাৰথি গচ্ছাহি, ৰথং নিয্যাদযাহিমং;

আৰোগ্যং ব্ৰাহ্মণিং ৱজ্জ, পব্বজি দানি ব্ৰাহ্মণো;

সুজাতো তীহি ৰত্তীহি, তিস্সো ৱিজ্জা অফস্সযি.

৩২৫. ‘‘ততো চ ৰথমাদায, সহস্সঞ্চাপি সাৰথি;

আৰোগ্যং ব্ৰাহ্মণিংৱোচ, ‘পব্বজি দানি ব্ৰাহ্মণো;

সুজাতো তীহি ৰত্তীহি, তিস্সো ৱিজ্জা অফস্সযি.

৩২৬. ‘‘এতঞ্চাহং অস্সৰথং, সহস্সঞ্চাপি সাৰথি;

তেৱিজ্জং ব্ৰাহ্মণং সুত্ৱা, পুণ্ণপত্তং দদামি তে.

৩২৭. ‘‘তুয্হেৱ হোত্ৱস্সৰথো, সহস্সঞ্চাপি ব্ৰাহ্মণি;

অহম্পি পব্বজিস্সামি, ৱৰপঞ্ঞস্স সন্তিকে.

৩২৮. ‘‘হত্থী গৱস্সং মণিকুণ্ডলঞ্চ, ফীতঞ্চিমং গহৱিভৱং পহায;

পিতা পব্বজিতো তুয্হং, ভুঞ্জ ভোগানি সুন্দৰী;

তুৱং দাযাদিকা কুলে.

৩২৯. ‘‘হত্থী গৱস্সং মণিকুণ্ডলঞ্চ, ৰম্মং চিমং গহৱিভৱং পহায;

পিতা পব্বজিতো ময্হং, পুত্তসোকেন অট্টিতো;

অহম্পি পব্বজিস্সামি, ভাতুসোকেন অট্টিতা.

৩৩০. ‘‘সো তে ইজ্ঝতু সঙ্কপ্পো, যং ত্ৱং পত্থেসি সুন্দৰী;

উত্তিট্ঠপিণ্ডো উঞ্ছো চ, পংসুকূলঞ্চ চীৱৰং;

এতানি অভিসম্ভোন্তী, পৰলোকে অনাসৱা.

৩৩১. ‘‘সিক্খমানায মে অয্যে, দিব্বচক্খু ৱিসোধিতং;

পুব্বেনিৱাসং জানামি, যত্থ মে ৱুসিতং পুৰে.

৩৩২. ‘‘তুৱং নিস্সায কল্যাণি, থেৰি সঙ্ঘস্স সোভনে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৩৩৩. ‘‘অনুজানাহি মে অয্যে, ইচ্ছে সাৱত্থি গন্তৱে;

সীহনাদং নদিস্সামি, বুদ্ধসেট্ঠস্স সন্তিকে.

৩৩৪. ‘‘পস্স সুন্দৰি সত্থাৰং, হেমৱণ্ণং হৰিত্তচং;

অদন্তানং দমেতাৰং, সম্বুদ্ধমকুতোভযং.

৩৩৫. ‘‘পস্স সুন্দৰিমাযন্তিং, ৱিপ্পমুত্তং নিৰূপধিং;

ৱীতৰাগং ৱিসংযুত্তং, কতকিচ্চমনাসৱং.

৩৩৬. ‘‘বাৰাণসিতো নিক্খম্ম, তৱ সন্তিকমাগতা;

সাৱিকা তে মহাৱীৰ, পাদে ৱন্দতি সুন্দৰী.

৩৩৭. ‘‘তুৱং বুদ্ধো তুৱং সত্থা, তুয্হং ধীতাম্হি ব্ৰাহ্মণ;

ওৰসা মুখতো জাতা, কতকিচ্চা অনাসৱা.

৩৩৮. ‘‘তস্সা তে স্ৱাগতং ভদ্দে, ততো তে অদুৰাগতং;

এৱঞ্হি দন্তা আযন্তি, সত্থু পাদানি ৱন্দিকা;

ৱীতৰাগা ৱিসংযুত্তা, কতকিচ্চা অনাসৱা’’তি. –

ইমা গাথা পচ্চুদাহাসি.

তত্থ পেতানীতি মতানি. ভোতীতি তং আলপতি. পুত্তানীতি লিঙ্গৱিপল্লাসেন ৱুত্তং, পেতে পুত্তেতি অত্থো. একো এৱ চ তস্সা পুত্তো মতো, ব্ৰাহ্মণো পন ‘‘চিৰকালং অযং সোকেন অট্টা হুত্ৱা ৱিচৰি, বহূ মঞ্ঞে ইমিস্সা পুত্তা মতা’’তি এৱংসঞ্ঞী হুত্ৱা বহুৱচনেনাহ. তথা চ ‘‘সাজ্জ সব্বানি খাদিত্ৱা সতপুত্তানী’’তি. খাদমানাতি লোকৱোহাৰৱসেন খুংসনৱচনমেতং. লোকে হি যস্সা ইত্থিযা জাতজাতা পুত্তা মৰন্তি, তং গৰহন্তা ‘‘পুত্তখাদিনী’’তিআদিং ৱদন্তি. অতীৱাতি অতিৱিয ভুসং. পৰিতপ্পসীতি সন্তপ্পসি, পুৰেতি যোজনা. অযঞ্হেত্থ সঙ্খেপত্থো – ভোতি ৱাসেট্ঠি, পুব্বে ত্ৱং মতপুত্তা হুত্ৱা সোচন্তী পৰিদেৱন্তী অতিৱিয সোকায সমপ্পিতা গামনিগমৰাজধানিযো আহিণ্ডসি.

সাজ্জাতি সা অজ্জ, সা ত্ৱং এতৰহীতি অত্থো. ‘‘সজ্জা’’তি ৱা পাঠো. কেন ৱণ্ণেনাতি কেন কাৰণেন.

খাদিতানীতি থেৰীপি ব্ৰাহ্মণেন ৱুত্তপৰিযাযেনেৱ ৱদতি. খাদিতানি ৱা ব্যগ্ঘদীপিবিড়াৰাদিজাতিযো সন্ধাযেৱমাহ. অতীতংসেতি অতীতকোট্ঠাসে, অতিক্কন্তভৱেসূতি অত্থো. মম তুয্হঞ্চাতি মযা চ তযা চ.

নিস্সৰণং ঞত্ৱা জাতিযা মৰণস্স চাতি জাতিজৰামৰণানং নিস্সৰণভূতং নিব্বানং মগ্গঞাণেন পটিৱিজ্ঝিত্ৱা. ন চাপি পৰিতপ্পযিন্তি ন চাপি উপাযাসাসিং, অহং উপাযাসং ন আপজ্জিন্তি অত্থো.

অব্ভুতং ৱতাতি অচ্ছৰিযং ৱত. তঞ্হি অব্ভুতং পুব্বে অভূতং অব্ভুতন্তি ৱুচ্চতি. এদিসিন্তি এৱৰূপিং, ‘‘ন সোচামি ন ৰোদামি, ন চাপি পৰিতপ্পযি’’ন্তি এৱং সোচনাদীনং অভাৱদীপনিং ৱাচং. কস্স ত্ৱং ধম্মমঞ্ঞাযাতি কেৱলং যথা এদিসো ধম্মো লদ্ধুং ন সক্কা, তস্মা কস্স নাম সত্থুনো ধম্মমঞ্ঞায গিৰং ভাসসি এদিসন্তি সত্থাৰং সাসনঞ্চ পুচ্ছতি.

নিৰূপধিন্তি নিদ্দুক্খং. ৱিঞ্ঞাতসদ্ধম্মাতি পটিৱিদ্ধঅৰিযসচ্চধম্মা. ব্যপানুদিন্তি নীহৰিং পজহিং.

ৱিপ্পমুত্তন্তি সব্বসো ৱিমুত্তং, সব্বকিলেসেহি সব্বভৱেহি চ ৱিসংযুত্তং. স্ৱস্সাতি সো সম্মাসম্বুদ্ধো অস্স ব্ৰাহ্মণস্স.

তত্থাতি তস্সং চতুসচ্চধম্মদেসনাযং.

ৰথং নিয্যাদযাহিমন্তি ইমং ৰথং ব্ৰাহ্মণিযা নিয্যাদেহি.

সহস্সঞ্চাপীতি মগ্গপৰিব্বযত্থং নীতং কহাপণসহস্সঞ্চাপি আদায নিয্যাদেহীতি যোজনা.

অস্সৰথন্তি অস্সযুত্তৰথং. পুণ্ণপত্তন্তি তুট্ঠিদানং.

এৱং ব্ৰাহ্মণিযা তুট্ঠিদানে দিয্যমানে তং অসম্পটিচ্ছন্তো সাৰথি ‘‘তুয্হেৱ হোতূ’’তি গাথং ৱত্ৱা সত্থু সন্তিকমেৱ গন্ত্ৱা পব্বজি. পব্বজিতে পন সাৰথিম্হি ব্ৰাহ্মণী অত্তনো ধীতৰং সুন্দৰিং আমন্তেত্ৱা ঘৰাৱাসে নিযোজেন্তী ‘‘হত্থী গৱস্স’’ন্তি গাথমাহ. তত্থ হত্থীতি হত্থিনো. গৱস্সন্তি গাৱো চ অস্সা চ. মণিকুণ্ডলঞ্চাতি মণি চ কুণ্ডলানি চ. ফীতঞ্চিমং গহৱিভৱং পহাযাতি ইমং হত্থিআদিপ্পভেদং যথাৱুত্তং অৱুত্তঞ্চ খেত্তৱত্থুহিৰঞ্ঞসুৱণ্ণাদিভেদং ফীতং পহূতঞ্চ গহৱিভৱং গেহূপকৰণং অঞ্ঞঞ্চ দাসিদাসাদিকং সব্বং পহায তৱ পিতা পব্বজিতো. ভুঞ্জ ভোগানি সুন্দৰীতি সুন্দৰি, ত্ৱং ইমে ভোগে ভুঞ্জস্সু. তুৱং দাযাদিকা কুলেতি তুৱঞ্হি ইমস্মিং কুলে দাযজ্জাৰহাতি.

তং সুত্ৱা সুন্দৰী অত্তনো নেক্খম্মজ্ঝাসযং পকাসেন্তী ‘‘হত্থীগৱস্স’’ন্তিআদিমাহ.

অথ নং মাতা নেক্খম্মেযেৱ নিযোজেন্তী ‘‘সো তে ইজ্ঝতূ’’তিআদিনা দিযড্ঢগাথমাহ. তত্থ যং ত্ৱং পত্থেসি সুন্দৰীতি সুন্দৰি ত্ৱং ইদানি যং পত্থেসি আকঙ্খসি. সো তৱ পব্বজ্জায সঙ্কপ্পো পব্বজ্জায ছন্দো ইজ্ঝতু অনন্তৰাযেন সিজ্ঝতু. উত্তিট্ঠপিণ্ডোতি ঘৰে ঘৰে পতিট্ঠিত্ৱা লদ্ধব্বভিক্খাপিণ্ডো. উঞ্ছোতি তদত্থং ঘৰপটিপাটিযা আহিণ্ডনং উদ্দিস্স ঠানঞ্চ. এতানীতি উত্তিট্ঠপিণ্ডাদীনি. অভিসম্ভোন্তীতি অনিব্বিন্নৰূপা জঙ্ঘবলং নিস্সায অভিসম্ভৱন্তী, সাধেন্তীতি অত্থো.

অথ সুন্দৰী ‘‘সাধু, অম্মা’’তি মাতুযা পটিস্সুণিত্ৱা নিক্খমিত্ৱা ভিক্খুনুপস্সযং গন্ত্ৱা সিক্খমানাযেৱ সমানা তিস্সো ৱিজ্জা সচ্ছিকত্ৱা ‘‘সত্থু সন্তিকং গমিস্সামী’’তি উপজ্ঝাযং আৰোচেত্ৱা ভিক্খুনীহি সদ্ধিং সাৱত্থিং অগমাসি. তেন ৱুত্তং ‘‘সিক্খমানায মে, অয্যে’’তিআদি. তত্থ সিক্খমানায মেতি সিক্খমানায সমানায মযা. অয্যেতি অত্তনো উপজ্ঝাযং আলপতি.

তুৱং নিস্সায কল্যাণি, থেৰি সঙ্ঘস্স সোভনেতি ভিক্খুনিসঙ্ঘে ৱুদ্ধতৰভাৱেন থিৰগুণযোগেন চ সঙ্ঘত্থেৰি সোভনেহি সীলাদীহি সমন্নাগতত্তা সোভনে কল্যাণি কল্যাণমিত্তে, অয্যে, তং নিস্সায মযা তিস্সো ৱিজ্জা অনুপ্পত্তা কতং বুদ্ধস্স সাসনন্তি যোজনা.

ইচ্ছেতি ইচ্ছামি. সাৱত্থি গন্তৱেতি সাৱত্থিং গন্তুং. সীহনাদং নদিস্সামীতি অঞ্ঞাব্যাকৰণমেৱ সন্ধাযাহ.

অথ সুন্দৰী অনুক্কমেন সাৱত্থিং গন্ত্ৱা ৱিহাৰং পৱিসিত্ৱা সত্থাৰং ধম্মাসনে নিসিন্নং দিস্ৱা উড়াৰং পীতিসোমনস্সং পটিসংৱেদযমানা অত্তানমেৱ আলপন্তী আহ ‘‘পস্স সুন্দৰী’’তি. হেমৱণ্ণন্তি সুৱণ্ণৱণ্ণং. হৰিত্তচন্তি কঞ্চনসন্নিভত্তচং. এত্থ চ ভগৱা পীতৱণ্ণেন ‘‘সুৱণ্ণৱণ্ণো’’তি ৱুচ্চতি. অথ খো সম্মদেৱ ঘংসিত্ৱা জাতিহিঙ্গুলকেন অনুলিম্পিত্ৱা সুপৰিমজ্জিতকঞ্চনাদাসসন্নিভোতি দস্সেতুং ‘‘হেমৱণ্ণ’’ন্তি ৱত্ৱা ‘‘হৰিত্তচ’’ন্তি ৱুত্তং.

পস্স সুন্দৰিমাযন্তিন্তি তং সুন্দৰিনামিকং মং ভগৱা আগচ্ছন্তি পস্স. ‘‘ৱিপ্পমুত্ত’’ন্তিআদিনা অঞ্ঞং ব্যাকৰোন্তী পীতিৱিপ্ফাৰৱসেন ৱদতি.

কুতো পন আগতা, কত্থ চ আগতা, কীদিসা চাযং সুন্দৰীতি আসঙ্কন্তানং আসঙ্কং নিৱত্তেতুং ‘‘বাৰাণসিতো’’তি গাথং ৱত্ৱা তত্থ ‘‘সাৱিকা চা’’তি ৱুত্তমত্থং পাকটতৰং কাতুং ‘‘তুৱং বুদ্ধো’’তি গাথমাহ. তস্সত্থো – ইমস্মিং সদেৱকে লোকে তুৱমেৱেকো সব্বঞ্ঞুবুদ্ধো, দিট্ঠধম্মিকসম্পৰাযিকপৰমত্থেহি যথাৰহং অনুসাসনতো তুৱং মে সত্থা, অহঞ্চ খীণাসৱব্ৰাহ্মণী ভগৱা তুয্হং উৰে ৱাযাম জনিতাভিজাতিতায ওৰসা, মুখতো পৱত্তধম্মঘোসেন সাসনস্স চ মুখভূতেন অৰিযমগ্গেন জাতত্তা মুখতো জাতা, নিট্ঠিতপৰিঞ্ঞাতাদিকৰণীযতায কতকিচ্চা, সব্বসো আসৱানং খেপিতত্তা অনাসৱাতি.

অথস্সা সত্থা আগমনং অভিনন্দন্তো ‘‘তস্সা তে স্ৱাগত’’ন্তি গাথমাহ. তস্সত্থো – যা ত্ৱং মযা অধিগতং ধম্মং যাথাৱতো অধিগচ্ছি. তস্সা তে, ভদ্দে সুন্দৰি, ইধ মম সন্তিকে আগতং আগমনং সুআগতং. ততো এৱ তং অদুৰাগতং ন দুৰাগতং হোতি. কস্মা? যস্মা এৱঞ্হি দন্তা আযন্তীতি, যথা ত্ৱং সুন্দৰি, এৱঞ্হি উত্তমেন অৰিযমগ্গদমথেন দন্তা ততো এৱ সব্বধি ৱীতৰাগা, সব্বেসং সংযোজনানং সমুচ্ছিন্নত্তা ৱিসংযুত্তা কতকিচ্চা অনাসৱা সত্থু পাদানং ৱন্দিকা আগচ্ছন্তি, তস্মা তস্সা তে স্ৱাগতং অদুৰাগতন্তি যোজনা.

সুন্দৰীথেৰীগাথাৱণ্ণনা নিট্ঠিতা.