১৫. উত্তৰাথেৰীগাথাৱণ্ণনা

কাযেন সংৱুতা আসিন্তি উত্তৰায থেৰিযা গাথা. তস্সাপি ৱত্থু তিস্সাথেৰিযা ৱত্থুসদিসং. সাপি হি সক্যকুলপ্পসুতা বোধিসত্তস্স ওৰোধভূতা মহাপজাপতিগোতমিযা সদ্ধিং নিক্খন্তা ওভাসগাথায অৰহত্তং পত্ৱা পন –

১৫. ‘‘কাযেন সংৱুতা আসিং, ৱাচায উদ চেতসা;

সমূলং তণ্হমব্বুয্হ, সীতিভূতাম্হি নিব্বুতা’’তি. –

উদানৱসেন তমেৱ গাথং অভাসি.

তত্থ কাযেন সংৱুতা আসিন্তি কাযিকেন সংৱৰেন সংৱুতা অহোসিং. ৱাচাযাতি ৱাচসিকেন সংৱৰেন সংৱুতা আসিন্তি যোজনা, পদদ্ৱযেনাপি সীলসংৱৰমাহ. উদাতি অথ. চেতসাতি সমাধিচিত্তেন, এতেন ৱিপস্সনাভাৱনমাহ. সমূলং তণ্হমব্বুয্হাতি সানুসযং, সহ ৱা অৱিজ্জায তণ্হং উদ্ধৰিত্ৱা. অৱিজ্জায হি পটিচ্ছাদিতাদীনৱে ভৱত্তযে তণ্হা উপ্পজ্জতি.

অপৰো নযো – কাযেন সংৱুতাতি সম্মাকম্মন্তেন সব্বসো মিচ্ছাকম্মন্তস্স পহানা মগ্গসংৱৰেনেৱ কাযেন সংৱুতা আসিং. ৱাচাযাতি সম্মাৱাচায সব্বসো মিচ্ছাৱাচায পহানা মগ্গসংৱৰেনেৱ ৱাচায সংৱুতা আসিন্তি অত্থো. চেতসাতি সমাধিনা. চেতোসীসেন হেত্থ সম্মাসমাধি ৱুত্তো, সম্মাসমাধিগ্গহণেনেৱ মগ্গলক্খণেন একলক্খণা সম্মাদিট্ঠিআদযো মগ্গধম্মা গহিতাৱ হোন্তীতি, মগ্গসংৱৰেন অভিজ্ঝাদিকস্স অসংৱৰস্স অনৱসেসতো পহানং দস্সিতং হোতি. তেনেৱাহ ‘‘সমূলং তণ্হমব্বুয্হা’’তি. সীতিভূতাম্হি নিব্বুতাতি সব্বসো কিলেসপৰিড়াহাভাৱেন সীতিভাৱপ্পত্তা অনুপাদিসেসায নিব্বানধাতুযা নিব্বুতা অম্হীতি.

উত্তৰাথেৰীগাথাৱণ্ণনা নিট্ঠিতা.