১৪. সুমনাথেৰীগাথাৱণ্ণনা

ধাতুযো দুক্খতো দিস্ৱাতি সুমনায থেৰিযা গাথা. তস্সা ৱত্থু তিস্সাথেৰিযা ৱত্থুসদিসং. ইমিস্সাপি হি সত্থা ওভাসং ৱিস্সজ্জেত্ৱা পুৰতো নিসিন্নো ৱিয অত্তানং দস্সেত্ৱা –

১৪. ‘‘ধাতুযো দুক্খতো দিস্ৱা, মা জাতিং পুনৰাগমি;

ভৱে ছন্দং ৱিৰাজেত্ৱা, উপসন্তা চৰিস্সসী’’তি. –

ইমং গাথমাহ. সা গাথাপৰিযোসানে অৰহত্তং পাপুণি.

তত্থ ধাতুযো দুক্খতো দিস্ৱাতি সসন্ততিপৰিযাপন্না চক্খাদিধাতুযো ইতৰাপি চ উদযব্বযপটিপীড়নাদিনা ‘‘দুক্খা’’তি ঞাণচক্খুনা দিস্ৱা. মা জাতিং পুনৰাগমীতি পুন জাতিং আযতিং পুনব্ভৱং মা উপগচ্ছি. ভৱে ছন্দং ৱিৰাজেত্ৱাতি কামভৱাদিকে সব্বস্মিং ভৱে তণ্হাছন্দং ৱিৰাগসঙ্খাতেন মগ্গেন পজহিত্ৱা. উপসন্তা চৰিস্সসীতি সব্বসো পহীনকিলেসতায নিব্বুতা ৱিহৰিস্সসি.

এত্থ চ ‘‘ধাতুযো দুক্খতো দিস্ৱা’’তি ইমিনা দুক্খানুপস্সনামুখেন ৱিপস্সনা দস্সিতা. ‘‘ভৱে ছন্দং ৱিৰাজেত্ৱা’’তি ইমিনা মগ্গো, ‘‘উপসন্তা চৰিস্সসী’’তি ইমিনা সউপাদিসেসা নিব্বানধাতু, ‘‘মা জাতিং পুনৰাগমী’’তি ইমিনা অনুপাদিসেসা নিব্বানধাতু দস্সিতাতি দট্ঠব্বং.

সুমনাথেৰীগাথাৱণ্ণনা নিট্ঠিতা.