৮. মিগজালত্থেৰগাথাৱণ্ণনা

সুদেসিতোতিআদিকা আযস্মতো মিগজালত্থেৰস্স গাথা. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে পুঞ্ঞানি উপচিনন্তো ইমস্মিং বুদ্ধুপ্পাদে সাৱত্থিযং ৱিসাখায মহাউপাসিকায পুত্তো হুত্ৱা নিব্বত্তি, মিগজালোতিস্স নামং অহোসি. সো ৱিহাৰং গন্ত্ৱা অভিণ্হসো ধম্মস্সৱনেন পটিলদ্ধসদ্ধো পব্বজিত্ৱা ৱিপস্সনং ৱড্ঢেত্ৱা অৰহত্তং পত্ৱা অঞ্ঞং ব্যাকৰোন্তো –

৪১৭. ‘‘সুদেসিতো চক্খুমতা, বুদ্ধেনাদিচ্চবন্ধুনা;

সব্বসংযোজনাতীতো, সব্বৱট্টৱিনাসনো.

৪১৮. ‘‘নিয্যানিকো উত্তৰণো, তণ্হামূলৱিসোসনো;

ৱিসমূলং আঘাতনং, ছেত্ৱা পাপেতি নিব্বুতিং.

৪১৯. ‘‘অঞ্ঞাণমূলভেদায, কম্মযন্তৱিঘাটনো;

ৱিঞ্ঞাণানং পৰিগ্গহে, ঞাণৱজিৰনিপাতনো.

৪২০.

‘‘ৱেদনানং ৱিঞ্ঞাপনো, উপাদানপ্পমোচনো;

ভৱং অঙ্গাৰকাসুংৱ, ঞাণেন অনুপস্সনো.

৪২১. ‘‘মহাৰসো সুগম্ভীৰো, জৰামচ্চুনিৱাৰণো;

অৰিযো অট্ঠঙ্গিকো মগ্গো, দুক্খূপসমনো সিৱো.

৪২২. ‘‘কম্মং কম্মন্তি ঞত্ৱান, ৱিপাকঞ্চ ৱিপাকতো;

পটিচ্চুপ্পন্নধম্মানং, যথাৱালোকদস্সনো;

মহাখেমঙ্গমো সন্তো, পৰিযোসানভদ্দকো’’তি. – ইমা গাথা অভাসি;

তত্থ সুদেসিতোতি সুট্ঠু দেসিতো, ৱেনেয্যজ্ঝাসযানুৰূপং দিট্ঠধম্মিকসম্পৰাযিকপৰমত্থানং যাথাৱতো ৱিভাৱনৱসেন দেসিতোতি অত্থো. অথ ৱা সুদেসিতোতি সম্মা দেসিতো, পৱত্তিনিৱত্তীনং তদুভযহেতূনঞ্চ অৱিপৰীততো পকাসনৱসেন ভাসিতো স্ৱাখ্যাতোতি অত্থো. চক্খুমতাতি মংসচক্খু, দিব্বচক্খু, পঞ্ঞাচক্খু, বুদ্ধচক্খু, সমন্তচক্খূতি ইমেহি পঞ্চহি চক্খূহি চক্খুমতা. বুদ্ধেনাতি সব্বঞ্ঞুবুদ্ধেন. আদিচ্চবন্ধুনাতি আদিচ্চগোত্তেন. দুৱিধো হি লোকে খত্তিযৱংসো – আদিচ্চৱংসো, সোমৱংসোতি. তত্থ আদিচ্চৱংসো, ওক্কাকৰাজৱংসোতি জানিতব্বং. ততো সঞ্জাততায সাকিযা আদিচ্চগোত্তাতি ভগৱা ‘‘আদিচ্চবন্ধূ’’তি ৱুচ্চতি. অথ ৱা আদিচ্চস্স বন্ধূতিপি ভগৱা আদিচ্চবন্ধু, স্ৱাযমত্থো হেট্ঠা ৱুত্তোযেৱ. কামৰাগসংযোজনাদীনং সব্বেসং সংযোজনানং সমতিক্কমনভাৱতো সব্বসংযোজনাতীতো ততো এৱ কিলেসকম্মৱিপাকৱট্টানং ৱিনাসনতো ৱিদ্ধংসনতো সব্বৱট্টৱিনাসনো, সংসাৰচাৰকতো নিয্যানতো নিয্যানিকো, সংসাৰমহোঘতো সমুত্তৰণট্ঠেন উত্তৰণো, কামতণ্হাদীনং সব্বতণ্হানং মূলং অৱিজ্জং অযোনিসো মনসিকাৰঞ্চ ৱিসোসেতি সুক্খাপেতীতি তণ্হামূলৱিসোসনো, তিণ্ণম্পি ৱেদানং সম্পটিৱেধস্স ৱিদ্ধংসনতো ৱিসস্স দুক্খস্স কাৰণত্তা ৱিসমূলং, সত্তানং ব্যসনুপ্পত্তিট্ঠানতায আঘাতনং কম্মং কিলেসং ৱা ছেত্ৱা সমুচ্ছিন্দিত্ৱা নিব্বুতিং নিব্বানং পাপেতি.

অঞ্ঞাণস্স মূলং অযোনিসো মনসিকাৰো আসৱা চ ‘‘আসৱসমুদযা অৱিজ্জাসমুদযো’’তি (ম. নি. ১.১০৩) হি ৱুত্তং, তস্স ভেদায ৱজিৰূপমঞাণেন ভিন্দনত্থায. অথ ৱা ‘‘অৱিজ্জাপচ্চযা সঙ্খাৰা’’তিআদিৱচনতো (ৱিভ. ২২৫-২২৬; সং. নি. ২.১) অঞ্ঞাণং মূলং এতস্সাতি অঞ্ঞাণমূলং, ভৱচক্কং, তস্স মগ্গঞাণৱজিৰেন পদালনত্থং দেসিতোতি সম্বন্ধো. কম্মযন্তৱিঘাটনোতি কম্মঘটিতস্স অত্তভাৱযন্তস্স ৱিদ্ধংসনো. ৱিঞ্ঞাণানং পৰিগ্গহেতি কামভৱাদীসু যথাসককম্মুনা ৱিঞ্ঞাণগ্গহণে উপট্ঠিতেতি ৱচনসেসো. তত্থ তত্থ হি ভৱে পটিসন্ধিযা গহিতায তংতংভৱনিস্সিতৱিঞ্ঞাণানিপি গহিতানেৱ হোন্তি. ঞাণৱজিৰনিপাতনোতি ঞাণৱজিৰস্স নিপাতো, ঞাণৱজিৰং নিপাতেত্ৱা তেসং পদালেতা. লোকুত্তৰধম্মো হি উপ্পজ্জমানো সত্তমভৱাদীসু উপ্পজ্জনাৰহানি ৱিঞ্ঞাণানি ভিন্দত্তমেৱ উপ্পজ্জতীতি.

ৱেদনানং ৱিঞ্ঞাপনোতি সুখাদীনং তিস্সন্নং ৱেদনানং যথাক্কমং দুক্খসল্লানিচ্চৱসেন যাথাৱতো পৱেদকো. উপাদানপ্পমোচনোতি কামুপাদানাদীহি চতূহিপি উপাদানেহি চিত্তসন্তানস্স ৱিমোচকো. ভৱং অঙ্গাৰকাসুংৱ, ঞাণেন অনুপস্সনোতি কামভৱাদিনৱৱিধম্পি ভৱং একাদসহি অগ্গীহি আদিত্তভাৱতো সাধিকপোৰিসং অঙ্গাৰকাসুং ৱিয মগ্গঞাণেন অনুপচ্চক্খতো দস্সেতা.

সন্তপণীতভাৱতো অতিত্তিকৰট্ঠেন মহাৰসো পৰিঞ্ঞাদিৱসেন ৱা মহাকিচ্চতায সামঞ্ঞফলৱসেন মহাসম্পত্তিতায চ মহাৰসো, অনুপচিতসম্ভাৰেহি দুৰৱগাহতায অলব্ভনেয্যপতিট্ঠতায চ সুট্ঠু গম্ভীৰো জৰামচ্চুনিৱাৰণো, আযতিং ভৱাভিনিপ্ফত্তিযা নিৱত্তনেন জৰায মচ্চুনো চ পটিসেধকো. ইদানি যথাৱুত্তগুণৱিসেসযুত্তং ধম্মং সৰূপতো দস্সেন্তো ‘‘অৰিযো অট্ঠঙ্গিকো’’তি ৱত্ৱা পুনপি তস্স কতিপযে গুণে ৱিভাৱেতুং ‘‘দুক্খূপসমনো সিৱো’’তিআদিমাহ. তস্সত্থো – পৰিসুদ্ধট্ঠেন অৰিযো, সম্মাদিট্ঠিআদিঅট্ঠধম্মসমোধানতায অট্ঠঙ্গিকো, নিব্বানগৱেসনট্ঠেন মগ্গো সকলৱট্টদুক্খৱূপসমনট্ঠেন দুক্খৱূপসমনো, খেমট্ঠেন সিৱো.

যথা ইতো বাহিৰকসমযে অসম্মাসম্বুদ্ধপৱেদিতত্তা কম্মৱিপাকো ৱিপল্লাসো সিযাতি এৱং অৱিপল্লাসেত্ৱা পটিচ্চুপ্পন্নধম্মানং পটিচ্চসমুপ্পন্নেসু ধম্মেসু কম্মং কম্মন্তি ৱিপাকঞ্চ ৱিপাকতো ঞত্ৱান পুব্বভাগঞাণেন জাননহেতু সস্সতুচ্ছেদগ্গাহানং ৱিধমনেন যাথাৱতো আলোকদস্সনো তক্কৰস্স লোকুত্তৰঞাণালোকস্স দস্সনো. কেনচি কঞ্চি কদাচিপি অনুপদ্দুতত্তা মহাখেমং নিব্বানং গচ্ছতি সত্তে গমেতি চাতি মহাখেমঙ্গমো, সব্বকিলেসদৰথপৰিড়াহৱূপসমনতো সন্তো, অকুপ্পায চেতোৱিমুত্তিযা অনুপাদিসেসায চ নিব্বানধাতুযা পাপনেন পৰিযোসানভদ্দকো সুদেসিতো চক্খুমতাতি যোজনা.

এৱং থেৰো নানানযেহি অৰিযধম্মং পসংসন্তো তস্স ধম্মস্স অত্তনা অধিগতভাৱং অঞ্ঞাপদেসেন পকাসেসি.

মিগজালত্থেৰগাথাৱণ্ণনা নিট্ঠিতা.