৮. দুতিযমিগলুদ্দকপেতৱত্থুৱণ্ণনা

কূটাগাৰে চ পাসাদেতি ইদং ভগৱতি ৱেড়ুৱনে ৱিহৰন্তে অপৰং মিগলুদ্দকপেতং আৰব্ভ ৱুত্তং. ৰাজগহে কিৰ অঞ্ঞতৰো মাগৱিকো মাণৱো ৱিভৱসম্পন্নোপি সমানো ভোগসুখং পহায ৰত্তিন্দিৱং মিগে হনন্তো ৱিচৰতি. তস্স সহাযভূতো একো উপাসকো অনুদ্দযং পটিচ্চ – ‘‘সাধু, সম্ম, পাণাতিপাততো ৱিৰমাহি, মা তে অহোসি দীঘৰত্তং অহিতায দুক্খাযা’’তি ওৱাদং অদাসি. সো তং অনাদিযি. অথ সো উপাসকো অঞ্ঞতৰং অত্তনো মনোভাৱনীযং খীণাসৱত্থেৰং যাচি – ‘‘সাধু, ভন্তে, অসুকপুৰিসস্স তথা ধম্মং দেসেথ, যথা সো পাণাতিপাততো ৱিৰমেয্যা’’তি.

অথেকদিৱসং সো থেৰো ৰাজগহে পিণ্ডায চৰন্তো তস্স গেহদ্ৱাৰে অট্ঠাসি. তং দিস্ৱা সো মাগৱিকো সঞ্জাতবহুমানো পচ্চুগ্গন্ত্ৱা গেহং পৱেসেত্ৱা আসনং পঞ্ঞাপেত্ৱা অদাসি. নিসীদি থেৰো পঞ্ঞত্তে আসনে, সোপি থেৰং উপসঙ্কমিত্ৱা নিসীদি. তস্স থেৰো পাণাতিপাতে আদীনৱং, ততো ৱিৰতিযা আনিসংসঞ্চ পকাসেসি. সো তং সুত্ৱাপি ততো ৱিৰমিতুং ন ইচ্ছি. অথ নং থেৰো আহ – ‘‘সচে, ত্ৱং আৱুসো, সব্বেন সব্বং ৱিৰমিতুং ন সক্কোসি, ৰত্তিম্পি তাৱ ৱিৰমস্সূ’’তি, সো ‘‘সাধু, ভন্তে, ৱিৰমামি ৰত্তি’’ন্তি ততো ৱিৰমি. সেসং অনন্তৰৱত্থুসদিসং. গাথাসু পন –

৪৮৮. ‘‘কূটাগাৰে চ পাসাদে, পল্লঙ্কে গোনকত্থতে;

পঞ্চঙ্গিকেন তুৰিযেন, ৰমসি সুপ্পৱাদিতে.

৪৮৯. ‘‘ততো ৰত্যা ৱিৱসানে, সূৰিযুগ্গমনং পতি;

অপৱিদ্ধো সুসানস্মিং, বহুদুক্খং নিগচ্ছসি.

৪৯০. ‘‘কিং নু কাযেন ৱাচায, মনসা দুক্কটং কতং;

কিস্সকম্মৱিপাকেন, ইদং দুক্খং নিগচ্ছসী’’তি. –

তীহি গাথাহি নাৰদত্থেৰো নং পটিপুচ্ছি. অথস্স পেতো –

৪৯১. ‘‘অহং ৰাজগহে ৰম্মে, ৰমণীযে গিৰিব্বজে;

মিগলুদ্দো পুৰে আসিং, লুদ্দো চাসিমসঞ্ঞতো.

৪৯২. ‘‘তস্স মে সহাযো সুহদযো, সদ্ধো আসি উপাসকো;

তস্স কুলূপকো ভিক্খু, আসি গোতমসাৱকো;

সোপি মং অনুকম্পন্তো, নিৱাৰেসি পুনপ্পুনং.

৪৯৩. ‘‘‘মাকাসি পাপকং কম্মং, মা তাত দুগ্গতিং অগা;

সচে ইচ্ছসি পেচ্চ সুখং, ৱিৰম পাণৱধা অসংযমা’.

৪৯৪. ‘‘তস্সাহং ৱচনং সুত্ৱা, সুখকামস্স হিতানুকম্পিনো;

নাকাসিং সকলানুসাসনিং, চিৰপাপাভিৰতো অবুদ্ধিমা.

৪৯৫. ‘‘সো মং পুন ভূৰিসুমেধসো, অনুকম্পায সংযমে নিৱেসযি;

‘সচে দিৱা হনসি পাণিনো, অথ তে ৰত্তিং ভৱতু সংযমো’.

৪৯৬. ‘‘স্ৱাহং দিৱা হনিত্ৱা পাণিনো, ৱিৰতো ৰত্তিমহোসি সঞ্ঞতো;

ৰত্তাহং পৰিচাৰেমি, দিৱা খজ্জামি দুগ্গতো.

৪৯৭. ‘‘তস্স কম্মস্স কুসলস্স, অনুভোমি ৰত্তিং অমানুসিং;

দিৱা পটিহতাৱ কুক্কুৰা, উপধাৱন্তি সমন্তা খাদিতুং.

৪৯৮. ‘‘যে চ তে সততানুযোগিনো, ধুৱং পযুত্তা সুগতস্স সাসনে;

মঞ্ঞামি তে অমতমেৱ কেৱলং, অধিগচ্ছন্তি পদং অসঙ্খত’’ন্তি. –

তমত্থং আচিক্খি. তাসং অত্থো হেট্ঠা ৱুত্তনযোৱ.

দুতিযমিগলুদ্দকপেতৱত্থুৱণ্ণনা নিট্ঠিতা.