৯. কূটৱিনিচ্ছযিকপেতৱত্থুৱণ্ণনা

মালী কিৰিটী কাযূৰীতি ইদং সত্থৰি ৱেড়ুৱনে ৱিহৰন্তে কূটৱিনিচ্ছযিকপেতং আৰব্ভ ৱুত্তং. তদা বিম্বিসাৰো ৰাজা মাসস্স ছসু দিৱসেসু উপোসথং উপৱসতি, তং অনুৱত্তন্তা বহূ মনুস্সা উপোসথং উপৱসন্তি. ৰাজা অত্তনো সন্তিকং আগতাগতে মনুস্সে পুচ্ছতি – ‘‘কিং তুম্হেহি উপোসথো উপৱুত্থো, উদাহু ন উপৱুত্থো’’তি? তত্ৰেকো অধিকৰণে নিযুত্তকপুৰিসো পিসুণৱাচো নেকতিকো লঞ্জগাহকো ‘‘ন উপৱুত্থোম্হী’’তি ৱত্তুং অসহন্তো ‘‘উপৱুত্থোম্হি, দেৱা’’তি আহ. অথ নং ৰাজসমীপতো নিক্খন্তং সহাযো আহ – ‘‘কিং, সম্ম, অজ্জ তযা উপৱুত্থো’’তি? ‘‘ভযেনাহং, সম্ম, ৰঞ্ঞো সম্মুখা এৱং অৱোচং, নাহং উপোসথিকো’’তি.

অথ নং সহাযো আহ – ‘‘যদি এৱং উপড্ঢুপোসথোপি তাৱ তে অজ্জ হোতু, উপোসথঙ্গানি সমাদিযাহী’’তি. সো তস্স ৱচনং ‘‘সাধূ’’তি সম্পটিচ্ছিত্ৱা গেহং গন্ত্ৱা অভুত্ৱাৱ মুখং ৱিক্খালেত্ৱা উপোসথং অধিট্ঠায ৰত্তিযং ৱাসূপগতো ৰিত্তাসযসম্ভূতেন বলৱৱাতহেতুকেন সূলেন উপচ্ছিন্নাযুসঙ্খাৰো চুতিঅনন্তৰং পব্বতকুচ্ছিযং ৱেমানিকপেতো হুত্ৱা নিব্বত্তি. সো হি একৰত্তিং উপোসথৰক্খণমত্তেন ৱিমানং পটিলভি দসকঞ্ঞাসহস্সপৰিৱাৰং মহতিঞ্চ দিব্বসম্পত্তিং. কূটৱিনিচ্ছযিকতায পন পেসুণিকতায চ অত্তনো পিট্ঠিমংসানি সযমেৱ ওক্কন্তিত্ৱা খাদতি. তং আযস্মা নাৰদো গিজ্জকূটতো ওতৰন্তো দিস্ৱা –

৪৯৯. ‘‘মালী কিৰিটী কাযূৰী, গত্তা তে চন্দনুস্সদা;

পসন্নমুখৱণ্ণোসি, সূৰিযৱণ্ণোৱ সোভসি.

৫০০. ‘‘অমানুসা পাৰিসজ্জা, যে তেমে পৰিচাৰকা;

দস কঞ্ঞাসহস্সানি, যা তেমা পৰিচাৰিকা;

তা কম্বুকাযূৰধৰা, কঞ্চনাৱেড়ভূসিতা.

৫০১. ‘‘মহানুভাৱোসি তুৱং, লোমহংসনৰূপৱা;

পিট্ঠিমংসানি অত্তনো, সামং উক্কচ্চ খাদসি.

৫০২. ‘‘কিং নু কাযেন ৱাচায, মনসা দুক্কটং কতং;

কিস্সকম্মৱিপাকেন, পিট্ঠিমংসানি অত্তনো;

সামং উক্কচ্চ খাদসীতি.

৫০৩. ‘‘অত্তনোহং অনত্থায, জীৱলোকে অচাৰিসং;

পেসুঞ্ঞমুসাৱাদেন, নিকতিৱঞ্চনায চ.

৫০৪. ‘‘তত্থাহং পৰিসং গন্ত্ৱা, সচ্চকালে উপট্ঠিতে;

অত্থং ধম্মং নিৰাকত্ৱা, অধম্মমনুৱত্তিসং.

৫০৫. ‘‘এৱং সো খাদতত্তানং, যো হোতি পিট্ঠিমংসিকো;

যথাহং অজ্জ খাদামি, পিট্ঠিমংসানি অত্তনো.

৫০৬. ‘‘তযিদং তযা নাৰদ সামং দিট্ঠং, অনুকম্পকা যে কুসলা ৱদেয্যুং;

মা পেসুণং মা চ মুসা অভাণি, মা খোসি পিট্ঠিমংসিকো তুৱ’’ন্তি. –

থেৰো চতূহি গাথাহি পুচ্ছি, সোপি তস্স চতূহি গাথাহি এতমত্থং ৱিস্সজ্জেসি.

৪৯৯. তত্থ মালীতি মালধাৰী, দিব্বপুপ্ফেহি পটিমণ্ডিতোতি অধিপ্পাযো. কিৰিটীতি ৱেঠিতসীসো. কাযূৰীতি কেযূৰৱা, বাহালঙ্কাৰপটিমণ্ডিতোতি অত্থো. গত্তাতি সৰীৰাৱযৱা. চন্দনুস্সদাতি চন্দনসাৰানুলিত্তা. সূৰিযৱণ্ণোৱ সোভসীতি বালসূৰিযসদিসৱণ্ণো এৱ হুত্ৱা ৱিৰোচসি. ‘‘অৰণৱণ্ণী পভাসসী’’তিপি পাড়ি, অৰণন্তি অৰণিযেহি দেৱেহি সদিসৱণ্ণো অৰিযাৱকাসোতি অত্থো.

৫০০. পাৰিসজ্জাতি পৰিসপৰিযাপন্না, উপট্ঠাকাতি অত্থো. তুৱন্তি ত্ৱং. লোমহংসনৰূপৱাতি পস্সন্তানং লোমহংসজননৰূপযুত্তো. মহানুভাৱতাসমঙ্গিতায হেতং ৱুত্তং. উক্কচ্চাতি উক্কন্তিত্ৱা, ছিন্দিত্ৱাতি অত্থো.

৫০৩. অচাৰিসন্তি অচৰিং পটিপজ্জিং. পেসুঞ্ঞমুসাৱাদেনাতি পেসুঞ্ঞেন চেৱ মুসাৱাদেন চ. নিকতিৱঞ্চনায চাতি নিকতিযা ৱঞ্চনায চ পতিৰূপদস্সনেন পৰেসং ৱিকাৰেন ৱঞ্চনায চ.

৫০৪. সচ্চকালেতি সচ্চং ৱত্তুং যুত্তকালে. অত্থন্তি দিট্ঠধম্মিকাদিভেদং হিতং. ধম্মন্তি কাৰণং ঞাযং. নিৰাকত্ৱাতি ছড্ডেত্ৱা পহায. সোতি যো পেসুঞ্ঞাদিং আচৰতি, সো সত্তো. সেসং সব্বং হেট্ঠা ৱুত্তনযমেৱ.

কূটৱিনিচ্ছযিকপেতৱত্থুৱণ্ণনা নিট্ঠিতা.