৭. মিগলুদ্দকপেতৱত্থুৱণ্ণনা

নৰনাৰিপুৰক্খতো যুৱাতি ইদং ভগৱতি ৱেড়ুৱনে ৱিহৰন্তে মিগলুদ্দকপেতং আৰব্ভ ৱুত্তং. ৰাজগহে কিৰ অঞ্ঞতৰো লুদ্দকো ৰত্তিন্দিৱং মিগে ৱধিত্ৱা জীৱিকং কপ্পেসি. তস্সেকো উপাসকো মিত্তো অহোসি, সো তং সব্বকালং পাপতো নিৱত্তেতুং অসক্কোন্তো ‘‘এহি, সম্ম, ৰত্তিযং পাণাতিপাতা ৱিৰমাহী’’তি ৰত্তিযং পুঞ্ঞে সমাদপেসি. সো ৰত্তিযং ৱিৰমিত্ৱা দিৱা এৱ পাণাতিপাতং কৰোতি.

সো অপৰেন সমযেন কালং কত্ৱা ৰাজগহসমীপে ৱেমানিকপেতো হুত্ৱা নিব্বত্তো, দিৱসভাগং মহাদুক্খং অনুভৱিত্ৱা ৰত্তিযং পঞ্চহি কামগুণেহি সমপ্পিতা সমঙ্গীভূতো পৰিচাৰেসি. তং দিস্ৱা আযস্মা নাৰদো –

৪৭৮. ‘‘নৰনাৰিপুৰক্খতো যুৱা, ৰজনীযেহি কামগুণেহি সোভসি;

দিৱসং অনুভোসি কাৰণং, কিমকাসি পুৰিমায জাতিযা’’তি. –

ইমায গাথায পটিপুচ্ছি. তত্থ নৰনাৰিপুৰক্খতোতি পৰিচাৰকভূতেহি দেৱপুত্তেহি দেৱধীতাহি চ পুৰক্খতো পযিৰুপাসিতো. যুৱাতি তৰুণো. ৰজনীযেহীতি কমনীযেহি ৰাগুপ্পত্তিহেতুভূতেহি. কামগুণেহীতি কামকোট্ঠাসেহি. সোভসীতি সমঙ্গিভাৱেন ৱিৰোচসি ৰত্তিযন্তি অধিপ্পাযো. তেনাহ ‘‘দিৱসং অনুভোসি কাৰণ’’ন্তি, দিৱসভাগে পন নানপ্পকাৰং কাৰণং ঘাতনং পচ্চনুভৱসি. ৰজনীতি ৱা ৰত্তীসু. যেহীতি নিপাতমত্তং. কিমকাসি পুৰিমায জাতিযাতি এৱং সুখদুক্খসংৱত্তনিযং কিং নাম কম্মং ইতো পুৰিমায জাতিযা ত্ৱং অকত্থ, তং কথেহীতি অত্থো.

তং সুত্ৱা পেতো থেৰস্স অত্তনা কতকম্মং আচিক্খন্তো –

৪৭৯. ‘‘অহং ৰাজগহে ৰম্মে, ৰমণীযে গিৰিব্বজে;

মিগলুদ্দো পুৰে আসিং, লোহিতপাণি দাৰুণো.

৪৮০. ‘‘অৱিৰোধকৰেসু পাণিসু, পুথুসত্তেসু পদুট্ঠমানসো;

ৱিচৰিং অতিদাৰুণো সদা, পৰহিংসায ৰতো অসঞ্ঞতো.

৪৮১. ‘‘তস্স মে সহাযো সুহদযো, সদ্ধো আসি উপাসকো;

সোপি মং অনুকম্পন্তো, নিৱাৰেসি পুনপ্পুনং.

৪৮২. ‘‘‘মাকাসি পাপকং কম্মং, মা তাত দুগ্গতিং অগা;

সচে ইচ্ছসি পেচ্চ সুখং, ৱিৰম পাণৱধা অসংযমা.

৪৮৩. ‘‘তস্সাহং ৱচনং সুত্ৱা, সুখকামস্স হিতানুকম্পিনো;

নাকাসিং সকলানুসাসনিং, চিৰপাপাভিৰতো অবুদ্ধিমা.

৪৮৪. ‘‘সো মং পুন ভূৰিসুমেধসো, অনুকম্পায সংযমে নিৱেসযি;

সচে দিৱা হনসি পাণিনো, অথ তে ৰত্তিং ভৱতু সংযমো.

৪৮৫. ‘‘স্ৱাহং দিৱা হনিত্ৱা পাণিনো, ৱিৰতো ৰত্তিমহোসি সঞ্ঞতো;

ৰত্তাহং পৰিচাৰেমি, দিৱা খজ্জামি দুগ্গতো.

৪৮৬. ‘‘তস্স কম্মস্স কুসলস্স, অনুভোমি ৰত্তিং অমানুসিং;

দিৱা পটিহতাৱ কুক্কুৰা, উপধাৱন্তি সমন্তা খাদিতুং.

৪৮৭. ‘‘যে চ তে সততানুযোগিনো, ধুৱং পযুত্তা সুগতস্স সাসনে;

মঞ্ঞামি তে অমতমেৱ কেৱলং, অধিগচ্ছন্তি পদং অসঙ্খত’’ন্তি. –

ইমা গাথা অভাসি.

৪৭৯-৮০. তত্থ লুদ্দোতি দাৰুণো. লোহিতপাণীতি অভিণ্হং পাণঘাতেন লোহিতমক্খিতপাণী. দাৰুণোতি খৰো, সত্তানং হিংসনকোতি অত্থো. অৱিৰোধকৰেসূতি কেনচি ৱিৰোধং অকৰোন্তেসু মিগসকুণাদীসু.

৪৮২-৮৩. অসংযমাতি অসংৱৰা দুস্সীল্যা. সকলানুসাসনিন্তি সব্বং অনুসাসনিং, সব্বকালং পাণাতিপাততো পটিৱিৰতিন্তি অত্থো. চিৰপাপাভিৰতোতি চিৰকালং পাপে অভিৰতো.

৪৮৪. সংযমেতি সুচৰিতে. নিৱেসযীহি নিৱেসেসি. সচে দিৱা হনসি পাণিনো, অথ তে ৰত্তিং ভৱতু সংযমোতি নিৱেসিতাকাৰদস্সনং. সো কিৰ সল্লপাসসজ্জনাদিনা ৰত্তিযম্পি পাণৱধং অনুযুত্তো অহোসি.

৪৮৫. দিৱা খজ্জামি দুগ্গতোতি ইদানি দুগ্গতিং গতো মহাদুক্খপ্পত্তো দিৱসভাগে খাদিযামি. তস্স কিৰ দিৱা সুনখেহি মিগানং খাদাপিতত্তা কম্মসৰিক্খকং ফলং হোতি, দিৱসভাগে মহন্তা সুনখা উপধাৱিত্ৱা অট্ঠিসঙ্ঘাতমত্তাৱসেসং সৰীৰং কৰোন্তি. ৰত্তিযা পন উপগতায তং পাকতিকমেৱ হোতি, দিব্বসম্পত্তিং অনুভৱতি. তেন ৱুত্তং –

৪৮৬. ‘‘তস্স কম্মস্স কুসলস্স, অনুভোমি ৰত্তিং অমানুসিং;

দিৱা পটিহতাৱ কুক্কুৰা, উপধাৱন্তি সমন্তা খাদিতু’’ন্তি.

তত্থ পটিহতাতি পটিহতচিত্তা বদ্ধাঘাতা ৱিয হুত্ৱা. সমন্তা খাদিতুন্তি মম সৰীৰং সমন্ততো খাদিতুং উপধাৱন্তি. ইদঞ্চ নেসং অতিৱিয অত্তনো ভযাৱহং উপগমনকালং গহেত্ৱা ৱুত্তং. তে পন উপধাৱিত্ৱা অট্ঠিমত্তাৱসেসং সৰীৰং কত্ৱা গচ্ছন্তি.

৪৮৭. যে চ তে সততানুযোগিনোতি ওসানগাথায অযং সঙ্খেপত্থো – অহম্পি নাম ৰত্তিযং পাণৱধমত্ততো ৱিৰতো এৱৰূপং সম্পত্তিং অনুভৱামি. যে পন তে পুৰিসা সুগতস্স বুদ্ধস্স ভগৱতো সাসনে অধিসীলাদিকে ধুৱং পযুত্তা দড়্হং পযুত্তা সততং সব্বকালং অনুযোগৱন্তা, তে পুঞ্ঞৱন্তো কেৱলং লোকিযসুখেন অসম্মিস্সং ‘‘অসঙ্খতং পদ’’ন্তি লদ্ধনামং অমতমেৱ অধিগচ্ছন্তি মঞ্ঞে, নত্থি তেসং তদধিগমে কোচি ৱিবন্ধোতি.

এৱং তেন পেতেন ৱুত্তে থেৰো তং পৱত্তিং সত্থু আৰোচেসি. সত্থা তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. সব্বম্পি ৱুত্তনযমেৱ.

মিগলুদ্দকপেতৱত্থুৱণ্ণনা নিট্ঠিতা.