৪. ভুসপেতৱত্থুৱণ্ণনা

ভুসানি একো সালিং পুনাপৰোতি ইদং সত্থৰি সাৱত্থিযং ৱিহৰন্তে চত্তাৰো পেতে আৰব্ভ ৱুত্তং. সাৱত্থিযা কিৰ অৱিদূৰে অঞ্ঞতৰস্মিং গামকে একো কূটৱাণিজো কূটমানাদীহি জীৱিকং কপ্পেসি. সো সালিপলাপে গহেত্ৱা তম্বমত্তিকায পৰিভাৱেত্ৱা গৰুতৰে কত্ৱা ৰত্তসালিহি সদ্ধিং মিস্সেত্ৱা ৱিক্কিণি. তস্স পুত্তো ‘‘ঘৰং আগতানং মম মিত্তসুহজ্জানং সম্মানং ন কৰোতী’’তি কুপিতো যুগচম্মং গহেত্ৱা মাতুসীসে পহাৰমদাসি. তস্স সুণিসা সব্বেসং অত্থায ঠপিতমংসং চোৰিকায খাদিত্ৱা পুন তেহি অনুযুঞ্জিযমানা ‘‘সচে মযা তং মংসং খাদিতং, ভৱে ভৱে অত্তনো পিট্ঠিমংসং কন্তিত্ৱা খাদেয্য’’ন্তি সপথমকাসি. ভৰিযা পনস্স কিঞ্চিদেৱ উপকৰণং যাচন্তানং ‘‘নত্থী’’তি ৱত্ৱা তেহি নিপ্পীড়িযমানা ‘‘সচে সন্তং নত্থীতি ৱদামি, জাতজাতট্ঠানে গূথভক্খা ভৱেয্য’’ন্তি মুসাৱাদেন সপথমকাসি.

তে চত্তাৰোপি জনা অপৰেন সমযেন কালং কত্ৱা ৱিঞ্ঝাটৱিযং পেতা হুত্ৱা নিব্বত্তিংসু. তত্থ কূটৱাণিজো কম্মফলেন পজ্জলন্তং ভুসং উভোহি হত্থেহি গহেত্ৱা অত্তনো মত্থকে আকিৰিত্ৱা মহাদুক্খং অনুভৱতি, তস্স পুত্তো অযোমযেহি মুগ্গৰেহি সযমেৱ অত্তনো সীসং ভিন্দিত্ৱা অনপ্পকং দুক্খং পচ্চনুভোতি. তস্স সুণিসা কম্মফলেন সুনিসিতেহি অতিৱিয ৱিপুলাযতেহি নখেহি অত্তনো পিট্ঠিমংসানি কন্তিত্ৱা খাদন্তী অপৰিমিতং দুক্খং অনুভৱতি, তস্স ভৰিযায সুগন্ধং সুৱিসুদ্ধং অপগতকাড়কং সালিভত্তং উপনীতমত্তমেৱ নানাৱিধকিমিকুলাকুলং পৰমদুগ্গন্ধজেগুচ্ছং গূথং সম্পজ্জতি, তং সা উভোহি হত্থেহি পৰিগ্গহেত্ৱা ভুঞ্জন্তী মহাদুক্খং পটিসংৱেদেতি.

এৱং তেসু চতূসু জনেসু পেতেসু নিব্বত্তিত্ৱা মহাদুক্খং অনুভৱন্তেসু আযস্মা মহামোগ্গলানো পব্বতচাৰিকং চৰন্তো একদিৱসং তং ঠানং গতো. তে পেতে দিস্ৱা –

৪৪৭. ‘‘ভুসানি একো সালিং পুনাপৰো, অযঞ্চ নাৰী সকমংসলোহিতং;

তুৱঞ্চ গূথং অসুচিং অকন্তং, পৰিভুঞ্জসি কিস্স অযং ৱিপাকো’’তি. –

ইমায গাথায তেহি কতকম্মং পুচ্ছি. তত্থ ভুসানীতি পলাপানি. একোতি এককো. সালিন্তি সালিনো. সামিঅত্থে হেতং উপযোগৱচনং, সালিনো পলাপানি পজ্জলন্তানি অত্তনো সীসে অৱকিৰতীতি অধিপ্পাযো. পুনাপৰোতি পুন অপৰো. যো হি সো মাতুসীসং পহৰি, সো অযোমুগ্গৰেহি অত্তনো সীসং পহৰিত্ৱা সীসভেদং পাপুণাতি, তং সন্ধায ৱদতি. সকমংসলোহিতন্তি অত্তনো পিট্ঠিমংসং লোহিতঞ্চ পৰিভুঞ্জতীতি যোজনা. অকন্তন্তি অমনাপং জেগুচ্ছং. কিস্স অযং ৱিপাকোতি কতমস্স পাপকম্মস্স ইদং ফলং, যং ইদানি তুম্হেহি পচ্চনুভৱীযতীতি অত্থো.

এৱং থেৰেন তেহি কতকম্মে পুচ্ছিতে কূটৱাণিজস্স ভৰিযা সব্বেহি তেহি কতকম্মং আচিক্খন্তী –

৪৪৮. ‘‘অযং পুৰে মাতৰং হিংসতি, অযং পন কূটৱাণিজো;

অযং মংসানি খাদিত্ৱা, মুসাৱাদেন ৱঞ্চেতি.

৪৪৯. ‘‘অহং মনুস্সেসু মনুস্সভূতা, অগাৰিনী সব্বকুলস্স ইস্সৰা;

সন্তেসু পৰিগুহামি, মা চ কিঞ্চি ইতো অদং.

৪৫০. ‘‘মুসাৱাদেন ছাদেমি, নত্থি এতং মম গেহে;

সচে সন্তং নিগুহামি, গূথো মে হোতু ভোজনং.

৪৫১. ‘‘তস্স কম্মস্স ৱিপাকেন, মুসাৱাদস্স চূভযং;

সুগন্ধং সালিনো ভত্তং, গূথং মে পৰিৱত্ততি.

৪৫২. ‘‘অৱঞ্ঝানি চ কম্মানি, ন হি কম্মং ৱিনস্সতি;

দুগ্গন্ধং কিমিনং মীড়্হং, ভুঞ্জামি চ পিৱামি চা’’তি. – গাথা অভাসি;

৪৪৮. তত্থ অযন্তি পুত্তং দস্সেন্তি ৱদতি. হিংসতীতি থামেন পৰিবাধেতি, মুগ্গৰেন পহৰতীতি অত্থো. কূটৱাণিজোতি খলৱাণিজো, ৱঞ্চনায ৱণিজ্জকাৰকোতি অত্থো. মংসানি খাদিত্ৱাতি পৰেহি সাধাৰণমংসং খাদিত্ৱা ‘‘ন খাদামী’’তি মুসাৱাদেন তে ৱঞ্চেতি.

৪৪৯-৫০. অগাৰিনীতি গেহসামিনী. সন্তেসূতি ৱিজ্জমানেস্ৱেৱ পৰেহি যাচিতউপকৰণেসু. পৰিগুহামীতি পটিচ্ছাদেসিং. কালৱিপল্লাসেন হেতং ৱুত্তং. মা চ কিঞ্চি ইতো অদন্তি ইতো মম সন্তকতো কিঞ্চিমত্তম্পি অত্থিকস্স পৰস্স ন অদাসিং. ছাদেমিতি ‘‘নত্থি এতং মম গেহে’’তি মুসাৱাদেন ছাদেসিং.

৪৫১-২. গূথং মে পৰিৱত্ততীতি সুগন্ধং সালিভত্তং ময্হং কম্মৱসেন গূথভাৱেন পৰিৱত্ততি পৰিণমতি. অৱঞ্ঝানীতি অমোঘানি অনিপ্ফলানি. ন হি কম্মং ৱিনস্সতীতি যথূপচিতং কম্মং ফলং অদত্ৱা ন হি ৱিনস্সতি. কিমিনন্তি কিমিৱন্তং সঞ্জাতকিমিকুলং. মীড়্হন্তি গূথং. সেসং হেট্ঠা ৱুত্তনযত্তা উত্তানমেৱ.

এৱং থেৰো তস্সা পেতিযা ৱচনং সুত্ৱা তং পৱত্তিং ভগৱতো আৰোচেসি. ভগৱা তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. সা দেসনা মহাজনস্স সাত্থিকা অহোসীতি.

ভুসপেতৱত্থুৱণ্ণনা নিট্ঠিতা.