২. সাণৱাসিত্থেৰপেতৱত্থুৱণ্ণনা

কুণ্ডিনাগৰিযো থেৰোতি ইদং সত্থৰি ৱেড়ুৱনে ৱিহৰন্তে আযস্মতো সাণৱাসিত্থেৰস্স ঞাতিপেতে আৰব্ভ ৱুত্তং. অতীতে কিৰ বাৰাণসিযং কিতৱস্স নাম ৰঞ্ঞো পুত্তো উয্যানকীড়ং কীড়িত্ৱা নিৱত্তন্তো সুনেত্তং নাম পচ্চেকবুদ্ধং পিণ্ডায চৰিত্ৱা নগৰতো নিক্খমন্তং দিস্ৱা ইস্সৰিযমদমত্তো হুত্ৱা ‘‘কথঞ্হি নাম ময্হং অঞ্জলিং অকত্ৱা অযং মুণ্ডকো গচ্ছতী’’তি পদুট্ঠচিত্তো হত্থিক্খন্ধতো ওতৰিত্ৱা ‘‘কচ্চি তে পিণ্ডপাতো লদ্ধো’’তি আলপন্তো হত্থতো পত্তং গহেত্ৱা পথৱিযং পাতেত্ৱা ভিন্দি. অথ নং সব্বত্থ তাদিভাৱপ্পত্তিযা নিব্বিকাৰং কৰুণাৱিপ্ফাৰসোমনস্সনিপাতপসন্নচিত্তমেৱ ওলোকেন্তং অট্ঠানাঘাতেন দূসিতচিত্তো ‘‘কিং মং কিতৱস্স ৰঞ্ঞো পুত্তং ন জানাসি, ত্ৱং ওলোকযন্তো ময্হং কিং কৰিস্সসী’’তি ৱত্ৱা অৱহসন্তো পক্কামি. পক্কন্তমত্তস্সেৱ চস্স নৰকগ্গিদাহপটিভাগো বলৱসৰীৰদাহো উপ্পজ্জি. সো তেন মহাসন্তাপেনাভিভূতকাযো অতিবাড়্হং দুক্খৱেদনাভিতুন্নো কালং কত্ৱা অৱীচীমহানিৰযে নিব্বত্তি.

সো তত্থ দক্খিণপস্সেন ৱামপস্সেন উত্তানো অৱকুজ্জোতি বহূহি পকাৰেহি পৰিৱত্তিত্ৱা চতুৰাসীতি ৱস্সসহস্সানি পচ্চিত্ৱা ততো চুতো পেতেসু অপিৰিমিতকালং খুপ্পিপাসাদিদুক্খং অনুভৱিত্ৱা ততো চুতো ইমস্মিং বুদ্ধুপ্পাদে কুণ্ডিনগৰস্স সমীপে কেৱট্টগামে নিব্বত্তি. তস্স জাতিস্সৰঞাণং উপ্পজ্জি, তেন সো পুব্বে অত্তনা অনুভূতপুব্বং দুক্খং অনুস্সৰন্তো ৱযপ্পত্তোপি পাপভযেন ঞাতকেহিপি সদ্ধিং মচ্ছবন্ধনত্থং ন গচ্ছতি. তেসু গচ্ছন্তেসু মচ্ছে ঘাতেতুং অনিচ্ছন্তো নিলীযতি, গতো চ জালং ভিন্দতি, জীৱন্তে ৱা মচ্ছে গহেত্ৱা উদকে ৱিস্সজ্জেতি, তস্স তং কিৰিযং অৰোচন্তা ঞাতকা গেহতো তং নীহৰিংসু. একো পনস্স ভাতা সিনেহবদ্ধহদযো অহোসি.

তেন চ সমযেন আযস্মা আনন্দো কুণ্ডিনগৰং উপনিস্সায সাণপব্বতে ৱিহৰতি. অথ সো কেৱট্টপুত্তো ঞাতকেহি পৰিচ্চত্তো হুত্ৱা ইতো চিতো চ পৰিব্ভমন্তো তং পদেসং পত্তো ভোজনৱেলায থেৰস্স সন্তিকং উপসঙ্কমি. থেৰো তং পুচ্ছিত্ৱা ভোজনেন অত্থিকভাৱং ঞত্ৱা তস্স ভত্তং দত্ৱা কতভত্তকিচ্চো সব্বং তং পৱত্তিং ঞত্ৱা ধম্মকথায পসন্নমানসং ঞত্ৱা ‘‘পব্বজিস্সসি, আৱুসো’’তি? ‘‘আম, ভন্তে, পব্বজিস্সামী’’তি. থেৰো তং পব্বাজেত্ৱা তেন সদ্ধিং ভগৱতো সন্তিকং অগমাসি. অথ নং সত্থা আহ – ‘‘আনন্দ, ইমং সামণেৰং অনুকম্পেয্যাসী’’তি. সো চ অকতকুসলত্তা অপ্পলাভো অহোসি. অথ নং সত্থা অনুগ্গণ্হন্তো ভিক্খূনং পৰিভোগত্থায পানীযঘটানং পৰিপূৰণে নিযোজেসি. তং দিস্ৱা উপাসকা তস্স বহূনি নিচ্চভত্তানি পট্ঠপেসুং.

সো অপৰেন সমযেন লদ্ধূপসম্পদো অৰহত্তং পত্ৱা থেৰো হুত্ৱা দ্ৱাদসহি ভিক্খূহি সদ্ধিং সাণপব্বতে ৱসি. তস্স পন ঞাতকা পঞ্চসতমত্তা অনুপচিতকুসলকম্মা উপচিতমচ্ছেৰাদিপাপধম্মা কালং কত্ৱা পেতেসু নিব্বত্তিংসু. তস্স পন মাতাপিতৰো ‘‘এস অম্হেহি পুব্বে গেহতো নিক্কড্ঢিতো’’তি সাৰজ্জমানা তং অনুপসঙ্কমিত্ৱা তস্মিং বদ্ধসিনেহং ভাতিকং পেসেসুং. সো থেৰস্স গামং পিণ্ডায পৱিট্ঠসমযে দক্খিণজাণুমণ্ডলং পথৱিযং পতিট্ঠাপেত্ৱা কতঞ্জলী অত্তানং দস্সেত্ৱা ‘‘মাতা পিতা চ তে, ভন্তে’’তিআদিগাথা অৱোচ. কুণ্ডিনাগৰিযো থেৰোতিআদযো পন আদিতো পঞ্চ গাথা তাসং সম্বন্ধদস্সনত্থং ধম্মসঙ্গাহকেহি ঠপিতা.

৪০৮. ‘‘কুণ্ডিনাগৰিযো থেৰো, সাণৱাসিনিৱাসিকো;

পোট্ঠপাদোতি নামেন, সমণো ভাৱিতিন্দ্ৰিযো.

৪০৯. ‘‘তস্স মাতা পিতা ভাতা, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা.

৪১০. ‘‘তে দুগ্গতা সূচিকট্টা, কিলন্তা নগ্গিনো কিসা;

উত্তসন্তা মহত্তাসা, ন দস্সেন্তি কুৰূৰিনো.

৪১১. ‘‘তস্স ভাতা ৱিতৰিত্ৱা, নগ্গো একপথেককো;

চতুকুণ্ডিকো ভৱিত্ৱান, থেৰস্স দস্সযীতুমং.

৪১২. ‘‘থেৰো চামনসিকত্ৱা, তুণ্হীভূতো অতিক্কমি;

সো চ ৱিঞ্ঞাপযী থেৰং, ‘ভাতা পেতগতো অহং’.

৪১৩. ‘‘মাতা পিতা চ তে ভন্তে, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা.

৪১৪. ‘‘তেন দুগ্গতা সূচিকট্টা, কিলন্তা নগ্গিনো কিসা;

উত্তসন্তা মহত্তাসা, ন দস্সেন্তি কুৰূৰিনো.

৪১৫. ‘‘অনুকম্পস্সু কাৰুণিকো, দত্ৱা অন্ৱাদিসাহি নো;

তৱ দিন্নেন দানেন, যাপেস্সন্তি কুৰূৰিনো’’তি.

৪০৮-৯. তত্থ কুণ্ডিনাগৰিযো থেৰোতি এৱংনামকে নগৰে জাতসংৱড্ঢত্থেৰো, ‘‘কুণ্ডিকনগৰো থেৰো’’তিপি পাঠো, সো এৱত্থো. সাণৱাসিনিৱাসিকোতি সাণপব্বতৱাসী. পোট্ঠপাদোতি নামেনাতি নামেন পোট্ঠপাদো নাম. সমণোতি সমিতপাপো. ভাৱিতিন্দ্ৰিযোতি অৰিযমগ্গভাৱনায ভাৱিতসদ্ধাদিইন্দ্ৰিযো, অৰহাতি অত্থো. তস্সাতি তস্স সাণৱাসিত্থেৰস্স. দুগ্গতাতি দুগ্গতিগতা.

৪১০. সূচিকট্টাতি পূতিনা লূখগত্তা অট্টকা, সূচিকাতি লদ্ধনামায খুপ্পিপাসায অট্টা পীড়িতা. ‘‘সূচিকণ্ঠা’’তি কেচি পঠন্তি, সূচিছিদ্দসদিসমুখদ্ৱাৰাতি অত্থো. কিলন্তাতি কিলন্তকাযচিত্তা. নগ্গিনোতি নগ্গৰূপা নিচ্চোড়া. কিসাতি অট্ঠিত্তচমত্তসৰীৰতায কিসদেহা. উত্তসন্তাতি ‘‘অযং সমণো অম্হাকং পুত্তো’’তি ওত্তপ্পেন উত্ৰাসং আপজ্জন্তা. মহত্তাসাতি অত্তনা পুব্বে কতকম্মং পটিচ্চ সঞ্জাতমহাভযা. ন দস্সেন্তীতি অত্তানং ন দস্সেন্তি, সম্মুখীভাৱং ন গচ্ছন্তি. কুৰূৰিনোতি দাৰুণকম্মন্তা.

৪১১. তস্স ভাতাতি সাণৱাসিত্থেৰস্স ভাতা. ৱিতৰিত্ৱাতি ৱিতিণ্ণো হুত্ৱা, ওত্তপ্পসন্তাসভযাতি অত্থো. ৱিতুৰিত্ৱাতি ৱা পাঠো, তুৰিতো হুত্ৱা, তৰমানৰূপো হুত্ৱাতি ৱুত্তং হোতি. একপথেতি একপদিকমগ্গে. এককোতি একিকো অদুতিযো. চতুকুণ্ডিকো ভৱিত্ৱানাতি চতূহি অঙ্গেহি কুণ্ডেতি অত্তভাৱং পৱত্তেতীতি চতুকুণ্ডিকো, দ্ৱীহি জাণূহি দ্ৱীহি হত্থেহি গচ্ছন্তো তিট্ঠন্তো চ, এৱংভূতো হুত্ৱাতি অত্থো. সো হি এৱং পুৰতো কোপীনপটিচ্ছাদনা হোতীতি তথা অকাসি. থেৰস্স দস্সযীতুমন্তি থেৰস্স অত্তানং উদ্দিসযি দস্সেসি.

৪১২. অমনসিকত্ৱাতি ‘‘অযং নাম এসো’’তি এৱং মনসি অকৰিত্ৱা অনাৱজ্জেত্ৱা. সো চাতি সো পেতো. ভাতা পেতগতো অহন্তি ‘‘অহং অতীতত্তভাৱে ভাতা, ইদানি পেতভূতো ইধাগতো’’তি ৱত্ৱা ৱিঞ্ঞাপযি থেৰন্তি যোজনা.

৪১৩-৫. যথা পন ৱিঞ্ঞাপযি, তং দস্সেতুং ‘‘মাতা পিতা চা’’তিআদিনা তিস্সো গাথা ৱুত্তা. তত্থ মাতা পিতা চ তেতি তৱ মাতা চ পিতা চ. অনুকম্পস্সূতি অনুগ্গণ্হ অনুদযং কৰোহি. অন্ৱাদিসাহীতি আদিস. নোতি অম্হাকং. তৱ দিন্নেনাতি তযা দিন্নেন.

তং সুত্ৱা থেৰো যথা পটিপজ্জি, তং দস্সেতুং –

৪১৬. ‘‘থেৰো চৰিত্ৱা পিণ্ডায, ভিক্খূ অঞ্ঞে চ দ্ৱাদস;

একজ্ঝং সন্নিপতিংসু, ভত্তৱিস্সগ্গকাৰণা.

৪১৭. ‘‘থেৰো সব্বেৱ তে আহ, যথালদ্ধং দদাথ মে;

সঙ্ঘভত্তং কৰিস্সামি, অনুকম্পায ঞাতিনং.

৪১৮. ‘‘নিয্যাদযিংসু থেৰস্স, থেৰো সঙ্ঘং নিমন্তযি;

দত্ৱা অন্ৱাদিসি থেৰো, মাতু পিতু চ ভাতুনো;

‘ইদং মে ঞাতীনং হোতু, সুখিতা হোন্তু ঞাতযো’.

৪১৯. ‘‘সমনন্তৰানুদ্দিট্ঠে, ভোজনং উদপজ্জথ;

সুচিং পণীতং সম্পন্নং, অনেকৰসব্যঞ্জনং.

৪২০. ‘‘ততো উদ্দস্সযী ভাতা, ৱণ্ণৱা বলৱা সুখী;

পহূতং ভোজনং ভন্তে, পস্স নগ্গাম্হসে মযং;

তথা ভন্তে পৰক্কম, যথা ৱত্থং লভামসে.

৪২১. ‘‘থেৰো সঙ্কাৰকূটম্হা, উচ্চিনিত্ৱান নন্তকে;

পিলোতিকং পটং কত্ৱা, সঙ্ঘে চাতুদ্দিসে অদা.

৪২২. ‘‘দত্ৱা অন্ৱাদিসী থেৰো, মাতু পিতু চ ভাতুনো;

‘ইদং মে ঞাতীনং হোতু, সুখিতা হোন্তু ঞাতযো’.

৪২৩. ‘‘সমনন্তৰানুদ্দিট্ঠে, ৱত্থানি উদপজ্জিসুং;

ততো সুৱত্থৱসনো, থেৰস্স দস্সযীতুমং.

৪২৪. ‘‘যাৱতা নন্দৰাজস্স, ৱিজিতস্মিং পটিচ্ছদা;

ততো বহুতৰা ভন্তে, ৱত্থানচ্ছাদনানি নো.

৪২৫. ‘‘কোসেয্যকম্বলীযানি, খোমকপ্পাসিকানি চ;

ৱিপুলা চ মহগ্ঘা চ, তেপাকাসেৱলম্বৰে.

৪২৬. ‘‘তে মযং পৰিদহাম, যং যঞ্হি মনসো পিযং;

তথা ভন্তে পৰক্কম, যথা গেহং লভামসে.

৪২৭. ‘‘থেৰো পণ্ণকুটিং কত্ৱা, সঙ্ঘে চাতুদ্দিসে অদা;

দত্ৱা চ অন্ৱাদিসী থেৰো, মাতু পিতু চ ভাতুনো;

‘ইদং মে ঞাতীনং হোতু, সুখিতা হোন্তু ঞাতযো’.

৪২৮. ‘‘সমনন্তৰানুদ্দিট্ঠে, ঘৰানি উদপজ্জিসুং;

কূটাগাৰনিৱেসনা, ৱিভত্তা ভাগসো মিতা.

৪২৯. ‘‘ন মনুস্সেসু ঈদিসা, যাদিসা নো ঘৰা ইধ;

অপি দিব্বেসু যাদিসা, তাদিসা নো ঘৰা ইধ.

৪৩০. ‘‘দদ্দল্লমানা আভেন্তি, সমন্তা চতুৰো দিসা;

তথা ভন্তে পৰক্কম, যথা পানীযং লভামসে.

৪৩১. ‘‘থেৰো কৰণং পূৰেত্ৱা, সঙ্ঘে চাতুদ্দিসে অদা;

দত্ৱা অন্ৱাদিসী থেৰো, মাতু পিতু চ ভাতুনো;

‘ইদং মে ঞাতীনং হোতু, সুখিতা হোন্তু ঞাতযো’.

৪৩২. ‘‘সমনন্তৰানুদ্দিট্ঠে, পানীযং উদপজ্জথ;

গম্ভীৰা চতুৰস্সা চ, পোক্খৰঞ্ঞো সুনিম্মিতা.

৪৩৩. ‘‘সীতোদিকা সুপ্পতিত্থা, সীতা অপ্পটিগন্ধিযা;

পদুমুপ্পলসঞ্ছন্না, ৱাৰিকিঞ্জক্খপূৰিতা.

৪৩৪. ‘‘তত্থ ন্হত্ৱা পিৱিত্ৱা চ, থেৰস্স পটিদস্সযুং;

পহূতং পানীযং ভন্তে, পাদা দুক্খা ফলন্তি নো.

৪৩৫. ‘‘আহিণ্ডমানা খঞ্জাম, সক্খৰে কুসকণ্টকে;

তথা ভন্তে পৰক্কম, যথা যানং লভামসে.

৪৩৬. ‘‘থেৰো সিপাটিকং লদ্ধা, সঙ্ঘে চাতুদ্দিসে অদা;

দত্ৱা অন্ৱাদিসী থেৰো, মাতু পিতু চ ভাতুনো;

‘ইদং মে ঞাতীনং হোতু, সুখিতা হোন্তু ঞাতযো’.

৪৩৭. ‘‘সমনন্তৰানুদ্দিট্ঠে, পেতা ৰথেন মাগমুং;

অনুকম্পিতম্হ ভদন্তে, ভত্তেনচ্ছাদনেন চ.

৪৩৮. ‘‘ঘৰেন পানীযদানেন, যানদানেন চূভযং;

মুনিং কাৰুণিকং লোকে, ভন্তে ৱন্দিতুমাগতা’’তি. – গাথাযো আহংসু;

৪১৬-৭. তত্থ থেৰো চৰিত্ৱা পিণ্ডাযাতি থেৰো পিণ্ডাপাতচাৰিকায চৰিত্ৱা. ভিক্খূ অঞ্ঞে চ দ্ৱাদসাতি থেৰেন সহ ৱসন্তা অঞ্ঞে চ দ্ৱাদস ভিক্খূ একজ্ঝং একতো সন্নিপতিংসু. কস্মাতি চে? ভত্তৱিস্সগ্গকাৰণাতি ভত্তকিচ্চকাৰণা ভুঞ্জননিমিত্তং. তেতি তে ভিক্খূ. যথালদ্ধন্তি যং যং লদ্ধং. দদাথাতি দেথ.

৪১৮. নিয্যাদযিংসূতি অদংসু. সঙ্ঘং নিমন্তযীতি তে এৱ দ্ৱাদস ভিক্খূ সঙ্ঘুদ্দেসৱসেন তং ভত্তং দাতুং নিমন্তেসি. অন্ৱাদিসীতি আদিসি. তত্থ যেসং অন্ৱাদিসি, তে দস্সেতুং ‘‘মাতু পিতু চ ভাতুনো, ইদং মে ঞাতীনং হোতু, সুখিতা হোন্তু ঞাতযো’’তি ৱুত্তং.

৪১৯. সমনন্তৰানুদ্দিট্ঠেতি উদ্দিট্ঠসমনন্তৰমেৱ. ভোজনং উদপজ্জথাতি তেসং পেতানং ভোজনং উপ্পজ্জি. কীদিসন্তি আহ ‘‘সুচি’’ন্তিআদি. তত্থ অনেকৰসব্যঞ্জনন্তি নানাৰসেহি ব্যঞ্জনেহি যুত্তং, অথ ৱা অনেকৰসং অনেকব্যঞ্জনঞ্চ. ততোতি ভোজনলাভতো পচ্ছা.

৪২০. উদ্দস্সযী ভাতাতি ভাতিকভূতো পেতো থেৰস্স অত্তানং দস্সেসি. ৱণ্ণৱা বলৱা সুখীতি তেন ভোজনলাভেন তাৱদেৱ ৰূপসম্পন্নো বলসম্পন্নো সুখিতোৱ হুত্ৱা. পহূতং ভোজনং, ভন্তেতি, ভন্তে, তৱ দানানুভাৱেন পহূতং অনপ্পকং ভোজনং অম্হেহি লদ্ধং. পস্স নগ্গাম্হসেতি ওলোকেহি, নগ্গিকা পন অম্হ, তস্মা তথা, ভন্তে, পৰক্কম পযোগং কৰোহি. যথা ৱত্থং লভামসেতি যেন পকাৰেন যাদিসেন পযোগেন সব্বেৱ মযং ৱত্থানি লভেয্যাম, তথা ৱাযমথাতি অত্থো.

৪২১. সঙ্কাৰকূটম্হাতি তত্থ তত্থ সঙ্কাৰট্ঠানতো. উচ্চিনিত্ৱানাতি গৱেসনৱসেন গহেত্ৱা. নন্তকেতি ছিন্নপৰিযন্তে ছড্ডিতদুস্সখণ্ডে. তে পন যস্মা খণ্ডভূতা পিলোতিকা নাম হোন্তি, তাহি চ থেৰো চীৱৰং কত্ৱা সঙ্ঘস্স অদাসি, তস্মা আহ ‘‘পিলোতিকং পটং কত্ৱা, সঙ্ঘে চাতুদ্দিসে অদা’’তি. তত্থ সঙ্ঘে চাতুদ্দিসে অদাতি চতূহিপি দিসাহি আগতভিক্খুসঙ্ঘস্স অদাসি. সম্পদানত্থে হি ইদং ভুম্মৱচনং.

৪২৩-৪. সুৱত্থৱসনোতি সুন্দৰৱত্থৱসনো. থেৰস্স দস্সযীতুমন্তি থেৰস্স অত্তানং দস্সযি দস্সেসি, পাকটো অহোসি. পটিচ্ছাদযতি এত্থাতি পটিচ্ছদা.

৪২৮-৯. কূটাগাৰনিৱেসনাতি কূটাগাৰভূতা তদঞ্ঞনিৱেসনসঙ্খাতা চ ঘৰা. লিঙ্গৱিপল্লাসৱসেন হেতং ৱুত্তং. ৱিভত্তাতি সমচতুৰস্সআযতৱট্টসণ্ঠানাদিৱসেন ৱিভত্তা. ভাগসো মিতাতি ভাগেন পৰিচ্ছিন্না. নোতি অম্হাকং. ইধাতি ইমস্মিং পেতলোকে. অপি দিব্বেসূতি অপীতি নিপাতমত্তং, দেৱলোকেসূতি অত্থো.

৪৩১. কৰণন্তি ধমকৰণং. পূৰেত্ৱাতি উদকস্স পূৰেত্ৱা. ৱাৰিকিঞ্জক্খপূৰিতাতি তত্থ তত্থ ৱাৰিমত্থকে পদুমুপ্পলাদীনং কেসৰভাৰেহি সঞ্ছাদিতৱসেন পূৰিতা. ফলন্তীতি পুপ্ফন্তি, পণ্হিকপৰিযন্তাদীসু ৱিদালেন্তীতি অত্থো.

৪৩৫-৬. আহিণ্ডমানাতি ৱিচৰমানা. খঞ্জামাতি খঞ্জনৱসেন গচ্ছাম. সক্খৰে কুসকণ্টকেতি সক্খৰৱতি কুসকণ্টকৱতি চ ভূমিভাগে, সক্খৰে কুসকণ্টকে চ অক্কমন্তাতি অত্থো. যানন্তি ৰথৱয্হাদিকং যংকিঞ্চি যানং. সিপাটিকন্তি একপটলউপাহনং.

৪৩৭-৮. ৰথেন মাগমুন্তি মকাৰো পদসন্ধিকৰো, ৰথেন আগমংসু. উভযন্তি উভযেন দানেন, যানদানেন চেৱ ভত্তাদিচতুপচ্চযদানেন চ. পানীযদানেন হেত্থ ভেসজ্জদানম্পি সঙ্গহিতং. সেসং হেট্ঠা ৱুত্তনযত্তা উত্তানমেৱাতি.

থেৰো তং পৱত্তিং ভগৱতো আৰোচেসি. ভগৱা তমত্থং অট্ঠুপ্পত্তিং কত্ৱা ‘‘যথা ইমে এতৰহি, এৱং ত্ৱম্পি ইতো অনন্তৰাতীতে অত্তভাৱে পেতো হুত্ৱা মহাদুক্খং অনুভৱী’’তি ৱত্ৱা থেৰেন যাচিতো সুত্তপেতৱত্থুং কথেত্ৱা সম্পত্তপৰিসায ধম্মং দেসেসি. তং সুত্ৱা মহাজনো সঞ্জাতসংৱেগো দানসীলাদিপুঞ্ঞকম্মনিৰতো অহোসীতি.

সাণৱাসিত্থেৰপেতৱত্থুৱণ্ণনা নিট্ঠিতা.