৯. মহাপেসকাৰপেতিৱত্থুৱণ্ণনা

গূথঞ্চ মুত্তং ৰুহিৰঞ্চ পুব্বন্তি ইদং সত্থৰি সাৱত্থিযং ৱিহৰন্তে অঞ্ঞতৰং পেসকাৰপেতিং আৰব্ভ ৱুত্তং. দ্ৱাদসমত্তা কিৰ ভিক্খূ সত্থু সন্তিকে কম্মট্ঠানং গহেত্ৱা ৱসনযোগ্গট্ঠানং ৱীমংসন্তা উপকট্ঠায ৱস্সূপনাযিকায অঞ্ঞতৰং ছাযূদকসম্পন্নং ৰমণীযং অৰঞ্ঞাযতনং তস্স চ নাতিদূৰে নাচ্চাসন্নে গোচৰগামং দিস্ৱা তত্থ একৰত্তিং ৱসিত্ৱা দুতিযদিৱসে গামং পিণ্ডায পৱিসিংসু. তত্থ একাদস পেসকাৰা পটিৱসন্তি, তে তে ভিক্খূ দিস্ৱা সঞ্জাতসোমনস্সা হুত্ৱা অত্তনো অত্তনো গেহং নেত্ৱা পণীতেন আহাৰেন পৰিৱিসিত্ৱা আহংসু ‘‘কুহিং, ভন্তে, গচ্ছথা’’তি? ‘‘যত্থ অম্হাকং ফাসুকং, তত্থ গমিস্সামা’’তি. ‘‘যদি এৱং, ভন্তে, ইধেৱ ৱসিতব্ব’’ন্তি ৱস্সূপগমনং যাচিংসু. ভিক্খূ সম্পটিচ্ছিংসু. উপাসকা তেসং তত্থ অৰঞ্ঞকুটিকাযো কাৰেত্ৱা অদংসু. ভিক্খূ তত্থ ৱস্সং উপগচ্ছিংসু.

তত্থ জেট্ঠকপেসকাৰো দ্ৱে ভিক্খূ চতূহি পচ্চযেহি সক্কচ্চং উপট্ঠহি, ইতৰে একেকং ভিক্খুং উপট্ঠহিংসু. জেট্ঠকপেসকাৰস্স ভৰিযা অস্সদ্ধা অপ্পসন্না মিচ্ছাদিট্ঠিকা মচ্ছৰিনী ভিক্খূ ন সক্কচ্চং উপট্ঠাতি. সো তং দিস্ৱা তস্সাযেৱ কনিট্ঠভগিনিং আনেত্ৱা অত্তনো গেহে ইস্সৰিযং নিয্যাদেসি. সা সদ্ধা পসন্না হুত্ৱা সক্কচ্চং ভিক্খূ পটিজগ্গি. তে সব্বে পেসকাৰো ৱস্সং ৱুত্থানং ভিক্খূনং একেকস্স একেকং সাটকমদংসু. তত্থ মচ্ছৰিনী জেট্ঠপেসকাৰস্স ভৰিযা পদুট্ঠচিত্তা অত্তনো সামিকং পৰিভাসি – ‘‘যং তযা সমণানং সক্যপুত্তিযানং দানং দিন্নং অন্নপানং, তং তে পৰলোকে গূথমুত্তং পুব্বলোহিতঞ্চ হুত্ৱা নিব্বত্ততু, সাটকা চ জলিতা অযোমযপট্টা হোন্তূ’’তি.

তত্থ জেট্ঠপেসকাৰো অপৰেন সমযেন কালং কত্ৱা ৱিঞ্ঝাটৱিযং আনুভাৱসম্পন্না ৰুক্খদেৱতা হুত্ৱা নিব্বত্তি. তস্স পন কদৰিযা ভৰিযা কালং কত্ৱা তস্সেৱ ৱসনট্ঠানস্স অৱিদূৰে পেতী হুত্ৱা নিব্বত্তি. সা নগ্গা দুব্বণ্ণৰূপা জিঘচ্ছাপিপাসাভিভূতা তস্স ভূমদেৱস্স সন্তিকং গন্ত্ৱা আহ – ‘‘অহং, সামি, নিচ্চোড়া অতিৱিয জিঘচ্ছাপিপাসাভিভূতা ৱিচৰামি, দেহি মে ৱত্থং অন্নপানঞ্চা’’তি. সো তস্সা দিব্বং উড়াৰং অন্নপানং উপনেসি. তং তায গহিতমত্তমেৱ গূথমুত্তং পুব্বলোহিতঞ্চ সম্পজ্জতি, সাটকঞ্চ দিন্নং তায পৰিদহিতং পজ্জলিতং অযোমযপট্টং হোতি. সা মহাদুক্খং অনুভৱন্তী তং ছড্ডেত্ৱা কন্দন্তী ৱিচৰতি.

তেন চ সমযেন অঞ্ঞতৰো ভিক্খু ৱুত্থৱস্সো সত্থাৰং ৱন্দিতুং গচ্ছন্তো মহতা সত্থেন সদ্ধিং ৱিঞ্ঝাটৱিং পটিপজ্জি. সত্থিকা ৰত্তিং মগ্গং গন্ত্ৱা দিৱা ৱনে সন্দচ্ছাযূদকসম্পন্নং পদেসং দিস্ৱা যানানি মুঞ্চিত্ৱা মুহুত্তং ৱিস্সমিংসু. ভিক্খু পন ৱিৱেককামতায থোকং অপক্কমিত্ৱা অঞ্ঞতৰস্স সন্দচ্ছাযস্স ৱনগহনপটিচ্ছন্নস্স ৰুক্খস্স মূলে সঙ্ঘাটিং পঞ্ঞপেত্ৱা নিপন্নো ৰত্তিযং মগ্গগমনপৰিস্সমেন কিলন্তকাযো নিদ্দং উপগঞ্ছি. সত্থিকা ৱিস্সমিত্ৱা মগ্গং পটিপজ্জিংসু, সো ভিক্খু ন পটিবুজ্ঝি. অথ সাযন্হসমযে উট্ঠহিত্ৱা তে অপস্সন্তো অঞ্ঞতৰং কুম্মগ্গং পটিপজ্জিত্ৱা অনুক্কমেন তস্সা দেৱতায ৱসনট্ঠানং সম্পাপুণি. অথ নং সো দেৱপুত্তো দিস্ৱা মনুস্সৰূপেন উপগন্ত্ৱা পটিসন্থাৰং কত্ৱা অত্তনো ৱিমানং পৱেসেত্ৱা পাদব্ভঞ্জনাদীনি দত্ৱা পযিৰুপাসন্তো নিসীদি. তস্মিঞ্চ সমযে সা পেতী আগন্ত্ৱা ‘‘দেহি মে, সামি, অন্নপানং সাটকঞ্চা’’তি আহ. সো তস্সা তানি অদাসি. তানি চ তায গহিতমত্তানি গূথমুত্তপুব্বলোহিতপজ্জলিতঅযোপট্টাযেৱ অহেসুং. সো ভিক্খু তং দিস্ৱা সঞ্জাতসংৱেগো তং দেৱপুত্তং –

৫৪. ‘‘গূথঞ্চ মুত্তং ৰুহিৰঞ্চ পুব্বং, পৰিভুঞ্জতি কিস্স অযং ৱিপাকো;

অযং নু কিং কম্মমকাসি নাৰী, যা সব্বদা লোহিতপুব্বভক্খা.

৫৫. ‘‘নৱানি ৱত্থানি সুভানি চেৱ, মুদূনি সুদ্ধানি চ লোমসানি;

দিন্নানি মিস্সা কিতকা ভৱন্তি, অযং নু কিং কম্মমকাসি নাৰী’’তি. –

দ্ৱীহি গাথাহি পটিপুচ্ছি. তত্থ কিস্স অযং ৱিপাকোতি কীদিসস্স কম্মস্স অযং ৱিপাকো, যং এসা ইদানি পচ্চনুভৱতীতি. অযং নু কিং কম্মমকাসি নাৰীতি অযং ইত্থী কিং নু খো কম্মং পুব্বে অকাসি. যা সব্বদা লোহিতপুব্বভক্খাতি যা সব্বকালং ৰুহিৰপুব্বমেৱ ভক্খতি পৰিভুঞ্জতি. নৱানীতি পচ্চগ্ঘানি তাৱদেৱ পাতুভূতানি. সুভানীতি সুন্দৰানি দস্সনীযানি. মুদূনীতি সুখসম্ফস্সানি. সুদ্ধানীতি পৰিসুদ্ধৱণ্ণানি. লোমসানীতি সলোমকানি সুখসম্ফস্সানি, সুন্দৰানীতি অত্থো. দিন্নানি মিস্সা কিতকা ভৱন্তীতি কিতককণ্টকসদিসানি লোহপট্টসদিসানি ভৱন্তি. ‘‘কীটকা ভৱন্তী’’তি ৱা পাঠো, খাদকপাণকৱণ্ণানি ভৱন্তীতি অত্থো.

এৱং সো দেৱপুত্তো তেন ভিক্খুনা পুট্ঠো তায পুৰিমজাতিযা কতকম্মং পকাসেন্তো –

৫৬. ‘‘ভৰিযা মমেসা অহু ভদন্তে, অদাযিকা মচ্ছৰিনী কদৰিযা;

সা মং দদন্তং সমণব্ৰাহ্মণানং, অক্কোসতি চ পৰিভাসতি চ.

৫৭. ‘‘গূথঞ্চ মুত্তং ৰুহিৰঞ্চ পুব্বং, পৰিভুঞ্জ ত্ৱং অসুচিং সব্বকালং;

এতং তে পৰলোকস্মিং হোতু, ৱত্থা চ তে কিতকসমা ভৱন্তু;

এতাদিসং দুচ্চৰিতং চৰিত্ৱা, ইধাগতা চিৰৰত্তায খাদতী’’তি. –

দ্ৱে গাথা অভাসি. তত্থ অদাযিকাতি কস্সচি কিঞ্চিপি অদানসীলা. মচ্ছৰিনী কদৰিযাতি পঠমং মচ্ছেৰমলস্স সভাৱেন মচ্ছৰিনী, তায চ পুনপ্পুনং আসেৱনতায থদ্ধমচ্ছৰিনী, তায কদৰিযা অহূতি যোজনা. ইদানি তস্সা তমেৱ কদৰিযতং দস্সেন্তো ‘‘সা মং দদন্ত’’ন্তিআদিমাহ. তত্থ এতাদিসন্তি এৱৰূপং যথাৱুত্তৱচীদুচ্চৰিতাদিং চৰিত্ৱা. ইধাগতাতি ইমং পেতলোকং আগতা, পেতত্তভাৱং উপগতা. চিৰৰত্তায খাদতীতি চিৰকালং গূথাদিমেৱ খাদতি. তস্সা হি যেনাকাৰেন অক্কুট্ঠং, তেনেৱাকাৰেন পৱত্তমানম্পি ফলং. যং উদ্দিস্স অক্কুট্ঠং, ততো অঞ্ঞত্থ পথৱিযং কমন্তকসঙ্খাতে মত্থকে অসনিপাতো ৱিয অত্তনো উপৰি পততি.

এৱং সো দেৱপুত্তো তায পুব্বে কতকম্মং কথেত্ৱা পুন তং ভিক্খুং আহ – ‘‘অত্থি পন, ভন্তে, কোচি উপাযো ইমং পেতলোকতো মোচেতু’’ন্তি? ‘‘অত্থী’’তি চ ৱুত্তে ‘‘কথেথ, ভন্তে’’তি. যদি ভগৱতো অৰিযসঙ্ঘস্স চ একস্সেৱ ৱা ভিক্খুনো দানং দত্ৱা ইমিস্সা উদ্দিসিযতি, অযঞ্চ তং অনুমোদতি, এৱমেতিস্সা ইতো দুক্খতো মুত্তি ভৱিস্সতীতি. তং সুত্ৱা দেৱপুত্তো তস্স ভিক্খুনো পণীতং অন্নপানং দত্ৱা তং দক্খিণং তস্সা পেতিযা আদিসি. তাৱদেৱ সা পেতী সুহিতা পীণিন্দ্ৰিযা দিব্বাহাৰস্স তিত্তা অহোসি. পুন তস্সেৱ ভিক্খুনো হত্থে দিব্বসাটকযুগং ভগৱন্তং উদ্দিস্স দত্ৱা তঞ্চ দক্খিণং পেতিযা আদিসি. তাৱদেৱ চ সা দিব্বৱত্থনিৱত্থা দিব্বালঙ্কাৰৱিভূসিতা সব্বকামসমিদ্ধা দেৱচ্ছৰাপটিভাগা অহোসি. সো চ ভিক্খু তস্স দেৱপুত্তস্স ইদ্ধিযা তদহেৱ সাৱত্থিং পত্ৱা জেতৱনং পৱিসিত্ৱা ভগৱতো সন্তিকং উপগন্ত্ৱা ৱন্দিত্ৱা তং সাটকযুগং দত্ৱা তং পৱত্তিং আৰোচেসি. ভগৱাপি তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. সা দেসনা মহাজনস্স সাত্থিকা অহোসীতি.

মহাপেসকাৰপেতিৱত্থুৱণ্ণনা নিট্ঠিতা.