১০. খল্লাটিযপেতিৱত্থুৱণ্ণনা

কা নু অন্তোৱিমানস্মিন্তি ইদং সত্থৰি সাৱত্থিযং ৱিহৰন্তে অঞ্ঞতৰং খল্লাটিযপেতিং আৰব্ভ ৱুত্তং. অতীতে কিৰ বাৰাণসিযং অঞ্ঞতৰা ৰূপূপজীৱিনী ইত্থী অভিৰূপা দস্সনীযা পাসাদিকা পৰমায ৱণ্ণপোক্খৰতায সমন্নাগতা অতিমনোহৰকেসকলাপী অহোসি. তস্সা হি কেসা নীলা দীঘা তনূ মুদূ সিনিদ্ধা ৱেল্লিতগ্গা দ্ৱিহত্থগয্হা ৱিসট্ঠা যাৱ মেখলা কলাপা ওলম্বন্তি. তং তস্সা কেসসোভং দিস্ৱা তৰুণজনো যেভুয্যেন তস্সং পটিবদ্ধচিত্তো অহোসি. অথস্সা তং কেসসোভং অসহমানা ইস্সাপকতা কতিপযা ইত্থিযো মন্তেত্ৱা তস্সা এৱ পৰিচাৰিকদাসিং আমিসেন উপলাপেত্ৱা তায তস্সা কেসূপপাতনং ভেসজ্জং দাপেসুং. সা কিৰ দাসী তং ভেসজ্জং ন্হানিযচুণ্ণেন সদ্ধিং পযোজেত্ৱা গঙ্গায নদিযা ন্হানকালে তস্সা অদাসি. সা তেন কেসমূলেসু তেমেত্ৱা উদকে নিমুজ্জি, নিমুজ্জনমত্তেযেৱ কেসা সমূলা পৰিপতিংসু, সীসং চস্সা তিত্তকলাবুসদিসং অহোসি. অথ সা সব্বসো ৱিলূনকেসা লুঞ্চিতমত্থকা কপোতী ৱিয ৱিৰূপা হুত্ৱা লজ্জায অন্তোনগৰং পৱিসিতুং অসক্কোন্তী ৱত্থেন সীসং ৱেঠেত্ৱা বহিনগৰে অঞ্ঞতৰস্মিং পদেসে ৱাসং কপ্পেন্তী কতিপাহচ্চযেন অপগতলজ্জা ততো নিৱত্তেত্ৱা তিলানি পীড়েত্ৱা তেলৱণিজ্জং সুৰাৱণিজ্জঞ্চ কৰোন্তী জীৱিকং কপ্পেসি. সা একদিৱসং দ্ৱীসু তীসু মনুস্সেসু সুৰামত্তেসু মহানিদ্দং ওক্কমন্তেসু সিথিলভূতানি তেসং নিৱত্থৱত্থানি অৱহৰি.

অথেকদিৱসং সা একং খীণাসৱত্থেৰং পিণ্ডায চৰন্তং দিস্ৱা পসন্নচিত্তা অত্তনো ঘৰং নেত্ৱা পঞ্ঞত্তে আসনে নিসীদাপেত্ৱা তেলসংসট্ঠং দোণিনিম্মজ্জনিং পিঞ্ঞাকমদাসি. সো তস্সা অনুকম্পায তং পটিগ্গহেত্ৱা পৰিভুঞ্জি. সা পসন্নমানসা উপৰি ছত্তং ধাৰযমানা অট্ঠাসি. সো চ থেৰো তস্সা চিত্তং পহংসেন্তো অনুমোদনং কত্ৱা পক্কামি. সা চ ইত্থী অনুমোদনকালেযেৱ ‘‘ময্হং কেসা দীঘা তনূ সিনিদ্ধা মুদূ ৱেল্লিতগ্গা হোন্তূ’’তি পত্থনমকাসি.

সা অপৰেন সমযেন কালং কত্ৱা মিস্সককম্মস্স ফলেন সমুদ্দমজ্ঝে কনকৱিমানে একিকা হুত্ৱা নিব্বত্তি. তস্সা কেসা পত্থিতাকাৰাযেৱ সম্পজ্জিংসু. মনুস্সানং সাটকাৱহৰণেন পন নগ্গা অহোসি. সা তস্মিং কনকৱিমানে পুনপ্পুনং উপ্পজ্জিত্ৱা একং বুদ্ধন্তৰং নগ্গাৱ হুত্ৱা ৱীতিনামেসি. অথ অম্হাকং ভগৱতি লোকে উপ্পজ্জিত্ৱা পৱত্তিতৱৰধম্মচক্কে অনুপুব্বেন সাৱত্থিযং ৱিহৰন্তে সাৱত্থিৱাসিনো সত্তসতা ৱাণিজা সুৱণ্ণভূমিং উদ্দিস্স নাৱায মহাসমুদ্দং ওতৰিংসু. তেহি আৰুড়্হা নাৱা ৱিসমৱাতৱেগুক্খিত্তা ইতো চিতো চ পৰিব্ভমন্তী তং পদেসং অগমাসি. অথ সা ৱিমানপেতী সহ ৱিমানেন তেসং অত্তানং দস্সেসি. তং দিস্ৱা জেট্ঠৱাণিজো পুচ্ছন্তো –

৫৮. ‘‘কা নু অন্তোৱিমানস্মিং, তিট্ঠন্তী নূপনিক্খমি;

উপনিক্খমস্সু ভদ্দে, পস্সাম তং বহিট্ঠিত’’ন্তি. –

গাথমাহ. তত্থ কা নু অন্তোৱিমানস্মিং তিট্ঠন্তীতি ৱিমানস্স অন্তো অব্ভন্তৰে তিট্ঠন্তী কা নু ত্ৱং, কিং মনুস্সিত্থী, উদাহু অমনুস্সিত্থীতি পুচ্ছতি. নূপনিক্খমীতি ৱিমানতো ন নিক্খমি. উপনিক্খমস্সু, ভদ্দে, পস্সাম তং বহিট্ঠিতন্তি, ভদ্দে, তং মযং বহি ঠিতং পস্সাম দট্ঠুকামম্হা, তস্মা ৱিমানতো নিক্খমস্সু. ‘‘উপনিক্খমস্সু ভদ্দন্তে’’তি ৱা পাঠো, ভদ্দং তে অত্থূতি অত্থো.

অথস্স সা অত্তনো বহি নিক্খমিসুং অসক্কুণেয্যতং পকাসেন্তী –

৫৯. ‘‘অট্টীযামি হৰাযামি, নগ্গা নিক্খমিতুং বহি;

কেসেহম্হি পটিচ্ছন্না, পুঞ্ঞং মে অপ্পকং কত’’ন্তি. –

গাথমাহ. তত্থ অট্টীযামীতি নগ্গা হুত্ৱা বহি নিক্খমিতুং অট্টিকা দুক্খিতা অম্হি. হৰাযামীতি লজ্জামি. কেসেহম্হি পটিচ্ছন্নাতি কেসেহি অম্হি অহং পটিচ্ছাদিতা পাৰুতসৰীৰা. পুঞ্ঞং মে অপ্পকং কতন্তি অপ্পকং পৰিত্তং মযা কুসলকম্মং কতং, পিঞ্ঞাকদানমত্তন্তি অধিপ্পাযো.

অথস্সা ৱাণিজো অত্তনো উত্তৰিসাটকং দাতুকামো –-

৬০. ‘‘হন্দুত্তৰীযং দদামি তে, ইদং দুস্সং নিৱাসয;

ইদং দুস্সং নিৱাসেত্ৱা, এহি নিক্খম সোভনে;

উপনিক্খমস্সু ভদ্দে, পস্সাম তং বহিট্ঠিত’’ন্তি. –

গাথমাহ. তত্থ হন্দাতি গণ্হ. উত্তৰীযন্তি উপসংব্যানং উত্তৰিসাটকন্তি অত্থো. দদামি তেতি তুয্হং দদামি. ইদং দুস্সং নিৱাসযাতি ইদং মম উত্তৰিসাটকং ত্ৱং নিৱাসেহি. সোভনেতি সুন্দৰৰূপে.

এৱঞ্চ পন ৱত্ৱা অত্তনো উত্তৰিসাটকং তস্সা উপনেসি, সা তথা দিয্যমানস্স অত্তনো অনুপকপ্পনীযতঞ্চ, যথা দিয্যমানং উপকপ্পতি, তঞ্চ দস্সেন্তী –

৬১. ‘‘হত্থেন হত্থে তে দিন্নং, ন ময্হং উপকপ্পতি;

এসেত্থুপাসকো সদ্ধো, সম্মাসম্বুদ্ধসাৱকো.

৬২. ‘‘এতং অচ্ছাদযিত্ৱান, মম দক্খিণমাদিস;

তথাহং সুখিতা হেস্সং, সব্বকামসমিদ্ধিনী’’তি. –

গাথাদ্ৱযমাহ. তত্থ হত্থেন হত্থে তে দিন্নং, ন ময্হং উপকপ্পতীতি, মাৰিস, তৱ হত্থেন মম হত্থে তযা দিন্নং ন ময্হং উপকপ্পতি ন ৱিনিযুজ্জতি, উপভোগযোগ্গং ন হোতীতি অত্থো. এসেত্থুপাসকো সদ্ধোতি এসো ৰতনত্তযং উদ্দিস্স সৰণগমনেন উপাসকো কম্মফলসদ্ধায চ সমন্নাগতত্তা সদ্ধো এত্থ এতস্মিং জনসমূহে অত্থি. এতং অচ্ছাদযিত্ৱান, মম দক্খিণমাদিসাতি এতং উপাসকং মম দিয্যমানং সাটকং পৰিদহাপেত্ৱা তং দক্খিণং ময্হং আদিস পত্তিদানং দেহি. তথাহং সুখিতা হেস্সন্তি তথা কতে অহং সুখিতা দিব্বৱত্থনিৱত্থা সুখপ্পত্তা ভৱিস্সামীতি.

তং সুত্ৱা ৱাণিজা তং উপাসকং ন্হাপেত্ৱা ৱিলিম্পেত্ৱা ৱত্থযুগেন অচ্ছাদেসুং. তমত্থং পকাসেন্তা সঙ্গীতিকাৰা –

৬৩. ‘‘তঞ্চ তে ন্হাপযিত্ৱান, ৱিলিম্পেত্ৱান ৱাণিজা;

ৱত্থেহচ্ছাদযিত্ৱান, তস্সা দক্খিণমাদিসুং.

৬৪. ‘‘সমনন্তৰানুদ্দিট্ঠে, ৱিপাকো উদপজ্জথ;

ভোজনচ্ছাদনপানীযং, দক্খিণায ইদং ফলং.

৬৫. ‘‘ততো সুদ্ধা সুচিৱসনা, কাসিকুত্তমধাৰিনী;

হসন্তী ৱিমানা নিক্খমি, দক্খিণায ইদং ফল’’ন্তি. –

তিস্সো গাথাযো অৱোচুং.

৬৩. তত্থ তন্তি তং উপাসকং. চ-সদ্দো নিপাতমত্তং. তেতি তে ৱাণিজাতি যোজনা. ৱিলিম্পেত্ৱানাতি উত্তমেন গন্ধেন ৱিলিম্পেত্ৱা. ৱত্থেহচ্ছাদযিত্ৱানাতি ৱণ্ণগন্ধৰসসম্পন্নং সব্যঞ্জনং ভোজনং ভোজেত্ৱা নিৱাসনং উত্তৰীযন্তি দ্ৱীহি ৱত্থেহি অচ্ছাদেসুং, দ্ৱে ৱত্থানি অদংসূতি অত্থো. তস্সা দক্খিণমাদিসুন্তি তস্সা পেতিযা তং দক্খিণং আদিসিংসু.

৬৪. সমনন্তৰানুদ্দিট্ঠেতি অনূ-তি নিপাতমত্তং, তস্সা দক্খিণায উদ্দিট্ঠসমনন্তৰমেৱ. ৱিপাকো উদপজ্জথাতি তস্সা পেতিযা ৱিপাকো দক্খিণায ফলং উপ্পজ্জি. কীদিসোতি পেতী আহ ভোজনচ্ছাদনপানীযন্তি. নানপ্পকাৰং দিব্বভোজনসদিসং ভোজনঞ্চ নানাৱিৰাগৱণ্ণসমুজ্জলং দিব্বৱত্থসদিসং ৱত্থঞ্চ অনেকৱিধং পানকঞ্চ দক্খিণায ইদং ঈদিসং ফলং উদপজ্জথাতি যোজনা.

৬৫. ততোতি যথাৱুত্তভোজনাদিপটিলাভতো পচ্ছা. সুদ্ধাতি ন্হানেন সুদ্ধসৰীৰা. সুচিৱসনাতি সুৱিসুদ্ধৱত্থনিৱত্থা. কাসিকুত্তমধাৰিনীতি কাসিকৱত্থতোপি উত্তমৱত্থধাৰিনী. হসন্তীতি ‘‘পস্সথ তাৱ তুম্হাকং দক্খিণায ইদং ফলৱিসেস’’ন্তি পকাসনৱসেন হসমানা ৱিমানতো নিক্খমি.

অথ তে ৱাণিজা এৱং পচ্চক্খতো পুঞ্ঞফলং দিস্ৱা অচ্ছৰিযব্ভুতচিত্তজাতা তস্মিং উপাসকে সঞ্জাতগাৰৱবহুমানা কতঞ্জলী তং পযিৰুপাসিংসু. সোপি তে ধম্মকথায ভিয্যোসোমত্তায পসাদেত্ৱা সৰণেসু চ সীলেসু চ পতিট্ঠাপেসি. তে তায ৱিমানপেতিযা কতকম্মং –

৬৬. ‘‘সুচিত্তৰূপং ৰুচিৰং, ৱিমানং তে পভাসতি;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি. –

ইমায গাথায পুচ্ছিংসু. তত্থ সুচিত্তৰূপন্তি হত্থিঅস্সইত্থিপুৰিসাদিৱসেন চেৱ মালাকম্মলতাকম্মাদিৱসেন চ সুট্ঠু ৱিহিতচিত্তৰূপং. ৰুচিৰন্তি ৰমণীযং দস্সনীযং. কিস্স কম্মস্সিদং ফলন্তি কীদিসস্স কম্মস্স, কিং দানমযস্স উদাহু সীলমযস্স ইদং ফলন্তি অত্থো.

সা তেহি এৱং পুট্ঠা ‘‘মযা কতস্স পৰিত্তকস্স কুসলকম্মস্স তাৱ ইদং ফলং, অকুসলকম্মস্স পন আযতিং নিৰযে এদিসং ভৱিস্সতী’’তি তদুভযং আচিক্খন্তী –

৬৭. ‘‘ভিক্খুনো চৰমানস্স, দোণিনিম্মজ্জনিং অহং;

অদাসিং উজুভূতস্স, ৱিপ্পসন্নেন চেতসা.

৬৮. ‘‘তস্স কম্মস্স কুসলস্স, ৱিপাকং দীঘমন্তৰং;

অনুভোমি ৱিমানস্মিং, তঞ্চ দানি পৰিত্তকং.

৬৯. ‘‘উদ্ধং চতূহি মাসেহি, কালংকিৰিযা ভৱিস্সতি;

একন্তকটুকং ঘোৰং, নিৰযং পপতিস্সহং.

৭০. ‘‘চতুক্কণ্ণং চতুদ্ৱাৰং, ৱিভত্তং ভাগসো মিতং;

অযোপাকাৰপৰিযন্তং, অযসা পটিকুজ্জিতং.

৭১. ‘‘তস্স অযোমযা ভূমি, জলিতা তেজসা যুতা;

সমন্তা যোজনসতং, ফৰিত্ৱা তিট্ঠতি সব্বদা.

৭২. ‘‘তত্থাহং দীঘমদ্ধানং, দুক্খং ৱেদিস্স ৱেদনং;

ফলঞ্চ পাপকম্মস্স, তস্মা সোচামহং ভুস’’ন্তি. – গাথাযো অভাসি;

৬৭. তত্থ ভিক্খুনো চৰমানস্সাতি অঞ্ঞতৰস্স ভিন্নকিলেসস্স ভিক্খুনো ভিক্খায চৰন্তস্স. দোণিনিম্মজ্জনিন্তি ৱিস্সন্দমানতেলং পিঞ্ঞাকং. উজুভূতস্সাতি চিত্তজিম্হৱঙ্ককুটিলভাৱকৰানং কিলেসানং অভাৱেন উজুভাৱপ্পত্তস্স. ৱিপ্পসন্নেন চেতসাতি কম্মফলসদ্ধায সুট্ঠু পসন্নেন চিত্তেন.

৬৮-৬৯. দীঘমন্তৰন্তি ম-কাৰো পদসন্ধিকৰো, দীঘঅন্তৰং দীঘকালন্তি অত্থো. তঞ্চ দানি পৰিত্তকন্তি তঞ্চ পুঞ্ঞফলং ৱিপক্কৱিপাকত্তা কম্মস্স ইদানি পৰিত্তকং অপ্পাৱসেসং, ন চিৰেনেৱ ইতো চৱিস্সামীতি অত্থো. তেনাহ ‘‘উদ্ধং চতূহি মাসেহি, কালংকিৰিযা ভৱিস্সতী’’তি চতূহি মাসেহি উদ্ধং চতুন্নং মাসানং উপৰি পঞ্চমে মাসে মম কালংকিৰিযা ভৱিস্সতীতি দস্সেতি. একন্তকটুকন্তি একন্তেনেৱ অনিট্ঠছফস্সাযতনিকভাৱতো একন্তদুক্খন্তি অত্থো. ঘোৰন্তি দাৰুণং. নিৰযন্তি নত্থি এত্থ অযো সুখন্তি কত্ৱা ‘‘নিৰয’’ন্তি লদ্ধনামং নৰকং. পপতিস্সহন্তি পপহিস্সামি অহং.

৭০. ‘‘নিৰয’’ন্তি চেত্থ অৱীচিমহানিৰযস্স অধিপ্পেতত্তা তং সৰূপতো দস্সেতুং ‘‘চতুক্কণ্ণ’’ন্তিআদিমাহ. তত্থ চতুক্কণ্ণন্তি চতুক্কোণং. চতুদ্ৱাৰন্তি চতূসু দিসাসু চতূহি দ্ৱাৰেহি যুত্তং. ৱিভত্তন্তি সুট্ঠু ৱিভত্তং.

ভাগসোতি ভাগতো. মিতন্তি তুলিতং. অযোপাকাৰপৰিযন্তন্তি অযোমযেন পাকাৰেন পৰিক্খিত্তং. অযসা পটিকুজ্জিতন্তি অযোপটলেনেৱ উপৰি পিহিতং.

৭১-৭২. তেজসা যুতাতি সমন্ততো সমুট্ঠিতজালেন মহতা অগ্গিনা নিৰন্তৰং সমাযুতজালা. সমন্তা যোজনসতন্তি এৱং পন সমন্তা বহি সব্বদিসাসু যোজনসতং যোজনানং সতং. সব্বদাতি সব্বকালং. ফৰিত্ৱা তিট্ঠতীতি ব্যাপেত্ৱা তিট্ঠতি. তত্থাতি তস্মিং মহানিৰযে. ৱেদিস্সন্তি ৱেদিস্সামি অনুভৱিস্সামি. ফলঞ্চ পাপকম্মস্সাতি ইদং ঈদিসং দুক্খানুভৱনং মহা এৱং কতস্স পাপস্স কম্মস্স ফলন্তি অত্থো.

এৱং তায অত্তনা কতকম্মফলে আযতিং নেৰযিকভযে চ পকাসিতে সো উপাসকো কৰুণাসঞ্চোদিতমানসো ‘‘হন্দস্সাহং পতিট্ঠা ভৱেয্য’’ন্তি চিন্তেত্ৱা আহ – ‘‘দেৱতে, ত্ৱং ময্হং একস্স দানৱসেন সব্বকামসমিদ্ধা উট্ঠাৰসম্পত্তিযুত্তা জাতা, ইদানি পন ইমেসং উপাসকানং দানং দত্ৱা সত্থু চ গুণে অনুস্সৰিত্ৱা নিৰযূপপত্তিতো মুচ্চিস্সসী’’তি. সা পেতী হট্ঠতুট্ঠা ‘‘সাধূ’’তি ৱত্ৱা তে দিব্বেন অন্নপানেন সন্তপ্পেত্ৱা দিব্বানি ৱত্থানি নানাৱিধানি ৰতনানি চ অদাসি, ভগৱন্তঞ্চ উদ্দিস্স দিব্বং দুস্সযুগং তেসং হত্থে দত্ৱা ‘‘অঞ্ঞতৰা, ভন্তে, ৱিমানপেতী ভগৱতো পাদে সিৰসা ৱন্দতীতি সাৱত্থিং গন্ত্ৱা সত্থাৰং মম ৱচনেন ৱন্দথা’’তি ৱন্দনঞ্চ পেসেসি, তঞ্চ নাৱং অত্তনো ইদ্ধানুভাৱেন তেহি ইচ্ছিতপট্টনং তং দিৱসমেৱ উপনেসি.

অথ তে ৱাণিজা ততো পট্টনতো অনুক্কমেন সাৱত্থিং পত্ৱা জেতৱনং পৱিসিত্ৱা সত্থু তং দুস্সযুগং দত্ৱা ৱন্দনঞ্চ নিৱেদেত্ৱা আদিতো পট্ঠায তং পৱত্তিং ভগৱতো আৰোচেসুং. সত্থা তমত্থং অট্ঠুপ্পত্তিং কত্ৱা সম্পত্তপৰিসায ৱিত্থাৰেন ধম্মং দেসেসি, সা দেসনা মহাজনস্স সাত্থিকা জাতা. তে পন উপাসকা দুতিযদিৱসে বুদ্ধপ্পমুখস্স ভিক্খুসঙ্ঘস্স মহাদানং দত্ৱা তস্সা দক্খিণমাদিসিংসু. সা চ ততো পেতলোকতো চৱিত্ৱা ৱিৱিধৰতনৱিজ্জোতিতে তাৱতিংসভৱনে কনকৱিমানে অচ্ছৰাসহস্সপৰিৱাৰা নিব্বত্তীতি.

খল্লাটিযপেতিৱত্থুৱণ্ণনা নিট্ঠিতা.