৩৮. ৱীৰিযাৰম্ভঞাণনিদ্দেসৱণ্ণনা

৮৯. ৱীৰিযাৰম্ভঞাণনিদ্দেসে অনুপ্পন্নানন্তি একস্মিং অত্তভাৱে, একস্মিং ৱা আৰম্মণে অনিব্বত্তানং. অনমতগ্গে হি সংসাৰে অনুপ্পন্না অকুসলা নাম নত্থি, কুসলা পন অত্থি. পাপকানন্তি লামকানং. অকুসলানং ধম্মানন্তি অকোসল্লসম্ভূতানং ধম্মানং. অনুপ্পাদাযাতি ন উপ্পাদনত্থায. উপ্পন্নানন্তি ইমস্মিং অত্তভাৱে নিব্বত্তানং. পহানাযাতি পজহনত্থায. অনুপ্পন্নানং কুসলানং ধম্মানন্তি ইমস্মিং অত্তভাৱে অনিব্বত্তপুব্বানং কোসল্লসম্ভূতানং ধম্মানং. উপ্পাদাযাতি উপ্পাদনত্থায. উপ্পন্নানন্তি ইমস্মিং অত্তভাৱে নিব্বত্তানং. ঠিতিযাতি ঠিতত্থায. অসম্মোসাযাতি অৱিনাসত্থায. ভিয্যোভাৱাযাতি পুনপ্পুনভাৱায. ৱেপুল্লাযাতি ৱিপুলভাৱায. ভাৱনাযাতি ৱড্ঢিযা. পাৰিপূৰিযাতি পৰিপূৰণত্থায.

ইদানি অকুসলেসু কামচ্ছন্দং, কুসলেসু নেক্খম্মং ৱিসেসেত্ৱা দস্সেতুং অনুপ্পন্নস্স কামচ্ছন্দস্সাতিআদিমাহ. তত্থ কামচ্ছন্দোতি সমাধিপটিপক্খো কামৰাগো. নেক্খম্মন্তি পঠমজ্ঝানসমাধি, পঠমজ্ঝানং ৱা, সব্বে এৱ ৱা কুসলা ধম্মা নেক্খম্মং.

ইদানি সব্বকিলেসানং সব্বকিলেসপটিপক্খস্স অৰহত্তমগ্গস্স চ ৱসেন যোজেত্ৱা দস্সেতুং অনুপ্পন্নানং সব্বকিলেসানন্তিআদিমাহ. তত্থ উপ্পন্নস্স অৰহত্তমগ্গস্স ঠিতিযাতিআদীসু উপ্পাদক্খণে উপ্পন্নস্স অৰহত্তমগ্গস্স ঠিতিক্খণভঙ্গক্খণৱসেন ‘‘ঠিতিযা’’তিআদিযোজনা ৱেদিতব্বা. ৱিভঙ্গট্ঠকথাযম্পি ‘‘যা চস্স পৱত্তি, অযমেৱ ঠিতি নামা’’তি (ৱিভ. অট্ঠ. ৪০৬) ৱুত্তং. কেচি পন ‘‘অৰহত্তমগ্গস্স পুব্বভাগমগ্গো দট্ঠব্বো’’তি ৱদন্তি.

ৱীৰিযাৰম্ভঞাণনিদ্দেসৱণ্ণনা নিট্ঠিতা.