৯. পৰিৱত্তনহাৰৱিভঙ্গৱণ্ণনা

৩৫. তত্থ কতমো পৰিৱত্তনো হাৰোতি পৰিৱত্তনহাৰৱিভঙ্গো. তত্থ যস্মা সংৱণ্ণিযমানে সুত্তে যথানিদ্দিট্ঠানং কুসলাকুসলধম্মানং পটিপক্খভূতে অকুসলকুসলধম্মে পহাতব্বভাৱাদিৱসেন নিদ্ধাৰণং পটিপক্খতো পৰিৱত্তনং, তস্মা ‘‘সম্মাদিট্ঠিস্স পুৰিসপুগ্গলস্স মিচ্ছাদিট্ঠি নিজ্জিণ্ণা ভৱতী’’তিআদি আৰদ্ধং. তত্থ সম্মা পসত্থা, সুন্দৰা দিট্ঠি এতস্সাতি সম্মাদিট্ঠি, তস্স. সা পনস্স সম্মাদিট্ঠিতা পুব্বভাগসম্মাদিট্ঠিযা ৱা লোকুত্তৰসম্মাদিট্ঠিযা ৱা ৱেদিতব্বা. মিচ্ছাদিট্ঠি নিজ্জিণ্ণা ভৱতীতি পুৰিমনযে ৱিপস্সনাসম্মাদিট্ঠিযা পহীনা হোতি, ৱিক্খম্ভিতাতি অত্থো. পচ্ছিমনযে পঠমমগ্গসম্মাদিট্ঠিযা পহীনা সমুচ্ছিন্নাতি অত্থো.

যে চস্স মিচ্ছাদিট্ঠিপচ্চযাতি মিচ্ছাভিনিৱেসহেতু যে অৰিযানং অদস্সনকামতাদযো লোভাদযো পাণাতিপাতাদযো চ অনেকে লামকট্ঠেন পাপকা অকোসল্লসম্ভূতট্ঠেন অকুসলা ধম্মা উপ্পজ্জেয্যুং. ইমস্স আৰদ্ধৱিপস্সকস্স অৰিযস্স চ. ধম্মাতি সমথৱিপস্সনাধম্মা, সত্তত্তিংসবোধিপক্খিযধম্মা ৱা অনুপ্পন্না ৱা সম্ভৱন্তি উপ্পন্না, ভাৱনাপাৰিপূৰিং গচ্ছন্তি. সম্মাসঙ্কপ্পস্সাতিআদীনম্পি ইমিনাৱ নযেন অত্থো ৱেদিতব্বো. অযং পন ৱিসেসো – সম্মাৱিমুত্তিআদীনং মিচ্ছাৱিমুত্তি অৱিমুত্তাৱ সমানা ‘‘ৱিমুত্তা ময’’ন্তি এৱংসঞ্ঞিনো অৱিমুত্তিযং ৱা ৱিমুত্তিসঞ্ঞিনো. তত্ৰাযং ৱচনত্থো – মিচ্ছা পাপিকা ৱিমুত্তি ৱিমোক্খো এতস্সাতি মিচ্ছাৱিমুত্তি. অট্ঠঙ্গা চ মিচ্ছাৱিমুত্তি যথাৱুত্তেনাকাৰেন মিচ্ছাভিনিৱেসৱসেন চ পৱত্তা অন্তদ্ৱযলক্খণা. সম্মাৱিমুত্তি পন ফলধম্মা, মিচ্ছাদিট্ঠিকে সমাসেৱতো মিচ্ছাৱিমোক্খো ৱা মিচ্ছাৱিমুত্তি. মিচ্ছাৱিমুত্তিঞাণদস্সনং পন মিচ্ছাৱিমোক্খে মিচ্ছাদিট্ঠিযা চ সাৰন্তি গহণৱসেন পৱত্তো অকুসলচিত্তুপ্পাদো অন্তমসো পাপং কত্ৱা ‘‘সুকতং মযা’’তি পচ্চৱেক্খতো উপ্পন্নমোহো চ. সম্মাৱিমুত্তিঞাণদস্সনস্সাতি এত্থ সেক্খানং পচ্চৱেক্খণঞাণং সম্মাৱিমুত্তিঞাণদস্সনন্তি অধিপ্পেতং. তঞ্হি উত্তৰিভাৱনাপাৰিপূৰিযা সংৱত্ততি.

৩৬. এৱং সম্মাদিট্ঠিআদিমুখেন মিচ্ছাদিট্ঠিআদিং দস্সেত্ৱা পুন পাণাতিপাতঅদিন্নাদানকামেসুমিচ্ছাচাৰাদিতো ৱেৰমণিযাদীহি পাণাতিপাতাদীনং পৰিৱত্তনং দস্সেতুং ‘‘যস্সা’’তিআদি আৰদ্ধং. তত্থ কালৱাদিস্সাতি লক্খণৱচনং. কালেন সাপদেসং পৰিযন্তৱতিং অত্থসঞ্হিতন্তি সো সম্ফপ্পলাপস্স পহানায পটিপন্নো হোতীতি ৱুত্তং.

পুন ‘‘যে চ খো কেচী’’তিআদিনা সম্মাদিট্ঠিআদিমুখেনেৱ মিচ্ছাদিট্ঠিআদীহি এৱ পৰিৱত্তনং পকাৰন্তৰেন দস্সেতি. তত্থ সন্দিট্ঠিকাতি পচ্চক্খা. সহধম্মিকাতি সকাৰণা. গাৰয্হাতি গৰহিতব্বযুত্তা. ৱাদানুৱাদাতি ৱাদা চেৱ অনুৱাদা চ. ‘‘ৱাদানুপাতা’’তিপি পাঠো, ৱাদানুপৱত্তিযোতি অত্থো. পুজ্জাতি পূজনীযা. পাসংসাতি পসংসিতব্বা.

পুন ‘‘যে চ খো কেচী’’তিআদিনা মজ্ঝিমায পটিপত্তিযা অন্তদ্ৱযপৰিৱত্তনং দস্সেতি. তত্থ ভুঞ্জিতব্বাতিআদীনি চত্তাৰি পদানি ৱত্থুকামৱসেন যোজেতব্বানি. ভাৱযিতব্বা বহুলীকাতব্বাতি পদদ্ৱযং কিলেসকামৱসেন. তেসং অধম্মোতি ভাৱেতব্বো নাম ধম্মো সিযা, কামা চ তেসং ভাৱেতব্বা ইচ্ছিতা, কামেহি চ ৱেৰমণী কামানং পটিপক্খো, ইতি সা তেসং অধম্মো আপজ্জতীতি অধিপ্পাযো.

নিয্যানিকো ধম্মোতি সহ ৱিপস্সনায অৰিযমগ্গো. দুক্খোতি পাপং নিজ্জৰাপেস্সামাতি পৱত্তিতং সৰীৰতাপনং ৱদতি. সুখোতি অনৱজ্জপচ্চযপৰিভোগসুখং. এতেসুপি ৱাৰেসু ৱুত্তনযেনেৱ অধম্মভাৱাপত্তি ৱত্তব্বা. ইদানি অসুভসঞ্ঞাদিমুখেন সুভসঞ্ঞাদিপৰিৱত্তনং দস্সেতুং ‘‘যথা ৱা পনা’’তিআদি ৱুত্তং. আৰদ্ধৱিপস্সকস্স কিলেসাসুচিপগ্ঘৰণৱসেন তেভূমকসঙ্খাৰা অসুভতো উপট্ঠহন্তীতি কত্ৱা ৱুত্তং ‘‘সব্বসঙ্খাৰেসু অসুভানুপস্সিনো ৱিহৰতো’’তি. ‘‘যং যং ৱা পনা’’তিআদিনা পটিপক্খস্স লক্খণং ৱিভাৱেতি. তত্থ অজ্ঝাপন্নোতি অধিআপন্নো, অভিউপগতো পৰিঞ্ঞাতোতি অত্থো.

পৰিৱত্তনহাৰৱিভঙ্গৱণ্ণনা নিট্ঠিতা.