৬. চতুব্যূহহাৰসম্পাতৱণ্ণনা

৬৮. ৰক্খীযতীতি ৰক্খিতং. ইদং পদৱসেন নিব্বচনং. যস্মা পন অত্থৱসেন নিব্বচনে ৱুত্তে পদৱসেন নিব্বচনং ৱুত্তমেৱ হোতি, তস্মা ‘‘ৰক্খিতং পৰিপালীযতীতি এসা নিৰুত্তী’’তি ৱুত্তং. তত্থ ইতি-সদ্দো আদ্যত্থো, পকাৰে ৱা. তেন এৱমাদিকা এৱংপকাৰা ৱা এসা নিৰুত্তীতি ৱুত্তং হোতি. তস্মা চিন্তেতীতি চিত্তং. অত্তনো সন্তানং চিনোতীতি চিত্তং, পচ্চযেহি চিতন্তি চিত্তং, চিত্তৱিচিত্তট্ঠেন চিত্তং, চিত্তকৰণট্ঠেন চিত্তং. সম্মা সঙ্কপ্পেতীতি সম্মাসঙ্কপ্পোতিআদিনা নিৰুত্তি ৱেদিতব্বা.

অযং এত্থ ভগৱতো অধিপ্পাযোতি ‘‘ৰক্খিতচিত্তো অস্সা’’তিআদিনা ইন্দ্ৰিযসংৱৰাদযো দুগ্গতিপহানঞ্চ ৱদতো ভগৱতো এত্থ গাথাযং অধিপ্পাযো. কোকালিকো হীতিআদি নিদাননিদ্দেসো. তত্থ হি-সদ্দো কাৰণে. ইদং ৱুত্তং হোতি – যস্মা কোকালিকো (সং. নি. ১.১৮১; অ. নি. ১০.৮৯; সু. নি. কোকালিকসুত্ত) অৰক্খিতচিত্ততায অগ্গসাৱকেসু চিত্তং পদোসেত্ৱা পদুমনিৰযং উপপন্নো, তস্মা দুগ্গতিযো জহিতুকামো ৰক্খিতচিত্তো অস্সাতি ভগৱা সতিআৰক্খেন চেতসা সমন্নাগতো সব্বা দুগ্গতিযো জহতীতি অত্থো. সুত্তম্হি ৱুত্তং ‘‘সতিযা চিত্তং ৰক্খিতব্ব’’ন্তি দেসনানুসন্ধিদস্সনং.

চতুব্যূহহাৰসম্পাতৱণ্ণনা নিট্ঠিতা.