৫. লক্খণহাৰসম্পাতৱণ্ণনা

৬৭. ইন্দ্ৰিযেসু গুত্তদ্ৱাৰতা সতিসংৱৰো, সতিবলেন চ নেক্খম্মৱিতক্কাদিবহুলো হোতীতি ৱুত্তং – ‘‘তস্মা ৰক্খিতচিত্তস্স সম্মাসঙ্কপ্পগোচৰোতি ইদং সতিন্দ্ৰিয’’ন্তি. তস্সত্থো – ‘‘তস্মা ৰক্খিতচিত্তস্স সম্মাসঙ্কপ্পগোচৰো’’তি এত্থ ৰক্খিতচিত্ততায চ সম্মাসঙ্কপ্পগোচৰতা কাৰণূপচাৰেন ইদং সতিন্দ্ৰিযং, গহিতানি ভৱন্তি পঞ্চিন্দ্ৰিযানি ইন্দ্ৰিযলক্খণেন ৱিমুত্তিপৰিপাচনভাৱেন ৱা একলক্খণত্তাতি অধিপ্পাযো. গহিতো ভৱতীতি এত্থ মগ্গলক্খণেন গহণং সুৱিঞ্ঞেয্যন্তি তং ঠপেত্ৱা কাৰণতো গহণং দস্সেতুং ‘‘সম্মাদিট্ঠিতো হি সম্মাসঙ্কপ্পো পভৱতী’’তিআদি ৱুত্তং. ততো এৱ গহিতো ভৱতি অৰিযো অট্ঠঙ্গিকো মগ্গোতি ৱত্ৱা ৱিমুত্তিৱিমুত্তিঞাণদস্সনানিপি ৱুত্তানি.

লক্খণহাৰসম্পাতৱণ্ণনা নিট্ঠিতা.