৪. পদট্ঠানহাৰসম্পাতৱণ্ণনা

৬৬. সকসম্পত্তিযা ৱিয সুসংৱিহিতসঙ্কপ্পো ভৱতি. ইন্দ্ৰিযেসু গুত্তদ্ৱাৰতা সুচৰিতপাৰিপূৰিযা আসন্নকাৰণন্তি আহ – ‘‘ৰক্খিতচিত্তস্সাতি তিণ্ণং সুচৰিতানং পদট্ঠান’’ন্তি. তস্সত্থো – ‘‘ৰক্খিতচিত্তস্সা’’তি ইদং তিণ্ণং সুচৰিতানং পদট্ঠানৱচনন্তি. নেক্খম্মসঙ্কপ্পাদিবহুলস্স কামচ্ছন্দাদিনীৱৰণপ্পহানং সুকৰন্তি নেক্খম্মসঙ্কপ্পাদযো সমথস্স আসন্নকাৰণন্তি আহ – ‘‘সম্মাসঙ্কপ্পগোচৰোতি সমথস্স পদট্ঠান’’ন্তি. কম্মস্সকতাসম্মাদিট্ঠিযং সপ্পচ্চযনামৰূপদস্সনসম্মাদিট্ঠিযঞ্চ ঠিতো অত্তাধীনং সংসাৰদুক্খং পস্সন্তো তদতিক্কমনুপাযং ৱিপস্সনং আৰভতীতি সম্মাদিট্ঠিৱিপস্সনায ৱিসেসকাৰণন্তি আহ – ‘‘সম্মাদিট্ঠিপুৰেক্খাৰোতি ৱিপস্সনায পদট্ঠান’’ন্তি. উদযব্বযদস্সনং উস্সুক্কাপেন্তো সম্মত্তনিযামং ওক্কমতীতি তং পঠমমগ্গাধিগমস্স কাৰণন্তি আহ – ‘‘ঞত্ৱান উদযব্বযন্তি দস্সনভূমিযা পদট্ঠান’’ন্তি. আলোকসঞ্ঞামনসিকাৰাদীহি থিনমিদ্ধস্স অভিভৱনং ৱীৰিযস্স আসন্নকাৰণন্তি আহ – ‘‘থিনমিদ্ধাভিভূ ভিক্খূতি ৱীৰিযস্স পদট্ঠান’’ন্তি. যদিপি অৰিযমগ্গক্খণে পহানভাৱনা সমানকালা একাভিসমযস্স ইচ্ছিতত্তা, তথাপি পহাতব্বস্স পহানাভাৱে ভাৱনাপাৰিপূৰী নত্থীতি পহাননিমিত্তা ৱিয কত্ৱা ভাৱনা ৱুত্তা ‘‘সব্বা দুগ্গতিযো জহেতি ভাৱনায পদট্ঠান’’ন্তি. অথ ৱা ‘‘সব্বা দুগ্গতিযো জহে’’তি ইদং ভগৱতো ৱচনং যোগীনং উস্সাহজননত্থং আনিসংসকিত্তনং হোতীতি ভাৱনায ৱিসেসকাৰণন্তি ৱুত্তং ‘‘সব্বা…পে… পদট্ঠান’’ন্তি.

পদট্ঠানহাৰসম্পাতৱণ্ণনা নিট্ঠিতা.