৩. যুত্তিহাৰসম্পাতৱণ্ণনা

৬৫. এৱং নানানযেহি ৱিচযহাৰসম্পাতং ৱিত্থাৰেত্ৱা ইদানি যুত্তিহাৰসম্পাতাদীনি দস্সেতুং ‘‘তত্থ কতমো যুত্তিহাৰসম্পাতো’’তিআদি আৰদ্ধং. তত্থ ‘‘তস্মা ৰক্খিতচিত্তস্সা’’তি গাথায পদত্থো ৱিত্থাৰিতোযেৱ. ৰক্খিতচিত্তস্স সম্মাসঙ্কপ্পগোচৰো ভৱিস্সতীতি যুজ্জতীতি মনচ্ছট্ঠানি দ্ৱাৰানি সতিকৱাটেন পিদহিত্ৱা ৱিহৰন্তস্স কামৱিতক্কাদীনং মিচ্ছাসঙ্কপ্পানং অৱসৰো এৱ নত্থীতি নেক্খম্মৱিতক্কাদিকো সম্মাসঙ্কপ্পো এৱ তস্স গোচৰো পৱত্তিট্ঠানং ভৱিস্সতীতি অযমত্থো যুজ্জতি. যুত্তিযা ঘটেতি সংসন্দতি সমেতীতি অত্থো. সম্মাসঙ্কপ্পগোচৰো সম্মাদিট্ঠি ভৱিস্সতীতি ৱুত্তনযেন সম্মাসঙ্কপ্পগোচৰো পুগ্গলো অৱিপৰীতমেৱ ৱিতক্কতো সম্মাদিট্ঠি ভৱিস্সতি. সম্মাদিট্ঠিসঙ্খাতং ৱিপস্সনাঞাণং পুৰক্খত্ৱা ৱিহৰন্তো মগ্গঞাণেন পঞ্চন্নং খন্ধানং উদযব্বযং অসম্মোহতো পটিৱিজ্ঝিস্সতি. তথা পটিৱিজ্ঝন্তো চ দুক্খসভাৱত্তা দুগ্গতিসঙ্খাতা সব্বা ভৱগতিযো জহিস্সতি, ততো এৱ সব্বং ৱিনিপাতভযং সংসাৰভযঞ্চ সমতিক্কমিস্সতীতি সব্বোপি চাযমত্থো যুত্তো এৱাতি.

যুত্তিহাৰসম্পাতৱণ্ণনা নিট্ঠিতা.