১৪. অধিট্ঠানহাৰৱিভঙ্গৱণ্ণনা

৪৬. তত্থ কতমো অধিট্ঠানো হাৰোতি অধিট্ঠানহাৰৱিভঙ্গো. তত্থ তথা ধাৰযিতব্বাতি একত্তৱেমত্ততাসঙ্খাতসামঞ্ঞৱিসেসমত্ততো ধাৰযিতব্বা, ন পন তত্থ কিঞ্চি ৱিকপ্পেতব্বাতি অধিপ্পাযো. অৱিকপ্পেতব্বতায কাৰণং নিদ্দেসৱাৰৱণ্ণনাযং ৱুত্তমেৱ. তং তং ফলং মগ্গতি গৱেসতীতি মগ্গো, তদত্থিকেহি মগ্গীযতি গৱেসীযতীতি ৱা মগ্গো. নিৰতিযট্ঠেন নিৰস্সাদট্ঠেন চ নিৰযো. উদ্ধং অনুগন্ত্ৱা তিৰিযং অঞ্চিতাতি তিৰচ্ছানা. তিৰচ্ছানাৱ তিৰচ্ছানযোনি. পেততায পেত্তি, ইতো পেচ্চ গতভাৱোতি অত্থো. পেত্তি এৱ পেত্তিৱিসযো. ন সুৰন্তি ন ভাসন্তি ন দিব্বন্তীতি অসুৰা. অসুৰা এৱ অসুৰযোনি. দিব্বেহি ৰূপাদীহি সুট্ঠু অগ্গাতি সগ্গা. মনস্স উস্সন্নতায মনুস্সা. ৱানং ৱুচ্চতি তণ্হা, তং তত্থ নত্থীতি নিব্বানং. নিৰযং গচ্ছতীতি নিৰযগামী. সেসপদেসুপি এসেৱ নযো. অসুৰযোনিযোতি অসুৰযোনিযা হিতো, অসুৰজাতিনিব্বত্তনকোতি অত্থো. সগ্গং গমেতীতি সগ্গগামিযো. মনুস্সগামীতি মনুস্সলোকগামী. পটিসঙ্খানিৰোধোতি পটিসঙ্খায পটিপক্খভাৱনায নিৰোধো, পটিপক্খে ৱা তথা অপ্পৱত্তে উপ্পজ্জনাৰহস্স পটিপক্খৱুত্তিযা অনুপ্পাদো. অপ্পটিসঙ্খানিৰোধোতি সঙ্খতধম্মানং সৰসনিৰোধো, খণিকনিৰোধোতি অত্থো.

৪৭. ৰূপন্তি একত্ততা. ভূতানং উপাদাযাতি ৱেমত্ততা. উপাদাৰূপন্তি একত্ততা. চক্খাযতনং…পে… কবড়ীকাৰো আহাৰোতি ৱেমত্ততা. তথা ভূতৰূপন্তি একত্ততা. পথৱীধাতু …পে… ৱাযোধাতূতি ৱেমত্ততা. পথৱীধাতূতি একত্ততা. ৱীসতি আকাৰা ৱেমত্ততা. আপোধাতূতি একত্ততা. দ্ৱাদস আকাৰা ৱেমত্ততা. তেজোধাতূতি একত্ততা. চত্তাৰো আকাৰা ৱেমত্ততা. ৱাযোধাতূতি একত্ততা. ছ আকাৰা ৱেমত্ততাতি ইমমত্থং দস্সেন্তো ‘‘দ্ৱীহি আকাৰেহি ধাতুযো পৰিগ্গণ্হাতী’’তিআদিমাহ.

তত্থ কেসাতি কেসা নাম উপাদিন্নকসৰীৰট্ঠকা কক্খড়লক্খণা ইমস্মিং সৰীৰে পাটিযেক্কো পথৱীধাতুকোট্ঠাসো. লোমা নাম…পে… মত্থলুঙ্গং নাম সৰীৰট্ঠকং কক্খড়লক্খণং ইমস্মিং সৰীৰে পাটিযেক্কো কোট্ঠাসোতি অযং ৱেমত্ততা. আপোধাতূতিআদিকোট্ঠাসেসু পিত্তাদীসু এসেৱ নযো. অযং পন ৱিসেসো – যেন চাতি যেন তেজোধাতুনা কুপিতেন. সন্তপ্পতীতি অযং কাযো সন্তপ্পতি একাহিকজৰাদিভাৱেন উসুমজাতো হোতি. যেন চ জীৰীযতীতি যেন অযং কাযো জৰীযতি. ইন্দ্ৰিযৱেকল্লতং বলক্খযং ৱলিত্তচপলিতাদিঞ্চ পাপুণাতি. যেন চ পৰিডয্হতীতি যেন কুপিতেন অযং কাযো ডয্হতি, সো চ পুগ্গলো ‘‘ডয্হামি ডয্হামী’’তি কন্দন্তো সতধোতসপ্পিগোসীতচন্দনাদিলেপনং তালৱণ্টৱাতঞ্চ পচ্চাসীসতি. যেন চ অসিতপীতখাযিতসাযিতং সম্মা পৰিণামং গচ্ছতীতি অসিতং ৱা ওদনাদি, পীতং ৱা পানকাদি, খাযিতং ৱা পিট্ঠখজ্জকাদি, সাযিতং ৱা অম্বপক্কমধুফাণিতাদি সম্মা পৰিপাকং গচ্ছতি, ৰসাদিভাৱেন ৱিৱেকং গচ্ছতীতি অত্থো. এত্থ চ পুৰিমা তযো তেজোধাতূ চতুসমুট্ঠানা. পচ্ছিমো কম্মসমুট্ঠানোৱ.

উদ্ধঙ্গমা ৱাতাতি উগ্গাৰহিক্কাৰাদিপৱত্তকা উদ্ধং আৰোহনৱাতা. অধোগমা ৱাতাতি উচ্চাৰপস্সাৱাদিনীহৰণকা অধো ওৰোহনৱাতা. কুচ্ছিসযা ৱাতাতি অন্তানং বহিৱাতা. কোট্ঠাসযা ৱাতাতি অন্তানং অন্তোৱাতা. অঙ্গমঙ্গানুসাৰিনো ৱাতাতি ধমনিজালানুসাৰেন সকলসৰীৰে অঙ্গমঙ্গানি অনুসটা সমিঞ্জনপসাৰণাদিনিব্বত্তকা ৱাতা. অস্সাসোতি অন্তোপৱিসননাসিকৱাতো. পস্সাসোতি বহিনিক্খমননাসিকৱাতো. এত্থ চ পুৰিমা সব্বে চতুসমুট্ঠানা. অস্সাসপস্সাসা চিত্তসমুট্ঠানা এৱ. এৱং ৱেমত্ততাদস্সনৱসেন ৱিভাগেন উদাহটা চতস্সো ধাতুযো পটিক্কূলমনসিকাৰৱসেন উপসংহৰন্তো ‘‘ইমেহি দ্ৱাচত্তালীসায আকাৰেহী’’তিআদিমাহ. তত্থ ন গয্হূপগন্তি ন গহণযোগ্গং. সভাৱভাৱতোতি সভাৱলক্খণতো.

এৱং পটিক্কূলমনসিকাৰং দস্সেত্ৱা পুন তত্থ সম্মসনচাৰং পাড়িৱসেনেৱ দস্সেতুং ‘‘তেনাহ ভগৱা যা চেৱ খো পনা’’তিআদিমাহ. তং সব্বং সুৱিঞ্ঞেয্যং.

৪৮. এৱং সচ্চমগ্গৰূপধম্মৱসেন অধিট্ঠানহাৰং দস্সেত্ৱা ইদানি অৱিজ্জাৱিজ্জাদীনম্পি ৱসেন তং দস্সেতুং ‘‘অৱিজ্জাতি একত্ততা’’তিআদি ৱুত্তং. তত্থ ‘‘দুক্খে অঞ্ঞাণ’’ন্তিআদীসু যস্মা অৱিজ্জা দুক্খসচ্চস্স যাথাৱসৰসলক্খণং জানিতুং পটিৱিজ্ঝিতুং ন দেতি ছাদেত্ৱা পৰিযোনন্ধিত্ৱা তিট্ঠতি, তস্মা ‘‘দুক্খে অঞ্ঞাণ’’ন্তি ৱুচ্চতি. তথা যস্মা দুক্খসমুদযস্স দুক্খনিৰোধস্স দুক্খনিৰোধগামিনিযা পটিপদায যাথাৱসৰসলক্খণং জানিতুং পটিৱিজ্ঝিতুং ন দেতি ছাদেত্ৱা পৰিযোনন্ধিত্ৱা তিট্ঠতি, তস্মা ‘‘দুক্খনিৰোধগামিনিযা পটিপদায অঞ্ঞাণ’’ন্তি ৱুচ্চতি. পুব্বন্তো অতীতদ্ধভূতা খন্ধাযতনধাতুযো. অপৰন্তো অনাগতদ্ধভূতা. পুব্বন্তাপৰন্তো তদুভযং. ইদপ্পচ্চযতা সঙ্খাৰাদীনং কাৰণানি অৱিজ্জাদীনি. পটিচ্চসমুপ্পন্না ধম্মা অৱিজ্জাদীহি নিব্বত্তা সঙ্খাৰাদিধম্মা.

তত্থাযং অৱিজ্জা যস্মা অতীতানং খন্ধাদীনং যাৱ পটিচ্চসমুপ্পন্নানং ধম্মানং যাথাৱসৰসলক্খণং জানিতুং পটিৱিজ্ঝিতুং ন দেতি ছাদেত্ৱা পৰিযোনন্ধিত্ৱা তিট্ঠতি, তস্মা ‘‘পুব্বন্তে অঞ্ঞাণং যাৱ পটিচ্চসমুপ্পন্নেসু ধম্মেসু অঞ্ঞাণ’’ন্তি ৱুচ্চতি, এৱাযং অৱিজ্জা কিচ্চতো জাতিতোপি কথিতা. অযঞ্হি ইমানি অট্ঠ ঠানানি জানিতুং পটিৱিজ্ঝিতুং ন দেতীতি কিচ্চতো কথিতা. উপ্পজ্জমানাপি ইমেসু অট্ঠসু ঠানেসু উপ্পজ্জতীতি জাতিতো কথিতা. এৱং কিচ্চতো জাতিতো চ কথিতাপি লক্খণতো কথিতে এৱ সুকথিতা হোতীতি লক্খণতো দস্সেতুং ‘‘অঞ্ঞাণ’’ন্তিআদি ৱুত্তং.

তত্থ ঞাণং অত্থানত্থং কাৰণাকাৰণং চতুসচ্চধম্মং ৱিদিতং পাকটং কৰোতি. অযং পন অৱিজ্জা উপ্পজ্জিত্ৱা তং ৱিদিতং পাকটং কাতুং ন দেতীতি ঞাণপচ্চনীকতো অঞ্ঞাণং. দস্সনন্তিপি পঞ্ঞা, সা হি তং আকাৰং পস্সতি. অৱিজ্জা পন উপ্পজ্জিত্ৱা পস্সিতুং ন দেতীতি অদস্সনং. অভিসমযোতিপি পঞ্ঞা, সা তং আকাৰং অভিসমেতি. অৱিজ্জা পন উপ্পজ্জিত্ৱা তং অভিসমেতুং ন দেতীতি অনভিসমযো. অনুবোধো সম্বোধো পটিৱেধোতিপি পঞ্ঞা, সা তং আকাৰং অনুবুজ্ঝতি সম্বুজ্ঝতি পটিৱিজ্ঝতি. অৱিজ্জা পন উপ্পজ্জিত্ৱা তং অনুবুজ্ঝিতুং সম্বুজ্ঝিতুং পটিৱিজ্ঝিতুং ন দেতীতি অননুবোধো অসম্বোধো অপ্পটিৱেধো. তথা সল্লক্খণং উপলক্খণং পচ্চুপলক্খণং সমপেক্খণন্তিপি পঞ্ঞা, সা তং আকাৰং সল্লক্খতি উপলক্খতি পচ্চুপলক্খতি সমং সম্মা চ অপেক্খতি. অৱিজ্জা পন উপ্পজ্জিত্ৱা তস্স তথা কাতুং ন দেতীতি অসল্লক্খণং অনুপলক্খণং অপচ্চুপলক্খণং অসমপেক্খণন্তি চ ৱুচ্চতি.

নাস্স কিঞ্চি পচ্চক্খকম্মং অত্থি, সযঞ্চ অপ্পচ্চৱেক্খিত্ৱা কতকম্মন্তি অপ্পচ্চক্খকম্মং. দুম্মেধানং ভাৱো দুম্মেজ্ঝং. বালানং ভাৱো বাল্যং. সম্পজঞ্ঞন্তি পঞ্ঞা, সা অত্থানত্থং কাৰণাকাৰণং চতুসচ্চধম্মং সম্পজানাতি. অৱিজ্জা পন উপ্পজ্জিত্ৱা তং কাৰণং পজানিতুং ন দেতীতি অসম্পজঞ্ঞং. মোহনৱসেন মোহো. পমোহনৱসেন পমোহো. সম্মোহনৱসেন সম্মোহো. অৱিন্দিযং ৱিন্দতি, ৱিন্দিযং ন ৱিন্দতীতি অৱিজ্জা. ৱট্টস্মিং ওহনতি ওতৰতীতি অৱিজ্জোঘো. ৱট্টস্মিং যোজেতীতি অৱিজ্জাযোগো. অপ্পহীনট্ঠেন চেৱ পুনপ্পুনং উপ্পজ্জনতো চ অৱিজ্জানুসযো. মগ্গে পৰিযুট্ঠিতচোৰা ৱিয অদ্ধিকে কুসলচিত্তং পৰিযুট্ঠাতি ৱিলুপ্পতীতি অৱিজ্জাপৰিযুট্ঠানং. যথা নগৰদ্ৱাৰে পলিঘসঙ্খাতায লঙ্গিযা পতিতায মনুস্সানং নগৰপ্পৱেসো পচ্ছিজ্জতি, এৱমেৱ যস্স সক্কাযনগৰে অযং পতিতা, তস্স নিব্বানসম্পাপকং ঞাণগমনং পচ্ছিজ্জতীতি অৱিজ্জালঙ্গী নাম হোতি. অকুসলঞ্চ তং মূলঞ্চ, অকুসলানং ৱা মূলন্তি অকুসলমূলং. তং পন ন অঞ্ঞং, ইধাধিপ্পেতো মোহোতি মোহো অকুসলমূলন্তি অযং একপদিকো অৱিজ্জায অত্থুদ্ধাৰো. অযং ৱেমত্ততাতি অযং অৱিজ্জায ৱেমত্ততা.

ৱিজ্জাতি ৱিন্দিযং ৱিন্দতীতি ৱিজ্জা, ৱিজ্ঝনট্ঠেন ৱিজ্জা, ৱিদিতকৰণট্ঠেন ৱিজ্জা. ‘‘দুক্খে ঞাণ’’ন্তিআদীসু দুক্খসচ্চস্স যাথাৱসৰসলক্খণং জানাতি পস্সতি পটিৱিজ্ঝতীতি দুক্খে অৰিযসচ্চে ৱিসযভূতে ঞাণং ‘‘দুক্খে ঞাণ’’ন্তি ৱুত্তং. এস নযো সেসেসুপি. পঞ্ঞাতি তস্স তস্স অত্থস্স পাকটকৰণসঙ্খাতেন পঞ্ঞাপনট্ঠেন পঞ্ঞা, তেন তেন ৱা অনিচ্চাদিনা পকাৰেন ধম্মে জানাতীতি পঞ্ঞা. পজাননাকাৰো পজাননা. অনিচ্চাদীনি ৱিচিনতীতি ৱিচযো. পকাৰেহি ৱিচিনতীতি পৱিচযো. চতুসচ্চধম্মে ৱিচিনতীতি ধম্মৱিচযো. অনিচ্চাদীনং সল্লক্খণৱসেন সল্লক্খণা. তেসংযেৱ পতি পতি উপলক্খণৱসেন পচ্চুপলক্খণা. পণ্ডিতভাৱো পণ্ডিচ্চং. কুসলভাৱো কোসল্লং. নিপুণভাৱো নেপুঞ্ঞং. অনিচ্চাদীনং ৱিভাৱনৱসেন ৱেভব্যা. তেসংযেৱ চিন্তনৱসেন চিন্তা. অনিচ্চাদীনি উপপৰিক্খতীতি উপপৰিক্খা. ভূৰীতি পথৱিযা নামং, অযম্পি সণ্হট্ঠেন ৱিত্থতট্ঠেন চ ভূৰী ৱিযাতি ভূৰী. তেন ৱুত্তং – ‘‘ভূৰী ৱুচ্চতি পথৱী, তায পথৱিসমায ৱিত্থতায পঞ্ঞায সমন্নাগতোতি ভূৰিপঞ্ঞো’’তি (মহানি. ২৭). অপি চ ভূৰীতি পঞ্ঞাযেৱেতং অধিৱচনং. ভূতে অত্থে ৰমতীতি ভূৰী.

কিলেসে মেধতি হিংসতীতি মেধা, খিপ্পং গহণধাৰণট্ঠেন ৱা মেধা. যস্সুপ্পজ্জতি, তং সত্তং হিতপটিপত্তিযং সম্পযুত্তং ৱা যাথাৱলক্খণপটিৱেধে পৰিণেতীতি পৰিণাযিকা. অনিচ্চাদিৱসেন ধম্মে ৱিপস্সতীতি ৱিপস্সনা. সম্মা পকাৰেহি অনিচ্চাদীনি জানাতীতি সম্পজঞ্ঞং. উপ্পথপটিপন্নে সিন্ধৱে ৱীথিআৰোপনত্থং পতোদো ৱিয উপ্পথে ধাৱনকূটচিত্তং ৱীথিআৰোপনত্থং ৱিজ্ঝতীতি পতোদো ৱিযাতি পতোদো. দস্সনলক্খণে ইন্দট্ঠং কাৰেতীতি ইন্দ্ৰিযং, পঞ্ঞাসঙ্খাতং ইন্দ্ৰিযং পঞ্ঞিন্দ্ৰিযং. অৱিজ্জায ন কম্পতীতি পঞ্ঞাবলং. কিলেসচ্ছেদনট্ঠেন পঞ্ঞাৱ সত্থং পঞ্ঞাসত্থং. অচ্চুগ্গতট্ঠেন পঞ্ঞাৱ পাসাদো পঞ্ঞাপাসাদো. আলোকনট্ঠেন পঞ্ঞাৱ আলোকো পঞ্ঞাআলোকো.

ওভাসনট্ঠেন পঞ্ঞাৱ ওভাসো পঞ্ঞাওভাসো. পজ্জোতনট্ঠেন পঞ্ঞাৱ পজ্জোতো পঞ্ঞাপজ্জোতো. ৰতিকৰণট্ঠেন ৰতিদাযকট্ঠেন ৰতিজনকট্ঠেন চিত্তীকতট্ঠেন দুল্লভপাতুভাৱট্ঠেন অতুলট্ঠেন অনোমসত্তপৰিভোগট্ঠেন চ পঞ্ঞাৱ ৰতনং পঞ্ঞাৰতনং. ন তেন সত্তা মুয্হন্তি, সযং ৱা আৰম্মণে ন মুয্হতীতি অমোহো. ধম্মৱিচযপদং ৱুত্তত্থমেৱ. কস্মা পনেতং পুন ৱুত্তন্তি? অমোহস্স মোহপটিপক্খভাৱদীপনত্থং. তেনেতং দীপেতি – য্ৱাযং অমোহো, সো ন কেৱলং মোহতো অঞ্ঞো ধম্মো, মোহস্স পটিপক্খো ধম্মৱিচযসঙ্খাতো অমোহোৱ ইধাধিপ্পেতোতি. সম্মাদিট্ঠীতি যাথাৱনিয্যানিককুসলদিট্ঠি. ধম্মৱিচযসঙ্খাতো পসত্থো সুন্দৰো ৱা বোজ্ঝঙ্গোতি ধম্মৱিচযসম্বোজ্ঝঙ্গো. মগ্গঙ্গন্তি অৰিযমগ্গস্স অঙ্গং কাৰণন্তি মগ্গঙ্গং. অৰিযমগ্গস্স অন্তোগধত্তা মগ্গপৰিযাপন্নন্তি.

অসঞ্ঞাসমাপত্তীতি সঞ্ঞাৱিৰাগভাৱনাৱসেন পৱত্তিতা অসঞ্ঞভৱূপপত্তিনিব্বত্তনসমাপত্তি. অনুপ্পন্নে হি বুদ্ধে একচ্চে তিত্থাযতনে পব্বজিত্ৱা ৱাযোকসিণে পৰিকম্মং কত্ৱা চতুত্থজ্ঝানং নিব্বত্তেত্ৱা ঝানা ৱুট্ঠায সঞ্ঞায দোসং পস্সন্তি, সঞ্ঞায সতি হত্থচ্ছেদাদিদুক্খঞ্চেৱ সব্বভযানি চ হোন্তি, ‘‘অলং ইমায সঞ্ঞায, সঞ্ঞাভাৱো সন্তো’’তি এৱং সঞ্ঞায দোসং পস্সিত্ৱা সঞ্ঞাৱিৰাগৱসেন চতুত্থজ্ঝানং নিব্বত্তেত্ৱা অপৰিহীনজ্ঝানা কালং কত্ৱা অসঞ্ঞীসু নিব্বত্তন্তি. চিত্তং নেসং চুতিচিত্তনিৰোধেনেৱ ইধ নিৱত্ততি, ৰূপক্খন্ধমত্তমেৱ তত্থ নিব্বত্ততি.

তে যথা নাম জিযাৱেগুক্খিত্তো সৰো যত্তকো জিযাৱেগো, তত্তকমেৱ আকাসে গচ্ছতি, এৱমেৱং ঝানৱেগুক্খিত্তা উপপজ্জিত্ৱা যত্তকো ঝানৱেগো, তত্তকমেৱ কালং তিট্ঠন্তি. ঝানৱেগে পন পৰিক্খীণে তত্থ ৰূপক্খন্ধো অন্তৰধাযতি, ইধ পটিসন্ধিসঞ্ঞা উপ্পজ্জতি, তং সন্ধায ৱুত্তং – ‘‘অসঞ্ঞভৱূপপত্তিনিব্বত্তনসমাপত্তী’’তি. ৱিভূতসঞ্ঞাসমাপত্তীতি ৱিঞ্ঞাণঞ্চাযতনসমাপত্তি. সা হি পঠমাৰুপ্পৱিঞ্ঞাণস্স পঠমাৰুপ্পসঞ্ঞাযপি ৱিভাৱনতো ‘‘ৱিভূতসঞ্ঞা’’তি ৱুচ্চতি. কেচি ‘‘ৱিভূতৰূপসঞ্ঞা’’তি পঠন্তি, তেসং মতেন ৱিভূতৰূপসমাপত্তি নাম সেসাৰুপ্পসমাপত্তিযো. সেসা সমাপত্তিযো সুৱিঞ্ঞেয্যাৱ.

নেৱসেক্খনাসেক্খো ঝাযীতি ঝানলাভী পুথুজ্জনো. আজানিযো ঝাযীতি অৰহা, সব্বেপি ৱা অৰিযপুগ্গলা. অস্সখলুঙ্কো ঝাযীতি খলুঙ্কস্সসদিসো ঝাযী. তথা হি খলুঙ্কো অস্সো দমথং ন উপেতি ইতো চিতো চ যথাৰুচি ধাৱতি, এৱমেৱং যো পুথুজ্জনো অভিঞ্ঞালাভী, সো অভিঞ্ঞা অস্সাদেত্ৱা ‘‘অলমেত্তাৱতা, কতমেত্তাৱতা’’তি উত্তৰিদমথায অপৰিসক্কন্তো অভিঞ্ঞাচিত্তৱসেন ইতো চিতো চ ধাৱতি পৱত্ততি, সো ‘‘অস্সখলুঙ্কো ঝাযী’’তি ৱুত্তো. দিট্ঠুত্তৰো ঝাযীতি ঝানলাভী দিট্ঠিগতিকো. পঞ্ঞুত্তৰো ঝাযীতি লক্খণূপনিজ্ঝানেন ঝাযী, সব্বো এৱ ৱা পঞ্ঞাধিকো ঝাযী.

সৰণো সমাধীতি অকুসলচিত্তেকগ্গতা, সব্বোপি ৱা সাসৱো সমাধি. অৰণো সমাধীতি সব্বো কুসলাব্যাকতো সমাধি, লোকুত্তৰো এৱ ৱা. সৱেৰো সমাধীতি পটিঘচিত্তেসু একগ্গতা. অৱেৰো সমাধীতি মেত্তাচেতোৱিমুত্তি. অনন্তৰদুকেপি এসেৱ নযো. সামিসো সমাধীতি লোকিযসমাধি. সো হি অনতিক্কন্তৱট্টামিসলোকামিসতায সামিসো. নিৰামিসো সমাধীতি লোকুত্তৰো সমাধি. সসঙ্খাৰো সমাধীতি দুক্খাপটিপদো দন্ধাভিঞ্ঞো সুখাপটিপদো চ দন্ধাভিঞ্ঞো. সো হি সসঙ্খাৰেন সপ্পযোগেন চিত্তেন পচ্চনীকধম্মে কিচ্ছেন কসিৰেন নিগ্গহেত্ৱা অধিগন্তব্বো. ইতৰো অসঙ্খাৰো সমাধি. একংসভাৱিতো সমাধীতি সুক্খৱিপস্সকস্স সমাধি. উভযংসভাৱিতো সমাধীতি সমথযানিকস্স সমাধি. উভযতো ভাৱিতভাৱনো সমাধীতি কাযসক্খিনো উভতোভাগৱিমুত্তস্স চ সমাধি. সো হি উভযতো ভাগেহি উভযতো ভাৱিতভাৱনো.

আগাড়্হপটিপদাতি কামানং ওৰোহনপটিপত্তি, কামসুখানুযোগোতি অত্থো. নিজ্ঝামপটিপদাতি কামস্স নিজ্ঝাপনৱসেন খেদনৱসেন পৱত্তা পটিপত্তি, অত্তকিলমথানুযোগোতি অত্থো. অক্খমা পটিপদাতিআদীসু পধানকৰণকালে সীতাদীনি অসহন্তস্স পটিপদা, তানি নক্খমতীতি অক্খমা. সহন্তস্স পন তানি খমতীতি খমা. ‘‘উপ্পন্নং কামৱিতক্কং নাধিৱাসেতী’’তিআদিনা (ম. নি. ১.২৬; অ. নি. ৪.১৪; ৬.৫৮) নযেন মিচ্ছাৱিতক্কে সমেতীতি সমা. মনচ্ছট্ঠানি ইন্দ্ৰিযানি দমেতীতি দমা পটিপদা.

এৱন্তি ইমিনা ৱুত্তনযেন. যো ধম্মোতি যো কোচি জাতিআদিধম্মো. যস্স ধম্মস্সাতি ততো অঞ্ঞস্স জৰাদিধম্মস্স. সমানভাৱোতি দুক্খাদিভাৱেন সমানভাৱো. একত্ততাযাতি সমানতায দুক্খাদিভাৱানং একীভাৱেন. একী ভৱতীতি অনেকোপি ‘‘দুক্খ’’ন্তিআদিনা একসদ্দাভিধেয্যতায একী ভৱতি. এতেন একত্ততায লক্খণমাহ. যেন যেন ৱা পন ৱিলক্খণোতি যো ধম্মো যস্স ধম্মস্স যেন যেন ভাৱেন ৱিসদিসো. তেন তেন ৱেমত্তং গচ্ছতীতি তেন তেন ভাৱেন সো ধম্মো তস্স ধম্মস্স ৱেমত্ততং ৱিসদিসত্তং গচ্ছতি, দুক্খভাৱেন সমানোপি জাতিআদিকো অভিনিব্বত্তিআদিভাৱেন জৰাদিকস্স ৱিসিট্ঠতং গচ্ছতীতি অত্থো. ইমিনা ৱেমত্ততায লক্খণমাহ.

ইদানি তাৱ একত্তৱেমত্ততাৱিসযে নিযোজেত্ৱা দস্সেতুং ‘‘সুত্তে ৱা ৱেয্যাকৰণে ৱা’’তিআদি ৱুত্তং. তত্থ পুচ্ছিতন্তি পুচ্ছাৱসেন দেসিতসুত্তৱসেন ৱুত্তং, ন পন অধিট্ঠানহাৰস্স পুচ্ছাৱিসযতায. সেসং উত্তানমেৱ.

অধিট্ঠানহাৰৱিভঙ্গৱণ্ণনা নিট্ঠিতা.