১৩. সোধনহাৰৱিভঙ্গৱণ্ণনা

৪৫. তত্থ কতমো সোধনো হাৰোতি সোধনহাৰৱিভঙ্গো. তত্থ ভগৱা পদং সোধেতীতি ‘‘অৱিজ্জায নিৱুতো লোকো’’তি (সু. নি. ১০৩৯; চূড়নি. অজিতমাণৱপুচ্ছা ৫৮, অজিতমাণৱপুচ্ছানিদ্দেস ২) ৱদন্তো ভগৱা – ‘‘কেনস্সু নিৱুতো লোকো’’তি (সু. নি. ১০৩৮; চূড়নি. অজিতমাণৱপুচ্ছা ৫৭, অজিতমাণৱপুচ্ছানিদ্দেস ১) আযস্মতা অজিতেন পুচ্ছাৱসেন ৱুত্তং পদং সোধেতি নাম, তদত্থস্স ৱিস্সজ্জনতো. নো চ আৰম্ভন্তি ন তাৱ আৰম্ভং সোধেতি, ঞাতুং ইচ্ছিতস্স অত্থস্স অপৰিযোসিতত্তা. সুদ্ধো আৰম্ভোতি ঞাতুং ইচ্ছিতস্স অত্থস্স পবোধিতত্তা সোধিতো আৰম্ভোতি অত্থো. অঞ্ঞাণপক্খন্দানং দ্ৱেড়্হকজাতানং ৱা পুচ্ছনকালে পুচ্ছিতানং পুচ্ছাৱিসযো অৱিজটং মহাগহনং ৱিয মহাদুগ্গং ৱিয চ অন্ধকাৰং অৱিভূতং হোতি. যদা চ ভগৱতা পণ্ডিতেহি ৱা ভগৱতো সাৱকেহি অপদে পদং দস্সেন্তেহি নিজ্জটং নিগুম্বং কত্ৱা পঞ্হে ৱিস্সজ্জিতে মহতা গন্ধহত্থিনা অভিভৱিত্ৱা ওভগ্গপদালিতো গহনপ্পদেসো ৱিয ৱিগতন্ধকাৰো ৱিভূতো উপট্ঠহমানো ৱিসোধিতো নাম হোতি.

সোধনহাৰৱিভঙ্গৱণ্ণনা নিট্ঠিতা.