৬. মহাকাড়ত্থেৰৱত্থু

সুভানুপস্সিন্তি ইমং ধম্মদেসনং সত্থা সেতব্যনগৰং উপনিস্সায সিংসপাৱনে ৱিহৰন্তো চূড়কাড়মহাকাড়ে আৰব্ভ কথেসি.

সেতব্যনগৰৱাসিনো হি চূড়কাড়ো, মজ্ঝিমকাড়ো, মহাকাড়োতি তযো ভাতৰো কুটুম্বিকা. তেসু জেট্ঠকনিট্ঠা দিসাসু ৱিচৰিত্ৱা পঞ্চহি সকটসতেহি ভণ্ডং আহৰন্তি, মজ্ঝিমকাড়ো আভতং ৱিক্কিণাতি. অথেকস্মিং সমযে তে উভোপি ভাতৰো পঞ্চহি সকটসতেহি নানাভণ্ডং গহেত্ৱা সাৱত্থিং গন্ত্ৱা সাৱত্থিযা চ জেতৱনস্স চ অন্তৰে সকটানি মোচযিংসু. তেসু মহাকাড়ো সাযন্হসমযে মালাগন্ধাদিহত্থে সাৱত্থিৱাসিনো অৰিযসাৱকে ধম্মস্সৱনায গচ্ছন্তে দিস্ৱা ‘‘কুহিং ইমে গচ্ছন্তী’’তি পুচ্ছিত্ৱা তমত্থং সুত্ৱা ‘‘অহম্পি গমিস্সামী’’তি চিন্তেত্ৱা কনিট্ঠং আমন্তেত্ৱা, ‘‘তাত, তেসু সকটেসু অপ্পমত্তো হোহি, অহং ধম্মং সোতুং গচ্ছামী’’তি ৱত্ৱা গন্ত্ৱা তথাগতং ৱন্দিত্ৱা পৰিসপৰিযন্তে নিসীদি. সত্থা তং দিস্ৱা তস্স অজ্ঝাসযৱসেন অনুপুব্বিং কথং কথেন্তো দুক্খক্খন্ধসুত্তাদিৱসেন (ম. নি. ১.১৬৩ আদযো) অনেকপৰিযাযেন কামানং আদীনৱং ওকাৰং সংকিলেসঞ্চ কথেসি. তং সুত্ৱা মহাকাড়ো ‘‘সব্বং কিৰ পহায গন্তব্বং, পৰলোকং গচ্ছন্তং নেৱ ভোগা, ন ঞাতকা চ অনুগচ্ছন্তি, কিং মে ঘৰাৱাসেন পব্বজিস্সামী’’তি চিন্তেত্ৱা মহাজনে সত্থাৰং ৱন্দিত্ৱা পক্কন্তে সত্থাৰং পব্বজ্জং যাচিত্ৱা সত্থাৰা ‘‘নত্থি তে কোচি অপলোকেতব্বো’’তি ৱুত্তে, ‘‘কনিট্ঠো মে, ভন্তে, অত্থী’’তি ৱত্ৱা তেন হি ‘‘অপলোকেহি ন’’ন্তি ৱুত্তে, ‘‘সাধু, ভন্তে’’তি ৱত্ৱা গন্ত্ৱা কনিট্ঠং পক্কোসাপেত্ৱা, ‘‘তাত, ইমং সব্বং সাপতেয্যং পটিপজ্জাহী’’তি আহ. ‘‘তুম্হে পন কিং কৰিস্সথ ভাতিকা’’তি? ‘‘অহং সত্থু সন্তিকে পব্বজিস্সামী’’তি. সো তং নানপ্পকাৰেহি যাচিত্ৱা নিৱত্তেতুং অসক্কোন্তো ‘‘সাধু, সামি, যথা অজ্ঝাসযং কৰোথা’’তি আহ. মহাকাড়ো গন্ত্ৱা সত্থু সন্তিকে পব্বজি. ‘‘অহং ভাতিকং গহেত্ৱাৱ উপ্পব্বজিস্সামী’’তি চূড়কাড়োপি পব্বজি. অপৰভাগে মহাকাড়ো উপসম্পদং লভিত্ৱা সত্থাৰং উপসঙ্কমিত্ৱা সাসনে ধুৰানি পুচ্ছিত্ৱা সত্থাৰা দ্ৱীসু ধুৰেসু কথিতেসু ‘‘অহং, ভন্তে, মহল্লককালে পব্বজিতত্তা গন্থধুৰং পূৰেতুং ন সক্খিস্সামি, ৱিপস্সনাধুৰং পন পূৰেস্সামী’’তি যাৱ অৰহত্তা কম্মট্ঠানং কথাপেত্ৱা সোসানিকধুতঙ্গং সমাদায পঠমযামাতিক্কন্তে সব্বেসু নিদ্দং ওক্কন্তেসু সুসানং গন্ত্ৱা পচ্চূসকালে সব্বেসু অনুট্ঠিতেসুযেৱ ৱিহাৰং আগচ্ছতি.

অথেকা সুসানগোপিকা কালী নাম ছৱডাহিকা থেৰস্স ঠিতট্ঠানং নিসিন্নট্ঠানং চঙ্কমিতট্ঠানঞ্চ দিস্ৱা ‘‘কো নু খো ইধাগচ্ছতি, পৰিগ্গণ্হিস্সামি ন’’ন্তি পৰিগ্গণ্হিতুং অসক্কোন্তী একদিৱসং সুসানকুটিকাযমেৱ দীপং জালেত্ৱা পুত্তধীতৰো আদায গন্ত্ৱা একমন্তে নিলীযমানা মজ্ঝিমযামে থেৰং আগচ্ছন্তং দিস্ৱা গন্ত্ৱা ৱন্দিত্ৱা, ‘‘অয্যো, নো, ভন্তে, ইমস্মিং ঠানে ৱিহৰতী’’তি আহ. ‘‘আম, উপাসিকে’’তি. ‘‘ভন্তে, সুসানে ৱিহৰন্তেহি নাম ৱত্তং উগ্গণ্হিতুং ৱট্টতী’’তি. থেৰো ‘‘কিং পন মযং তযা কথিতৱত্তে ৱত্তিস্সামা’’তি অৱত্ৱা ‘‘কিং কাতুং ৱট্টতি উপাসিকে’’তি আহ. ‘‘ভন্তে, সোসানিকেহি নাম সুসানে ৱসনভাৱো সুসানগোপকানঞ্চ ৱিহাৰে মহাথেৰস্স চ গামভোজকস্স চ কথেতুং ৱট্টতী’’তি. ‘‘থেৰো কিং কাৰণা’’তি? ‘‘কতকম্মা চোৰা ধনসামিকেহি পদানুপদং অনুবদ্ধা সুসানে ভণ্ডকং ছড্ডেত্ৱা পলাযন্তি, অথ মনুস্সা সোসানিকানং পৰিপন্থং কৰোন্তি, এতেসং পন কথিতে ‘মযং ইমস্স ভদ্দন্তস্স এত্তকং নাম কালং এত্থ ৱসনভাৱং জানাম, অচোৰো এসো’তি উপদ্দৱং নিৱাৰেন্তি. তস্মা এতেসং কথেতুং ৱট্টতী’’তি.

‘‘থেৰো অঞ্ঞং কিং কাতব্ব’’ন্তি? ‘‘ভন্তে, সুসানে ৱসন্তেন নাম অয্যেন মচ্ছমংসতিলপিট্ঠতেলগুড়াদীনি ৱজ্জেতব্বানি, দিৱা ন নিদ্দাযিতব্বং, কুসীতেন ন ভৱিতব্বং, আৰদ্ধৱীৰিযেন ভৱিতব্বং, অসঠেন অমাযাৱিনা হুত্ৱা কল্যাণজ্ঝাসযেন ভৱিতব্বং, সাযং সব্বেসু সুত্তেসু ৱিহাৰতো আগন্তব্বং, পচ্চূসকালে সব্বেসু অনুট্ঠিতেসুযেৱ ৱিহাৰং গন্তব্বং. সচে, ভন্তে, অয্যো ইমস্মিং ঠানে এৱং ৱিহৰন্তো পব্বজিতকিচ্চং মত্থকং পাপেতুং সক্খিস্সতি, সচে মতসৰীৰং আনেত্ৱা ছড্ডেন্তি, অহং কম্বলকূটাগাৰং আৰোপেত্ৱা গন্ধমালাদীহি সক্কাৰং কত্ৱা সৰীৰকিচ্চং কৰিস্সামি. নো চে সক্খিস্সতি, চিতকং আৰোপেত্ৱা অগ্গিং জালেত্ৱা সঙ্কুনা আকড্ঢিত্ৱা বহি খিপিত্ৱা ফৰসুনা কোট্টেত্ৱা খণ্ডাখণ্ডিকং ছিন্দিত্ৱা অগ্গিম্হি পক্খিপিত্ৱা ঝাপেস্সামী’’তি আহ. অথ নং থেৰো ‘‘সাধু ভদ্দে, একং পন ৰূপাৰম্মণং দিস্ৱা ময্হং কথেয্যাসী’’তি আহ. সা ‘‘সাধূ’’তি পচ্চস্সোসি. থেৰো যথাজ্ঝাসযেন সুসানে সমণধম্মং কৰোতি. চূড়কাড়ত্থেৰো পন উট্ঠায সমুট্ঠায ঘৰাৱাসং চিন্তেতি, পুত্তদাৰং অনুস্সৰতি. ‘‘ভাতিকো মে অতিভাৰিযং কম্মং কৰোতী’’তি চিন্তেতি.

অথেকা কুলধীতা তংমুহুত্তসমুট্ঠিতেন ব্যাধিনা সাযন্হসমযে অমিলাতা অকিলন্তা কালমকাসি. তমেনং ঞাতকাদযো দাৰুতেলাদীহি সদ্ধিং সাযং সুসানং নেত্ৱা সুসানগোপিকায ‘‘ইমং ঝাপেহী’’তি ভতিং দত্ৱা নিয্যাদেত্ৱা পক্কমিংসু. সা তস্সা পাৰুতৱত্থং অপনেত্ৱা তংমুহুত্তমতং পীণিতপীণিতং সুৱণ্ণৱণ্ণং সৰীৰং দিস্ৱা, ‘‘ইমং অয্যস্স দস্সেতুং পতিৰূপং আৰম্মণ’’ন্তি চিন্তেত্ৱা গন্ত্ৱা থেৰং ৱন্দিত্ৱা, ‘‘ভন্তে, এৱৰূপং নাম আৰম্মণং অত্থি, ওলোকেথ অয্যা’’তি আহ. থেৰো ‘‘সাধূ’’তি ৱত্ৱা পাৰুপনং নীহৰাপেত্ৱা পাদতলতো যাৱ কেসগ্গা ওলোকেত্ৱা ‘‘অতিপীণিতমেতং ৰূপং সুৱণ্ণৱণ্ণং অগ্গিম্হি নং পক্খিপিত্ৱা মহাজালাহি গহিতমত্তকালে ময্হং আৰোচেয্যাসী’’তি ৱত্ৱা সকট্ঠানমেৱ গন্ত্ৱা নিসীদি. সা তথা কত্ৱা থেৰস্স আৰোচেসি. থেৰো গন্ত্ৱা ওলোকেসি. জালায পহটপহটট্ঠানং কবৰগাৱিযা ৱিয সৰীৰৱণ্ণং অহোসি, পাদা নমিত্ৱা ওলম্বিংসু, হত্থা পটিকুটিংসু, ঊৰুনলাটং নিচ্চম্মং অহোসি. থেৰো ‘‘ইদং সৰীৰং ইদানেৱ ওলোকেন্তানং অপৰিযন্তকৰং হুত্ৱা ইদানেৱ খযং পত্তং ৱযং পত্ত’’ন্তি ৰত্তিট্ঠানং গন্ত্ৱা নিসীদিত্ৱা খযৱযং সম্পস্সমানো –

‘‘অনিচ্চা ৱত সঙ্খাৰা, উপ্পাদৱযধম্মিনো;

উপ্পজ্জিত্ৱা নিৰুজ্ঝন্তি, তেসং ৱূপসমো সুখো’’তি. (দী. নি. ২.২২১, ২৭২; সং. নি. ১.১৮৬; ২.১৪৩; জা. ১.১.৯৫) –

গাথং ৱত্ৱা ৱিপস্সনং ৱড্ঢেত্ৱা সহ পটিসম্ভিদাহি অৰহত্তং পাপুণি.

তস্মিং অৰহত্তং পত্তে সত্থা ভিক্খুসঙ্ঘপৰিৱুতো চাৰিকং চৰমানো সেতব্যং গন্ত্ৱা সিংসপাৱনং পাৱিসি. চূড়কাড়স্স ভৰিযাযো ‘‘সত্থা কিৰ অনুপ্পত্তো সিংসপাৱন’’ন্তি সুত্ৱা ‘‘অম্হাকং সামিকং গণ্হিস্সামা’’তি পেসেত্ৱা সত্থাৰং নিমন্তাপেসুং. বুদ্ধানং পন অপৰিচিণ্ণট্ঠানে আসনপঞ্ঞত্তিং আচিক্খন্তেন একেন ভিক্খুনা পঠমতৰং গন্তুং ৱট্টতি. বুদ্ধানঞ্হি মজ্ঝিমট্ঠানে আসনং পঞ্ঞাপেত্ৱা তস্স দক্খিণতো সাৰিপুত্তত্থেৰস্স, ৱামতো মহামোগ্গল্লানত্থেৰস্স, ততো পট্ঠায উভোসু পস্সেসু ভিক্খুসঙ্ঘস্স আসনং পঞ্ঞাপেতব্বং হোতি. তস্মা মহাকাড়ত্থেৰো চীৱৰপাৰুপনট্ঠানে ঠত্ৱা, ‘‘চূড়কাড়, ত্ৱং পুৰতো গন্ত্ৱা আসনপঞ্ঞত্তিং আচিক্খা’’তি চূড়কাড়ং পেসেসি. তস্স দিট্ঠকালতো পট্ঠায গেহজনা তেন সদ্ধিং পৰিহাসং কৰোন্তা নীচাসনানি সঙ্ঘত্থেৰস্স কোটিযং অত্থৰন্তি, উচ্চাসনানি সঙ্ঘনৱকস্স কোটিযং. ইতৰো ‘‘মা এৱং কৰোথ, নীচাসনানি উপৰি মা পঞ্ঞাপেথ, উচ্চাসনানি উপৰি পঞ্ঞাপেথ, নীচাসনানি হেট্ঠা’’তি আহ. ইত্থিযো তস্স ৱচনং অসুণন্তিযো ৱিয ‘‘ত্ৱং কিং কৰোন্তো ৱিচৰসি, কিং তৱ আসনানি পঞ্ঞাপেতুং ন ৱট্টতি, ত্ৱং কং আপুচ্ছিত্ৱা পব্বজিতো, কেন পব্বজিতোসি, কস্মা ইধাগতোসী’’তি ৱত্ৱা নিৱাসনপাৰুপনং অচ্ছিন্দিত্ৱা সেতকানি নিৱাসেত্ৱা সীসে চ মালাচুম্বুটকং ঠপেত্ৱা, ‘‘গচ্ছ সত্থাৰং আনেহি, মযং আসনানি পঞ্ঞাপেস্সামা’’তি পহিণিংসু. ন চিৰং ভিক্খুভাৱে ঠত্ৱা অৱস্সিকোৱ উপ্পব্বজিতত্তা লজ্জিতুং ন জানাতি, তস্মা সো তেন আকপ্পেন নিৰাসঙ্কোৱ গন্ত্ৱা সত্থাৰং ৱন্দিত্ৱা বুদ্ধপ্পমুখং ভিক্খুসঙ্ঘং আদায আগতো. ভিক্খুসঙ্ঘস্স পন ভত্তকিচ্চাৱসানে মহাকাড়স্স ভৰিযাযো ‘‘ইমাহি অত্তনো সামিকো গহিতো, মযম্পি অম্হাকং সামিকং গণ্হিস্সামা’’তি চিন্তেত্ৱা পুনদিৱসে সত্থাৰং নিমন্তযিংসু. তদা পন আসনপঞ্ঞাপনত্থং অঞ্ঞো ভিক্খু অগমাসি. তা তস্মিং খণে ওকাসং অলভিত্ৱা বুদ্ধপ্পমুখং ভিক্খুসঙ্ঘং নিসীদাপেত্ৱা ভিক্খং অদংসু. চূড়কাড়স্স পন দ্ৱে ভৰিযাযো, মজ্ঝিমকাড়স্স চতস্সো, মহাকাড়স্স পন অট্ঠ. ভিক্খূপি ভত্তকিচ্চং কাতুকামা নিসীদিত্ৱা ভত্তকিচ্চমকংসু, বহি গন্তুকামা উট্ঠায অগমংসু. সত্থা পন নিসীদিত্ৱা ভত্তকিচ্চং কৰি. তস্স ভত্তকিচ্চপৰিযোসানে তা ইত্থিযো, ‘‘ভন্তে, মহাকাড়ো অম্হাকং অনুমোদনং কত্ৱা আগচ্ছিস্সতি, তুম্হে পুৰতো গচ্ছথা’’তি ৱদিংসু. সত্থা ‘‘সাধূ’’তি ৱত্ৱা পুৰতো অগমাসি. গামদ্ৱাৰং পত্ৱা ভিক্খূ উজ্ঝাযিংসু ‘‘কিং নামেতং সত্থাৰা কতং, ঞত্ৱা নু খো কতং, উদাহু অজানিত্ৱা. হিয্যো চূড়কাড়স্স পুৰতো গতত্তা পব্বজ্জন্তৰাযো জাতো, অজ্জ অঞ্ঞস্স পুৰতো গতত্তা অন্তৰাযো নাহোসি. ইদানি মহাকাড়ং ঠপেত্ৱা আগতো, সীলৱা খো পন ভিক্খু আচাৰসম্পন্নো, কৰিস্সতি নু খো তস্স পব্বজ্জন্তৰায’’ন্তি. সত্থা তেসং ৱচনং সুত্ৱা নিৱত্তিত্ৱা ঠিতো ‘‘কিং কথেথ, ভিক্খৱে’’তি পুচ্ছি. তে তমত্থং আৰোচেসুং. ‘‘কিং পন তুম্হে, ভিক্খৱে, চূড়কাড়ং ৱিয মহাকাড়ং সল্লক্খেথা’’তি? ‘‘আম, ভন্তে’’. তস্স হি দ্ৱে পজাপতিযো, ইমস্স অট্ঠ. ‘‘অট্ঠহি পৰিক্খিপিত্ৱা গহিতো কিং কৰিস্সতি, ভন্তে’’তি? সত্থা ‘‘মা, ভিক্খৱে, এৱং অৱচুত্থ, চূড়কাড়ো উট্ঠায সমুট্ঠায সুভাৰম্মণবহুলো ৱিহৰতি, পপাতে ঠিতো দুব্বলৰুক্খসদিসো. ময্হং পন পুত্তো মহাকাড়ো অসুভানুপস্সী ৱিহৰতি, ঘনসেলপব্বতো ৱিয অচলো’’তি ৱত্ৱা ইমা গাথা অভাসি –

৭. ‘‘সুভানুপস্সিং ৱিহৰন্তং, ইন্দ্ৰিযেসু অসংৱুতং;

ভোজনম্হি চামত্তঞ্ঞুং, কুসীতং হীনৱীৰিযং;

তং ৱে পসহতি মাৰো, ৱাতো ৰুক্খংৱ দুব্বলং.

৮. ‘‘অসুভানুপস্সিং ৱিহৰন্তং, ইন্দ্ৰিযেসু সুসংৱুতং;

ভোজনম্হি চ মত্তঞ্ঞুং, সদ্ধং আৰদ্ধৱীৰিযং;

তং ৱে নপ্পসহতী মাৰো, ৱাতো সেলংৱ পব্বত’’ন্তি.

তত্থ সুভানুপস্সিং ৱিহৰন্তন্তি সুতং অনুপস্সন্তং, ইট্ঠাৰম্মণে মানসং ৱিস্সজ্জেত্ৱা ৱিহৰন্তন্তি অত্থো. যো হি পুগ্গলো নিমিত্তগ্গাহং অনুব্যঞ্জনগ্গাহং গণ্হন্তো ‘‘নখা সোভনা’’তি গণ্হাতি, ‘‘অঙ্গুলিযো সোভনা’’তি গণ্হাতি, ‘‘হত্থপাদা, জঙ্ঘা, ঊৰু, কটি, উদৰং, থনা, গীৱা, ওট্ঠা, দন্তা, মুখং, নাসা, অক্খীনি, কণ্ণা, ভমুকা, নলাটং, কেসা, সোভনা’’তি গণ্হাতি, ‘‘কেসা, লোমা, নখা, দন্তা, তচো, সোভনা’’তি গণ্হাতি, ৱণ্ণো সুভো, সণ্ঠানং সুভন্তি, অযং সুভানুপস্সী নাম. এৱং তং সুভানুপস্সিং ৱিহৰন্তং. ইন্দ্ৰিযেসূতি চক্খাদীসু ছসু ইন্দ্ৰিযেসু. অসংৱুতন্তি চক্খুদ্ৱাৰাদীনি অৰক্খন্তং. পৰিযেসনমত্তা পটিগ্গহণমত্তা পৰিভোগমত্তাতি ইমিস্সা মত্তায অজাননতো ভোজনম্হি চামত্তঞ্ঞুং. অপিচ পচ্চৱেক্খণমত্তা ৱিস্সজ্জনমত্তাতি ইমিস্সাপি মত্তায অজাননতো অমত্তঞ্ঞুং, ইদং ভোজনং ধম্মিকং, ইদং অধম্মিকন্তিপি অজানন্তং. কামচ্ছন্দব্যাপাদৱিহিংসাৱিতক্কৱসিতায কুসীতং. হীনৱীৰিযন্তি নিব্বীৰিযং চতূসু ইৰিযাপথেসু ৱীৰিযকৰণৰহিতং. পসহতীতি অভিভৱতি অজ্ঝোত্থৰতি. ৱাতো ৰুক্খংৱ দুব্বলন্তি বলৱৱাতো ছিন্নপপাতে জাতং দুব্বলৰুক্খং ৱিয. যথা হি সো ৱাতো তস্স দুব্বলৰুক্খস্স পুপ্ফফলপল্লৱাদীনিপি পাতেতি, খুদ্দকসাখাপি ভঞ্জতি, মহাসাখাপি ভঞ্জতি, সমূলকম্পি তং ৰুক্খং উপ্পাটেত্ৱা উদ্ধংমূলং অধোসাখং কত্ৱা গচ্ছতি, এৱমেৱ এৱৰূপং পুগ্গলং অন্তো উপ্পন্নো কিলেসমাৰো পসহতি, বলৱৱাতো দুব্বলৰুক্খস্স পুপ্ফফলপল্লৱাদিপাতনং ৱিয খুদ্দানুখুদ্দকাপত্তিআপজ্জনম্পি কৰোতি, খুদ্দকসাখাভঞ্জনং ৱিয নিস্সগ্গিযাদিআপত্তিআপজ্জনম্পি কৰোতি, মহাসাখাভঞ্জনং ৱিয তেৰসসঙ্ঘাদিসেসাপত্তিআপজ্জনম্পি কৰোতি, উপ্পাটেত্ৱা উদ্ধং, মূলকং হেট্ঠাসাখং কত্ৱা পাতনং ৱিয পাৰাজিকাপত্তিআপজ্জনম্পি কৰোতি, স্ৱাক্খাতসাসনা নীহৰিত্ৱা কতিপাহেনেৱ গিহিভাৱং পাপেতীতি এৱং এৱৰূপং পুগ্গলং কিলেসমাৰো অত্তনো ৱসে ৱত্তেতীতি অত্থো.

অসুভানুপস্সিন্তি দসসু অসুভেসু অঞ্ঞতৰং অসুভং পস্সন্তং পটিকূলমনসিকাৰে যুত্তং কেসে অসুভতো পস্সন্তং লোমে নখে দন্তে তচং ৱণ্ণং সণ্ঠানং অসুভতো পস্সন্তং. ইন্দ্ৰিযেসূতি ছসু ইন্দ্ৰিযেসু. সুসংৱুতন্তি নিমিত্তাদিগ্গাহৰহিতং পিহিতদ্ৱাৰং. অমত্তঞ্ঞুতাপটিক্খেপেন ভোজনম্হি চ মত্তঞ্ঞুং. সদ্ধন্তি কম্মস্স চেৱ ফলস্স চ সদ্দহনলক্খণায লোকিকায সদ্ধায চেৱ তীসু ৱত্থূসু অৱেচ্চপ্পসাদসঙ্খাতায লোকুত্তৰসদ্ধায চ সমন্নাগতং. আৰদ্ধৱীৰিযন্তি পগ্গহিতৱীৰিযং পৰিপুণ্ণৱীৰিযং. তং ৱেতি এৱৰূপং তং পুগ্গলং যথা দুব্বলৱাতো সণিকং পহৰন্তো একগ্ঘনং সেলং চালেতুং ন সক্কোতি, তথা অব্ভন্তৰে উপ্পজ্জমানোপি দুব্বলকিলেসমাৰো নপ্পসহতি, খোভেতুং ৱা চালেতুং ৱা ন সক্কোতীতি অত্থো.

তাপি খো তস্স পুৰাণদুতিযিকাযো থেৰং পৰিৱাৰেত্ৱা ‘‘ত্ৱং কং আপুচ্ছিত্ৱা পব্বজিতো, ইদানি গিহী ভৱিস্সসি ন ভৱিস্সসী’’তিআদীনি ৱত্ৱা কাসাৱং নীহৰিতুকামা অহেসুং. থেৰো তাসং আকাৰং সল্লক্খেত্ৱা নিসিন্নাসনা ৱুট্ঠায ইদ্ধিযা উপ্পত্তিত্ৱা কূটাগাৰকণ্ণিকং দ্ৱিধা ভিন্দিত্ৱা আকাসেনাগন্ত্ৱা সত্থৰি গাথা পৰিযোসাপেন্তেযেৱ সত্থু সুৱণ্ণৱণ্ণং সৰীৰং অভিত্থৱন্তো আকাসতো ওতৰিত্ৱা তথাগতস্স পাদে ৱন্দি.

গাথাপৰিযোসানে সম্পত্তভিক্খূ সোতাপত্তিফলাদীসু পতিট্ঠহিংসূতি.

মহাকাড়ত্থেৰৱত্থু ছট্ঠং.