১৪. দ্ৱেসহাযকভিক্খুৱত্থু

বহুম্পি চেতি ইমং ধম্মদেসনং সত্থা জেতৱনে ৱিহৰন্তো দ্ৱে সহাযকে আৰব্ভ কথেসি.

সাৱত্থিৱাসিনো হি দ্ৱে কুলপুত্তা সহাযকা ৱিহাৰং গন্ত্ৱা সত্থু ধম্মদেসনং সুত্ৱা কামে পহায সাসনে উৰং দত্ৱা পব্বজিত্ৱা পঞ্চ ৱস্সানি আচৰিযুপজ্ঝাযানং সন্তিকে ৱসিত্ৱা সত্থাৰং উপসঙ্কমিত্ৱা সাসনে ধুৰং পুচ্ছিত্ৱা ৱিপস্সনাধুৰঞ্চ গন্থধুৰঞ্চ ৱিত্থাৰতো সুত্ৱা একো তাৱ ‘‘অহং, ভন্তে, মহল্লককালে পব্বজিতো ন সক্খিস্সামি গন্থধুৰং পূৰেতুং, ৱিপস্সনাধুৰং পন পূৰেস্সামী’’তি যাৱ অৰহত্তা ৱিপস্সনাধুৰং কথাপেত্ৱা ঘটেন্তো ৱাযমন্তো সহ পটিসম্ভিদাহি অৰহত্তং পাপুণি. ইতৰো পন ‘‘অহং গন্থধুৰং পূৰেস্সামী’’তি অনুক্কমেন তেপিটকং বুদ্ধৱচনং উগ্গণ্হিত্ৱা গতগতট্ঠানে ধম্মং কথেতি, সৰভঞ্ঞং ভণতি, পঞ্চন্নং ভিক্খুসতানং ধম্মং ৱাচেন্তো ৱিচৰতি. অট্ঠাৰসন্নং মহাগণানং আচৰিযো অহোসি. ভিক্খূ সত্থু সন্তিকে কম্মট্ঠানং গহেত্ৱা ইতৰস্স থেৰস্স ৱসনট্ঠানং গন্ত্ৱা তস্স ওৱাদে ঠত্ৱা অৰহত্তং পত্ৱা থেৰং ৱন্দিত্ৱা, ‘‘সত্থাৰং দট্ঠুকামম্হা’’তি ৱদন্তি. থেৰো ‘‘গচ্ছথ, আৱুসো, মম ৱচনেন সত্থাৰং ৱন্দিত্ৱা অসীতি মহাথেৰে ৱন্দথ, সহাযকত্থেৰম্পি মে ‘অম্হাকং আচৰিযো তুম্হে ৱন্দতী’তি ৱদথা’’তি পেসেতি. তে ভিক্খূ ৱিহাৰং গন্ত্ৱা সত্থাৰঞ্চেৱ অসীতি মহাথেৰে চ ৱন্দিত্ৱা গন্থিকত্থেৰস্স সন্তিকং গন্ত্ৱা, ‘‘ভন্তে, অম্হাকং আচৰিযো তুম্হে ৱন্দতী’’তি ৱদন্তি. ইতৰেন চ ‘‘কো নাম সো’’তি ৱুত্তে, ‘‘তুম্হাকং সহাযকভিক্খু, ভন্তে’’তি ৱদন্তি. এৱং থেৰে পুনপ্পুনং সাসনং পহিণন্তে সো ভিক্খু থোকং কালং সহিত্ৱা অপৰভাগে সহিতুং অসক্কোন্তো ‘‘অম্হাকং আচৰিযো তুম্হে ৱন্দতী’’তি ৱুত্তে, ‘‘কো এসো’’তি ৱত্ৱা ‘‘তুম্হাকং সহাযকভিক্খূ’’তি ৱুত্তে, ‘‘কিং পন তুম্হেহি তস্স সন্তিকে উগ্গহিতং, কিং দীঘনিকাযাদীসু অঞ্ঞতৰো নিকাযো, কিং তীসু পিটকেসু একং পিটক’’ন্তি ৱত্ৱা ‘‘চতুপ্পদিকম্পি গাথং ন জানাতি, পংসুকূলং গহেত্ৱা পব্বজিতকালেযেৱ অৰঞ্ঞং পৱিট্ঠো, বহূ ৱত অন্তেৱাসিকে লভি, তস্স আগতকালে মযা পঞ্হং পুচ্ছিতুং ৱট্টতী’’তি চিন্তেসি.

অথ অপৰভাগে থেৰো সত্থাৰং দট্ঠুং আগতো. সহাযকস্স থেৰস্স সন্তিকে পত্তচীৱৰং ঠপেত্ৱা গন্ত্ৱা সত্থাৰঞ্চেৱ অসীতি মহাথেৰে চ ৱন্দিত্ৱা সহাযকস্স ৱসনট্ঠানং পচ্চাগমি. অথস্স সো ৱত্তং কাৰেত্ৱা সমপ্পমাণং আসনং গহেত্ৱা, ‘‘পঞ্হং পুচ্ছিস্সামী’’তি নিসীদি. তস্মিং খণে সত্থা ‘‘এস এৱৰূপং মম পুত্তং ৱিহেঠেত্ৱা নিৰযে নিব্বত্তেয্যা’’তি তস্মিং অনুকম্পায ৱিহাৰচাৰিকং চৰন্তো ৱিয তেসং নিসিন্নট্ঠানং গন্ত্ৱা পঞ্ঞত্তৱৰবুদ্ধাসনে নিসীদি. তত্থ তত্থ নিসীদন্তা হি ভিক্খূ বুদ্ধাসনং পঞ্ঞাপেত্ৱাৱ নিসীদন্তি. তেন সত্থা পকতিপঞ্ঞত্তেযেৱ আসনে নিসীদি. নিসজ্জ খো পন গন্থিকভিক্খুং পঠমজ্ঝানে পঞ্হং পুচ্ছিত্ৱা তস্মিং অকথিতে দুতিযজ্ঝানং আদিং কত্ৱা অট্ঠসুপি সমাপত্তীসু ৰূপাৰূপেসু চ পঞ্হং পুচ্ছি. গন্থিকত্থেৰো একম্পি কথেতুং নাসক্খি. ইতৰো তং সব্বং কথেসি. অথ নং সোতাপত্তিমগ্গে পঞ্হং পুচ্ছি. গন্থিকত্থেৰো কথেতুং নাসক্খি. ততো খীণাসৱত্থেৰং পুচ্ছি. থেৰো কথেসি. সত্থা ‘‘সাধু সাধু, ভিক্খূ’’তি অভিনন্দিত্ৱা সেসমগ্গেসুপি পটিপাটিযা পঞ্হং পুচ্ছি. গন্থিকো একম্পি কথেতুং নাসক্খি, খীণাসৱো পুচ্ছিতং পুচ্ছিতং কথেসি. সত্থা চতূসুপি ঠানেসু তস্স সাধুকাৰং অদাসি. তং সুত্ৱা ভুম্মদেৱে আদিং কত্ৱা যাৱ ব্ৰহ্মলোকা সব্বা দেৱতা চেৱ নাগসুপণ্ণা চ সাধুকাৰং অদংসু. তং সাধুকাৰং সুত্ৱা তস্স অন্তেৱাসিকা চেৱ সদ্ধিৱিহাৰিনো চ সত্থাৰং উজ্ঝাযিংসু – ‘‘কিং নামেতং সত্থাৰা কতং, কিঞ্চি অজানন্তস্স মহল্লকত্থেৰস্স চতূসু ঠানেসু সাধুকাৰং অদাসি, অম্হাকং পনাচৰিযস্স সব্বপৰিযত্তিধৰস্স পঞ্চন্নং ভিক্খুসতানং পামোক্খস্স পসংসামত্তম্পি ন কৰী’’তি. অথ নে সত্থা ‘‘কিং নামেতং, ভিক্খৱে, কথেথা’’তি পুচ্ছিত্ৱা তস্মিং অত্থে আৰোচিতে, ‘‘ভিক্খৱে, তুম্হাকং আচৰিযো মম সাসনে ভতিযা গাৱো ৰক্খণসদিসো, ময্হং পন পুত্তো যথাৰুচিযা পঞ্চ গোৰসে পৰিভুঞ্জনকসামিসদিসো’’তি ৱত্ৱা ইমা গাথা অভাসি –

১৯. ‘‘বহুম্পি চে সংহিত ভাসমানো,

ন তক্কৰো হোতি নৰো পমত্তো;

গোপোৱ গাৱো গণযং পৰেসং,

ন ভাগৱা সামঞ্ঞস্স হোতি.

২০. ‘‘অপ্পম্পি চে সংহিত ভাসমানো,

ধম্মস্স হোতি অনুধম্মচাৰী;

ৰাগঞ্চ দোসঞ্চ পহায মোহং,

সম্মপ্পজানো সুৱিমুত্তচিত্তো.

‘‘অনুপাদিযানো ইধ ৱা হুৰং ৱা,

স ভাগৱা সামঞ্ঞস্স হোতী’’তি.

তত্থ সংহিতন্তি তেপিটকস্স বুদ্ধৱচনস্সেতং নামং. তং আচৰিযে উপসঙ্কমিত্ৱা উগ্গণ্হিত্ৱা বহুম্পি পৰেসং ভাসমানো ৱাচেন্তো তং ধম্মং সুত্ৱা যং কাৰকেন পুগ্গলেন কত্তব্বং, তক্কৰো ন হোতি. কুক্কুটস্স পক্খপহৰণমত্তম্পি অনিচ্চাদিৱসেন যোনিসোমনসিকাৰং নপ্পৱত্তেতি. এসো যথা নাম দিৱসং ভতিযা গাৱো ৰক্খন্তো গোপো পাতোৱ নিৰৱসেসং সম্পটিচ্ছিত্ৱা সাযং গহেত্ৱা সামিকানং নিয্যাদেত্ৱা দিৱসভতিমত্তং গণ্হাতি, যথাৰুচিযা পন পঞ্চ গোৰসে পৰিভুঞ্জিতুং ন লভতি, এৱমেৱ কেৱলং অন্তেৱাসিকানং সন্তিকা ৱত্তপটিৱত্তকৰণমত্তস্স ভাগী হোতি, সামঞ্ঞস্স পন ভাগী ন হোতি. যথা পন গোপালকেন নিয্যাদিতানং গুন্নং গোৰসং সামিকাৱ পৰিভুঞ্জন্তি, তথা তেন কথিতং ধম্মং সুত্ৱা কাৰকপুগ্গলা যথানুসিট্ঠং পটিপজ্জিত্ৱা কেচি পঠমজ্ঝানাদীনি পাপুণন্তি, কেচি ৱিপস্সনং ৱড্ঢেত্ৱা মগ্গফলানি পাপুণন্তি, গোণসামিকা গোৰসস্সেৱ সামঞ্ঞস্স ভাগিনো হোন্তি.

ইতি সত্থা সীলসম্পন্নস্স বহুস্সুতস্স পমাদৱিহাৰিনো অনিচ্চাদিৱসেন যোনিসোমনসিকাৰে পমত্তস্স ভিক্খুনো ৱসেন পঠমং গাথং কথেসি, ন দুস্সীলস্স. দুতিযগাথা পন অপ্পস্সুতস্সপি যোনিসোমনসিকাৰে কম্মং কৰোন্তস্স কাৰকপুগ্গলস্স ৱসেন কথিতা.

তত্থ অপ্পম্পী চেতি থোকং একৱগ্গদ্ৱিৱগ্গমত্তম্পি. ধম্মস্স হোতি অনুধম্মচাৰীতি অত্থমঞ্ঞায ধম্মমঞ্ঞায নৱলোকুত্তৰধম্মস্স অনুৰূপং ধম্মং পুব্বভাগপটিপদাসঙ্খাতং চতুপাৰিসুদ্ধিসীলধুতঙ্গঅসুভকম্মট্ঠানাদিভেদং চৰন্তো অনুধম্মচাৰী হোতি. সো ‘‘অজ্জ অজ্জেৱা’’তি পটিৱেধং আকঙ্খন্তো ৱিচৰতি. সো ইমায সম্মাপটিপত্তিযা ৰাগঞ্চ দোসঞ্চ পহায মোহং সম্মা হেতুনা নযেন পৰিজানিতব্বে ধম্মে পৰিজানন্তো তদঙ্গৱিক্খম্ভনসমুচ্ছেদপটিপ্পস্সদ্ধিনিস্সৰণৱিমুত্তীনং ৱসেন সুৱিমুত্তচিত্তো, অনুপাদিযানো ইধ ৱা হুৰং ৱাতি ইধলোকপৰলোকপৰিযাপন্না ৱা অজ্ঝত্তিকবাহিৰা ৱা খন্ধাযতনধাতুযো চতূহি উপাদানেহি অনুপাদিযন্তো মহাখীণাসৱো মগ্গসঙ্খাতস্স সামঞ্ঞস্স ৱসেন আগতস্স ফলসামঞ্ঞস্স চেৱ পঞ্চঅসেক্খধম্মক্খন্ধস্স চ ভাগৱা হোতীতি ৰতনকূটেন ৱিয অগাৰস্স অৰহত্তেন দেসনায কূটং গণ্হীতি.

গাথাপৰিযোসানে বহূ সোতাপন্নাদযো অহেসুং. দেসনা মহাজনস্স সাত্থিকা জাতাতি.

দ্ৱেসহাযকভিক্খুৱত্থু চুদ্দসমং.

যমকৱগ্গৱণ্ণনা নিট্ঠিতা.

পঠমো ৱগ্গো.