১১. ধম্মিকউপাসকৱত্থু

ইধ মোদতীতি ইমং ধম্মদেসনং সত্থা জেতৱনে ৱিহৰন্তো ধম্মিকউপাসকং আৰব্ভ কথেসি.

সাৱত্থিযং কিৰ পঞ্চসতা ধম্মিকউপাসকা নাম অহেসুং. তেসু একেকস্স পঞ্চ পঞ্চ উপাসকসতানি পৰিৱাৰা. যো তেসং জেট্ঠকো, তস্স সত্ত পুত্তা সত্ত ধীতৰো. তেসু একেকস্স একেকা সলাকযাগু সলাকভত্তং পক্খিকভত্তং নিমন্তনভত্তং উপোসথিকভত্তং আগন্তুকভত্তং সঙ্ঘভত্তং ৱস্সাৱাসিকং অহোসি. তেপি সব্বেৱ অনুজাতপুত্তা নাম অহেসুং. ইতি চুদ্দসন্নং পুত্তানং ভৰিযায উপাসকস্সাতি সোড়স সলাকযাগুআদীনি পৱত্তন্তি. ইতি সো সপুত্তদাৰো সীলৱা কল্যাণধম্মো দানসংৱিভাগৰতো অহোসি. অথস্স অপৰভাগে ৰোগো উপ্পজ্জি, আযুসঙ্খাৰো পৰিহাযি. সো ধম্মং সোতুকামো ‘‘অট্ঠ ৱা মে সোড়স ৱা ভিক্খূ পেসেথা’’তি সত্থু সন্তিকং পহিণি. সত্থা পেসেসি. তে গন্ত্ৱা তস্স মঞ্চং পৰিৱাৰেত্ৱা পঞ্ঞত্তেসু আসনেসু নিসিন্না. ‘‘ভন্তে, অয্যানং মে দস্সনং দুল্লভং ভৱিস্সতি, দুব্বলোম্হি, একং মে সুত্তং সজ্ঝাযথা’’তি ৱুত্তে ‘‘কতৰং সুত্তং সোতুকামো উপাসকা’’তি? ‘‘সব্ববুদ্ধানং অৱিজহিতং সতিপট্ঠানসুত্ত’’ন্তি ৱুত্তে – ‘‘একাযনো অযং, ভিক্খৱে, মগ্গো সত্তানং ৱিসুদ্ধিযা’’তি (দী. নি. ২.৩৭৩; ম. নি. ১.১০৬) সুত্তন্তং পট্ঠপেসুং. তস্মিং খণে ছহি দেৱলোকেহি সব্বালঙ্কাৰপটিমণ্ডিতা সহস্সসিন্ধৱযুত্তা দিযড্ঢযোজনসতিকা ছ ৰথা আগমিংসু. তেসু ঠিতা দেৱতা ‘‘অম্হাকং দেৱলোকং নেস্সাম, অম্হাকং দেৱলোকং নেস্সাম, অম্ভো মত্তিকভাজনং ভিন্দিত্ৱা সুৱণ্ণভাজনং গণ্হন্তো ৱিয অম্হাকং দেৱলোকে অভিৰমিতুং ইধ নিব্বত্তাহি, অম্হাকং দেৱলোকে অভিৰমিতুং ইধ নিব্বত্তাহী’’তি ৱদিংসু. উপাসকো ধম্মস্সৱনন্তৰাযং অনিচ্ছন্তো – ‘‘আগমেথ আগমেথা’’তি আহ. ভিক্খূ ‘‘অম্হে ৱাৰেতী’’তি সঞ্ঞায তুণ্হী অহেসুং.

অথস্স পুত্তধীতৰো ‘‘অম্হাকং পিতা পুব্বে ধম্মস্সৱনেন অতিত্তো অহোসি, ইদানি পন ভিক্খূ পক্কোসাপেত্ৱা সজ্ঝাযং কাৰেত্ৱা সযমেৱ ৱাৰেতি, মৰণস্স অভাযনকসত্তো নাম নত্থী’’তি ৱিৰৱিংসু. ভিক্খূ ‘‘ইদানি অনোকাসো’’তি উট্ঠাযাসনা পক্কমিংসু. উপাসকো থোকং ৱীতিনামেত্ৱা সতিং পটিলভিত্ৱা পুত্তে পুচ্ছি – ‘‘কস্মা কন্দথা’’তি? ‘‘তাত, তুম্হে ভিক্খূ পক্কোসাপেত্ৱা ধম্মং সুণন্তা সযমেৱ ৱাৰযিত্থ, অথ মযং ‘মৰণস্স অভাযনকসত্তো নাম নত্থী’তি কন্দিম্হা’’তি. ‘‘অয্যা পন কুহি’’ন্তি? ‘‘‘অনোকাসো’তি উট্ঠাযাসনা পক্কন্তা, তাতা’’তি. ‘‘নাহং, অয্যেহি সদ্ধিং কথেমী’’তি ৱুত্তে ‘‘অথ কেন সদ্ধিং কথেথা’’তি. ‘‘ছহি দেৱলোকেহি দেৱতা ছ ৰথে অলঙ্কৰিত্ৱা আদায আকাসে ঠত্ৱা ‘অম্হাহি দেৱলোকে অভিৰম, অম্হাকং দেৱলোকে অভিৰমা’তি সদ্দং কৰোন্তি, তাহি সদ্ধিং কথেমী’’তি. ‘‘কুহিং, তাত, ৰথা, ন মযং পস্সামা’’তি? ‘‘অত্থি পন ময্হং গন্থিতানি পুপ্ফানী’’তি? ‘‘অত্থি, তাতা’’তি. ‘‘কতৰো দেৱলোকো ৰমণীযো’’তি? ‘‘সব্ববোধিসত্তানং বুদ্ধমাতাপিতূনঞ্চ ৱসিতট্ঠানং তুসিতভৱনং ৰমণীযং, তাতা’’তি. ‘‘তেন হি ‘তুসিতভৱনতো আগতৰথে লগ্গতূ’তি পুপ্ফদামং খিপথা’’তি. তে খিপিংসু. তং ৰথধুৰে লগ্গিত্ৱা আকাসে ওলম্বি. মহাজনো তদেৱ পস্সতি, ৰথং ন পস্সতি. উপাসকো ‘‘পস্সথেতং পুপ্ফদাম’’ন্তি ৱত্ৱা, ‘‘আম, পস্সামা’’তি ৱুত্তে – ‘‘এতং তুসিতভৱনতো আগতৰথে ওলম্বতি, অহং তুসিতভৱনং গচ্ছামি, তুম্হে মা চিন্তযিত্থ, মম সন্তিকে নিব্বত্তিতুকামা হুত্ৱা মযা কতনিযামেনেৱ পুঞ্ঞানি কৰোথা’’তি ৱত্ৱা কালং কত্ৱা ৰথে পতিট্ঠাসি.

তাৱদেৱস্স তিগাৱুতপ্পমাণো সট্ঠিসকটভাৰালঙ্কাৰপটিমণ্ডিতো অত্তভাৱো নিব্বত্তি, অচ্ছৰাসহস্সং পৰিৱাৰেসি, পঞ্চৱীসতিযোজনিকং কনকৱিমানং পাতুৰহোসি. তেপি ভিক্খূ ৱিহাৰং অনুপ্পত্তে সত্থা পুচ্ছি – ‘‘সুতা, ভিক্খৱে, উপাসকেন ধম্মদেসনা’’তি? ‘‘আম, ভন্তে, অন্তৰাযেৱ পন ‘আগমেথা’তি ৱাৰেসি. অথস্স পুত্তধীতৰো কন্দিংসু. মযং ‘ইদানি অনোকাসো’তি উট্ঠাযাসনা নিক্খন্তা’’তি. ‘‘ন সো, ভিক্খৱে, তুম্হেহি সদ্ধিং কথেসি, ছহি দেৱলোকেহি দেৱতা ছ ৰথে অলঙ্কৰিত্ৱা আহৰিত্ৱা তং উপাসকং পক্কোসিংসু. সো ধম্মদেসনায অন্তৰাযং অনিচ্ছন্তো তাহি সদ্ধিং কথেসী’’তি. ‘‘এৱং, ভন্তে’’তি. ‘‘এৱং, ভিক্খৱে’’তি. ‘‘ইদানি কুহিং নিব্বত্তো’’তি? ‘‘তুসিতভৱনে, ভিক্খৱে’’তি. ‘‘ভন্তে, ইদানি ইধ ঞাতিমজ্ঝে মোদমানো ৱিচৰিত্ৱা ইদানেৱ গন্ত্ৱা পুন মোদনট্ঠানেযেৱ নিব্বত্তো’’তি. ‘‘আম, ভিক্খৱে, অপ্পমত্তা হি গহট্ঠা ৱা পব্বজিতা ৱা সব্বত্থ মোদন্তিযেৱা’’তি ৱত্ৱা ইমং গাথমাহ –

১৬. ‘‘ইধ মোদতি পেচ্চ মোদতি,

কতপুঞ্ঞো উভযত্থ মোদতি;

সো মোদতি সো পমোদতি,

দিস্ৱা কম্মৱিসুদ্ধিমত্তনো’’তি.

তত্থ কতপুঞ্ঞোতি নানপ্পকাৰস্স কুসলস্স কাৰকো পুগ্গলো ‘‘অকতং ৱত মে পাপং, কতং মে কল্যাণ’’ন্তি ইধ কম্মমোদনেন, পেচ্চ ৱিপাকমোদনেন মোদতি. এৱং উভযত্থ মোদতি নাম. কম্মৱিসুদ্ধিন্তি ধম্মিকউপাসকোপি অত্তনো কম্মৱিসুদ্ধিং পুঞ্ঞকম্মসম্পত্তিং দিস্ৱা কালকিৰিযতো পুব্বে ইধলোকেপি মোদতি, কালং কত্ৱা ইদানি পৰলোকেপি অতিমোদতিযেৱাতি.

গাথাপৰিযোসানে বহূ সোতাপন্নাদযো অহেসুং মহাজনস্স সাত্থিকা ধম্মদেসনা জাতাতি.

ধম্মিকউপাসকৱত্থু একাদসমং.