১০. চুন্দসূকৰিকৱত্থু

ইধ সোচেতীতি ইমং ধম্মদেসনং সত্থা ৱেড়ুৱনে ৱিহৰন্তো চুন্দসূকৰিকং নাম পুৰিসং আৰব্ভ কথেসি.

সো কিৰ পঞ্চপণ্ণাস ৱস্সানি সূকৰে ৱধিত্ৱা খাদন্তো চ ৱিক্কিণন্তো চ জীৱিকং কপ্পেসি. ছাতকালে সকটেন ৱীহিং আদায জনপদং গন্ত্ৱা একনাড়িদ্ৱেনাড়িমত্তেন গামসূকৰপোতকে কিণিত্ৱা সকটং পূৰেত্ৱা আগন্ত্ৱা পচ্ছানিৱেসনে ৱজং ৱিয একং ঠানং পৰিক্খিপিত্ৱা তত্থেৱ তেসং নিৱাপং ৰোপেত্ৱা, তেসু নানাগচ্ছে চ সৰীৰমলঞ্চ খাদিত্ৱা ৱড্ঢিতেসু যং যং মাৰেতুকামো হোতি, তং তং আড়ানে নিচ্চলং বন্ধিত্ৱা সৰীৰমংসস্স উদ্ধুমাযিত্ৱা বহলভাৱত্থং চতুৰস্সমুগ্গৰেন পোথেত্ৱা, ‘‘বহলমংসো জাতো’’তি ঞত্ৱা মুখং ৱিৱৰিত্ৱা অন্তৰে দণ্ডকং দত্ৱা লোহথালিযা পক্কুথিতং উণ্হোদকং মুখে আসিঞ্চতি. তং কুচ্ছিং পৱিসিত্ৱা পক্কুথিতং কৰীসং আদায অধোভাগেন নিক্খমতি, যাৱ থোকম্পি কৰীসং অত্থি, তাৱ আৱিলং হুত্ৱা নিক্খমতি, সুদ্ধে উদৰে অচ্ছং অনাৱিলং হুত্ৱা নিক্খমতি. অথস্স অৱসেসং উদকং পিট্ঠিযং আসিঞ্চতি. তং কাড়চম্মং উপ্পাটেত্ৱা গচ্ছতি. ততো তিণুক্কায লোমানি ঝাপেত্ৱা তিখিণেন অসিনা সীসং ছিন্দতি. পগ্ঘৰণতং লোহিতং ভাজনেন পটিগ্গহেত্ৱা মংসং লোহিতেন মদ্দিত্ৱা পচিত্ৱা পুত্তদাৰমজ্ঝে নিসিন্নো খাদিত্ৱা সেসং ৱিক্কিণাতি. তস্স ইমিনাৱ নিযামেন জীৱিকং কপ্পেন্তস্স পঞ্চপণ্ণাস ৱস্সানি অতিক্কন্তানি. তথাগতে ধুৰৱিহাৰে ৱসন্তে একদিৱসম্পি পুপ্ফমুট্ঠিমত্তেন পূজা ৱা কটচ্ছুমত্তং ভিক্খদানং ৱা অঞ্ঞং ৱা কিঞ্চি পুঞ্ঞং নাম নাহোসি. অথস্স সৰীৰে ৰোগো উপ্পজ্জি, জীৱন্তস্সেৱ অৱীচিমহানিৰযসন্তাপো উপট্ঠহি. অৱীচিসন্তাপো নাম যোজনসতে ঠত্ৱা ওলোকেন্তস্স অক্খীনং ভিজ্জনসমত্থো পৰিড়াহো হোতি. ৱুত্তম্পি চেতং –

‘‘তস্স অযোমযা ভূমি, জলিতা তেজসাযুতা;

সমন্তা যোজনসতং, ফৰিত্ৱা তিট্ঠতি সব্বদা’’তি. (ম. নি. ৩.২৬৭; অ. নি. ৩.৩৬);

নাগসেনত্থেৰেন পনস্স পাকতিকগ্গিসন্তাপতো অধিমত্ততায অযং উপমা ৱুত্তা – ‘‘যথা, মহাৰাজ, কূটাগাৰমত্তো পাসাণোপি নেৰযিকগ্গিম্হি পক্খিত্তো খণেন ৱিলযং গচ্ছতি, নিব্বত্তসত্তা পনেত্থ কম্মবলেন মাতুকুচ্ছিগতা ৱিয ন ৱিলীযন্তী’’তি (মি. প. ২.৪.৬). তস্স তস্মিং সন্তাপে উপট্ঠিতে কম্মসৰিক্খকো আকাৰো উপ্পজ্জি. গেহমজ্ঝেযেৱ সূকৰৰৱং ৰৱিত্ৱা জণ্ণুকেহি ৱিচৰন্তো পুৰত্থিমৱত্থুম্পি পচ্ছিমৱত্থুম্পি গচ্ছতি. অথস্স গেহমানুসকা তং দড়্হং গহেত্ৱা মুখং পিদহন্তি. কম্মৱিপাকো নাম ন সক্কা কেনচি পটিবাহিতুং. সো ৱিৰৱন্তোৱ ইতো চিতো চ ৱিচৰতি. সমন্তা সত্তসু ঘৰেসু মনুস্সা নিদ্দং ন লভন্তি. মৰণভযেন তজ্জিতস্স পন বহিনিক্খমনং নিৱাৰেতুং অসক্কোন্তো সব্বো গেহজনো যথা অন্তোঠিতো বহি ৱিচৰিতুং ন সক্কোতি, তথা গেহদ্ৱাৰানি থকেত্ৱা বহিগেহং পৰিৱাৰেত্ৱা ৰক্খন্তো অচ্ছতি. ইতৰো অন্তোগেহেযেৱ নিৰযসন্তাপেন ৱিৰৱন্তো ইতো চিতো চ ৱিচৰতি. এৱং সত্তদিৱসানি ৱিচৰিত্ৱা অট্ঠমে দিৱসে কালং কত্ৱা অৱীচিমহানিৰযে নিব্বত্তি. অৱীচিমহানিৰযো দেৱদূতসুত্তেন (ম. নি. ৩.২৬১ আদযো; অ. নি. ৩.৩৬) ৱণ্ণেতব্বোতি.

ভিক্খূ তস্স ঘৰদ্ৱাৰেন গচ্ছন্তা তং সদ্দং সুত্ৱা, ‘‘সূকৰসদ্দো’’তি সঞ্ঞিনো হুত্ৱা ৱিহাৰং গন্ত্ৱা সত্থু সন্তিকে নিসিন্না এৱমাহংসু – ‘‘ভন্তে, চুন্দসূকৰিতস্স গেহদ্ৱাৰং পিদহিত্ৱা সূকৰানং মাৰিযমানানং অজ্জ সত্তমো দিৱসো, গেহে কাচি মঙ্গলকিৰিযা ভৱিস্সতি মঞ্ঞে. এত্তকে নাম, ভন্তে, সূকৰে মাৰেন্তস্স একম্পি মেত্তচিত্তং ৱা কাৰুঞ্ঞং ৱা নত্থি, ন ৱত নো এৱৰূপো কক্খড়ো ফৰুসো সত্তো দিট্ঠপুব্বো’’তি. সত্থা – ‘‘ন, ভিক্খৱে, সো ইমে সত্তদিৱসে সূকৰে মাৰেতি, কম্মসৰিক্খকং পনস্স ৱিপাকং উদপাদি, জীৱন্তস্সেৱ অৱীচিমহানিৰযসন্তাপো উপট্ঠাসি. সো তেন সন্তাপেন সত্ত দিৱসানি সূকৰৰৱং ৰৱন্তো অন্তোনিৱেসনে ৱিচৰিত্ৱা অজ্জ কালং কত্ৱা অৱীচিম্হি নিব্বত্তো’’তি ৱত্ৱা, ‘‘ভন্তে, ইধ লোকে এৱং সোচিত্ৱা পুন গন্ত্ৱা সোচনট্ঠানেযেৱ নিব্বত্তো’’তি ৱুত্তে, ‘‘আম, ভিক্খৱে, পমত্তা নাম গহট্ঠা ৱা হোন্তু পব্বজিতা ৱা, উভযত্থ সোচন্তিযেৱা’’তি ৱত্ৱা ইমং গাথমাহ –

১৫. ‘‘ইধ সোচতি পেচ্চ সোচতি,

পাপকাৰী উভযত্থ সোচতি;

সো সোচতি সো ৱিহঞ্ঞতি;

দিস্ৱা কম্মকিলিট্ঠমত্তনো’’তি.

তত্থ পাপকাৰীতি নানপ্পকাৰস্স পাপকম্মস্স কাৰকো পুগ্গলো ‘‘অকতং ৱত মে কল্যাণং, কতং পাপ’’ন্তি একংসেনেৱ মৰণসমযে ইধ সোচতি, ইদমস্স কম্মসোচনং. ৱিপাকং অনুভৱন্তো পন পেচ্চ সোচতি. ইদমস্স পৰলোকে ৱিপাকসোচনং. এৱং সো উভযত্থ সোচতিযেৱ. তেনেৱ কাৰণেন জীৱমানোযেৱ সো চুন্দসূকৰিকোপি সোচতি. দিস্ৱা কম্মকিলিট্ঠন্তি অত্তনো কিলিট্ঠকম্মং পস্সিত্ৱা নানপ্পকাৰকং ৱিলপন্তো ৱিহঞ্ঞতীতি.

গাথাপৰিযোসানে বহূ সোতাপন্নাদযো অহেসুং. মহাজনস্স সাত্থিকা ধম্মদেসনা জাতাতি.

চুন্দসূকৰিকৱত্থু দসমং.