১. নাগসমালত্থেৰঅপদানৱণ্ণনা

আপাটলিং অহং পুপ্ফন্তিআদিকং আযস্মতো নাগসমালত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিখিস্স ভগৱতো কালে একস্মিং কুলগেহে নিব্বত্তো ৱিঞ্ঞুতং পত্তো ঘৰাৱাসং সণ্ঠপেত্ৱা তথাৰূপসজ্জনসংসগ্গস্স অলাভেন সত্থৰি ধৰমানকালে দস্সনসৱনপূজাকম্মমকৰিত্ৱা পৰিনিব্বুতকালে তস্স ভগৱতো সাৰীৰিকধাতুং নিদহিত্ৱা কতচেতিযম্হি চিত্তং পসাদেত্ৱা পাটলিপুপ্ফং পূজেত্ৱা সোমনস্সং উপ্পাদেত্ৱা যাৱতাযুকং ঠত্ৱা তেনেৱ সোমনস্সেন ততো কালং কতো তুসিতাদীসু ছসু দেৱলোকেসু সুখমনুভৱিত্ৱা অপৰভাগে মনুস্সেসু মনুস্সসম্পত্তিং অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো নাগৰুক্খপল্লৱকোমড়সদিসসৰীৰত্তা নাগসমালোতি মাতাপিতূহি কতনামধেয্যো ভগৱতি পসন্নো পব্বজিত্ৱা নচিৰস্সেৱ অৰহা অহোসি.

১. সো পচ্ছা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো আপাটলিং অহং পুপ্ফন্তিআদিমাহ. তত্থ আপাটলিন্তি আ সমন্ততো, আদৰেন ৱা পাটলিপুপ্ফং গহেত্ৱা অহং থূপম্হি অভিৰোপেসিং পূজেসিন্তি অত্থো. উজ্ঝিতং সুমহাপথেতি সব্বনগৰৱাসীনং ৱন্দনপূজনত্থায মহাপথে নগৰমজ্ঝে ৱীথিযং উজ্ঝিতং উট্ঠাপিতং, ইট্ঠককম্মসুধাকম্মাদীহি নিপ্ফাদিতন্তি অত্থো. সেসং হেট্ঠা ৱুত্তনযত্তা উত্তানত্থত্তা চ সুৱিঞ্ঞেয্যমেৱাতি.

নাগসমালত্থেৰঅপদানৱণ্ণনা সমত্তা.