১-১০. ভদ্দালিত্থেৰঅপদানাদিৱণ্ণনা

বাচত্তালীসমৱগ্গে পঠমাপদানঞ্চ দুতিযাপদানঞ্চ ততিযাপদানঞ্চ নযানুসাৰেন সুৱিঞ্ঞেয্যমেৱ.

১০৬. চতুত্থাপদানে নগৰে বন্ধুমতিযাতিআদিকং আযস্মতো মধুমংসদাযকত্থেৰস্স অপদানং. তত্থ সূকৰিকোতি সূকৰমংসং ৱিক্কিণিত্ৱা জীৱিকং কপ্পেন্তো. উক্কোটকং ৰন্ধযিত্ৱাতি পিহকপপ্ফাসমংসং পচিত্ৱা মধুমংসম্হি ওকিৰিং পক্খিপিং. তেন মংসেন পত্তং পূৰেত্ৱা ভিক্খুসঙ্ঘস্স দত্ৱা তেন পুঞ্ঞকম্মেন ইমস্মিং বুদ্ধুপ্পাদে অৰহত্তং পাপুণিন্তি অত্থো.

নাগপল্লৱত্থেৰস্স পঞ্চমাপদানম্পি একদীপিযত্থেৰস্স ছট্ঠাপদানম্পি উচ্ছঙ্গপুপ্ফিযত্থেৰস্স সত্তমাপদানম্পি যাগুদাযকত্থেৰস্স অট্ঠমাপদানম্পি পত্থোদনদাযকত্থেৰস্স নৱমাপদানম্পি মঞ্চদাযকত্থেৰস্স দসমাপদানম্পি সব্বং সুৱিঞ্ঞেয্যমেৱাতি.

বাচত্তালীসমৱগ্গৱণ্ণনা সমত্তা.