১-১০. পদুমকেসৰিযত্থেৰঅপদানাদিৱণ্ণনা

১-২. একতিংসতিমে ৱগ্গে পঠমাপদানে ইসিসঙ্ঘে অহং পুব্বেতি অহং পুব্বে বোধিসম্ভাৰপূৰণকালে ইসিসঙ্ঘে পচ্চেকবুদ্ধইসিসমূহে তেসং সমীপে হিমৱন্তপব্বতে মাতঙ্গহত্থিকুলে ৱাৰণো চণ্ডহত্থী অহোসিন্তি সম্বন্ধো. মনুস্সাদযো ৱাৰেতীতি ৱাৰণো, অথ ৱা ৱাচায ৰৱতি কোঞ্চনাদং নদতীতি ৱাৰণো. মহেসীনং পসাদেনাতি পচ্চেকবুদ্ধমহেসীনং পসাদেন. পচ্চেকজিনসেট্ঠেসু, ধুতৰাগেসু তাদিসূতি লোকধম্মেহি নিচ্চলেসু পচ্চেকবুদ্ধেসু পদ্মকেসৰং পদুমৰেণুং ওকিৰিং অৱসিঞ্চিন্তি সম্বন্ধো.

দুতিযততিযাপদানানি উত্তানানি.

১৩-১৬. চতুত্থাপদানে মহাবোধিমহো অহূতি ৱিপস্সিস্স ভগৱতো চতুমগ্গঞাণাধাৰভাৱতো ‘‘বোধী’’তি লদ্ধনামস্স ৰুক্খস্স পূজা অহোসীতি অত্থো. ৰুক্খট্ঠস্সেৱ সম্বুদ্ধোতি অস্স বোধিপূজাসমযে সন্নিপতিতস্স মহাজনস্স সম্বুদ্ধো লোকজেট্ঠো নৰাসভো ৰুক্খট্ঠো ইৱ ৰুক্খে ঠিতো ৱিয পঞ্ঞাযতীতি অত্থো. ভগৱা তম্হি সমযেতি তস্মিং বোধিপূজাকৰণকালে ভগৱা ভিক্খুসঙ্ঘপুৰক্খতো ভিক্খুসঙ্ঘেন পৰিৱুতো. ৱাচাসভিমুদীৰযন্তি মুদুসিলিট্ঠমধুৰউত্তমঘোসং উদীৰযং কথযন্তো নিচ্ছাৰেন্তো চতুসচ্চং পকাসেসি, দেসেসীতি অত্থো. সংখিত্তেন চ দেসেন্তোতি ৱেনেয্যপুগ্গলজ্ঝাসযানুৰূপেন দেসেন্তো সংখিত্তেন চ ৱিত্থাৰেন চ দেসযীতি অত্থো. ৱিৱট্টচ্ছদোতি ৰাগো ছদনং, দোসো ছদনং, মোহো ছদনং, সব্বকিলেসা ছদনা’’তি এৱং ৱুত্তা ছদনা ৱিৱটা উগ্ঘাটিতা ৱিদ্ধংসিতা অনেনাতি ৱিৱট্টচ্ছদো, সম্বুদ্ধো. তং মহাজনং দেসনাৱসেন নিব্বাপেসি পৰিড়াহং ৱূপসমেসীতি অত্থো. তস্সাহং ধম্মং সুত্ৱানাতি তস্স ভগৱতো দেসেন্তস্স ধম্মং সুত্ৱা.

২০. পঞ্চমাপদানে ফলহত্থো অপেক্খৱাতি ৱিপস্সিং ভগৱন্তং দিস্ৱা মধুৰানি ফলানি গহেত্ৱা অপেক্খৱা অতুৰিতো সণিকং অস্সমং গঞ্ছিন্তি অত্থো.

ছট্ঠসত্তমাপদানানি উত্তানানেৱ.

৪০. অট্ঠমাপদানে নিট্ঠিতে নৱকম্মে চাতি সীমায নৱকম্মে নিট্ঠং গতে সতি. অনুলেপমদাসহন্তি অনুপচ্ছা সুধালেপং অদাসিং, সুধায লেপাপেসিন্তি অত্থো.

নৱমদসমাপদানানি উত্তানানিযেৱাতি.

একতিংসমৱগ্গৱণ্ণনা সমত্তা.