২৯. পণ্ণদাযকৱগ্গো

১-১০. পণ্ণদাযকত্থেৰঅপদানাদিৱণ্ণনা

১-২. একূনতিংসতিমে ৱগ্গে পঠমাপদানে পণ্ণভোজনভোজনোতি খীৰপণ্ণাদিভোজনস্স ভুঞ্জনত্থায পণ্ণসালায নিসিন্নো অম্হি ভৱামীতি অত্থো. উপৱিট্ঠঞ্চ মং সন্তন্তি পণ্ণসালাযং উপৱিট্ঠং সন্তং ৱিজ্জমানং মং. উপাগচ্ছি মহাইসীতি মহন্তে সীলাদিখন্ধে এসনতো মহাইসি. লোকপজ্জোতো লোকপদীপো সিদ্ধত্থো ভগৱা উপগচ্ছি, মম সমীপং অগমাসীতি অত্থো. নিসিন্নস্স পণ্ণসন্থৰেতি উপগন্ত্ৱা পণ্ণসন্থৰে নিসিন্নস্স খাদনত্থায সেদিতং পণ্ণং মযা দিন্নন্তি সম্বন্ধো.

৫-৭. দুতিযাপদানে সিনেৰুসমসন্তোসো ধৰণীসমসাদিসো সিদ্ধত্থো ভগৱাতি সম্বন্ধো. ৱুট্ঠহিত্ৱা সমাধিম্হাতি নিৰোধসমাপত্তিতো ৱুট্ঠহিত্ৱা ৱিসুং হুত্ৱাতি অত্থো. ভিক্খায মমুপট্ঠিতোতি ভিক্খাচাৰৱেলায ‘‘অজ্জ মম যো কোচি কিঞ্চি দানং দদাতি, তস্স মহপ্ফল’’ন্তি চিন্তেত্ৱা নিসিন্নস্স মম সন্তিকং সমীপং উপট্ঠিতো সমীপমাগতোতি অত্থো. হৰীতকং…পে… ফাৰুসকফলানি চাতি এৱং সব্বং তং ফলং সব্বলোকানুকম্পিনো তস্স সিদ্ধত্থস্স মহেসিস্স মযা ৱিপ্পসন্নেন চেতসা দিন্নন্তি অত্থো.

১১-১২. ততিযাপদানে সীহং যথা ৱনচৰন্তি ৱনে চৰমানং সীহৰাজং ইৱ চৰমানং সিদ্ধত্থং ভগৱন্তন্তি সম্বন্ধো. নিসভাজানিযং যথাতি ৱসভো, নিসভো, ৱিসভো, আসভোতি চত্তাৰো গৱজেট্ঠকা. তেসু গৱসতস্স জেট্ঠকো ৱসভো, গৱসহস্সস্স জেট্ঠকো নিসভো, গৱসতসহস্সস্স জেট্ঠকো ৱিসভো, গৱকোটিসতসহস্সস্স জেট্ঠকো আসভো. ইধ পন আসভো ‘‘নিসভো’’তি ৱুত্তো, আজানীযং অভীতং নিচ্চলং উসভৰাজং ইৱাতি অত্থো. ককুধং ৱিলসন্তংৱাতি পুপ্ফপল্লৱেহি সোভমানং ককুধৰুক্খং ইৱ নৰাসভং নৰানং আসভং উত্তমং আগচ্ছন্তং সিদ্ধত্থং ভগৱন্তং দিস্ৱা সদ্ধায সম্পযুত্তত্তা ৱিপ্পসন্নেন চেতসা পচ্চুগ্গমনং অকাসিন্তি অত্থো.

চতুত্থাপদানাদীনি দসমাৱসানানি সুৱিঞ্ঞেয্যানেৱাতি.

একূনতিংসতিমৱগ্গৱণ্ণনা সমত্তা.