১-১০. আকাসুক্খিপিযত্থেৰঅপদানাদিৱণ্ণনা

১-২. সত্তৱীসতিমে ৱগ্গে পঠমাপদানে জলজগ্গে দুৱে গয্হাতি জলে উদকে জাতে অগ্গে উপ্পলাদযো দ্ৱে পুপ্ফে গহেত্ৱা বুদ্ধস্স সমীপং গন্ত্ৱা একং পুপ্ফং পাদেসু নিক্খিপিং পূজেসিং, একং পুপ্ফং আকাসে খিপিন্তি অত্থো.

দুতিযাপদানং পাকটমেৱ.

১০. ততিযাপদানে বোধিযা পাদপুত্তমেতি উত্তমে বোধিপাদপে. অড্ঢচন্দং মযা দিন্নন্তি তস্মিং বোধিমূলে অড্ঢচন্দাকাৰেন মযা অনেকপুপ্ফানি পূজিতানীতি অত্থো. ধৰণীৰুহপাদপেতি ৰুক্খপব্বতৰতনাদযো ধাৰেতীতি ধৰণী, পথৱী, ধৰণিযা ৰুহতি পতিট্ঠহতীতি ধৰণীৰুহো, পাদসঙ্খাতেন মূলেন উদকং পিৱতি খন্ধৱিটপাদীসু পত্থৰিযতীতি পাদপো, ধৰণীৰুহো চ সো পাদপো চেতি ধৰণীৰুহপাদপো, তস্মিং ধৰণীৰুহপাদপে পুপ্ফং মযা পূজিতন্তি অত্থো.

চতুত্থাপদানং উত্তানত্থমেৱ.

১৮-১৯. পঞ্চমাপদানে হিমৱন্তস্সাৱিদূৰেতি হিমৱন্তস্স আসন্নে. ৰোমসো নাম পব্বতোতি ৰুক্খলতাগুম্বাভাৱা কেৱলং দব্বতিণাদিসঞ্ছন্নত্তা ৰোমসো নাম পব্বতো অহোসি. তম্হি পব্বতপাদম্হীতি তস্মিং পব্বতপৰিযন্তে. সমণো ভাৱিতিন্দ্ৰিযোতি সমিতপাপো ৱূপসন্তকিলেসো সমণো ৱড্ঢিতইন্দ্ৰিযো, ৰক্খিতচক্খুন্দ্ৰিযাদিইন্দ্ৰিযোতি অত্থো. অথ ৱা ৱড্ঢিতইন্দ্ৰিযো ৱড্ঢিতসদ্ধিন্দ্ৰিযাদিইন্দ্ৰিযোতি অত্থো. তস্স সমণস্স অহং বিড়ালিআলুৱে গহেত্ৱা অদাসিন্তি অত্থো.

ছট্ঠসত্তমট্ঠমনৱমদসমাপদানানি উত্তানত্থানেৱাতি.

সত্তৱীসতিমৱগ্গৱণ্ণনা সমত্তা.