১-১০. তমালপুপ্ফিযত্থেৰঅপদানাদিৱণ্ণনা

ৱীসতিমে ৱগ্গে পঠমত্থেৰাপদানং উত্তানমেৱ.

৬. দুতিযত্থেৰাপদানে যং দাযৱাসিকো ইসীতি ইসিপব্বজ্জং পব্বজিত্ৱা ৱনে ৱসনভাৱেন দাযৱাসিকো ইসীতি সঙ্খং গতো, অত্তনো অনুকম্পায তং ৱনং উপগতস্স সিদ্ধত্থস্স সত্থুনো ৱসনমণ্ডপচ্ছাদনত্থায যং তিণং, তং লাযতি ছিন্দতীতি অত্থো. দব্বছদনং কত্ৱা অনেকেহি খুদ্দকদণ্ডকেহি মণ্ডপং কত্ৱা তং তিণেন ছাদেত্ৱা সিদ্ধত্থস্স ভগৱতো অহং অদাসিং পূজেসিন্তি অত্থো.

৮. সত্তাহং ধাৰযুং তত্থাতি তং মণ্ডপং তত্থ ঠিতা দেৱমনুস্সা সত্তাহং নিৰোধসমাপত্তিং সমাপজ্জিত্ৱা নিসিন্নস্স সত্থুনো ধাৰযুং ধাৰেসুন্তি অত্থো. সেসং উত্তানত্থমেৱাতি.

ততিযত্থেৰস্স অপদানে খণ্ডফুল্লিযত্থেৰোতি এত্থ খণ্ডন্তি কট্ঠানং জিণ্ণত্তা ছিন্নভিন্নট্ঠানং, ফুল্লন্তি কট্ঠানং জিণ্ণট্ঠানে কণ্ণকিতমহিচ্ছত্তকাদিপুপ্ফনং, খণ্ডঞ্চ ফুল্লঞ্চ খণ্ডফুল্লানি, খণ্ডফুল্লানং পটিসঙ্খৰণং পুনপ্পুনং থিৰকৰণন্তি খণ্ডফুল্লপটিসঙ্খৰণং. ইমস্স পন থেৰস্স সম্ভাৰপূৰণকালে ফুস্সস্স ভগৱতো চেতিযে ছিন্নভিন্নট্ঠানে সুধাপিণ্ডং মক্খেত্ৱা থিৰকৰণং খণ্ডফুল্লপটিসঙ্খৰণং নাম. তস্মা সো খণ্ডফুল্লিযো থেৰোতি পাকটো অহোসি. ততিযং.

১৭. চতুত্থত্থেৰস্সাপদানে ৰঞ্ঞো বদ্ধচৰো অহন্তি ৰঞ্ঞো পৰিচাৰকো কম্মকাৰকো অহোসিন্তি অত্থো.

১৯. জলজুত্তমনামিনোতি জলে উদকে জাতং জলজং, কিং তং পদুমং, পদুমেন সমাননামত্তা পদুমুত্তৰস্স ভগৱতোতি অত্থো. উত্তমপদুমনামস্স ভগৱতোতি ৱা অত্থো. চতুত্থং.

পঞ্চমং উত্তানত্থমেৱ.

২৮. ছট্ঠে নগৰে দ্ৱাৰৱতিযাতি মহাদ্ৱাৰৱাতপানকৱাটফলকাহি ৱতিপাকাৰট্টালগোপুৰকদ্দমোদকপৰিখাহি চ সম্পন্নং নগৰন্তি দ্ৱাৰৱতীনগৰং, দ্ৱাৰং ৱতিঞ্চ পধানং কত্ৱা নগৰস্স উপলক্খিতত্তা ‘‘দ্ৱাৰৱতী নগৰ’’ন্তি ৱোহৰন্তীতি নগৰে দ্ৱাৰৱতিযাতি ৱুত্তং. মালাৱচ্ছো পুপ্ফাৰামো মম অহোসীতি অত্থো.

৩১. তে কিসলযাতি তে অসোকপল্লৱা. ছট্ঠং.

সত্তমট্ঠমনৱমানি উত্তানত্থানেৱ. দসমেপি অপুব্বং নত্থীতি.

ৱীসতিমৱণ্ণনা সমত্তা.