সুজাতো বুদ্ধো

তস্স অপৰভাগে সুজাতো নাম সত্থা উদপাদি. তস্সাপি তযো সাৱকসন্নিপাতা. পঠমসন্নিপাতে সট্ঠি ভিক্খুসতসহস্সানি অহেসুং, দুতিযে পঞ্ঞাসং, ততিযে চত্তালীসং. তদা বোধিসত্তো চক্কৱত্তিৰাজা হুত্ৱা ‘‘বুদ্ধো উপ্পন্নো’’তি সুত্ৱা উপসঙ্কমিত্ৱা ধম্মং সুত্ৱা বুদ্ধপ্পমুখস্স ভিক্খুসঙ্ঘস্স সদ্ধিং সত্তহি ৰতনেহি চতুমহাদীপৰজ্জং দত্ৱা সত্থু সন্তিকে পব্বজি. সকলৰট্ঠৱাসিনো ৰট্ঠুপ্পাদং গহেত্ৱা আৰামিককিচ্চং সাধেন্তা বুদ্ধপ্পমুখস্স ভিক্খুসঙ্ঘস্স নিচ্চং মহাদানং অদংসু. সোপি নং সত্থা ‘‘অনাগতে বুদ্ধো ভৱিস্সতী’’তি ব্যাকাসি. তস্স ভগৱতো নগৰং সুমঙ্গলং নাম অহোসি, উগ্গতো নাম ৰাজা পিতা, পভাৱতী নাম মাতা, সুদস্সনো চ সুদেৱো চ দ্ৱে অগ্গসাৱকা, নাৰদো নামুপট্ঠাকো, নাগা চ নাগসমালা চ দ্ৱে অগ্গসাৱিকা, মহাৱেড়ুৰুক্খো বোধি. সো কিৰ মন্দচ্ছিদ্দো ঘনক্খন্ধো উপৰি নিগ্গতাহি মহাসাখাহি মোৰপিঞ্ছকলাপো ৱিয ৱিৰোচিত্থ. তস্স ভগৱতো সৰীৰং পণ্ণাসহত্থুব্বেধং অহোসি, আযু নৱুতি ৱস্সসহস্সন্তি.

‘‘তত্থেৱ মণ্ডকপ্পম্হি, সুজাতো নাম নাযকো;

সীহহনূসভক্খন্ধো, অপ্পমেয্যো দুৰাসদো’’তি. (বু. ৱং. ১৪.১);