পিযদস্সী বুদ্ধো

তস্স অপৰভাগে ইতো অট্ঠাৰসকপ্পসতমত্থকে একস্মিং কপ্পে পিযদস্সী, অত্থদস্সী, ধম্মদস্সীতি তযো বুদ্ধা নিব্বত্তিংসু. পিযদস্সিস্সপি ভগৱতো তযো সাৱকসন্নিপাতা. পঠমে কোটিসতসহস্সং ভিক্খূ অহেসুং, দুতিযে নৱুতিকোটিযো, ততিযে অসীতিকোটিযো. তদা বোধিসত্তো কস্সপো নাম মাণৱো তিণ্ণং ৱেদানং পাৰঙ্গতো হুত্ৱা সত্থু ধম্মদেসনং সুত্ৱা কোটিসতসহস্সধনপৰিচ্চাগেন সঙ্ঘাৰামং কাৰেত্ৱা সৰণেসু চ সীলেসু চ পতিট্ঠাসি. অথ নং সত্থা ‘‘অট্ঠাৰসকপ্পসতচ্চযেন বুদ্ধো ভৱিস্সতী’’তি ব্যাকাসি. তস্স ভগৱতো অনোমং নাম নগৰং অহোসি, পিতা সুদিন্নো নাম ৰাজা, মাতা চন্দা নাম, পালিতো চ সব্বদস্সী চ দ্ৱে অগ্গসাৱকা, সোভিতো নামুপট্ঠাকো, সুজাতা চ ধম্মদিন্না চ দ্ৱে অগ্গসাৱিকা, ককুধৰুক্খো বোধি, সৰীৰং অসীতিহত্থুব্বেধং অহোসি, নৱুতি ৱস্সসহস্সং আযূতি.

‘‘সুজাতস্স অপৰেন, সযম্ভূ লোকনাযকো;

দুৰাসদো অসমসমো, পিযদস্সী মহাযসো’’তি. (বু. ৱং. ১৫.১);