সুমেধো বুদ্ধো

তস্স অপৰভাগে তিংস কপ্পসহস্সানি অতিক্কমিত্ৱা সুমেধো চ সুজাতো চাতি একস্মিং কপ্পে দ্ৱে বুদ্ধা নিব্বত্তিংসু. সুমেধস্সাপি তযো সাৱকসন্নিপাতা. পঠমসন্নিপাতে সুদস্সননগৰে কোটিসতং খীণাসৱা অহেসুং, দুতিযে নৱুতিকোটিযো, ততিযে অসীতিকোটিযো. তদা বোধিসত্তো উত্তৰো নাম মাণৱো হুত্ৱা নিদহিত্ৱা ঠপিতংযেৱ অসীতিকোটিধনং ৱিস্সজ্জেত্ৱা বুদ্ধপ্পমুখস্স ভিক্খুসঙ্ঘস্স মহাদানং দত্ৱা ধম্মং সুত্ৱা সৰণেসু পতিট্ঠায নিক্খমিত্ৱা পব্বজি. সোপি নং ‘‘অনাগতে বুদ্ধো ভৱিস্সতী’’তি ব্যাকাসি. সুমেধস্স ভগৱতো সুদস্সনং নাম নগৰং অহোসি, সুদত্তো নাম ৰাজা পিতা, মাতাপি সুদত্তা নাম দেৱী, সৰণো চ সব্বকামো চ দ্ৱে অগ্গসাৱকা, সাগৰো নামুপট্ঠাকো, ৰামা চ সুৰামা চ দ্ৱে অগ্গসাৱিকা, মহানীপৰুক্খো বোধি, সৰীৰং অট্ঠাসীতিহত্থুব্বেধং অহোসি, আযু নৱুতি ৱস্সসহস্সন্তি.

‘‘পদুমুত্তৰস্স অপৰেন, সুমেধো নাম নাযকো;

দুৰাসদো উগ্গতেজো, সব্বলোকুত্তমো মুনী’’তি. (বু. ৱং. ১৩.১);