পদুমুত্তৰো বুদ্ধো

নাৰদবুদ্ধস্স পন অপৰভাগে ইতো সতসহস্সকপ্পমত্থকে একস্মিং কপ্পে একোৱ পদুমুত্তৰো নাম বুদ্ধো উদপাদি. তস্সাপি তযো সাৱকসন্নিপাতা. পঠমে সন্নিপাতে কোটিসতসহস্সং ভিক্খূ অহেসুং, দুতিযে ৱেভাৰপব্বতে নৱুতিকোটিসহস্সানি, ততিযে অসীতিকোটিসহস্সানি. তদা বোধিসত্তো জটিলো নাম মহাৰট্ঠিযো হুত্ৱা বুদ্ধপ্পমুখস্স ভিক্খুসঙ্ঘস সচীৱৰং দানং অদাসি. সোপি নং সত্থা ‘‘অনাগতে বুদ্ধো ভৱিস্সতী’’তি ব্যাকাসি. পদুমুত্তৰস্স পন ভগৱতো কালে তিত্থিযা নাম নাহেসুং. সব্বদেৱমনুস্সা বুদ্ধমেৱ সৰণং অগমংসু. তস্স নগৰং হংসৱতী নাম অহোসি, পিতা আনন্দো নাম খত্তিযো, মাতা সুজাতা নাম দেৱী, দেৱলো চ সুজাতো চ দ্ৱে অগ্গসাৱকা, সুমনো নামুপট্ঠাকো, অমিতা চ অসমা চ দ্ৱে অগ্গসাৱিকা, সালৰুক্খো বোধি, সৰীৰং অট্ঠপণ্ণাসহত্থুব্বেধং অহোসি, সৰীৰপ্পভা সমন্ততো দ্ৱাদসযোজনানি গণ্হি, ৱস্সসতসহস্সং আযূতি.

‘‘নাৰদস্স অপৰেন, সম্বুদ্ধো দ্ৱিপদুত্তমো;

পদুমুত্তৰো নাম জিনো, অক্খোভো সাগৰূপমো’’তি. (বু. ৱং. ১২.১);