৯. আটানাটিযসুত্তৱণ্ণনা

পঠমভাণৱাৰৱণ্ণনা

২৭৫. এৱং মে সুতন্তি আটানাটিযসুত্তং. তত্ৰাযমপুব্বপদৱণ্ণনা – চতুদ্দিসং ৰক্খং ঠপেত্ৱাতি অসুৰসেনায নিৱাৰণত্থং সক্কস্স দেৱানমিন্দস্স চতূসু দিসাসু আৰক্খং ঠপেত্ৱা. গুম্বং ঠপেত্ৱাতি বলগুম্বং ঠপেত্ৱা. ওৱৰণং ঠপেত্ৱাতি চতূসু দিসাসু আৰক্খকে ঠপেত্ৱা. এৱং সক্কস্স দেৱানমিন্দস্স আৰক্খং সুসংৱিহিতং কত্ৱা আটানাটনগৰে নিসিন্না সত্ত বুদ্ধে আৰব্ভ ইমং পৰিত্তং বন্ধিত্ৱা ‘‘যে সত্থু ধম্মআণং অম্হাকঞ্চ ৰাজআণং ন সুণন্তি, তেসং ইদঞ্চিদঞ্চ কৰিস্সামা’’তি সাৱনং কত্ৱা অত্তনোপি চতূসু দিসাসু মহতিযা চ যক্খসেনাযাতিআদীহি চতূহি সেনাহি আৰক্খং সংৱিদহিত্ৱা অভিক্কন্তায ৰত্তিযা…পে… একমন্তং নিসীদিংসু.

অভিক্কন্তায ৰত্তিযাতি এত্থ অভিক্কন্তসদ্দো খযসুন্দৰাভিৰূপঅব্ভনুমোদনাদীসু দিস্সতি. তত্থ ‘‘অভিক্কন্তা, ভন্তে ৰত্তি, নিক্খন্তো পঠমো যামো, চিৰনিসিন্নো ভিক্খুসঙ্ঘো উদ্দিসতু, ভন্তে, ভগৱা ভিক্খূনং পাতিমোক্খ’’ন্তি (অ. নি. ৮.২০) এৱমাদীসু খযে দিস্সতি. ‘‘অযং ইমেসং চতুন্নং পুগ্গলানং অভিক্কন্ততৰো পণীততৰো চা’’তি (অ. নি. ৪.১০০) এৱমাদীসু সুন্দৰে.

‘‘কো মে ৱন্দতি পাদানি, ইদ্ধিযা যসসা জলং;

অভিক্কন্তেন ৱণ্ণেন, সব্বা ওভাসযং দিসা’’তি. (ৱি. ৱ. ৮৫৭);

এৱমাদীসু অভিৰূপে. ‘‘অভিক্কন্তং, ভো গোতমাতি (পাৰা. ১৫) এৱমাদীসু অব্ভনুমোদনে. ইধ পন খযে. তেন অভিক্কন্তায ৰত্তিযা, পৰিক্খীণায ৰত্তিযাতি ৱুত্তং হোতি.

অভিক্কন্তৱণ্ণাতি ইধ অভিক্কন্তসদ্দো অভিৰূপে. ৱণ্ণসদ্দো পন ছৱিথুতিকুলৱগ্গকাৰণসণ্ঠানপমাণৰূপাযতনাদীসু দিস্সতি. তত্থ ‘‘সুৱণ্ণৱণ্ণোসি ভগৱা’’তি (ম. নি. ২.৩৯৯) এৱমাদীসু ছৱিযং. ‘‘কদা সঞ্ঞূড়্হা পন তে, গহপতি, ইমে সমণস্স গোতমস্স ৱণ্ণা’’তি (ম. নি. ২.৭৭) এৱমাদীসু থুতিযং. ‘‘চত্তাৰোমে, ভো গোতম, ৱণ্ণা’’তি (দী. নি. ১.২৬৬) এৱমাদীসু কুলৱগ্গে. ‘‘অথ কেন নু ৱণ্ণেন গন্ধথেনোতি ৱুচ্চতী’’তিআদীসু (সং. নি. ১.২৩৪) কাৰণে. ‘‘মহন্তং হত্থিৰাজৱণ্ণং অভিনিম্মিনিত্ৱা’’তি (সং. নি. ১.১৩৮) এৱমাদীসু সণ্ঠানে. ‘‘তযো পত্তস্স ৱণ্ণা’’তি (পাৰা. ৬০২) এৱমাদীসু পমাণে. ‘‘ৱণ্ণো গন্ধো ৰসো ওজা’’তি এৱমাদীসু ৰূপাযতনে. সো ইধ ছৱিযং দট্ঠব্বো. তেন ‘‘অভিক্কন্তৱণ্ণা অভিৰূপচ্ছৱী’’তি ৱুত্তং হোতি.

কেৱলকপ্পন্তি এত্থ কেৱলসদ্দো অনৱসেসযেভুয্যঅব্যামিস্সানতিৰেকদড়্হত্থৱিসংযোগাদিঅনেকত্থো. তথা হিস্স ‘‘কেৱলপৰিপুণ্ণং পৰিসুদ্ধং ব্ৰহ্মচৰিয’’ন্তি (পাৰা. ১) এৱমাদীসু অনৱসেসতা অত্থো. ‘‘কেৱলকপ্পা চ অঙ্গমাগধা পহূতং খাদনীযং ভোজনীযং আদায অভিক্কমিতুকামা হোন্তী’’তি (মহাৱ. ৪৩) এৱমাদীসু যেভুয্যতা. ‘‘কেৱলস্স দুক্খক্খন্ধস্স সমুদযো হোতী’’তি (মহাৱ. ১) এৱমাদীসু অব্যামিস্সতা. ‘‘কেৱলং সদ্ধামত্তকং নূন অযমাযস্মা’’তি (অ. নি. ৬.৫৫) এৱমাদীসু অনতিৰেকতা. ‘‘আযস্মতো, ভন্তে, অনুৰুদ্ধস্স বাহিকো নাম সদ্ধিৱিহাৰিকো কেৱলকপ্পং সঙ্ঘভেদায ঠিতো’’তি (অ. নি. ৪.২৪৩) এৱমাদীসু দড়্হত্থতা. ‘‘কেৱলী ৱুসিতৱা উত্তমপুৰিসোতি ৱুচ্চতী’’তি (অ. নি. ১০.১২) এৱমাদীসু ৱিসংযোগো. ইধ পনস্স অনৱসেসত্থো অধিপ্পেতো.

কপ্পসদ্দো পনাযং অভিসদ্দহনৱোহাৰকালপঞ্ঞত্তিছেদনৱিকপ্পলেসসমন্তভাৱাদিঅনেকত্থো. তথা হিস্স ‘‘ওকপ্পনিযমেতং ভোতো গোতমস্স. যথা তং অৰহতো সম্মাসম্বুদ্ধস্সা’’তি (ম. নি. ১.৩৮৭) এৱমাদীসু অভিসদ্দহনমত্থো. ‘‘অনুজানামি, ভিক্খৱে, পঞ্চহি সমণকপ্পেহি ফলং পৰিভুঞ্জিতু’’ন্তি (চূড়ৱ. ২৫০) এৱমাদীসু ৱোহাৰো. ‘‘যেন সুদং নিচ্চকপ্পং ৱিহৰামী’’তি (ম. নি. ১.৩৮৭) এৱমাদীসু কালো. ‘‘ইচ্চাযস্মা কপ্পো’’তি (সু. নি. ১০৯৮) এৱমাদীসু পঞ্ঞত্তি. ‘‘অলঙ্কতো কপ্পিতকেসমস্সূ’’তি (ৱি. ৱ. ১০৯৪) এৱমাদীসু ছেদনং. ‘‘কপ্পতি দ্ৱঙ্গুলকপ্পো’’তি (চূড়ৱ. ৪৪৬) এৱমাদীসু ৱিকপ্পো, অত্থি কপ্পো নিপজ্জিতু’’ন্তি (অ. নি. ৮.৮০) এৱমাদীসু লেসো. ‘‘কেৱলকপ্পং ৱেড়ুৱনং ওভাসেত্ৱা’’তি (সং. নি. ১.৯৪) এৱমাদীসু সমন্তভাৱো. ইধ পন সমন্তভাৱো অত্থো অধিপ্পেতো. তস্মা ‘‘কেৱলকপ্পং গিজ্ঝকূট’’ন্তি এত্থ অনৱসেসং সমন্ততো গিজ্ঝকূটন্তি এৱমত্থো দট্ঠব্বো.

ওভাসেত্ৱাতি ৱত্থমালালঙ্কাৰসৰীৰসমুট্ঠিতায আভায ফৰিত্ৱা, চন্দিমা ৱিয সূৰিযো ৱিয চ একোভাসং একপজ্জোতং কৰিত্ৱাতি অত্থো. একমন্তং নিসীদিংসূতি দেৱতানং দসবলস্স সন্তিকে নিসিন্নট্ঠানং নাম ন বহু, ইমস্মিং পন সুত্তে পৰিত্তগাৰৱৱসেন নিসীদিংসু.

২৭৬. ৱেস্সৱণোতি কিঞ্চাপি চত্তাৰো মহাৰাজানো আগতা, ৱেস্সৱণো পন দসবলস্স ৱিস্সাসিকো কথাপৱত্তনে ব্যত্তো সুসিক্খিতো, তস্মা ৱেস্সৱণো মহাৰাজা ভগৱন্তং এতদৱোচ. উড়াৰাতি মহেসক্খানুভাৱসম্পন্না. পাণাতিপাতা ৱেৰমণিযাতি পাণাতিপাতে দিট্ঠধম্মিকসম্পৰাযিকং আদীনৱং দস্সেত্ৱা ততো ৱেৰমণিযা ধম্মং দেসেতি. সেসেসুপি এসেৱ নযো. তত্থ সন্তি উড়াৰা যক্খা নিৱাসিনোতি তেসু সেনাসনেসু সন্তি উড়াৰা যক্খা নিবদ্ধৱাসিনো. আটানাটিযন্তি আটানাটনগৰে বদ্ধত্তা এৱংনামং. কিং পন ভগৱতো অপচ্চক্খধম্মো নাম অত্থীতি, নত্থি. অথ কস্মা ৱেস্সৱণো ‘‘উগ্গণ্হাতু, ভন্তে, ভগৱা’’তিআদিমাহ? ওকাসকৰণত্থং. সো হি ভগৱন্তং ইমং পৰিত্তং সাৱেতুং ওকাসং কাৰেন্তো এৱমাহ. সত্থু কথিতে ইমং পৰিত্তং গৰু ভৱিস্সতীতিপি আহ. ফাসুৱিহাৰাযাতি গমনট্ঠানাদীসু চতূসু ইৰিযাপথেসু সুখৱিহাৰায.

২৭৭. চক্খুমন্তস্সাতি ন ৱিপস্সীযেৱ চক্খুমা, সত্তপি বুদ্ধা চক্খুমন্তো, তস্মা একেকস্স বুদ্ধস্স এতানি সত্ত সত্ত নামানি হোন্তি. সব্বেপি বুদ্ধা চক্খুমন্তো, সব্বে সব্বভূতানুকম্পিনো, সব্বে ন্হাতকিলেসত্তা ন্হাতকা. সব্বে মাৰসেনাপমদ্দিনো, সব্বে ৱুসিতৱন্তো, সব্বে ৱিমুত্তা, সব্বে অঙ্গতো ৰস্মীনং নিক্খন্তত্তা অঙ্গীৰসা. ন কেৱলঞ্চ বুদ্ধানং এতানেৱ সত্ত নামানি অসঙ্খ্যেয্যানি নামানি সগুণেন মহেসিনোতি ৱুত্তং.

ৱেস্সৱণো পন অত্তনো পাকটনামৱসেন এৱমাহ. তে জনাতি ইধ খীণাসৱা জনাতি অধিপ্পেতা. অপিসুণাথাতি দেসনাসীসমত্তমেতং, অমুসা অপিসুণা অফৰুসা মন্তভাণিনোতি অত্থো. মহত্তাতি মহন্তভাৱং পত্তা. ‘‘মহন্তা’’তিপি পাঠো, মহন্তাতি অত্থো. ৱীতসাৰদাতি নিস্সাৰদা ৱিগতলোমহংসা.

হিতন্তি মেত্তাফৰণেন হিতং. যং নমস্সন্তীতি এত্থ যন্তি নিপাতমত্তং. মহত্তন্তি মহন্তং. অযমেৱ ৱা পাঠো, ইদং ৱুত্তং হোতি ‘‘যে চাপি লোকে কিলেসনিব্বানেন নিব্বুতা যথাভূতং ৱিপস্সিসুং, ৱিজ্জাদিগুণসম্পন্নঞ্চ হিতং দেৱমনুস্সানং গোতমং নমস্সন্তি, তে জনা অপিসুণা, তেসম্পি নমত্থূ’’তি. অট্ঠকথাযং পন তে জনা অপিসুণাতি তে বুদ্ধা অপিসুণাতি এৱং পঠমগাথায বুদ্ধানংযেৱ ৱণ্ণো কথিতো, তস্মা পঠমগাথা সত্তন্নং বুদ্ধানং ৱসেন ৱুত্তা. দুতিযগাথায ‘‘গোতম’’ন্তি দেসনামুখমত্তমেতং. অযম্পি হি সত্তন্নংযেৱ ৱসেন ৱুত্তাতি ৱেদিতব্বা. অযঞ্হেত্থ অত্থো – লোকে পণ্ডিতা দেৱমনুস্সা যং নমস্সন্তি গোতমং, তস্স চ ততো পুৰিমানঞ্চ বুদ্ধানং নমত্থূতি.

২৭৮. যতো উগ্গচ্ছতীতি যতো ঠানতো উদেতি. আদিচ্চোতি অদিতিযা পুত্তো, ৱেৱচনমত্তং ৱা এতং সূৰিযসদ্দস্স. মহন্তং মণ্ডলং অস্সাতি মণ্ডলীমহা. যস্স চুগ্গচ্ছমানস্সাতি যম্হি উগ্গচ্ছমানে. সংৱৰীপি নিৰুজ্ঝতীতি ৰত্তি অন্তৰধাযতি. যস্স চুগ্গতেতি যস্মিং উগ্গতে.

ৰহদোতি উদকৰহদো. তত্থাতি যতো উগ্গচ্ছতি সূৰিযো, তস্মিং ঠানে. সমুদ্দোতি যো সো ৰহদোতি ৱুত্তো, সো ন অঞ্ঞো, অথ খো সমুদ্দো. সৰিতোদকোতি ৱিসটোদকো, সৰিতা নানপ্পকাৰা নদিযো অস্স উদকে পৱিট্ঠাতি ৱা সৰিতোদকো. এৱং তং তত্থ জানন্তীতি তং ৰহদং তত্থ এৱং জানন্তি. কিন্তি জানন্তি? সমুদ্দো সৰিতোদকোতি এৱং জানন্তি.

ইতোতি সিনেৰুতো ৱা তেসং নিসিন্নট্ঠানতো ৱা. জনোতি অযং মহাজনো. একনামাতি ইন্দনামেন একনামা. সব্বেসং কিৰ তেসং সক্কস্স দেৱৰঞ্ঞো নামমেৱ নামমকংসু. অসীতি দস একো চাতি একনৱুতিজনা. ইন্দনামাতি ইন্দোতি এৱংনামা. বুদ্ধং আদিচ্চবন্ধুনন্তি কিলেসনিদ্দাপগমনেনাপি বুদ্ধং. আদিচ্চেন সমানগোত্ততাযপি আদিচ্চবন্ধুনং. কুসলেন সমেক্খসীতি অনৱজ্জেন নিপুণেন ৱা সব্বঞ্ঞুতঞ্ঞাণেন মহাজনং ওলোকেসি. অমনুস্সাপি তং ৱন্দন্তীতি অমনুস্সাপি তং ‘‘সব্বঞ্ঞুতঞ্ঞাণেন মহাজনং ওলোকেসী’’তি ৱত্ৱা ৱন্দন্তি. সুতং নেতং অভিণ্হসোতি এতং অম্হেহি অভিক্খণং সুতং. জিনং ৱন্দথ গোতমং, জিনং ৱন্দাম গোতমন্তি অম্হেহি পুট্ঠা জিনং ৱন্দাম গোতমন্তি ৱদন্তি.

২৭৯. যেন পেতা পৱুচ্চন্তীতি পেতা নাম কালঙ্কতা, তে যেন দিসাভাগেন নীহৰিযন্তূতি ৱুচ্চন্তি. পিসুণা পিট্ঠিমংসিকাতি পিসুণাৱাচা চেৱ পিট্ঠিমংসং খাদন্তা ৱিয পৰম্মুখা গৰহকা চ. এতে চ যেন নীহৰিযন্তূতি ৱুচ্চন্তি, সব্বেপি হেতে দক্খিণদ্ৱাৰেন নীহৰিত্ৱা দক্খিণতো নগৰস্স ডয্হন্তু ৱা ছিজ্জন্তু ৱা হঞ্ঞন্তু ৱাতি এৱং ৱুচ্চন্তি. ইতো সা দক্খিণা দিসাতি যেন দিসাভাগেন তে পেতা চ পিসুণাদিকা চ নীহৰিযন্তূতি ৱুচ্চন্তি, ইতো সা দক্খিণা দিসা. ইতোতি সিনেৰুতো ৱা তেসং নিসিন্নট্ঠানতো ৱা. কুম্ভণ্ডানন্তি তে কিৰ দেৱা মহোদৰা হোন্তি, ৰহস্সঙ্গম্পি চ নেসং কুম্ভো ৱিয মহন্তং হোতি. তস্মা কুম্ভণ্ডাতি ৱুচ্চন্তি.

২৮০. যত্থ চোগ্গচ্ছতি সূৰিযোতি যস্মিং দিসাভাগে সূৰিযো অত্থং গচ্ছতি.

২৮১. যেনাতি যেন দিসাভাগেন. মহানেৰূতি মহাসিনেৰু পব্বতৰাজা. সুদস্সনোতি সোৱণ্ণমযত্তা সুন্দৰদস্সনো. সিনেৰুস্স হি পাচীনপস্সং ৰজতমযং, দক্খিণপস্সং মণিমযং, পচ্ছিমপস্সং ফলিকমযং, উত্তৰপস্সং সোৱণ্ণমযং, তং মনুঞ্ঞদস্সনং হোতি. তস্মা যেন দিসাভাগেন সিনেৰু সুদস্সনোতি অযমেত্থত্থো. মনুস্সা তত্থ জাযন্তীতি তত্থ উত্তৰকুৰুম্হি মনুস্সা জাযন্তি. অমমাতি ৱত্থাভৰণপানভোজনাদীসুপি মমত্তৱিৰহিতা. অপৰিগ্গহাতি ইত্থিপৰিগ্গহেন অপৰিগ্গহা. তেসং কিৰ ‘‘অযং ময্হং ভৰিযা’’তি মমত্তং ন হোতি, মাতৰং ৱা ভগিনিং ৱা দিস্ৱা ছন্দৰাগো নুপ্পজ্জতি.

নপি নীযন্তি নঙ্গলাতি নঙ্গলানিপি তত্থ ‘‘কসিকম্মং কৰিস্সামা’’তি ন খেত্তং নীযন্তি. অকট্ঠপাকিমন্তি অকট্ঠে ভূমিভাগে অৰঞ্ঞে সযমেৱ জাতং. তণ্ডুলপ্ফলন্তি তণ্ডুলাৱ তস্স ফলং হোতি.

তুণ্ডিকীৰে পচিত্ৱানাতি উক্খলিযং আকিৰিত্ৱা নিদ্ধুমঙ্গাৰেন অগ্গিনা পচিত্ৱা. তত্থ কিৰ জোতিকপাসাণা নাম হোন্তি. অথ খো তে তযো পাসাণে ঠপেত্ৱা তং উক্খলিং আৰোপেন্তি. পাসাণেহি তেজো সমুট্ঠহিত্ৱা তং পচতি. ততো ভুঞ্জন্তি ভোজনন্তি ততো উক্খলিতো ভোজনমেৱ ভুঞ্জন্তি, অঞ্ঞো সূপো ৱা ব্যঞ্জনং ৱা ন হোতি, ভুঞ্জন্তানং চিত্তানুকূলোযেৱস্স ৰসো হোতি. তে তং ঠানং সম্পত্তানং দেন্তিযেৱ, মচ্ছৰিযচিত্তং নাম ন হোতি. বুদ্ধপচ্চেকবুদ্ধাদযোপি মহিদ্ধিকা তত্থ গন্ত্ৱা পিণ্ডপাতং গণ্হন্তি.

গাৱিং একখুৰং কত্ৱাতি গাৱিং গহেত্ৱা একখুৰং ৱাহনমেৱ কত্ৱা. তং অভিৰুয্হ ৱেস্সৱণস্স পৰিচাৰকা যক্খা. অনুযন্তি দিসোদিসন্তি তায তায দিসায চৰন্তি. পসুং একখুৰং কত্ৱাতি ঠপেত্ৱা গাৱিং অৱসেসচতুপ্পদজাতিকং পসুং একখুৰং ৱাহনমেৱ কত্ৱা দিসোদিসং অনুযন্তি.

ইত্থিং ৱা ৱাহনং কত্ৱাতি যেভুয্যেন গব্ভিনিং মাতুগামং ৱাহনং কৰিত্ৱা. তস্সা পিট্ঠিযা নিসীদিত্ৱা চৰন্তি. তস্সা কিৰ পিট্ঠি ওনমিতুং সহতি. ইতৰা পন ইত্থিযো যানে যোজেন্তি. পুৰিসং ৱাহনং কত্ৱাতি পুৰিসে গহেত্ৱা যানে যোজেন্তি. গণ্হন্তা চ সম্মাদিট্ঠিকে গহেতুং ন সক্কোন্তি. যেভুয্যেন পচ্চন্তিমমিলক্খুৱাসিকে গণ্হন্তি. অঞ্ঞতৰো কিৰেত্থ জানপদো একস্স থেৰস্স সমীপে নিসীদিত্ৱা নিদ্দাযতি, থেৰো ‘‘উপাসক অতিৱিয নিদ্দাযসী’’তি পুচ্ছি. ‘‘অজ্জ, ভন্তে, সব্বৰত্তিং ৱেস্সৱণদাসেহি কিলমিতোম্হী’’তি আহ.

কুমাৰিং ৱাহনং কত্ৱাতি কুমাৰিযো গহেত্ৱা একখুৰং ৱাহনং কত্ৱা ৰথে যোজেন্তি. কুমাৰৱাহনেপি এসেৱ নযো. পচাৰা তস্স ৰাজিনোতি তস্স ৰঞ্ঞো পৰিচাৰিকা. হত্থিযানং অস্সযানন্তি ন কেৱলং গোযানাদীনিযেৱ, হত্থিঅস্সযানাদীনিপি অভিৰুহিত্ৱা ৱিচৰন্তি. দিব্বং যানন্তি অঞ্ঞম্পি নেসং বহুৱিধং দিব্বযানং উপট্ঠিতমেৱ হোতি, এতানি তাৱ নেসং উপকপ্পনযানানি. তে পন পাসাদে ৱৰসযনম্হি নিপন্নাপি পীঠসিৱিকাদীসু চ নিসিন্নাপি ৱিচৰন্তি. তেন ৱুত্তং ‘‘পাসাদা সিৱিকা চেৱা’’তি. মহাৰাজস্স যসস্সিনোতি এৱং আনুভাৱসম্পন্নস্স যসস্সিনো মহাৰাজস্স এতানি যানানি নিব্বত্তন্তি.

তস্স চ নগৰা অহু অন্তলিক্খে সুমাপিতাতি তস্স ৰঞ্ঞো আকাসে সুট্ঠু মাপিতা এতে আটানাটাদিকা নগৰা অহেসুং, নগৰানি ভৱিংসূতি অত্থো. একঞ্হিস্স নগৰং আটানাটা নাম আসি, একং কুসিনাটা নাম, একং পৰকুসিনাটা নাম, একং নাটসূৰিযা নাম, একং পৰকুসিটনাটা নাম.

উত্তৰেন কসিৱন্তোতি তস্মিং ঠত্ৱা উজুং উত্তৰদিসায কসিৱন্তো নাম অঞ্ঞং নগৰং. জনোঘমপৰেন চাতি এতস্স অপৰভাগে জনোঘং নাম অঞ্ঞং নগৰং. নৱনৱতিযোতি অঞ্ঞম্পি নৱনৱতিযো নাম একং নগৰং. অপৰং অম্বৰঅম্বৰৱতিযো নাম. আড়কমন্দাতি অপৰম্পি আড়কমন্দা নাম ৰাজধানী.

তস্মা কুৱেৰো মহাৰাজাতি অযং কিৰ অনুপ্পন্নে বুদ্ধে কুৱেৰো নাম ব্ৰাহ্মণো হুত্ৱা উচ্ছুৱপ্পং কাৰেত্ৱা সত্ত যন্তানি যোজেসি. একিস্সায যন্তসালায উট্ঠিতং আযং আগতাগতস্স মহাজনস্স দত্ৱা পুঞ্ঞং অকাসি. অৱসেসসালাহি তত্থেৱ বহুতৰো আযো উট্ঠাসি, সো তেন পসীদিত্ৱা অৱসেসসালাসুপি উপ্পজ্জনকং গহেত্ৱা ৱীসতি ৱস্সসহস্সানি দানং অদাসি. সো কালং কত্ৱা চাতুমহাৰাজিকেসু কুৱেৰো নাম দেৱপুত্তো জাতো. অপৰভাগে ৱিসাণায ৰাজধানিযা ৰজ্জং কাৰেসি. ততো পট্ঠায ৱেস্সৱণোতি ৱুচ্চতি.

পচ্চেসন্তো পকাসেন্তীতি পটিএসন্তো ৱিসুং ৱিসুং অত্থে উপপৰিক্খমানা অনুসাসমানা অঞ্ঞে দ্ৱাদস যক্খৰট্ঠিকা পকাসেন্তি. তে কিৰ যক্খৰট্ঠিকা সাসনং গহেত্ৱা দ্ৱাদসন্নং যক্খদোৱাৰিকানং নিৱেদেন্তি. যক্খদোৱাৰিকা তং সাসনং মহাৰাজস্স নিৱেদেন্তি. ইদানি তেসং যক্খৰট্ঠিকানং নামং দস্সেন্তো ততোলাতিআদিমাহ. তেসু কিৰ একো ততোলা নাম, একো তত্তলা নাম, একো ততোতলা নাম, একো ওজসি নাম, একো তেজসি নাম, একো ততোজসী নাম. সূৰো ৰাজাতি একো সূৰো নাম, একো ৰাজা নাম, একো সূৰোৰাজা নাম, অৰিট্ঠো নেমীতি একো অৰিট্ঠো নাম, একো নেমি নাম, একো অৰিট্ঠনেমি নাম.

ৰহদোপি তত্থ ধৰণী নামাতি তত্থ পনেকো নামেন ধৰণী নাম উদকৰহদো অত্থি, পণ্ণাসযোজনা মহাপোক্খৰণী অত্থীতি ৱুত্তং হোতি. যতো মেঘা পৱস্সন্তীতি যতো পোক্খৰণিতো উদকং গহেত্ৱা মেঘা পৱস্সন্তি. ৱস্সা যতো পতাযন্তীতি যতো ৱুট্ঠিযো অৱত্থৰমানা নিগচ্ছন্তি. মেঘেসু কিৰ উট্ঠিতেসু ততো পোক্খৰণিতো পুৰাণউদকং ভস্সতি. উপৰি মেঘো উট্ঠহিত্ৱা তং পোক্খৰণিং নৱোদকেন পূৰেতি. পুৰাণোদকং হেট্ঠিমং হুত্ৱা নিক্খমতি. পৰিপুণ্ণায পোক্খৰণিযা ৱলাহকা ৱিগচ্ছন্তি. সভাপীতি সভা. তস্সা কিৰ পোক্খৰণিযা তীৰে সালৱতিযা নাম লতায পৰিক্খিত্তো দ্ৱাদসযোজনিকো ৰতনমণ্ডপো অত্থি, তং সন্ধাযেতং ৱুত্তং.

পযিৰুপাসন্তীতি নিসীদন্তি. তত্থ নিচ্চফলা ৰুক্খাতি তস্মিং ঠানে তং মণ্ডপং পৰিৱাৰেত্ৱা সদা ফলিতা অম্বজম্বুআদযো ৰুক্খা নিচ্চপুপ্ফিতা চ চম্পকমালাদযোতি দস্সেতি. নানাদিজগণাযুতাতি ৱিৱিধপক্খিসঙ্ঘসমাকুলা. মযূৰকোঞ্চাভিৰুদাতি মযূৰেহি কোঞ্চসকুণেহি চ অভিৰুদা উপগীতা.

জীৱঞ্জীৱকসদ্দেত্থাতি ‘‘জীৱ জীৱা’’তি এৱং ৱিৰৱন্তানং জীৱঞ্জীৱকসকুণানম্পি এত্থ সদ্দো অত্থি. ওট্ঠৱচিত্তকাতি ‘‘উট্ঠেহি, চিত্ত, উট্ঠেহি চিত্তা’’তি এৱং ৱস্সমানা উট্ঠৱচিত্তকসকুণাপি তত্থ ৱিচৰন্তি. কুক্কুটকাতি ৱনকুক্কুটকা. কুড়ীৰকাতি সুৱণ্ণকক্কটকা. ৱনেতি পদুমৱনে. পোক্খৰসাতকাতি পোক্খৰসাতকা নাম সকুণা.

সুকসাড়িকসদ্দেত্থাতি সুকানঞ্চ সাড়িকানঞ্চ সদ্দো এত্থ. দণ্ডমাণৱকানি চাতি মনুস্সমুখসকুণা. তে কিৰ দ্ৱীহি হত্থেহি সুৱণ্ণদণ্ডং গহেত্ৱা একং পোক্খৰপত্তং অক্কমিত্ৱা অনন্তৰে পোক্খৰপত্তে সুৱণ্ণদণ্ডং নিক্খিপন্তা ৱিচৰন্তি. সোভতি সব্বকালং সাতি সা পোক্খৰণী সব্বকালং সোভতি. কুৱেৰনড়িনীতি কুৱেৰস্স নড়িনী পদুমসৰভূতা, সা ধৰণী নাম পোক্খৰণী সদা নিৰন্তৰং সোভতি.

২৮২. যস্স কস্সচীতি ইদং ৱেস্সৱণো আটানাটিযং ৰক্খং নিট্ঠপেত্ৱা তস্সা পৰিকম্মং দস্সেন্তো আহ. তত্থ সুগ্গহিতাতি অত্থঞ্চ ব্যঞ্জনঞ্চ পৰিসোধেত্ৱা সুট্ঠু উগ্গহিতা. সমত্তা পৰিযাপুতাতি পদব্যঞ্জনানি অহাপেত্ৱা পৰিপুণ্ণং উগ্গহিতা. অত্থম্পি পাড়িম্পি ৱিসংৱাদেত্ৱা সব্বসো ৱা পন অপ্পগুণং কত্ৱা ভণন্তস্স হি পৰিত্তং তেজৱন্তং ন হোতি, সব্বসো পগুণং কত্ৱা ভণন্তস্সেৱ তেজৱন্তং হোতি. লাভহেতু উগ্গহেত্ৱা ভণন্তস্সাপি অত্থং ন সাধেতি, নিস্সৰণপক্খে ঠত্ৱা মেত্তং পুৰেচাৰিকং কত্ৱা ভণন্তস্সেৱ অত্থায হোতীতি দস্সেতি. যক্খপচাৰোতি যক্খপৰিচাৰকো.

ৱত্থুং ৱাতি ঘৰৱত্থুং ৱা. ৱাসং ৱাতি তত্থ নিবদ্ধৱাসং ৱা. সমিতিন্তি সমাগমং. অনাৱয্হন্তি ন আৱাহযুত্তং. অৱিৱয্হন্তি ন ৱিৱাহযুত্তং. তেন সহ আৱাহৱিৱাহং ন কৰেয্যুন্তি অত্থো. অত্তাহিপি পৰিপুণ্ণাহীতি ‘‘কড়াৰক্খি কড়াৰদন্তা’’তি এৱং এতেসং অত্তভাৱং উপনেত্ৱা ৱুত্তাহি পৰিপুণ্ণব্যঞ্জনাহি পৰিভাসাহি পৰিভাসেয্যুং যক্খঅক্কোসেহি নাম অক্কোসেয্যুন্তি অত্থো. ৰিত্তম্পিস্স পত্তন্তি ভিক্খূনং পত্তসদিসমেৱ লোহপত্তং হোতি. তং সীসে নিক্কুজ্জিতং যাৱ গলৱাটকা ভস্সতি. অথ নং মজ্ঝে অযোখীলেন আকোটেন্তি.

চণ্ডাতি কোধনা. ৰুদ্ধাতি ৱিৰুদ্ধা. ৰভসাতি কৰণুত্তৰিযা. নেৱ মহাৰাজানং আদিযন্তীতি ৱচনং ন গণ্হন্তি, আণং ন কৰোন্তি. মহাৰাজানং পুৰিসকানন্তি অট্ঠৱীসতিযক্খসেনাপতীনং. পুৰিসকানন্তি যক্খসেনাপতীনং যে মনস্সা তেসং. অৱৰুদ্ধা নামাতি পচ্চামিত্তা ৱেৰিনো. উজ্ঝাপেতব্বন্তি পৰিত্তং ৱত্ৱা অমনুস্সে পটিক্কমাপেতুং অসক্কোন্তেন এতেসং যক্খানং উজ্ঝাপেতব্বং, এতে জানাপেতব্বাতি অত্থো.

পৰিত্তপৰিকম্মকথা

ইধ পন ঠত্ৱা পৰিত্তস্স পৰিকম্মং কথেতব্বং. পঠমমেৱ হি আটানাটিযসুত্তং ন ভণিতব্বং, মেত্তসুত্তং ধজগ্গসুত্তং ৰতনসুত্তন্তি ইমানি সত্তাহং ভণিতব্বানি. সচে মুঞ্চতি, সুন্দৰং. নো চে মুঞ্চতি, আটানাটিযসুত্তং ভণিতব্বং, তং ভণন্তেন ভিক্খুনা পিট্ঠং ৱা মংসং ৱা ন খাদিতব্বং, সুসানে ন ৱসিতব্বং. কস্মা? অমনুস্সা ওকাসং লভন্তি. পৰিত্তকৰণট্ঠানং হৰিতুপলিত্তং কাৰেত্ৱা তত্থ পৰিসুদ্ধং আসনং পঞ্ঞপেত্ৱা নিসীদিতব্বং.

পৰিত্তকাৰকো ভিক্খু ৱিহাৰতো ঘৰং নেন্তেহি ফলকাৱুধেহি পৰিৱাৰেত্ৱা নেতব্বো. অব্ভোকাসে নিসীদিত্ৱা ন ৱত্তব্বং, দ্ৱাৰৱাতপানানি পিদহিত্ৱা নিসিন্নেন আৱুধহত্থেহি সংপৰিৱাৰিতেন মেত্তচিত্তং পুৰেচাৰিকং কত্ৱা ৱত্তব্বং. পঠমং সিক্খাপদানি গাহাপেত্ৱা সীলে পতিট্ঠিতস্স পৰিত্তং কাতব্বং. এৱম্পি মোচেতুং অসক্কোন্তেন ৱিহাৰং আনেত্ৱা চেতিযঙ্গণে নিপজ্জাপেত্ৱা আসনপূজং কাৰেত্ৱা দীপে জালাপেত্ৱা চেতিযঙ্গণং সম্মজ্জিত্ৱা মঙ্গলকথা ৱত্তব্বা. সব্বসন্নিপাতো ঘোসেতব্বো. ৱিহাৰস্স উপৱনে জেট্ঠকৰুক্খো নাম হোতি, তত্থ ভিক্খুসঙ্ঘো তুম্হাকং আগমনং পটিমানেতীতি পহিণিতব্বং. সব্বসন্নিপাতট্ঠানে অনাগন্তুং নাম ন লব্ভতি. ততো অমনুস্সগহিতকো ‘‘ত্ৱং কো নামা’’তি পুচ্ছিতব্বো. নামে কথিতে নামেনেৱ আলপিতব্বো. ইত্থন্নাম তুয্হং মালাগন্ধাদীসু পত্তি আসনপূজায পত্তি পিণ্ডপাতে পত্তি, ভিক্খুসঙ্ঘেন তুয্হং পণ্ণাকাৰত্থায মহামঙ্গলকথা ৱুত্তা, ভিক্খুসঙ্ঘে গাৰৱেন এতং মুঞ্চাহীতি মোচেতব্বো. সচে ন মুঞ্চতি, দেৱতানং আৰোচেতব্বং ‘‘তুম্হে জানাথ, অযং অমনুস্সো অম্হাকং ৱচনং ন কৰোতি, মযং বুদ্ধআণং কৰিস্সামা’’তি পৰিত্তং কাতব্বং. এতং তাৱ গিহীনং পৰিকম্মং. সচে পন ভিক্খু অমনুস্সেন গহিতো হোতি, আসনানি ধোৱিত্ৱা সব্বসন্নিপাতং ঘোসাপেত্ৱা গন্ধমালাদীসু পত্তিং দত্ৱা পৰিত্তং ভণিতব্বং. ইদং ভিক্খূনং পৰিকম্মং.

ৱিক্কন্দিতব্বন্তি সব্বসন্নিপাতং ঘোসাপেত্ৱা অট্ঠৱীসতি যক্খসেনাপতযো কন্দিতব্বা. ৱিৰৱিতব্বন্তি ‘‘অযং যক্খো গণ্হাতী’’তিআদীনি ভণন্তেন তেহি সদ্ধিং কথেতব্বং. তত্থ গণ্হাতীতি সৰীৰে অধিমুচ্চতি. আৱিসতীতি তস্সেৱ ৱেৱচনং. অথ ৱা লগ্গতি ন অপেতীতি ৱুত্তং হোতি. হেঠেতীতি উপ্পন্নং ৰোগং ৱড্ঢেন্তো বাধতি. ৱিহেঠেতীতি তস্সেৱ ৱেৱচনং. হিংসতীতি অপ্পমংসলোহিতং কৰোন্তো দুক্খাপেতি. ৱিহিংসতীতি তস্সেৱ ৱেৱচনং. ন মুঞ্চতীতি অপ্পমাদগাহো হুত্ৱা মুঞ্চিতুং ন ইচ্ছতি, এৱং এতেসং ৱিৰৱিতব্বং.

২৮৩. ইদানি যেসং এৱং ৱিৰৱিতব্বং, তে দস্সেতুং কতমেসং যক্খানন্তিআদিমাহ. তত্থ ইন্দো সোমোতিআদীনি তেসং নামানি. তেসু ৱেস্সামিত্তোতি ৱেস্সামিত্তপব্বতৱাসী একো যক্খো. যুগন্ধৰোপি যুগন্ধৰপব্বতৱাসীযেৱ. হিৰি নেত্তি চ মন্দিযোতি হিৰি চ নেত্তি চ মন্দিযো চ. মণি মাণি ৱৰো দীঘোতি মণি চ মাণি চ ৱৰো চ দীঘো চ. অথো সেৰীসকো সহাতি তেহি সহ অঞ্ঞো সেৰীসকো নাম. ‘‘ইমেসং যক্খানং…পে… উজ্ঝাপেতব্ব’’ন্তি অযং যক্খো ইমং হেঠেতি ৱিহেঠেতি ন মুঞ্চতীতি এৱং এতেসং যক্খসেনাপতীনং আৰোচেতব্বং. ততো তে ভিক্খুসঙ্ঘো অত্তনো ধম্মআণং কৰোতি, মযম্পি অম্হাকং যক্খৰাজআণং কৰোমাতি উস্সুক্কং কৰিস্সন্তি. এৱং অমনুস্সানং ওকাসো ন ভৱিস্সতি, বুদ্ধসাৱকানং ফাসুৱিহাৰো চ ভৱিস্সতীতি দস্সেন্তো ‘‘অযং খো সা, মাৰিস, আটানাটিযা ৰক্খা’’তিআদিমাহ. তং সব্বং, ততো পৰঞ্চ উত্তানত্থমেৱাতি.

সুমঙ্গলৱিলাসিনিযা দীঘনিকাযট্ঠকথায

আটানাটিযসুত্তৱণ্ণনা নিট্ঠিতা.