৪. অগ্গঞ্ঞসুত্তৱণ্ণনা

ৱাসেট্ঠভাৰদ্ৱাজৱণ্ণনা

১১১. এৱং মে সুতন্তি অগ্গঞ্ঞসুত্তং. তত্ৰাযমনুত্তানপদৱণ্ণনা – পুব্বাৰামে মিগাৰমাতুপাসাদেতি এত্থ অযং অনুপুব্বিকথা. অতীতে সতসহস্সকপ্পমত্থকে একা উপাসিকা পদুমুত্তৰং ভগৱন্তং নিমন্তেত্ৱা বুদ্ধপ্পমুখস্স ভিক্খুসতসহস্সস্স দানং দত্ৱা ভগৱতো পাদমূলে নিপজ্জিত্ৱা ‘‘অনাগতে তুম্হাদিসস্স বুদ্ধস্স অগ্গুপট্ঠাযিকা হোমী’’তি পত্থনং অকাসি. সা কপ্পসতসহস্সং দেৱেসু চেৱ মনুস্সেসু চ সংসৰিত্ৱা অম্হাকং ভগৱতো কালে ভদ্দিযনগৰে মেণ্ডকসেট্ঠিপুত্তস্স ধনঞ্চযসেট্ঠিনো গেহে সুমনদেৱিযা কুচ্ছিম্হি পটিসন্ধিং গণ্হি. জাতকালে তস্সা ৱিসাখাতি নামং অকংসু. সা যদা ভগৱা ভদ্দিযনগৰং আগমাসি, তদা পঞ্চদাসিসতেহি সদ্ধিং ভগৱতো পচ্চুগ্গমনং কত্ৱা পঠমদস্সনম্হিযেৱ সোতাপন্না অহোসি.

অপৰভাগে সাৱত্থিযং মিগাৰসেট্ঠিপুত্তস্স পুণ্ণৱড্ঢনকুমাৰস্স গেহং গতা. তত্থ নং মিগাৰসেট্ঠি মাতুট্ঠানে ঠপেসি. তস্মা মিগাৰমাতাতি ৱুচ্চতি. পতিকুলং গচ্ছন্তিযা চস্সা পিতা মহালতাপিড়ন্ধনং নাম কাৰাপেসি. তস্মিং পিড়ন্ধনে চতস্সো ৱজিৰনাড়িযো উপযোগং অগমংসু, মুত্তানং একাদস নাড়িযো, পৱাড়স্স দ্ৱাৱীসতি নাড়িযো, মণীনং তেত্তিংস নাড়িযো. ইতি এতেহি চ অঞ্ঞেহি চ সত্তহি ৰতনেহি নিট্ঠানং অগমাসি. তং সীসে পটিমুক্কং যাৱ পাদপিট্ঠিযা ভস্সতি. পঞ্চন্নং হত্থীনং বলং ধাৰযমানাৱ নং ইত্থী ধাৰেতুং সক্কোতি. সা অপৰভাগে দসবলস্স অগ্গুপট্ঠাযিকা হুত্ৱা তং পসাধনং ৱিস্সজ্জেত্ৱা নৱহি কোটীহি ভগৱতো ৱিহাৰং কাৰযমানা কৰীসমত্তে ভূমিভাগে পাসাদং কাৰেসি. তস্স উপৰিভূমিযং পঞ্চ গব্ভসতানি হোন্তি, হেট্ঠিমভূমিযং পঞ্চাতি গব্ভসহস্সপ্পটিমণ্ডিতো অহোসি. সা ‘‘সুদ্ধপাসাদোৱ ন সোভতী’’তি তং পৰিৱাৰেত্ৱা পঞ্চ দুৱড্ঢগেহসতানি, পঞ্চ চূড়পাসাদসতানি, পঞ্চ দীঘসালসতানি চ কাৰাপেসি. ৱিহাৰমহো চতূহি মাসেহি নিট্ঠানং অগমাসি.

মাতুগামত্তভাৱে ঠিতায ৱিসাখায ৱিয অঞ্ঞিস্সা বুদ্ধসাসনে ধনপৰিচ্চাগো নাম নত্থি, পুৰিসত্তভাৱে ঠিতস্স অনাথপিণ্ডিকস্স ৱিয অঞ্ঞস্সাতি. সো হি চতুপণ্ণাসকোটিযো ৱিস্সজ্জেত্ৱা সাৱত্থিযা দক্খিণভাগে অনুৰাধপুৰস্স মহাৱিহাৰসদিসে ঠানে জেতৱনমহাৱিহাৰং নাম কাৰেসি. ৱিসাখা সাৱত্থিযা পাচীনভাগে উত্তৰদেৱিযা ৱিহাৰসদিসে ঠানে পুব্বাৰামং নাম কাৰেসি. ভগৱা ইমেসং দ্ৱিন্নং কুলানং অনুকম্পায সাৱত্থিং নিস্সায ৱিহৰন্তো ইমেসু দ্ৱীসু ৱিহাৰেসু নিবদ্ধৱাসং ৱসি. একং অন্তোৱস্সং জেতৱনে ৱসতি, একং পুব্বাৰামে. তস্মিং সমযে পন ভগৱা পুব্বাৰামে ৱিহৰতি. তেন ৱুত্তং ‘‘পুব্বাৰামে মিগাৰমাতুপাসাদে’’তি.

ৱাসেট্ঠভাৰদ্ৱাজাতি ৱাসেট্ঠো চ সামণেৰো ভাৰদ্ৱাজো চ. ভিক্খূসু পৰিৱসন্তীতি তে নেৱ তিত্থিযপৰিৱাসং ৱসন্তি, ন আপত্তিপৰিৱাসং. অপৰিপুণ্ণৱস্সত্তা পন ভিক্খুভাৱং পত্থযমানা ৱসন্তি. তেনেৱাহ ‘‘ভিক্খুভাৱং আকঙ্খমানা’’তি. উভোপি হেতে উদিচ্চব্ৰাহ্মণমহাসালকুলে নিব্বত্তা, চত্তালীস চত্তালীস কোটিৱিভৱা তিণ্ণং ৱেদানং পাৰগূ মজ্ঝিমনিকাযে ৱাসেট্ঠসুত্তং সুত্ৱা সৰণং গতা, তেৱিজ্জসুত্তং সুত্ৱা পব্বজিত্ৱা ইমস্মিং কালে ভিক্খুভাৱং আকঙ্খমানা পৰিৱসন্তি. অব্ভোকাসে চঙ্কমতীতি উত্তৰদক্খিণেন আযতস্স পাসাদস্স পুৰত্থিমদিসাভাগে পাসাদচ্ছাযাযং যন্তৰজ্জূহি আকড্ঢিযমানং ৰতনসতুব্বেধং সুৱণ্ণঅগ্ঘিকং ৱিয অনিলপথে ৱিধাৱন্তীহি ছব্বণ্ণাহি বুদ্ধৰস্মীহি সোভমানো অপৰাপৰং চঙ্কমতি.

১১৩. অনুচঙ্কমিংসূতি অঞ্জলিং পগ্গয্হ ওনতসৰীৰা হুত্ৱা অনুৱত্তমানা চঙ্কমিংসু. ৱাসেট্ঠং আমন্তেসীতি সো তেসং পণ্ডিততৰো গহেতব্বং ৱিস্সজ্জেতব্বঞ্চ জানাতি, তস্মা তং আমন্তেসি. তুম্হে খ্ৱত্থাতি তুম্হে খো অত্থ. ব্ৰাহ্মণজচ্চাতি, ব্ৰাহ্মণজাতিকা. ব্ৰাহ্মণকুলীনাতি ব্ৰাহ্মণেসু কুলীনা কুলসম্পন্না. ব্ৰাহ্মণকুলাতি ব্ৰাহ্মণকুলতো, ভোগাদিসম্পন্নং ব্ৰাহ্মণকুলং পহাযাতি অত্থো. ন অক্কোসন্তীতি দসৱিধেন অক্কোসৱত্থুনা ন অক্কোসন্তি. ন পৰিভাসন্তীতি নানাৱিধায পৰিভৱকথায ন পৰিভাসন্তীতি অত্থো. ইতি ভগৱা ‘‘ব্ৰাহ্মণা ইমে সামণেৰে অক্কোসন্তি পৰিভাসন্তী’’তি জানমানোৱ পুচ্ছতি. কস্মা? ইমে মযা অপুচ্ছিতা পঠমতৰং ন কথেস্সন্তি, অকথিতে কথা ন সমুট্ঠাতীতি কথাসমুট্ঠাপনত্থায. তগ্ঘাতি একংসৱচনে নিপাতো, একংসেনেৱ নো, ভন্তে, ব্ৰাহ্মণা অক্কোসন্তি পৰিভাসন্তীতি ৱুত্তং হোতি. অত্তৰূপাযাতি অত্তনো অনুৰূপায. পৰিপুণ্ণাযাতি যথাৰুচি পদব্যঞ্জনানি আৰোপেত্ৱা আৰোপেত্ৱা পৰিপূৰিতায. নো অপৰিপুণ্ণাযাতি অন্তৰা অট্ঠপিতায নিৰন্তৰং পৱত্তায.

কস্মা পন ব্ৰাহ্মণা ইমে সামণেৰে অক্কোসন্তীতি? অপ্পতিট্ঠতায. ইমে হি সামণেৰা অগ্গব্ৰাহ্মণানং পুত্তা তিণ্ণং ৱেদানং পাৰগূ জম্বুদীপে ব্ৰাহ্মণানং অন্তৰে পাকটা সম্ভাৱিতা তেসং পব্বজিতত্তা অঞ্ঞে ব্ৰাহ্মণপুত্তা পব্বজিংসু. অথ খো ব্ৰাহ্মণা ‘‘অপতিট্ঠা মযং জাতা’’তি ইমায অপ্পতিট্ঠতায গামদ্ৱাৰেপি অন্তোগামেপি তে দিস্ৱা ‘‘তুম্হেহি ব্ৰাহ্মণসমযো ভিন্নো, মুণ্ডসমণকস্স পচ্ছতো পচ্ছতো ৰসগিদ্ধা হুত্ৱা ৱিচৰথা’’তিআদীনি চেৱ পাড়িযং আগতানি ‘‘ব্ৰাহ্মণোৱ সেট্ঠো ৱণ্ণো’’তিআদীনি চ ৱত্ৱা অক্কোসন্তি. সামণেৰা তেসু অক্কোসন্তেসুপি কোপং ৱা আঘাতং ৱা অকত্ৱা কেৱলং ভগৱতা পুট্ঠা ‘‘তগ্ঘ নো, ভন্তে, ব্ৰাহ্মণা অক্কোসন্তি পৰিভাসন্তী’’তি আৰোচেসুং. অথ নে ভগৱা অক্কোসনাকাৰং পুচ্ছন্তো যথা কথং পন ৱোতি পুচ্ছতি. তে আচিক্খন্তা ব্ৰাহ্মণা ভন্তেতিআদিমাহংসু.

তত্থ সেট্ঠো ৱণ্ণোতি জাতিগোত্তাদীনং পঞ্ঞাপনট্ঠানে ব্ৰাহ্মণোৱ সেট্ঠোতি দস্সেন্তি. হীনা অঞ্ঞে ৱণ্ণাতি ইতৰে তযো ৱণ্ণা হীনা লামকাতি ৱদন্তি. সুক্কোতি পণ্ডৰো. কণ্হোতি কাড়কো. সুজ্ঝন্তীতি জাতিগোত্তাদীনং পঞ্ঞাপনট্ঠানে সুজ্ঝন্তি. ব্ৰহ্মুনো পুত্তাতি মহাব্ৰহ্মুনো পুত্তা. ওৰসা মুখতো জাতাতি উৰে ৱসিত্ৱা মুখতো নিক্খন্তা, উৰে কত্ৱা সংৱড্ঢিতাতি ৱা ওৰসা. ব্ৰহ্মজাতি ব্ৰহ্মতো নিব্বত্তা. ব্ৰহ্মনিম্মিতাতি ব্ৰহ্মুনা নিম্মিতা. ব্ৰহ্মদাযাদাতি ব্ৰহ্মুনো দাযাদা. হীনমত্থ ৱণ্ণং অজ্ঝুপগতাতি হীনং ৱণ্ণং অজ্ঝুপগতা অত্থ. মুণ্ডকে সমণকেতি নিন্দন্তা জিগুচ্ছন্তা ৱদন্তি, ন মুণ্ডকমত্তঞ্চেৱ সমণমত্তঞ্চ সন্ধায. ইব্ভেতি গহপতিকে. কণ্হেতি কাড়কে. বন্ধূতি মাৰস্স বন্ধুভূতে মাৰপক্খিকে. পাদাপচ্চেতি মহাব্ৰহ্মুনো পাদানং অপচ্চভূতে পাদতো জাতেতি অধিপ্পাযো.

১১৪. ‘‘তগ্ঘ ৱো, ৱাসেট্ঠ, ব্ৰাহ্মণা পোৰাণং অস্সৰন্তা এৱমাহংসূ’’তি এত্থ ৱোতি নিপাতমত্তং, সামিৱচনং ৱা, তুম্হাকং ব্ৰাহ্মণাতি অত্থো. পোৰাণন্তি পোৰাণকং অগ্গঞ্ঞং লোকুপ্পত্তিচৰিযৱংসং. অস্সৰন্তাতি অস্সৰমানা. ইদং ৱুত্তং হোতি, একংসেন ৱো, ৱাসেট্ঠ, ব্ৰাহ্মণা পোৰাণং লোকুপ্পত্তিং অননুস্সৰন্তা অজানন্তা এৱং ৱদন্তীতি. ‘‘দিস্সন্তি খো পনা’’তি এৱমাদি তেসং লদ্ধিভিন্দনত্থায ৱুত্তং. তত্থ ব্ৰাহ্মণিযোতি ব্ৰাহ্মণানং পুত্তপ্পটিলাভত্থায আৱাহৱিৱাহৱসেন কুলং আনীতা ব্ৰাহ্মণিযো দিস্সন্তি. তা খো পনেতা অপৰেন সমযেন উতুনিযোপি হোন্তি, সঞ্জাতপুপ্ফাতি অত্থো. গব্ভিনিযোতি সঞ্জাতগব্ভা. ৱিজাযমানাতি পুত্তধীতৰো জনযমানা. পাযমানাতি দাৰকে থঞ্ঞং পাযন্তিযো. যোনিজাৱ সমানাতি ব্ৰাহ্মণীনং পস্সাৱমগ্গেন জাতা সমানা. এৱমাহংসূতি এৱং ৱদন্তি. কথং? ‘‘ব্ৰাহ্মণোৱ সেট্ঠো ৱণ্ণো…পে… ব্ৰহ্মদাযাদা’’তি. যদি পন নেসং তং সচ্চৱচনং সিযা, ব্ৰাহ্মণীনং কুচ্ছি মহাব্ৰহ্মস্স উৰো ভৱেয্য, ব্ৰাহ্মণীনং পস্সাৱমগ্গো মহাব্ৰহ্মুনো মুখং ভৱেয্য, ন খো পনেতং এৱং দট্ঠব্বং. তেনাহ ‘‘তে চ ব্ৰহ্মূনঞ্চেৱ অব্ভাচিক্খন্তী’’তিআদি.

চতুৱণ্ণসুদ্ধিৱণ্ণনা

এত্তাৱতা ‘‘মযং মহাব্ৰহ্মুনো উৰে ৱসিত্ৱা মুখতো নিক্খন্তাতি ৱত্তুং মা লভন্তূ’’তি ইমং মুখচ্ছেদকৱাদং ৱত্ৱা পুন চত্তাৰোপি ৱণ্ণা কুসলে ধম্মে সমাদায ৱত্তন্তাৱ সুজ্ঝন্তীতি দস্সনত্থং চত্তাৰোমে, ৱাসেট্ঠ, ৱণ্ণাতিআদিমাহ. অকুসলসঙ্খাতাতি অকুসলাতি সঙ্খাতা অকুসলকোট্ঠাসভূতা ৱা. এস নযো সব্বত্থ. ন অলমৰিযাতি অৰিযভাৱে অসমত্থা. কণ্হাতি পকতিকাড়কা. কণ্হৱিপাকাতি ৱিপাকোপি নেসং কণ্হো দুক্খোতি অত্থো. খত্তিযেপি তেতি খত্তিযম্হিপি তে. একচ্চেতি একস্মিং. এস নযো সব্বত্থ.

সুক্কাতি নিক্কিলেসভাৱেন পণ্ডৰা. সুক্কৱিপাকাতি ৱিপাকোপি নেসং সুক্কো সুখোতি অত্থো.

১১৬. উভযৱোকিণ্ণেসু ৱত্তমানেসূতি উভযেসু ৱোকিণ্ণেসু মিস্সীভূতেসু হুত্ৱা ৱত্তমানেসু. কতমেসু উভযেসূতি? কণ্হসুক্কেসু ধম্মেসু ৱিঞ্ঞুগৰহিতেসু চেৱ ৱিঞ্ঞুপ্পসত্থেসু চ. যদেত্থ ব্ৰাহ্মণা এৱমাহংসূতি এত্থ এতেসু কণ্হসুক্কধম্মেসু ৱত্তমানাপি ব্ৰাহ্মণা যদেতং এৱং ৱদন্তি ‘‘ব্ৰাহ্মণোৱ সেট্ঠো ৱণ্ণো’’তিআদি. তং নেসং ৱিঞ্ঞূ নানুজানন্তীতি যে লোকে পণ্ডিতা, তে নানুমোদন্তি, ন পসংসন্তীতি অত্থো. তং কিস্স হেতু? ইমেসঞ্হি ৱাসেট্ঠাতিআদিম্হি অযং সঙ্খেপত্থো. যং ৱুত্তং নানুজানন্তীতি, তং কস্মাতি চে? যস্মা ইমেসং চতুন্নং ৱণ্ণানং যো ভিক্খু অৰহং…পে… সম্মদঞ্ঞা ৱিমুত্তো, সো তেসং অগ্গমক্খাযতি, তে চ ন এৱৰূপা. তস্মা নেসং ৱিঞ্ঞূ নানুজানন্তি.

অৰহন্তিআদিপদেসু চেত্থ কিলেসানং আৰকত্তাদীহি কাৰণেহি অৰহং. আসৱানং খীণত্তা খীণাসৱো. সত্ত সেক্খা পুথুজ্জনকল্যাণকা চ ব্ৰহ্মচৰিযৱাসং ৱসন্তি নাম. অযং পন ৱুত্থৱাসোতি ৱুসিতৱা. চতূহি মগ্গেহি চতূসু সচ্চেসু পৰিজাননাদিকৰণীযং কতং অস্সাতি কতকৰণীযো. কিলেসভাৰো চ খন্ধভাৰো চ ওহিতো অস্সাতি ওহিতভাৰো. ওহিতোতি ওহাৰিতো. সুন্দৰো অত্থো, সকো ৱা অত্থো সদত্থো, অনুপ্পত্তো সদত্থো এতেনাতি অনুপ্পত্তসদত্থো. ভৱসংযোজনং ৱুচ্চতি তণ্হা, সা পৰিক্খীণা অস্সাতি পৰিক্খীণভৱসংযোজনো. সম্মদঞ্ঞা ৱিমুত্তোতি সম্মা হেতুনা কাৰণেন জানিত্ৱা ৱিমুত্তো. জনেতস্মিন্তি জনে এতস্মিং, ইমস্মিং লোকেতি অত্থো. দিট্ঠে চেৱ ধম্মে অভিসম্পৰাযঞ্চাতি ইধত্তভাৱে চ পৰত্তভাৱে.

১১৭. অনন্তৰাতি অন্তৰৱিৰহিতা, অত্তনো কুলেন সদিসাতি অত্থো. অনুযুত্তাতি ৱসৱত্তিনো. নিপচ্চকাৰন্তি মহল্লকতৰা নিপচ্চকাৰং দস্সেন্তি. দহৰতৰা অভিৱাদনাদীনি কৰোন্তি. তত্থ সামীচিকম্মন্তি তংতংৱত্তকৰণাদি অনুচ্ছৱিককম্মং.

১১৮. নিৱিট্ঠাতি অভিনিৱিট্ঠা অচলট্ঠিতা. কস্স পন এৱৰূপা সদ্ধা হোতীতি? সোতাপন্নস্স. সো হি নিৱিট্ঠসদ্ধো অসিনা সীসে ছেজ্জমানেপি বুদ্ধো অবুদ্ধোতি ৱা, ধম্মো অধম্মোতি ৱা, সঙ্ঘো অসঙ্ঘোতি ৱা ন ৱদতি. পতিট্ঠিতসদ্ধো হোতি সূৰম্বট্ঠো ৱিয.

সো কিৰ সত্থু ধম্মদেসনং সুত্ৱা সোতাপন্নো হুত্ৱা গেহং অগমাসি. অথ মাৰো দ্ৱত্তিংসৱৰলক্খণপ্পটিমণ্ডিতং বুদ্ধৰূপং মাপেত্ৱা তস্স ঘৰদ্ৱাৰে ঠত্ৱা ‘‘সত্থা আগতো’’তি সাসনং পহিণি. সূৰম্বট্ঠো চিন্তেসি ‘‘অহং ইদানেৱ সত্থু সন্তিকে ধম্মং সুত্ৱা আগতো, কিং নু খো ভৱিস্সতী’’তি উপসঙ্কমিত্ৱা সত্থুসঞ্ঞায ৱন্দিত্ৱা অট্ঠাসি. মাৰো আহ – ‘‘অম্বট্ঠ, যং তে মযা ‘ৰূপং অনিচ্চং…পে… ৱিঞ্ঞাণং অনিচ্চন্তি কথিতং, তং দুক্কথিতং. অনুপধাৰেত্ৱাৱ হি মযা এৱং ৱুত্তং. তস্মা ত্ৱং ‘ৰূপং নিচ্চং…পে… ৱিঞ্ঞাণং নিচ্চ’ন্তি গণ্হাহী’’তি. সো চিন্তেসি – ‘‘অট্ঠানমেতং যং বুদ্ধা অনুপধাৰেত্ৱা অপচ্চক্খং কত্ৱা কিঞ্চি কথেয্যুং, অদ্ধা অযং ময্হং ৱিচ্ছিন্দজননত্থং মাৰো আগতো’’তি. ততো নং ‘‘ত্ৱং মাৰোসী’’তি আহ. সো মুসাৱাদং কাতুং নাসক্খি. ‘‘আম মাৰোস্মী’’তি পটিজানাতি. ‘‘কস্মা আগতোসী’’তি? তৱ সদ্ধাচালনত্থন্তি আহ. ‘‘কণ্হ পাপিম, ত্ৱং তাৱ একো তিট্ঠ, তাদিসানং মাৰানং সতম্পি সহস্সম্পি সতসহস্সম্পি মম সদ্ধং চালেতুং অসমত্থং, মগ্গেন আগতসদ্ধা নাম থিৰা সিলাপথৱিযং পতিট্ঠিতসিনেৰু ৱিয অচলা হোতি, কিং ত্ৱং এত্থা’’তি অচ্ছৰং পহৰি. সো ঠাতুং অসক্কোন্তো তত্থেৱ অন্তৰধাযি. এৱৰূপং সদ্ধং সন্ধাযেতং ৱুত্তং ‘‘নিৱিট্ঠা’’তি.

মূলজাতা পতিট্ঠিতাতি মগ্গমূলস্স সঞ্জাতত্তা তেন মগ্গমূলেন পতিট্ঠিতা. দড়্হাতি থিৰা. অসংহাৰিযাতি সুনিখাতইন্দখীলো ৱিয কেনচি চালেতুং অসক্কুণেয্যা. তস্সেতং কল্লং ৱচনাযাতি তস্স অৰিযসাৱকস্স যুত্তমেতং ৱত্তুং. কিন্তি? ‘‘ভগৱতোম্হি পুত্তো ওৰসো’’তি এৱমাদি. সো হি ভগৱন্তং নিস্সায অৰিযভূমিযং জাতোতি ভগৱতো পুত্তো. উৰে ৱসিত্ৱা মুখতো নিক্খন্তধম্মঘোসৱসেন মগ্গফলেসু পতিট্ঠিতত্তা ওৰসো মুখতো জাতো. অৰিযধম্মতো জাতত্তা অৰিযধম্মেন চ নিম্মিতত্তা ধম্মজো ধম্মনিম্মিতো. নৱলোকুত্তৰধম্মদাযজ্জং অৰহতীতি ধম্মদাযাদো. তং কিস্স হেতূতি যদেতং ‘‘ভগৱতোম্হি পুত্তো’’তি ৱত্ৱা ‘‘ধম্মজো ধম্মনিম্মিতো’’তি ৱুত্তং, তং কস্মাতি চে? ইদানিস্স অত্থং দস্সেন্তো তথাগতস্স হেতন্তিআদিমাহ. তত্থ ‘‘ধম্মকাযো ইতিপী’’তি কস্মা তথাগতো ‘‘ধম্মকাযো’’তি ৱুত্তো? তথাগতো হি তেপিটকং বুদ্ধৱচনং হদযেন চিন্তেত্ৱা ৱাচায অভিনীহৰি. তেনস্স কাযো ধম্মমযত্তা ধম্মোৱ. ইতি ধম্মো কাযো অস্সাতি ধম্মকাযো. ধম্মকাযত্তা এৱ ব্ৰহ্মকাযো. ধম্মো হি সেট্ঠত্থেন ব্ৰহ্মাতি ৱুচ্চতি. ধম্মভূতোতি ধম্মসভাৱো. ধম্মভূতত্তা এৱ ব্ৰহ্মভূতো.

১১৯. এত্তাৱতা ভগৱা সেট্ঠচ্ছেদকৱাদং দস্সেত্ৱা ইদানি অপৰেনপি নযেন সেট্ঠচ্ছেদকৱাদমেৱ দস্সেতুং হোতি খো সো, ৱাসেট্ঠ, সমযোতিআদিমাহ. তত্থ সংৱট্টৱিৱট্টকথা ব্ৰহ্মজালে ৱিত্থাৰিতাৱ. ইত্থত্তং আগচ্ছন্তীতি ইত্থভাৱং মনুস্সত্তং আগচ্ছন্তি. তেধ হোন্তি মনোমযাতি তে ইধ মনুস্সলোকে নিব্বত্তমানাপি ওপপাতিকা হুত্ৱা মনেনেৱ নিব্বত্তাতি মনোমযা. ব্ৰহ্মলোকে ৱিয ইধাপি নেসং পীতিযেৱ আহাৰকিচ্চং সাধেতীতি পীতিভক্খা. এতেনেৱ নযেন সযংপভাদীনিপি ৱেদিতব্বানীতি.

ৰসপথৱিপাতুভাৱৱণ্ণনা

১২০. একোদকীভূতন্তি সব্বং চক্কৱাড়ং একোদকমেৱ ভূতং. অন্ধকাৰোতি তমো. অন্ধকাৰতিমিসাতি চক্খুৱিঞ্ঞাণুপ্পত্তিনিৱাৰণেন অন্ধভাৱকৰণং বহলতমং. সমতনীতি পতিট্ঠহি সমন্ততো পত্থৰি. পযসো তত্তস্সাতি তত্তস্স খীৰস্স. ৱণ্ণসম্পন্নাতি ৱণ্ণেন সম্পন্না. কণিকাৰপুপ্ফসদিসো হিস্সা ৱণ্ণো অহোসি. গন্ধসম্পন্নাতি গন্ধেন সম্পন্না দিব্বগন্ধং ৱাযতি. ৰসসম্পন্নাতি ৰসেন সম্পন্না পক্খিত্তদিব্বোজা ৱিয হোতি. খুদ্দমধুন্তি খুদ্দকমক্খিকাহি কতমধুং. অনেড়কন্তি নিদ্দোসং মক্খিকণ্ডকৱিৰহিতং. লোলজাতিকোতি লোলসভাৱো. অতীতানন্তৰেপি কপ্পে লোলোযেৱ. অম্ভোতি অচ্ছৰিযজাতো আহ. কিমেৱিদং ভৱিস্সতীতি ৱণ্ণোপিস্সা মনাপো গন্ধোপি, ৰসো পনস্সা কীদিসো ভৱিস্সতীতি অত্থো. যো তত্থ উপ্পন্নলোভো, সো ৰসপথৱিং অঙ্গুলিযা সাযি, অঙ্গুলিযা গহেত্ৱা জিৱ্হগ্গে ঠপেসি.

অচ্ছাদেসীতি জিৱ্হগ্গে ঠপিতমত্তা সত্ত ৰসহৰণীসহস্সানি ফৰিত্ৱা মনাপা হুত্ৱা তিট্ঠতি. তণ্হা চস্স ওক্কমীতি তত্থ চস্স তণ্হা উপ্পজ্জি.

চন্দিমসূৰিযাদিপাতুভাৱৱণ্ণনা

১২১. আলুপ্পকাৰকং উপক্কমিংসু পৰিভুঞ্জিতুন্তি আলোপং কত্ৱা পিণ্ডে পিণ্ডে ছিন্দিত্ৱা পৰিভুঞ্জিতুং আৰভিংসু. চন্দিমসূৰিযাতি চন্দিমা চ সূৰিযো চ. পাতুৰহেসুন্তি পাতুভৱিংসু.

কো পন তেসং পঠমং পাতুভৱি, কো কস্মিং ৱসতি, কস্স কিং পমাণং, কো উপৰি, কো সীঘং গচ্ছতি, কতি নেসং ৱীথিযো, কথং চৰন্তি, কিত্তকে ঠানে আলোকং কৰোন্তীতি? উভো একতো পাতুভৱন্তি. সূৰিযো পঠমতৰং পঞ্ঞাযতি. তেসঞ্হি সত্তানং সযংপভায অন্তৰহিতায অন্ধকাৰো অহোসি. তে ভীততসিতা ‘‘ভদ্দকং ৱতস্স সচে আলোকো পাতুভৱেয্যা’’তি চিন্তযিংসু. ততো মহাজনস্স সূৰভাৱং জনযমানং সূৰিযমণ্ডলং উট্ঠহি. তেনেৱস্স সূৰিযোতি নামং অহোসি. তস্মিং দিৱসং আলোকং কত্ৱা অত্থঙ্গতে পুন অন্ধকাৰো অহোসি. তে ‘‘ভদ্দকং ৱতস্স সচে অঞ্ঞো আলোকো উপ্পজ্জেয্যা’’তি চিন্তযিংসু. অথ নেসং ছন্দং ঞত্ৱাৱ চন্দমণ্ডলং উট্ঠহি. তেনেৱস্স চন্দোতি নামং অহোসি.

তেসু চন্দো অন্তোমণিৱিমানে ৱসতি. তং বহি ৰজতেন পৰিক্খিত্তং. উভযম্পি সীতলমেৱ অহোসি. সূৰিযো অন্তোকনকৱিমানে ৱসতি. তং বাহিৰং ফলিকপৰিক্খিত্তং হোতি. উভযম্পি উণ্হমেৱ.

পমাণতো চন্দো উজুকং একূনপঞ্ঞাসযোজনো. পৰিমণ্ডলতো তীহি যোজনেহি ঊনদিযড্ঢসতযোজনো. সূৰিযো উজুকং পঞ্ঞাসযোজনো, পৰিমণ্ডলতো দিযড্ঢসতযোজনো.

চন্দো হেট্ঠা, সূৰিযো উপৰি, অন্তৰা নেসং যোজনং হোতি. চন্দস্স হেট্ঠিমন্ততো সূৰিযস্স উপৰিমন্ততো যোজনসতং হোতি.

চন্দো উজুকং সণিকং গচ্ছতি, তিৰিযং সীঘং. দ্ৱীসু পস্সেসু নক্খত্ততাৰকা গচ্ছন্তি. চন্দো ধেনু ৱিয ৱচ্ছং তং তং নক্খত্তং উপসঙ্কমতি. নক্খত্তানি পন অত্তনো ঠানং ন ৱিজহন্তি. সূৰিযস্স উজুকং গমনং সীঘং, তিৰিযং গমনং দন্ধং. সো কাড়পক্খউপোসথতো পাটিপদদিৱসে যোজনানং সতসহস্সং চন্দমণ্ডলং ওহায গচ্ছতি. অথ চন্দো লেখা ৱিয পঞ্ঞাযতি. পক্খস্স দুতিযায সতসহস্সন্তি এৱং যাৱ উপোসথদিৱসা সতসহস্সং সতসহস্সং ওহায গচ্ছতি. অথ চন্দো অনুক্কমেন ৱড্ঢিত্ৱা উপোসথদিৱসে পৰিপুণ্ণো হোতি. পুন পাটিপদদিৱসে যোজনানং সতসহস্সং ধাৱিত্ৱা গণ্হাতি. দুতিযায সতসহস্সন্তি এৱং যাৱ উপোসথদিৱসা সতসহস্সং সতসহস্সং ধাৱিত্ৱা গণ্হাতি. অথ চন্দো অনুক্কমেন হাযিত্ৱা উপোসথদিৱসে সব্বসো ন পঞ্ঞাযতি. চন্দং হেট্ঠা কত্ৱা সূৰিযো উপৰি হোতি. মহতিযা পাতিযা খুদ্দকভাজনং ৱিয চন্দমণ্ডলং পিধীযতি. মজ্ঝন্হিকে গেহচ্ছাযা ৱিয চন্দস্স ছাযা ন পঞ্ঞাযতি. সো ছাযায অপঞ্ঞাযমানায দূৰে ঠিতানং দিৱা পদীপো ৱিয সযম্পি ন পঞ্ঞাযতি.

কতি নেসং ৱীথিযোতি এত্থ পন অজৱীথি, নাগৱীথি, গোৱীথীতি তিস্সো ৱীথিযো হোন্তি. তত্থ অজানং উদকং পটিকূলং হোতি, হত্থিনাগানং মনাপং. গুন্নং সীতুণ্হসমতায ফাসু হোতি. তস্মা যং কালং চন্দিমসূৰিযা অজৱীথিং আৰুহন্তি, তদা দেৱো একবিন্দুম্পি ন ৱস্সতি. যদা নাগৱীথিং আৰোহন্তি, তদা ভিন্নং ৱিয নভং পগ্ঘৰতি. যদা গোৱীথিং আৰোহন্তি, তদা উতুসমতা সম্পজ্জতি. চন্দিমসূৰিযা ছমাসে সিনেৰুতো বহি নিক্খমন্তি, ছমাসে অন্তো ৱিচৰন্তি. তে হি আসাড়্হমাসে সিনেৰুসমীপেন ৱিচৰন্তি. ততো পৰে দ্ৱে মাসে নিক্খমিত্ৱা বহি ৱিচৰন্তা পঠমকত্তিকমাসে মজ্ঝেন গচ্ছন্তি. ততো চক্কৱাড়াভিমুখা গন্ত্ৱা তযো মাসে চক্কৱাড়সমীপেন চৰিত্ৱা পুন নিক্খমিত্ৱা চিত্ৰমাসে মজ্ঝেন গন্ত্ৱা ততো দ্ৱে মাসে সিনেৰুভিমুখা পক্খন্দিত্ৱা পুন আসাড়্হে সিনেৰুসমীপেন চৰন্তি.

কিত্তকে ঠানে আলোকং কৰোন্তীতি? একপ্পহাৰেন তীসু দীপেসু আলোকং কৰোন্তি. কথং? ইমস্মিঞ্হি দীপে সূৰিযুগ্গমনকালো পুব্বৱিদেহে মজ্ঝন্হিকো হোতি, উত্তৰকুৰূসু অত্থঙ্গমনকালো, অপৰগোযানে মজ্ঝিমযামো. পুব্বৱিদেহম্হি উগ্গমনকালো উত্তৰকুৰূসু মজ্ঝন্হিকো, অপৰগোযানে অত্থঙ্গমনকালো, ইধ মজ্ঝিমযামো. উত্তৰকুৰূসু উগ্গমনকালো অপৰগোযানে মজ্ঝন্হিকো, ইধ অত্থঙ্গমনকালো, পুব্বৱিদেহে মজ্ঝিমযামো. অপৰগোযানদীপে উগ্গমনকালো ইধ মজ্ঝন্হিকো, পুব্বৱিদেহে অত্থঙ্গমনকালো, উত্তৰকুৰূসু মজ্ঝিমযামোতি.

নক্খত্তানি তাৰকৰূপানীতি কত্তিকাদিনক্খত্তানি চেৱ সেসতাৰকৰূপানি চ চন্দিমসূৰিযেহি সদ্ধিংযেৱ পাতুৰহেসুং. ৰত্তিন্দিৱাতি ততো সূৰিযত্থঙ্গমনতো যাৱ অৰুণুগ্গমনা ৰত্তি, অৰুণুগ্গমনতো যাৱ সূৰিযত্থঙ্গমনা দিৱাতি এৱং ৰত্তিন্দিৱা পঞ্ঞাযিংসু. অথ পঞ্চদস ৰত্তিযো অড্ঢমাসো, দ্ৱে অড্ঢমাসা মাসোতি এৱং মাসড্ঢমাসা পঞ্ঞাযিংসু. অথ চত্তাৰো মাসা উতু, তযো উতূ সংৱচ্ছৰোতি এৱং উতুসংৱচ্ছৰা পঞ্ঞাযিংসু.

১২২. ৱণ্ণৱেৱণ্ণতা চাতি ৱণ্ণস্স ৱিৱণ্ণভাৱো. তেসং ৱণ্ণাতিমানপচ্চযাতি তেসং ৱণ্ণং আৰব্ভ উপ্পন্নঅতিমানপচ্চযা. মানাতিমানজাতিকানন্তি পুনপ্পুনং উপ্পজ্জমানাতিমানসভাৱানং. ৰসায পথৱিযাতি সম্পন্নৰসত্তা ৰসাতি লদ্ধনামায পথৱিযা. অনুত্থুনিংসূতি অনুভাসিংসু. অহো ৰসন্তি অহো অম্হাকং মধুৰৰসং অন্তৰহিতং. অগ্গঞ্ঞং অক্খৰন্তি লোকুপ্পত্তিৱংসকথং. অনুসৰন্তীতি অনুগচ্ছন্তি.

ভূমিপপ্পটকপাতুভাৱাদিৱণ্ণনা

১২৩. এৱমেৱ পাতুৰহোসীতি এদিসো হুত্ৱা উট্ঠহি, অন্তোৱাপিযং উদকে ছিন্নে সুক্খকললপটলং ৱিয চ উট্ঠহি.

১২৪. পদালতাতি একা মধুৰৰসা ভদ্দালতা. কলম্বুকাতি নাড়িকা. অহু ৱত নোতি মধুৰৰসা ৱত নো পদালতা অহোসি. অহাযি ৱত নোতি সা নো এতৰহি অন্তৰহিতাতি.

১২৫. অকট্ঠপাকোতি অকট্ঠেযেৱ ভূমিভাগে উপ্পন্নো. অকণোতি নিক্কুণ্ডকো. অথুসোতি নিত্থুসো. সুগন্ধোতি দিব্বগন্ধং ৱাযতি. তণ্ডুলপ্ফলোতি সুপৰিসুদ্ধং পণ্ডৰং তণ্ডুলমেৱ ফলতি. পক্কং পটিৱিৰূড়্হন্তি সাযং গহিতট্ঠানং পাতো পক্কং হোতি, পুন ৱিৰূড়্হং পটিপাকতিকমেৱ গহিতট্ঠানং ন পঞ্ঞাযতি. নাপদানং পঞ্ঞাযতীতি অলাযিতং হুত্ৱা অনূনমেৱ পঞ্ঞাযতি.

ইত্থিপুৰিসলিঙ্গাদিপাতুভাৱৱণ্ণনা

১২৬. ইত্থিযা চাতি যা পুব্বে মনুস্সকালে ইত্থী, তস্স ইত্থিলিঙ্গং পাতুভৱতি, পুব্বে পুৰিসস্স পুৰিসলিঙ্গং. মাতুগামো নাম হি পুৰিসত্তভাৱং লভন্তো অনুপুব্বেন পুৰিসত্তপচ্চযে ধম্মে পূৰেত্ৱা লভতি. পুৰিসো ইত্থত্তভাৱং লভন্তো কামেসুমিচ্ছাচাৰং নিস্সায লভতি. তদা পন পকতিযা মাতুগামস্স ইত্থিলিঙ্গং, পুৰিসস্স পুৰিসলিঙ্গং পাতুৰহোসি. উপনিজ্ঝাযতন্তি উপনিজ্ঝাযন্তানং ওলোকেন্তানং. পৰিড়াহোতি ৰাগপৰিড়াহো. সেট্ঠিন্তি ছাৰিকং. নিব্বুয্হমানাযাতি নিয্যমানায.

১২৭. অধম্মসম্মতন্তি তং পংসুখিপনাদি অধম্মোতি সম্মতং. তদেতৰহি ধম্মসম্মতন্তি তং ইদানি ধম্মোতি সম্মতং, ধম্মোতি তং গহেত্ৱা ৱিচৰন্তি. তথা হি একচ্চেসু জানপদেসু কলহং কুৰুমানা ইত্থিযো ‘‘ত্ৱং কস্মা কথেসি? যা গোমযপিণ্ডমত্তম্পি নালত্থা’’তি ৱদন্তি. পাতব্যতন্তি সেৱিতব্বতং. সন্নিধিকাৰকন্তি সন্নিধিং কত্ৱা. অপদানং পঞ্ঞাযিত্থাতি ছিন্নট্ঠানং ঊনমেৱ হুত্ৱা পঞ্ঞাযিত্থ. সণ্ডসণ্ডাতি একেকস্মিং ঠানে কলাপবন্ধা ৱিয গুম্বগুম্বা হুত্ৱা.

১২৮. মৰিযাদং ঠপেয্যামাতি সীমং ঠপেয্যাম. যত্ৰ হি নামাতি যো হি নাম. পাণিনা পহৰিংসূতি তযো ৱাৰে ৱচনং অগণ্হন্তং পাণিনা পহৰিংসু. তদগ্গে খোতি তং অগ্গং কত্ৱা.

মহাসম্মতৰাজৱণ্ণনা

১৩০. খীযিতব্বং খীযেয্যাতি পকাসেতব্বং পকাসেয্য খিপিতব্বং খিপেয্য, হাৰেতব্বং হাৰেয্যাতি ৱুত্তং হোতি. যো নেসং সত্তোতি যো তেসং সত্তো. কো পন সোতি? অম্হাকং বোধিসত্তো. সালীনং ভাগং অনুপদস্সামাতি মযং একেকস্স খেত্ততো অম্বণম্বণং আহৰিত্ৱা তুয্হং সালিভাগং দস্সাম, তযা কিঞ্চি কম্মং ন কাতব্বং, ত্ৱং অম্হাকং জেট্ঠকট্ঠানে তিট্ঠাতি.

১৩১. অক্খৰং উপনিব্বত্তন্তি সঙ্খা সমঞ্ঞা পঞ্ঞত্তি ৱোহাৰো উপ্পন্নো. খত্তিযো খত্তিযোত্ৱেৱ দুতিযং অক্খৰন্তি ন কেৱলং অক্খৰমেৱ, তে পনস্স খেত্তসামিনো তীহি সঙ্খেহি অভিসেকম্পি অকংসু. ৰঞ্জেতীতি সুখেতি পিনেতি. অগ্গঞ্ঞেনাতি অগ্গন্তি ঞাতেন, অগ্গে ৱা ঞাতেন লোকুপ্পত্তিসমযে উপ্পন্নেন অভিনিব্বত্তি অহোসীতি.

ব্ৰাহ্মণমণ্ডলাদিৱণ্ণনা

১৩২. ৱীতঙ্গাৰা ৱীতধূমাতি পচিত্ৱা খাদিতব্বাভাৱতো ৱিগতধূমঙ্গাৰা. পন্নমুসলাতি কোট্টেত্ৱা পচিতব্বাভাৱতো পতিতমুসলা. ঘাসমেসমানাতি ভিক্খাচৰিযৱসেন যাগুভত্তং পৰিযেসন্তা. তমেনং মনুস্সা দিস্ৱাতি তে এতে মনুস্সা পস্সিত্ৱা. অনভিসম্ভুণমানাতি অসহমানা অসক্কোন্তা. গন্থে কৰোন্তাতি তযো ৱেদে অভিসঙ্খৰোন্তা চেৱ ৱাচেন্তা চ. অচ্ছন্তীতি ৱসন্তি, ‘‘অচ্ছেন্তী’’তিপি পাঠো. এসেৱত্থো. হীনসম্মতন্তি ‘‘মন্তে ধাৰেন্তি মন্তে ৱাচেন্তী’’তি খো, ৱাসেট্ঠ, ইদং তেন সমযেন হীনসম্মতং. তদেতৰহি সেট্ঠসম্মতন্তি তং ইদানি ‘‘এত্তকে মন্তে ধাৰেন্তি এত্তকে মন্তে ৱাচেন্তী’’তি সেট্ঠসম্মতং জাতং. ব্ৰাহ্মণমণ্ডলস্সাতি ব্ৰাহ্মণগণস্স.

১৩৩. মেথুনং ধম্মং সমাদাযাতি মেথুনধম্মং সমাদিযিত্ৱা. ৱিসুকম্মন্তে পযোজেসুন্তি গোৰক্খ ৱাণিজকম্মাদিকে ৱিস্সুতে উগ্গতে কম্মন্তে পযোজেসুং.

১৩৪. সুদ্দা সুদ্দাতি তেন লুদ্দাচাৰকম্মখুদ্দাচাৰকম্মুনা সুদ্দং সুদ্দং লহুং লহুং কুচ্ছিতং গচ্ছন্তি, ৱিনস্সন্তীতি অত্থো. অহু খোতি হোতি খো.

১৩৫. সকং ধম্মং গৰহমানোতি ন সেতচ্ছত্তং উস্সাপনমত্তেন সুজ্ঝিতুং সক্কাতি এৱং অত্তনো খত্তিযধম্মং নিন্দমানো. এস নযো সব্বত্থ. ‘‘ইমেহি খো, ৱাসেট্ঠ, চতূহি মণ্ডলেহী’’তি ইমিনা ইমং দস্সেতি ‘‘সমণমণ্ডলং নাম ৱিসুং নত্থি, যস্মা পন ন সক্কা জাতিযা সুজ্ঝিতুং, অত্তনো অত্তনো সম্মাপটিপত্তিযা ৱিসুদ্ধি হোতি. তস্মা ইমেহি চতূহি মণ্ডলেহি সমণমণ্ডলস্স অভিনিব্বত্তি হোতি. ইমানি মণ্ডলানি সমণমণ্ডলং অনুৱত্তন্তি, অনুৱত্তন্তানি চ ধম্মেনেৱ অনুৱত্তন্তি, নো অধম্মেন. সমণমণ্ডলঞ্হি আগম্ম সম্মাপটিপত্তিং পূৰেত্ৱা সুদ্ধিং পাপুণন্তী’’তি.

দুচ্চৰিতাদিকথাৱণ্ণনা

১৩৬. ইদানি যথাজাতিযা ন সক্কা সুজ্ঝিতুং, সম্মাপটিপত্তিযাৱ সুজ্ঝন্তি, তমত্থং পাকটং কৰোন্তো খত্তিযোপি খো, ৱাসেট্ঠাতি দেসনং আৰভি. তত্থ মিচ্ছাদিট্ঠিকম্মসমাদানহেতূতি মিচ্ছাদিট্ঠিৱসেন সমাদিন্নকম্মহেতু, মিচ্ছাদিট্ঠিকম্মস্স ৱা সমাদানহেতু.

১৩৭. দ্ৱযকাৰীতি কালেন কুসলং কৰোতি, কালেন অকুসলন্তি এৱং উভযকাৰী. সুখদুক্খপ্পটিসংৱেদী হোতীতি একক্খণে উভযৱিপাকদানট্ঠানং নাম নত্থি. যেন পন অকুসলং বহুং কতং হোতি, কুসলং মন্দং, সো তং কুসলং নিস্সায খত্তিযকুলে ৱা ব্ৰাহ্মণকুলে ৱা নিব্বত্ততি. অথ নং অকুসলকম্মং কাণম্পি কৰোতি খুজ্জম্পি পীঠসপ্পিম্পি. সো ৰজ্জস্স ৱা অনৰহো হোতি, অভিসিত্তকালে ৱা এৱংভূতো ভোগে পৰিভুঞ্জিতুং ন সক্কোতি. অপৰস্স মৰণকালে দ্ৱে বলৱমল্লা ৱিয তে দ্ৱেপি কুসলাকুসলকম্মানি উপট্ঠহন্তি. তেসু অকুসলং বলৱতৰং হোতি, তং কুসলং পটিবাহিত্ৱা তিৰচ্ছানযোনিযং নিব্বত্তাপেতি. কুসলকম্মম্পি পৱত্তিৱেদনীযং হোতি. তমেনং মঙ্গলহত্থিং ৱা কৰোন্তি মঙ্গলঅস্সং ৱা মঙ্গলউসভং ৱা. সো সম্পত্তিং অনুভৱতি. ইদং সন্ধায ৱুত্তং ‘‘সুখদুক্খপ্পটিসংৱেদী হোতী’’তি.

বোধিপক্খিযভাৱনাৱণ্ণনা

১৩৮. সত্তন্নং বোধিপক্খিযানন্তি ‘‘চত্তাৰো সতিপট্ঠানা’’তি আদিকোট্ঠাসৱসেন সত্তন্নং, পটিপাটিযা পন সত্ততিংসায বোধিপক্খিযানং ধম্মানং. ভাৱনমন্ৱাযাতি ভাৱনং অনুগন্ত্ৱা, পটিপজ্জিত্ৱাতি অত্থো. পৰিনিব্বাযতীতি কিলেসপৰিনিব্বানেন পৰিনিব্বাযতি. ইতি ভগৱা চত্তাৰো ৱণ্ণে দস্সেত্ৱা ৱিনিৱত্তেত্ৱা পটিৱিদ্ধচতুসচ্চং খীণাসৱমেৱ দেৱমনুস্সেসু সেট্ঠং কত্ৱা দস্সেসি.

১৪০. ইদানি তমেৱত্থং লোকসম্মতস্স ব্ৰহ্মুনোপি ৱচনদস্সনানুসাৰেন দড়্হং কত্ৱা দস্সেন্তো ইমেসঞ্হি ৱাসেট্ঠ চতুন্নং ৱণ্ণানন্তিআদিমাহ. ‘‘ব্ৰহ্মুনাপেসা’’তিআদি অম্বট্ঠসুত্তে ৱিত্থাৰিতং. ইতি ভগৱা এত্তকেন ইমিনা কথামগ্গেন সেট্ঠচ্ছেদকৱাদমেৱ দস্সেত্ৱা সুত্তন্তং ৱিনিৱত্তেত্ৱা অৰহত্তনিকূটেন দেসনং নিট্ঠাপেসি. অত্তমনা ৱাসেট্ঠভাৰদ্ৱাজাতি ৱাসেট্ঠভাৰদ্ৱাজ সামণেৰাপি হি সকমনা তুট্ঠমনা ‘‘সাধু, সাধূ’’তি ভগৱতো ভাসিতং অভিনন্দিংসু. ইদমেৱ সুত্তন্তং আৱজ্জন্তা অনুমজ্জন্তা সহ পটিসম্ভিদাহি অৰহত্তং পাপুণিংসূতি.

সুমঙ্গলৱিলাসিনিযা দীঘনিকাযট্ঠকথায

অগ্গঞ্ঞসুত্তৱণ্ণনা নিট্ঠিতা.