সোমনস্সপটিলাভকথাৱণ্ণনা

৩৬৮. ৱেদপটিলাভন্তি তুট্ঠিপটিলাভং. দেৱাসুৰসঙ্গামোতি দেৱানঞ্চ অসুৰানঞ্চ সঙ্গামো. সমুপব্যূড়্হোতি সমাপন্নো নলাটেন নলাটং পহৰণাকাৰপ্পত্তো ৱিয. এতেসং কিৰ কদাচি মহাসমুদ্দপিট্ঠে সঙ্গামো হোতি তত্থ পন ছেদনৱিজ্ঝনাদীহি অঞ্ঞমঞ্ঞং ঘাতো নাম নত্থি, দাৰুমেণ্ডকযুদ্ধং ৱিয জযপৰাজযমত্তমেৱ হোতি. কদাচি দেৱা জিনন্তি, কদাচি অসুৰা. তত্থ যস্মিং সঙ্গামে দেৱা পুন অপচ্চাগমনায অসুৰে জিনিংসু, তং সন্ধায তস্মিং খো পন ভন্তেতিআদিমাহ. উভযমেতন্তি উভযং এতং. দুৱিধম্পি ওজং এত্থ দেৱলোকে দেৱাযেৱ পৰিভুঞ্জিস্সন্তীতি এৱমস্স আৱজ্জন্তস্স বলৱপীতিসোমনস্সং উপ্পজ্জি. সদণ্ডাৱচৰোতি সদণ্ডাৱচৰকো, দণ্ডগ্গহণেন সত্থগ্গহণেন সদ্ধিং অহোসি, ন নিক্খিত্তদণ্ডসত্থোতি দস্সেতি. একন্তনিব্বিদাযাতি একন্তেনেৱ ৱট্টে নিব্বিন্দনত্থাযাতি সব্বং মহাগোৱিন্দসুত্তে ৱুত্তমেৱ.

৩৬৯. পৱেদেসীতি কথেসি দীপেসি. ইধেৱাতি ইমস্মিঞ্ঞেৱ ওকাসে. দেৱভূতস্স মে সতোতি দেৱস্স মে সতো. পুনৰাযু চ মে লদ্ধোতি পুন অঞ্ঞেন কম্মৱিপাকেন মে জীৱিতং লদ্ধন্তি, ইমিনা অত্তনো চুতভাৱং চেৱ উপপন্নভাৱঞ্চ আৱিকৰোতি.

দিৱিযা কাযাতি দিব্বা অত্তভাৱা. আযুং হিত্ৱা অমানুসন্তি দিব্বং আযুং জহিত্ৱা. অমূড়্হো গব্ভমেস্সামীতি নিযতগতিকত্তা অমূড়্হো হুত্ৱা. যত্থ মে ৰমতী মনোতি যত্থ মে মনো ৰমিস্সতি, তত্থেৱ খত্তিযকুলাদীসু গব্ভং উপগচ্ছিস্সামীতি সত্তক্খত্তুং দেৱে চ মানুসে চাতি ইমমত্থং দীপেতি.

ঞাযেন ৱিহৰিস্সামীতি মনুস্সেসু উপপন্নোপি মাতৰং জীৱিতা ৱোৰোপনাদীনং অভব্বত্তা ঞাযেন কাৰণেন সমেন ৱিহৰিস্সামীতি অত্থো.

সম্বোধি চে ভৱিস্সতীতি ইদং সকদাগামিমগ্গং সন্ধায ৱদতি, সচে সকদাগামী ভৱিস্সামীতি দীপেতি. অঞ্ঞাতা ৱিহৰিস্সামীতি অঞ্ঞাতা আজানিতুকামো হুত্ৱা ৱিহৰিস্সামি. স্ৱেৱ অন্তো ভৱিস্সতীতি সো এৱ মে মনুস্সলোকে অন্তো ভৱিস্সতীতি.

পুন দেৱো ভৱিস্সামি, দেৱলোকস্মিং উত্তমোতি পুন দেৱলোকস্মিং উত্তমো সক্কো দেৱানমিন্দো ভৱিস্সামীতি ৱদতি.

অন্তিমে ৱত্তমানম্হীতি অন্তিমে ভৱে ৱত্তমানে. সো নিৱাসো ভৱিস্সতীতি যে তে আযুনা চ পঞ্ঞায চ অকনিট্ঠা জেট্ঠকা সব্বদেৱেহি পণীততৰা দেৱা, অৱসানে মে সো নিৱাসো ভৱিস্সতি. অযং কিৰ ততো সক্কত্তভাৱতো চুতো তস্মিং অত্তভাৱে অনাগামিমগ্গস্স পটিলদ্ধত্তা উদ্ধংসোতো অকনিট্ঠগামী হুত্ৱা অৱিহাদীসু নিব্বত্তন্তো অৱসানে অকনিট্ঠে নিব্বত্তিস্সতি. তং সন্ধায এৱমাহ. এস কিৰ অৱিহেসু কপ্পসহস্সং ৱসিস্সতি, অতপ্পেসু দ্ৱে কপ্পসহস্সানি, সুদস্সেসু চত্তাৰি কপ্পসহস্সানি, সুদস্সীসু অট্ঠ, অকনিট্ঠেসু সোড়সাতি একতিংস কপ্পসহস্সানি ব্ৰহ্মআযুং অনুভৱিস্সতি. সক্কো দেৱৰাজা অনাথপিণ্ডিকো গহপতি ৱিসাখা মহাউপাসিকাতি তযোপি হি ইমে একপ্পমাণআযুকা এৱ, ৱট্টাভিৰতসত্তা নাম এতেহি সদিসা সুখভাগিনো নাম নত্থি.

৩৭০. অপৰিযোসিতসঙ্কপ্পোতি অনিট্ঠিতমনোৰথো. যস্সু মঞ্ঞামি সমণেতি যে চ সমণে পৱিৱিত্তৱিহাৰিনোতি মঞ্ঞামি.

আৰাধনাতি সম্পাদনা. ৱিৰাধনাতি অসম্পাদনা. ন সম্পাযন্তীতি সম্পাদেত্ৱা কথেতুং ন সক্কোন্তি.

আদিচ্চবন্ধুনন্তি আদিচ্চোপি গোতমগোত্তো, ভগৱাপি গোতমগোত্তো, তস্মা এৱমাহ. যং কৰোমসীতি যং পুব্বে ব্ৰহ্মুনো নমক্কাৰং কৰোম. সমং দেৱেহীতি দেৱেহি সদ্ধিং, ইতো পট্ঠায ইদানি অম্হাকং ব্ৰহ্মুনো নমক্কাৰকৰণং নত্থীতি দস্সেতি. সামং কৰোমাতি নমক্কাৰং কৰোম.

৩৭১. পৰামসিত্ৱাতি তুট্ঠচিত্তো সহাযং হত্থেন হত্থম্হি পহৰন্তো ৱিয পথৱিং পহৰিত্ৱা, সক্খিভাৱত্থায ৱা পহৰিত্ৱা ‘‘যথা ত্ৱং নিচ্চলো, এৱমহং ভগৱতী’’তি. অজ্ঝিট্ঠপঞ্হাতি অজ্ঝেসিতপঞ্হা পত্থিতপঞ্হা. সেসং সব্বত্থ উত্তানমেৱাতি.

ইতি সুমঙ্গলৱিলাসিনিযা দীঘনিকাযট্ঠকথাযং

সক্কপঞ্হসুত্তৱণ্ণনা নিট্ঠিতা.