৬. মহালিসুত্তৱণ্ণনা

ব্ৰাহ্মণদূতৱত্থুৱণ্ণনা

৩৫৯. এৱং মে সুতং – একং সমযং ভগৱা ৱেসালিযন্তি মহালিসুত্তং. তত্ৰাযং অপুব্বপদৱণ্ণনা. ৱেসালিযন্তি পুনপ্পুনং ৱিসালভাৱূপগমনতো ৱেসালীতি লদ্ধনামকে নগৰে. মহাৱনেতি বহিনগৰে হিমৱন্তেন সদ্ধিং একাবদ্ধং হুত্ৱা ঠিতং সযং জাতৱনং অত্থি, যং মহন্তভাৱেনেৱ মহাৱনন্তি ৱুচ্চতি, তস্মিং মহাৱনে. কূটাগাৰসালাযন্তি তস্মিং ৱনসণ্ডে সঙ্ঘাৰামং পতিট্ঠপেসুং. তত্থ কণ্ণিকং যোজেত্ৱা থম্ভানং উপৰি কূটাগাৰসালাসঙ্খেপেন দেৱৱিমানসদিসং পাসাদং অকংসু, তং উপাদায সকলোপি সঙ্ঘাৰামো ‘‘কূটাগাৰসালা’’তি পঞ্ঞাযিত্থ. ভগৱা তং ৱেসালিং উপনিস্সায তস্মিং সঙ্ঘাৰামে ৱিহৰতি. তেন ৱুত্তং – ‘‘ৱেসালিযং ৱিহৰতি মহাৱনে কূটাগাৰসালায’’ন্তি. কোসলকাতি কোসলৰট্ঠৱাসিনো. মাগধকাতি মগধৰট্ঠৱাসিনো. কৰণীযেনাতি অৱস্সং কত্তব্বকম্মেন. যঞ্হি অকাতুম্পি ৱট্টতি, তং কিচ্চন্তি ৱুচ্চতি, যং অৱস্সং কাতব্বমেৱ, তং কৰণীযং নাম.

৩৬০. পটিসল্লীনো ভগৱাতি নানাৰম্মণচাৰতো পটিক্কম্ম সল্লীনো নিলীনো, একীভাৱং উপগম্ম একত্তাৰম্মণে ঝানৰতিং অনুভৱতীতি অত্থো. তত্থেৱাতি তস্মিঞ্ঞেৱ ৱিহাৰে. একমন্তন্তি তস্মা ঠানা অপক্কম্ম তাসু তাসু ৰুক্খচ্ছাযাসু নিসীদিংসু.

ওট্ঠদ্ধলিচ্ছৱীৱত্থুৱণ্ণনা

৩৬১. ওট্ঠদ্ধোতি অদ্ধোট্ঠতায এৱংলদ্ধনামো. মহতিযা লিচ্ছৱীপৰিসাযাতি পুৰেভত্তং বুদ্ধপ্পমুখস্স ভিক্খুসঙ্ঘস্স দানং দত্ৱা ভগৱতো সন্তিকে উপোসথঙ্গানি অধিট্ঠহিত্ৱা গন্ধমালাদীনি গাহাপেত্ৱা উগ্ঘোসনায মহতিং লিচ্ছৱিৰাজপৰিসং সন্নিপাতাপেত্ৱা তায নীলপীতাদিৱণ্ণৱত্থাভৰণৱিলেপনপটিমণ্ডিতায তাৱতিংসপৰিসসপ্পটিভাগায মহতিযা লিচ্ছৱিপৰিসায সদ্ধিং উপসঙ্কমি. অকালো খো মহালীতি তস্স ওট্ঠদ্ধস্স মহালীতি মূলনামং, তেন মূলনামমত্তেন নং থেৰো মহালীতি আলপতি. একমন্তং নিসীদীতি পতিৰূপাসু ৰুক্খচ্ছাযাসু তায লিচ্ছৱিপৰিসায সদ্ধিং ৰতনত্তযস্স ৱণ্ণং কথযন্তো নিসীদি.

৩৬২. সীহো সমণুদ্দেসোতি আযস্মতো নাগিতস্স ভাগিনেয্যো সত্তৱস্সকালে পব্বজিত্ৱা সাসনে যুত্তপযুত্তো ‘‘সীহো’’তি এৱংনামকো সামণেৰো, সো কিৰ তং মহাপৰিসং দিস্ৱা – ‘‘অযং পৰিসা মহতী, সকলং ৱিহাৰং পূৰেত্ৱা নিসিন্না, অদ্ধা ভগৱা অজ্জ ইমিস্সা পৰিসায মহন্তেন উস্সাহেন ধম্মং দেসেস্সতি, যংনূনাহং উপজ্ঝাযস্সাচিক্খিত্ৱা ভগৱতো মহাপৰিসায সন্নিপতিতভাৱং আৰোচাপেয্য’’ন্তি চিন্তেত্ৱা যেনাযস্মা নাগিতো তেনুপসঙ্কমি. ভন্তে কস্সপাতি থেৰং গোত্তেন আলপতি. এসা জনতাতি এসো জনসমূহো.

ত্ৱঞ্ঞেৱ ভগৱতো আৰোচেহীতি সীহো কিৰ ভগৱতো ৱিস্সাসিকো, অযঞ্হি থেৰো থূলসৰীৰো, তেনস্স সৰীৰগৰুতায উট্ঠাননিসজ্জাদীসু আলসিযভাৱো ঈসকং অপ্পহীনো ৱিয হোতি. অথাযং সামণেৰো ভগৱতো কালেন কালং ৱত্তং কৰোতি. তেন নং থেৰো ‘‘ত্ৱম্পি দসবলস্স ৱিস্সাসিকো’’তি ৱত্ৱা গচ্ছ ত্ৱঞ্ঞেৱাৰোচেহীতি আহ. ৱিহাৰপচ্ছাযাযন্তি ৱিহাৰছাযাযং, কূটাগাৰমহাগেহচ্ছাযায ফৰিতোকাসেতি অত্থো. সা কিৰ কূটাগাৰসালা দক্খিণুত্তৰতো দীঘা পাচীনমুখা, তেনস্সা পুৰতো মহতী ছাযা পত্থটা হোতি, সীহো তত্থ ভগৱতো আসনং পঞ্ঞপেসি.

৩৬৩. অথ খো ভগৱা দ্ৱাৰন্তৰেহি চেৱ ৱাতপানন্তৰেহি চ নিক্খমিত্ৱা ৱিধাৱন্তাহি ৱিপ্ফৰন্তীহি ছব্বণ্ণাহি বুদ্ধৰস্মীহি সংসূচিতনিক্খমনো ৱলাহকন্তৰতো পুণ্ণচন্দো ৱিয কূটাগাৰসালতো নিক্খমিত্ৱা পঞ্ঞত্তৱৰবুদ্ধাসনে নিসীদি. তেন ৱুত্তং – ‘‘অথ খো ভগৱা ৱিহাৰা নিক্খম্ম ৱিহাৰপচ্ছাযায পঞ্ঞত্তে আসনে নিসীদী’’তি.

৩৬৪-৩৬৫. পুৰিমানি, ভন্তে, দিৱসানি পুৰিমতৰানীতি এত্থ হিয্যো দিৱসং পুৰিমং নাম, ততো পৰং পুৰিমতৰং. ততো পট্ঠায পন সব্বানি পুৰিমানি চেৱ পুৰিমতৰানি চ হোন্তি. যদগ্গেতি মূলদিৱসতো পট্ঠায যং দিৱসং অগ্গং পৰকোটিং কত্ৱা ৱিহৰামীতি অত্থো, যাৱ ৱিহাসিন্তি ৱুত্তং হোতি. ইদানি তস্স পৰিমাণং দস্সেন্তো ‘‘নচিৰং তীণি ৱস্সানী’’তি আহ. অথ ৱা যদগ্গেতি যং দিৱসং অগ্গং কত্ৱা নচিৰং তীণি ৱস্সানি ৱিহৰামীতিপি অত্থো. যং দিৱসং আদিং কত্ৱা নচিৰং ৱিহাসিং তীণিযেৱ ৱস্সানীতি ৱুত্তং হোতি. অযং কিৰ ভগৱতো পত্তচীৱৰং গণ্হন্তো তীণি সংৱচ্ছৰানি ভগৱন্তং উপট্ঠাসি, তং সন্ধায এৱং ৱদতি. পিযৰূপানীতি পিযজাতিকানি সাতজাতিকানি. কামূপসংহিতানীতি কামস্সাদযুত্তানি. ৰজনীযানীতি ৰাগজনকানি. নো চ খো দিব্বানি সদ্দানীতি কস্মা সুনক্খত্তো তানি ন সুণাতি? সো কিৰ ভগৱন্তং উপসঙ্কমিত্ৱা দিব্বচক্খুপৰিকম্মং যাচি, তস্স ভগৱা আচিক্খি, সো যথানুসিট্ঠং পটিপন্নো দিব্বচক্খুং উপ্পাদেত্ৱা দেৱতানং ৰূপানি দিস্ৱা চিন্তেসি ‘‘ইমস্মিং সৰীৰসণ্ঠানে সদ্দেন মধুৰেন ভৱিতব্বং, কথং নু খো নং সুণেয্য’’ন্তি ভগৱন্তং উপসঙ্কমিত্ৱা দিব্বসোতপৰিকম্মং পুচ্ছি. অযঞ্চ অতীতে একং সীলৱন্তং ভিক্খুং কণ্ণসক্খলিযং পহৰিত্ৱা বধিৰমকাসি. তস্মা পৰিকম্মং কৰোন্তোপি অভব্বো দিব্বসোতাধিগমায. তেনস্স ন ভগৱা পৰিকম্মং কথেসি. সো এত্তাৱতা ভগৱতি আঘাতং বন্ধিত্ৱা চিন্তেসি – ‘‘অদ্ধা সমণস্স গোতমস্স এৱং হোতি – ‘অহম্পি খত্তিযো অযম্পি খত্তিযো, সচস্স ঞাণং ৱড্ঢিস্সতি, অযম্পি সব্বঞ্ঞূ ভৱিস্সতী’তি উসূযায ময্হং ন কথেসী’’তি. সো অনুক্কমেন গিহিভাৱং পত্ৱা তমত্থং মহালিলিচ্ছৱিনো কথেন্তো এৱমাহ.

৩৬৬-৩৭১. একংসভাৱিতোতি একংসায এককোট্ঠাসায ভাৱিতো, দিব্বানং ৱা ৰূপানং দস্সনত্থায দিব্বানং ৱা সদ্দানং সৱনত্থায ভাৱিতোতি অত্থো. তিৰিযন্তি অনুদিসায. উভযংসভাৱিতোতি উভযংসায উভযকোট্ঠাসায ভাৱিতোতি অত্থো. অযং খো মহালি হেতূতি অযং দিব্বানংযেৱ ৰূপানং দস্সনায একংসভাৱিতো সমাধি হেতু. ইমমত্থং সুত্ৱা সো লিচ্ছৱী চিন্তেসি – ‘‘ইদং দিব্বসোতেন সদ্দসুণনং ইমস্মিং সাসনে উত্তমত্থভূতং মঞ্ঞে ইমস্স নূন অত্থায এতে ভিক্খূ পঞ্ঞাসম্পি সট্ঠিপি ৱস্সানি অপণ্ণকং ব্ৰহ্মচৰিযং চৰন্তি, যংনূনাহং দসবলং এতমত্থং পুচ্ছেয্য’’ন্তি.

৩৭২. ততো তমত্থং পুচ্ছন্তো ‘‘এতাসং নূন, ভন্তে’’তিআদিমাহ. সমাধিভাৱনানন্তি এত্থ সমাধিযেৱ সমাধিভাৱনা, উভযংসভাৱিতানং সমাধীনন্তি অত্থো. অথ যস্মা সাসনতো বাহিৰা এতা সমাধিভাৱনা, ন অজ্ঝত্তিকা. তস্মা তা পটিক্খিপিত্ৱা যদত্থং ভিক্খূ ব্ৰহ্মচৰিযং চৰন্তি, তং দস্সেন্তো ভগৱা ‘‘ন খো মহালী’’তিআদিমাহ.

চতুঅৰিযফলৱণ্ণনা

৩৭৩. তিণ্ণং সংযোজনানন্তি সক্কাযদিট্ঠিআদীনং তিণ্ণং বন্ধনানং. তানি হি ৱট্টদুক্খমযে ৰথে সত্তে সংযোজেন্তি, তস্মা সংযোজনানীতি ৱুচ্চন্তি. সোতাপন্নো হোতীতি মগ্গসোতং আপন্নো হোতি. অৱিনিপাতধম্মোতি চতূসু অপাযেসু অপতনধম্মো. নিযতোতি ধম্মনিযামেন নিযতো. সম্বোধিপৰাযণোতি উপৰিমগ্গত্তযসঙ্খাতা সম্বোধি পৰং অযনং অস্স, অনেন ৱা পত্তব্বাতি সম্বোধিপৰাযণো.

তনুত্তাতি পৰিযুট্ঠানমন্দতায চ কদাচি কৰহচি উপ্পত্তিযা চ তনুভাৱা. ওৰম্ভাগিযানন্তি হেট্ঠাভাগিযানং, যে হি বদ্ধো উপৰি সুদ্ধাৱাসভূমিযং নিব্বত্তিতুং ন সক্কোতি. ওপপাতিকোতি সেসযোনিপটিক্খেপৱচনমেতং. তত্থ পৰিনিব্বাযীতি তস্মিং উপৰিভৱেযেৱ পৰিনিব্বানধম্মো. অনাৱত্তিধম্মোতি ততো ব্ৰহ্মলোকা পুন পটিসন্ধিৱসেন অনাৱত্তনধম্মো. চেতোৱিমুত্তিন্তি চিত্তৱিসুদ্ধিং, সব্বকিলেসবন্ধনৱিমুত্তস্স অৰহত্তফলচিত্তস্সেতং অধিৱচনং. পঞ্ঞাৱিমুত্তিন্তি এত্থাপি সব্বকিলেসবন্ধনৱিমুত্তা অৰহত্তফলপঞ্ঞাৱ পঞ্ঞাৱিমুত্তীতি ৱেদিতব্বা. দিট্ঠেৱ ধম্মেতি ইমস্মিংযেৱ অত্তভাৱে. সযন্তি সামং. অভিঞ্ঞাতি অভিজানিত্ৱা. সচ্ছিকত্ৱাতি পচ্চক্খং কত্ৱা. অথ ৱা অভিঞ্ঞা সচ্ছিকত্ৱাতি অভিঞ্ঞায অভিৱিসিট্ঠেন ঞাণেন সচ্ছিকৰিত্ৱাতিপি অত্থো. উপসম্পজ্জাতি পত্ৱা পটিলভিত্ৱা. ইদং সুত্ৱা লিচ্ছৱিৰাজা চিন্তেসি – ‘‘অযং পন ধম্মো ন সকুণেন ৱিয উপ্পতিত্ৱা, নাপি গোধায ৱিয উৰেন গন্ত্ৱা সক্কা পটিৱিজ্ঝিতুং, অদ্ধা পন ইমং পটিৱিজ্ঝন্তস্স পুব্বভাগপ্পটিপদায ভৱিতব্বং, পুচ্ছামি তাৱ ন’’ন্তি.

অৰিযঅট্ঠঙ্গিকমগ্গৱণ্ণনা

৩৭৪-৩৭৫. ততো ভগৱন্তং পুচ্ছন্তো ‘‘অত্থি পন ভন্তে’’তিআদিমাহ. অট্ঠঙ্গিকোতি পঞ্চঙ্গিকং তুৰিযং ৱিয অট্ঠঙ্গিকো গামো ৱিয চ অট্ঠঙ্গমত্তোযেৱ হুত্ৱা অট্ঠঙ্গিকো, ন অঙ্গতো অঞ্ঞো মগ্গো নাম অত্থি. তেনেৱাহ – ‘‘সেয্যথিদং, সম্মাদিট্ঠি…পে… সম্মাসমাধী’’তি. তত্থ সম্মাদস্সনলক্খণা সম্মাদিট্ঠি. সম্মা অভিনিৰোপনলক্খণো সম্মাসঙ্কপ্পো. সম্মা পৰিগ্গহণলক্খণা সম্মাৱাচা. সম্মা সমুট্ঠাপনলক্খণো সম্মাকম্মন্তো. সম্মা ৱোদাপনলক্খণো সম্মাআজীৱো. সম্মা পগ্গহলক্খণো সম্মাৱাযামো. সম্মা উপট্ঠানলক্খণা সম্মাসতি. সম্মা সমাধানলক্খণো সম্মাসমাধি. এতেসু একেকস্স তীণি তীণি কিচ্চানি হোন্তি. সেয্যথিদং, সম্মাদিট্ঠি তাৱ অঞ্ঞেহিপি অত্তনো পচ্চনীককিলেসেহি সদ্ধিং মিচ্ছাদিট্ঠিং পজহতি, নিৰোধং আৰম্মণং কৰোতি, সম্পযুত্তধম্মে চ পস্সতি তপ্পটিচ্ছাদকমোহৱিধমনৱসেন অসম্মোহতো. সম্মাসঙ্কপ্পাদযোপি তথেৱ মিচ্ছাসঙ্কপ্পাদীনি পজহন্তি, নিৰোধঞ্চ আৰম্মণং কৰোন্তি, ৱিসেসতো পনেত্থ সম্মাসঙ্কপ্পো সহজাতধম্মে অভিনিৰোপেতি. সম্মাৱাচা সম্মা পৰিগ্গণ্হতি. সম্মাকম্মন্তো সম্মা সমুট্ঠাপেতি. সম্মাআজীৱো সম্মা ৱোদাপেতি. সম্মাৱাযামো সম্মা পগ্গণ্হতি. সম্মাসতি সম্মা উপট্ঠাপেতি. সম্মাসমাধি সম্মা পদহতি.

অপি চেসা সম্মাদিট্ঠি নাম পুব্বভাগে নানাক্খণা নানাৰম্মণা হোতি, মগ্গক্খণে একক্খণা একাৰম্মণা. কিচ্চতো পন ‘‘দুক্খে ঞাণ’’ন্তিআদীনি চত্তাৰি নামানি লভতি. সম্মাসঙ্কপ্পাদযোপি পুব্বভাগে নানাক্খণা নানাৰম্মণা হোন্তি. মগ্গক্খণে একক্খণা একাৰম্মণা. তেসু সম্মাসঙ্কপ্পো কিচ্চতো ‘‘নেক্খম্মসঙ্কপ্পো’’তিআদীনি তীণি নামানি লভতি. সম্মা ৱাচাদযো তিস্সো ৱিৰতিযোপি হোন্তি, চেতনাদযোপি হোন্তি, মগ্গক্খণে পন ৱিৰতিযেৱ. সম্মাৱাযামো সম্মাসতীতি ইদম্পি দ্ৱযং কিচ্চতো সম্মপ্পধানসতিপট্ঠানৱসেন চত্তাৰি নামানি লভতি. সম্মাসমাধি পন পুব্বভাগেপি মগ্গক্খণেপি সম্মাসমাধিযেৱ.

ইতি ইমেসু অট্ঠসু ধম্মেসু ভগৱতা নিব্বানাধিগমায পটিপন্নস্স যোগিনো বহুকাৰত্তা পঠমং সম্মাদিট্ঠি দেসিতা. অযঞ্হি ‘‘পঞ্ঞাপজ্জোতো পঞ্ঞাসত্থ’’ন্তি (ধ. স. ২০) চ ৱুত্তা. তস্মা এতায পুব্বভাগে ৱিপস্সনাঞাণসঙ্খাতায সম্মাদিট্ঠিযা অৱিজ্জন্ধকাৰং ৱিধমিত্ৱা কিলেসচোৰে ঘাতেন্তো খেমেন যোগাৱচৰো নিব্বানং পাপুণাতি. তেন ৱুত্তং – ‘‘নিব্বানাধিগমায পটিপন্নস্স যোগিনো বহুকাৰত্তা পঠমং সম্মাদিট্ঠি দেসিতা’’তি.

সম্মাসঙ্কপ্পো পন তস্সা বহুকাৰো, তস্মা তদনন্তৰং ৱুত্তো. যথা হি হেৰঞ্ঞিকো হত্থেন পৰিৱট্টেত্ৱা পৰিৱট্টেত্ৱা চক্খুনা কহাপণং ওলোকেন্তো – ‘‘অযং ছেকো, অযং কূটো’’তি জানাতি. এৱং যোগাৱচৰোপি পুব্বভাগে ৱিতক্কেন ৱিতক্কেত্ৱা ৱিপস্সনাপঞ্ঞায ওলোকযমানো – ‘‘ইমে ধম্মা কামাৱচৰা, ইমে ধম্মা ৰূপাৱচৰাদযো’’তি পজানাতি. যথা ৱা পন পুৰিসেন কোটিযং গহেত্ৱা পৰিৱট্টেত্ৱা পৰিৱট্টেত্ৱা দিন্নং মহাৰুক্খং তচ্ছকো ৱাসিযা তচ্ছেত্ৱা কম্মে উপনেতি, এৱং ৱিতক্কেন ৱিতক্কেত্ৱা ৱিতক্কেত্ৱা দিন্নে ধম্মে যোগাৱচৰো পঞ্ঞায – ‘‘ইমে কামাৱচৰা, ইমে ৰূপাৱচৰা’’তিআদিনা নযেন পৰিচ্ছিন্দিত্ৱা কম্মে উপনেতি. তেন ৱুত্তং – ‘‘সম্মাসঙ্কপ্পো পন তস্সা বহুকাৰো, তস্মা তদনন্তৰং ৱুত্তো’’তি. স্ৱাযং যথা সম্মাদিট্ঠিযা এৱং সম্মাৱাচাযপি উপকাৰকো. যথাহ – ‘‘পুব্বে খো, ৱিসাখ, ৱিতক্কেত্ৱা ৱিচাৰেত্ৱা পচ্ছা ৱাচং ভিন্দতী’’তি, (ম. নি. ১.৪৬৩) তস্মা তদনন্তৰং সম্মাৱাচা ৱুত্তা.

যস্মা পন – ‘‘ইদঞ্চিদঞ্চ কৰিস্সামা’’তি পঠমং ৱাচায সংৱিদহিত্ৱা লোকে কম্মন্তে পযোজেন্তি; তস্মা ৱাচা কাযকম্মস্স উপকাৰিকাতি সম্মাৱাচায অনন্তৰং সম্মাকম্মন্তো ৱুত্তো. চতুব্বিধং পন ৱচীদুচ্চৰিতং, তিৱিধঞ্চ কাযদুচ্চৰিতং পহায উভযং সুচৰিতং পূৰেন্তস্সেৱ যস্মা আজীৱট্ঠমকং সীলং পূৰেতি, ন ইতৰস্স, তস্মা তদুভযানন্তৰং সম্মাআজীৱো ৱুত্তো. এৱং ৱিসুদ্ধাজীৱেন পন ‘‘পৰিসুদ্ধো মে আজীৱো’’তি এত্তাৱতা চ পৰিতোসং কত্ৱা সুত্তপমত্তেন ৱিহৰিতুং ন যুত্তং, অথ খো ‘‘সব্বিৰিযাপথেসু ইদং ৱীৰিযং সমাৰভিতব্ব’’ন্তি দস্সেতুং তদনন্তৰং সম্মাৱাযামো ৱুত্তো. ততো ‘‘আৰদ্ধৱীৰিযেনপি কাযাদীসু চতূসু ৱত্থূসু সতি সূপট্ঠিতা কাতব্বা’’তি দস্সনত্থং তদনন্তৰং সম্মাসতি দেসিতা. যস্মা পনেৱং সূপট্ঠিতা সতি সমাধিস্সুপকাৰানুপকাৰানং ধম্মানং গতিযো সমন্নেসিত্ৱা পহোতি একত্তাৰম্মণে চিত্তং সমাধাতুং, তস্মা সম্মাসতিযা অনন্তৰং সম্মাসমাধি দেসিতোতি ৱেদিতব্বো. এতেসং ধম্মানং সচ্ছিকিৰিযাযাতি এতেসং সোতাপত্তিফলাদীনং পচ্চক্খকিৰিযত্থায.

দ্ৱে পব্বজিতৱত্থুৱণ্ণনা

৩৭৬-৩৭৭. একমিদাহন্তি ইদং কস্মা আৰদ্ধং? অযং কিৰ ৰাজা – ‘‘ৰূপং অত্তা’’তি এৱংলদ্ধিকো, তেনস্স দেসনায চিত্তং নাধিমুচ্চতি. অথ ভগৱতা তস্স লদ্ধিযা আৱিকৰণত্থং একং কাৰণং আহৰিতুং ইদমাৰদ্ধং. তত্ৰাযং সঙ্খেপত্থো – ‘‘অহং একং সমযং ঘোসিতাৰামে ৱিহৰামি, তত্ৰ ৱসন্তং মং তে দ্ৱে পব্বজিতা এৱং পুচ্ছিংসু. অথাহং তেসং বুদ্ধুপ্পাদং দস্সেত্ৱা তন্তিধম্মং নাম কথেন্তো ইদমৱোচং – ‘‘আৱুসো, সদ্ধাসম্পন্নো নাম কুলপুত্তো এৱৰূপস্স সত্থু সাসনে পব্বজিতো, এৱং তিৱিধং সীলং পূৰেত্ৱা পঠমজ্ঝানাদীনি পত্ৱা ঠিতো ‘তং জীৱ’ন্তিআদীনি ৱদেয্য, যুত্তং নু খো এতমস্সা’’তি? ততো তেহি ‘‘যুত্ত’’ন্তি ৱুত্তে ‘‘অহং খো পনেতং, আৱুসো, এৱং জানামি, এৱং পস্সামি, অথ চ পনাহং ন ৱদামী’’তি তং ৱাদং পটিক্খিপিত্ৱা উত্তৰি খীণাসৱং দস্সেত্ৱা ‘‘ইমস্স এৱং ৱত্তুং ন যুত্ত’’ন্তি অৱোচং. তে মম ৱচনং সুত্ৱা অত্তমনা অহেসুন্তি. এৱং ৱুত্তে সোপি অত্তমনো অহোসি. তেনাহ – ‘‘ইদমৱোচ ভগৱা. অত্তমনো ওট্ঠদ্ধো লিচ্ছৱী ভগৱতো ভাসিতং অভিনন্দী’’তি.

ইতি সুমঙ্গলৱিলাসিনিযা দীঘনিকাযট্ঠকথাযং

মহালিসুত্তৱণ্ণনা নিট্ঠিতা.